December 23, 2015

മാടമ്പള്ളിയിലെ യഥാർത്ഥ രോഗി സോളിഡാരിറ്റിയാണ്

ഫാസിസത്തിനെതിരെ കൊച്ചിയിലൊരു മനുഷ്യക്കൂട്ടായ്മ. അതേ ദിവസം അതേ സമയം ഫാസിസത്തിനെതിരെ കോഴിക്കോട്ടൊരു മനുഷ്യക്കൂട്ടായ്മ. കൊച്ചിയിലെ ഫാസിസ്റ്റ് വിരുദ്ധർ കോഴിക്കോട്ടെ ഫാസിസ്റ്റ് വിരുദ്ധരെ വിമർശിക്കുന്നു, കളിയാക്കുന്നു, ട്രോളുന്നു. കോഴിക്കോട്ടെ ഫാസിസ്റ്റ് വിരുദ്ധർ കൊച്ചിക്കാരെ വിമർശിക്കുന്നു, കളിയാക്കുന്നു, ട്രോളുന്നു. കൊച്ചിയിലെ മനുഷ്യ സംഗമത്തിലേക്ക് മുസ്‌ലിം സംഘടനകളെ ക്ഷണിച്ചില്ല എന്ന കാരണം പറഞ്ഞാണ് അതേ ദിവസം അതേ സമയം ജമാഅത്തെ ഇസ്‌ലാമിയുടെ പോഷക ഘടകമായ സോളിഡാരിറ്റി, എസ് ഡി പി ഐ തുടങ്ങിയ മുസ്‌ലിം സംഘടനകളുടെ നേതൃത്വത്തിൽ കോഴിക്കോട്ട് 'അ'മാനവിക സംഗമം എന്ന പേരിൽ ഫാസിസ്റ്റ് വിരുദ്ധ കൂട്ടായ്മ നടത്തിയത്. രണ്ട് കൂട്ടായ്മകളിലും എഴുത്തുകാരും ചിന്തകരും സാമൂഹ്യ പ്രവർത്തകരും പങ്കെടുക്കുകയും ചെയ്തു. കേരളത്തിന്റെ സാംസ്കാരികാന്തരീക്ഷത്തിൽ ഫാസിസ്റ്റ് വിരുദ്ധർ ഇരുപക്ഷത്തായി നിന്ന് ഇതുപോലെ പൊരുതിയ മറ്റൊരവസരം ഉണ്ടായിട്ടില്ല. വർഗീയ വാദികളേയും ഫാസിസ്റ്റുകളേയും നാളിതുവരെ ഫലപ്രദമായി തടുത്തു നിർത്തിയിട്ടുള്ള പ്രബുദ്ധ കേരളത്തിന്റെ സാമൂഹ്യ ചരിത്രത്തിൽ ഫാസിസ്റ്റ് വിരുദ്ധ മുന്നണി ഇതുപോലെ ആശയക്കുഴപ്പത്തിലാവുകയും ആന്തരിക ശൈഥില്യം നേരിടുകയും ചെയ്ത മറ്റൊരു സന്ദർഭവും ഉണ്ടായിട്ടില്ല എന്നും പറയാം.

November 23, 2015

This is Me!.. in Asianet and Media One

രണ്ട് വീഡിയോകൾ വായനക്കാരുമായി പങ്ക് വെക്കുന്നു. ഒന്ന് 2015 ൽ വായിച്ച പ്രിയ പുസ്തകങ്ങളെക്കുറിച്ച് പ്രമുഖർ വിലയിരുത്തുന്ന ഏഷ്യാനെറ്റിന്റെ വർഷാന്ത പരിപാടി. '2015 പ്രിയ പുസ്തകം'. സാംസ്കാരിക കേരളത്തിന്റെ പ്രിയങ്കരനായ ബി ആർ പി ഭാസ്കർ ഈ പരിപാടിയിൽ അവതരിപ്പികുന്നത് 'നിനക്ക് തട്ടമിട്ടൂടേ പെണ്ണേ' ആണ്. എന്റ പുസ്തകത്തിന് ലഭിച്ച വലിയ അംഗീകാരങ്ങളിൽ ഒന്ന്. ഒരവാർഡിനേക്കാൾ വില മതിക്കുന്നു ബി ആർ പി സാറിന്റെ വാക്കുകൾ.. 2015 ലെ മികച്ച വായനാനുഭവങ്ങളിൽ എന്റെ പുസ്തകത്തെ പരിഗണിച്ച ഏഷ്യാനെറ്റിനും Brp Bhaskar സാറിനും നന്ദി
.

മറ്റൊന്ന് മീഡിയവൺ വീക്കെൻഡ് അറേബ്യയിൽ എന്റെ പുസ്തകത്തെക്കുറിച്ചും ബ്ലോഗേഴുത്തിനെക്കുറിച്ചും വന്ന പരിപാടിയാണ്.

November 17, 2015

നന്ദിയുണ്ട് പ്രിയരേ, നന്ദി

നന്ദിയാരോടു ഞാൻ ചൊല്ലേണ്ടു?. പ്രിയപ്പെട്ട വായനക്കാരും സുഹൃത്തുക്കളും നല്കിയ സ്നേഹത്തിന്, എന്റെ യോഗ്യതകൾ ക്കപ്പുറത്തുള്ള അംഗീകാരത്തിന്, എല്ലാത്തിനുമുപരി എന്റെ സ്വപ്നങ്ങളിൽ പോലും ഇടം പിടിക്കാത്തത്ര മനോഹരമായ ഒരു പുസ്തക പ്രകാശന ചടങ്ങ് സമ്മാനിച്ചതിന്.. എല്ലാം ഒരു നിയോഗം പോലെ സംഭവിക്കുകയായിരുന്നു എന്ന് വേണം പറയാൻ. 2007 ൽ ഒരു ചെറിയ ബ്ലോഗ്‌ തുടങ്ങുന്നു. പൊതു വിഷയങ്ങളിലുള്ള എന്റെ ദുർബല ചിന്തകളും അഭിപ്രായങ്ങളും പങ്ക് വെച്ചു തുടങ്ങുന്നു. എട്ടു വർഷത്തിനിടയിൽ നാന്നൂറ്റി അമ്പതിൽ പരം പോസ്റ്റുകളിലേക്ക് ആ എഴുത്ത് യാത്ര നീളുന്നു. നാല്പത് ലക്ഷത്തിലധികം ഹിറ്റുകളും മുപ്പതിനായിരത്തിൽ പരം പ്രതികരണങ്ങളും ബ്ലോഗിൽ ലഭിക്കുന്നു. പോസ്റ്റുകളിൽ നിന്ന് തിരഞ്ഞെടുത്തവ ഒരു പുസ്തകമായി പ്രസിദ്ധീകരിക്കപ്പെടുന്നു. അതിന്റെ പ്രകാശന ചടങ്ങ് അന്താരാഷ്‌ട്ര പ്രസിദ്ധമായ ഷാർജ പുസ്തക മേളയിൽ നടത്തുവാൻ ഭാഗ്യം ലഭിക്കുന്നു. പ്രകാശന കർമം നിർവഹിക്കുവാൻ ലോക പ്രശസ്തനായ അറബ് കവി ശിഹാബ് ഗാനിം എത്തിച്ചേരുന്നു. മലയാളത്തിന്റെ പ്രിയ എഴുത്തുകാരൻ പി സുരേന്ദ്രൻ അത് ഏറ്റു വാങ്ങുന്നു. ബ്ലോഗർമാരും  നവമാധ്യമ എഴുത്തുകാരും സുഹൃത്തുക്കളും മാധ്യമ പ്രവർത്തകരും തിങ്ങി നിറഞ്ഞ ഒരു സദസ്സ് അതിന് സാക്ഷ്യം വഹിക്കുന്നു. എന്റെ ഭ്രാന്തമായ സ്വപ്നങ്ങളിൽ പോലും കടന്നു വരാത്തത്ര മനോഹരമായാണ് എല്ലാം സംഭവിച്ചത്. നന്ദിയാരോടു ഞാൻ ചൊല്ലേണ്ടു?.

October 31, 2015

തട്ടമിടാത്ത പുസ്തകത്തെക്കുറിച്ച്

പ്രിയ സുഹൃത്തുക്കളേ,
ഈ ബ്ലോഗിൽ പ്രസിദ്ധീകരിച്ച നാന്നൂറ്റി അമ്പതിലധികം പോസ്റ്റുകളിൽ നിന്ന് തിരഞ്ഞെടുത്ത ലേഖനങ്ങൾ കൂട്ടിച്ചേർത്ത് ഒരു പുസ്തകം ഇറങ്ങുകയാണ്. 'നിനക്ക് തട്ടമിട്ടൂടേ പെണ്ണേ' എന്ന ടൈറ്റിലിൽ. കൂടുതൽ വായിക്കപ്പെട്ട ഒരു പോസ്റ്റിന്റെ തലക്കെട്ട് നല്കി എന്ന് മാത്രമേയുള്ളൂ. മതം, കല, സാഹിത്യം, വാർത്താ വ്യാപാരം, സിനിമ, യാത്ര തുടങ്ങി വിവിധ മേഖലകളെ പരാമർശിക്കുന്ന മുപ്പത്തിയൊന്ന് ലേഖനങ്ങളാണ് പുസ്തകത്തിൽ ഉൾപെടുത്തിയിട്ടുള്ളത്. കൈരളി ബുക്സ് (കണ്ണൂർ) ആണ് പ്രസാധകർ. രണ്ടായിരത്തി ഏഴ് ജൂണ്‍ മാസത്തിലാണ്  ബ്ലോഗിങ്ങിലേക്ക് കടക്കുന്നത്‌. മുമ്പ് പ്രസിദ്ധീകരിച്ച ലേഖനങ്ങളുടെ സോഫ്റ്റ്‌ കോപ്പികൾ സൂക്ഷിച്ചു വെക്കാനുള്ള ഒരിടമായാണ് ബ്ലോഗ്‌ തുടങ്ങിയതെങ്കിലും പിന്നീട് ആനുകാലിക വിഷയങ്ങളിലുള്ള പ്രതികരണ വേദിയായി ബ്ലോഗിനെ ഉപയോഗപ്പെടുത്തുകയായിരുന്നു. തുടക്ക കാലങ്ങളിൽ ബ്ലോഗിൽ ഉണ്ടായിരുന്ന സജീവത ഇപ്പോൾ കുറഞ്ഞു വന്നിട്ടുണ്ട് എന്നറിയാം. ആഴ്ചയിൽ ഒന്നും രണ്ടും പോസ്റ്റുകൾ ഇട്ടിരുന്ന കാലത്തിൽ നിന്ന് മാസത്തിൽ ഒന്ന് പോലും എഴുതാത്ത അവസ്ഥയിൽ ഇപ്പോൾ എത്തിയിട്ടുണ്ട്. എഴുത്തുകൾ കൂടുതലും ഫെയ്സ്ബുക്കിലേക്ക് മാറിയതാണ് പ്രധാന കാരണം. എന്നാലും നൂറ് കണക്കിന് വായനക്കാർ ദിവസവും ഈ ബ്ലോഗിൽ എത്തുന്നു എന്ന് ബ്ലോഗർ സ്റ്റാറ്റിറ്റിക്സ് കാണിക്കുന്നുണ്ട്. വീണ്ടും ഇവിടെ സജീവമാകാനുള്ള ആവേശം നല്കുന്നത് അതാണ്‌. എന്റെ പ്രിയ വായനക്കാരോടുള്ള കടപ്പാടുകളും ഇഷ്ടവും വാക്കുകളിൽ ഒതുങ്ങുന്നതല്ല.

September 6, 2015

അറബിക്ക് സർവകലാശാലയെന്ന ആറാം മന്ത്രി

അറബി ഒരന്താരാഷ്ട്ര ഭാഷയാണ്‌. ഇസ്രാഈൽ അടക്കം ലോകത്തെ ഇരുപത്തിയാറ് രാജ്യങ്ങളിലെ ഔദ്യോഗിക ഭാഷ. ഐക്യരാഷ്ട്ര സഭയുടെ ആറ് ഔദ്യോഗിക ഭാഷകളിൽ ഒന്ന്. (ഇംഗ്ലീഷ്, ഫ്രഞ്ച്, റഷ്യൻ, ചൈനീസ്‌, സ്പാനിഷ്‌ എന്നിവയാണ് മറ്റ് അഞ്ച് ഭാഷകൾ). ഒരു പൗരാണിക സെമിറ്റിക്ക് ഭാഷ എന്നതിലുപരി ആധുനിക ലോകത്ത് സജീവതയോടെ നിലനില്ക്കുന്ന ഒരു ഭാഷ എന്ന് വേണമെങ്കിലും അറബിയെ വിളിക്കാം. അറബി സംസാരിക്കുന്ന രാജ്യങ്ങളുമായുള്ള അടുത്ത ബന്ധവും പാരസ്പര്യവും മാത്രമല്ല, ദശലക്ഷക്കണക്കിന് പ്രവാസികൾ ഉപജീവന മാർഗത്തിന് ഉപയോഗപ്പെടുത്തുന്ന ഭാഷയെന്ന നിലയിലും അറബിയോട് കേരളീയർക്ക് ഒരു ബന്ധമുണ്ട്.  അതിനെല്ലാമുപരി അറബി ഭാഷ പഠിക്കാനും അതിൽ ഉന്നത ബിരുദം നേടാനും ആഗ്രഹിക്കുന്ന ആയിരക്കണക്കിന് വിദ്യാർത്ഥികൾ കേരളത്തിലുണ്ട്.  ഇവയെല്ലാം പരിഗണിക്കുമ്പോൾ കേരളത്തിൽ ഒരു അറബി സർവകലാശാല സ്ഥാപിക്കുക എന്നത് അത്ര വലിയ പാതകമൊന്നുമല്ല. ഇത്രയും പറഞ്ഞത്  അറബിയെന്നല്ല, വിജ്ഞാന, ജോലി സാധ്യതകളും പഠിക്കാൻ തയ്യാറായി കുട്ടികളും മുന്നോട്ട് വരുന്ന ഏത് ഭാഷയുടെ പഠനത്തിനും ഉന്നത അക്കാദമിക് കേന്ദ്രങ്ങൾ സ്ഥാപിക്കുക എന്ന ആശയത്തോട് താത്വികമായി വിയോജിപ്പില്ല എന്ന് പറയാനാണ്. പിന്നെ എന്താണ് ഹേ നിങ്ങളുടെ പ്രശ്നം എന്ന് ചോദിക്കും. അത് പറയാനാണ് അഞ്ചാം മന്ത്രിയെ ഈ വിഷയത്തിലേക്ക് കൊണ്ട് വരുന്നത്. അദ്ദേഹത്തിന്റെ വരവിനെ വിശകലനം ചെയ്തു കഴിഞ്ഞാൽ പിന്നെ കൂടുതൽ വിശദീകരിക്കേണ്ട ആവശ്യം വരില്ല.

August 18, 2015

അബുദാബിയിലെ അമ്പലം പറയുന്നതെന്തെന്നാൽ

ഇന്ത്യൻ പ്രധാന മന്ത്രിയുടെ യു എ ഇ സന്ദർശനത്തിന്റെ വാർത്തകൾ വൈറലായി ക്കൊണ്ടിരിക്കുന്ന സമയത്ത് ഫെയ്സ്ബുക്കിൽ ഞാനിങ്ങനെയൊരു സ്റ്റാറ്റസ് ഇട്ടിരുന്നു. "ബാബരി മസ്ജിദ് പൊളിച്ചു കൊണ്ട് രാഷ്ട്രീയ അസ്ഥിവാരം പണിത ഒരു പാർട്ടിയുടെ നേതാവിനെ ആദ്യമായി കൊണ്ട് പോയത് ഷെയ്ഖ്‌ സായിദ് പള്ളിയിലേക്ക്. അതിന്റെ വാതിലുകൾ അദ്ദേഹത്തിനായി മലർക്കെ തുറന്നു കൊടുത്തു. നമസ്കാരം നിർവഹിക്കപ്പെടുന്ന അകത്തളങ്ങളിൽ ചുറ്റിക്കറങ്ങാൻ അനുവദിച്ചു. അബുദാബിയിൽ ഹൈന്ദവ ക്ഷേത്രം പണിയാനുള്ള അനുമതിയും കൊടുത്തു. ചരിത്രത്തിന്റെ തെറ്റുകളോടും വർഗീയതയുടെ തത്വശാസ്ത്രങ്ങളോടും സ്നേഹത്തിന്റെ ഭാഷയിൽ എങ്ങിനെ പ്രതികരിക്കാമെന്ന് കാണിച്ചു കൊടുത്തിരിക്കുന്നു യു എ ഇ ഭരണാധികാരികൾ. വിദ്വേഷത്തിന്റെ പ്രചാരകർക്ക് അവരിൽ നിന്ന് പഠിക്കാൻ ഏറെയുണ്ട്". ആ വരികളിൽ  അടങ്ങിയ സദുദ്ദേശത്തെ അത് വായിച്ചവരിൽ മിക്കവരും മനസ്സിലാക്കിയെങ്കിലും ചിലരെങ്കിലും ചോദിച്ചു. മുഴുവൻ പ്രവാസികളും ആഹ്ലാദിക്കുന്ന ഇത്തരം ചരിത്ര മുഹൂർത്തങ്ങളിൽ പഴയകാല സംഭവങ്ങൾ ഓർത്തെടുത്ത് പുറത്തിടുന്നത് ശരിയാണോ എന്ന്.

August 1, 2015

ഇരട്ട നീതിയെക്കുറിച്ച് ചർച്ച വേണം, പക്ഷേ യാക്കൂബ് മേമനെ ഗാന്ധിയാക്കരുത്

യാക്കൂബ് മേമനെ തൂക്കിലേറ്റിയതിനെത്തുടർന്ന് ഉയർന്നു വരുന്ന ചർച്ചകൾ ചിലയിടങ്ങളിലെങ്കിലും അല്പം വഴി തിരിയുന്നുണ്ടോ എന്ന ആശങ്കയിൽ നിന്നുള്ള ഒരു കുറിപ്പായി മാത്രം ഇതിനെ കണ്ടാൽ മതി. ഒരു വിധിയോട് താത്വികമായി യോജിക്കുന്നവരും വിയോജിക്കുന്നവരും ഉണ്ടാവാം. അതുകൊണ്ട് തന്നെ അഭിപ്രായ പ്രകടനങ്ങൾക്ക് വിലക്കുകളില്ല, അതിരുകളുമില്ല. ഇന്ത്യ ഒരു ജനാധിപത്യ രാജ്യമാണ്. ആ ജനാധിപത്യ വ്യവസ്ഥയുടെ പരിരക്ഷയിലുള്ള ഒരു കോടതി സംവിധാനമാണ് ഇന്ത്യയിലുള്ളത്. കോടതി എങ്ങിനെയാവണമെന്നും നിയമങ്ങളെന്താവണമെന്നും ആത്യന്തികമായി തീരുമാനിക്കുന്നത് ജനങ്ങൾ തന്നെയാണ്. അവർ തിരഞ്ഞെടുക്കുന്ന പ്രതിനിധികളാണ്. അതുകൊണ്ട് തന്നെ കോടതികളെക്കുറിച്ചും നിയമങ്ങൾ നടപ്പിലാക്കുന്നതിലെ ശരി തെറ്റുകളെക്കുറിച്ചും  സംസാരിക്കുവാൻ അടിസ്ഥാനപരമായി ഒരു പൗരന് അവകാശമുണ്ട്‌. അതയാൾക്ക്‌ ജനാധിപത്യ വ്യവസ്ഥ നല്കുന്ന മൗലിക അവകാശങ്ങളുടെ കൂടി ഭാഗമാണ്. എന്നാൽ ഉയർത്തപ്പെടുന്ന അഭിപ്രായങ്ങളുടെ സോഷ്യൽ ഇമ്പാക്റ്റ് എന്താണെന്ന് ചിന്തിക്കുകയും വിലയിരുത്തുകയും ചെയ്യേണ്ട ഒരു ഉത്തരവാദിത്വവും കൂടി ഒരു പൗരനുണ്ടെന്നു നാം മനസ്സിലാക്കണം.

July 15, 2015

ബൽറാമിനോട് അടി ഇരന്ന് വാങ്ങിയ കെ സുരേന്ദ്രൻ

ഇത് പോലൊരു അടി കെ സുരേന്ദ്രന് തന്റെ ജീവിതത്തിൽ മറ്റാരിൽ നിന്നും കിട്ടിയിരിക്കാൻ ഇടയില്ല. മാസ്സ് അടി. സൽമാൻ ഖാന്റെ ദബാങ്ങ് ചിത്രങ്ങളിൽ പോലും ഇത്ര പഞ്ചുള്ള ഒരടി കണ്ടിട്ടില്ല. സോഷ്യൽ മീഡിയയിൽ വളരെ സെൻസിബിളായി കാര്യങ്ങൾ അവതരിപ്പിക്കുന്ന ഒരാളാണ് വി ടി ബൽറാം. സാധാരണ രാഷ്ട്രീയ നേതാക്കളിൽ കണ്ടു പരിചയമില്ലാത്ത എഴുത്തും ഭാഷാ ചാതുരിയും കൊണ്ട് നവ മാധ്യമങ്ങളിൽ  പലപ്പോഴും തരംഗമുയർത്താറുണ്ട് ബൽറാം. എന്ത് കൊണ്ടും ഒരു ന്യൂ ജനറേഷൻ പൊളിറ്റീഷ്യൻ എന്ന് വിളിക്കാവുന്ന നേതാവ്. സുരേന്ദ്രനും മോശക്കാരനല്ല. ബി ജെ പി നിരയിലെ ഏറ്റവും സമർത്ഥനായ യുവ നേതാവാണ്‌. കാര്യങ്ങൾ കുറിക്ക് കൊള്ളുന്ന രൂപത്തിൽ പറഞ്ഞവതരിപ്പിക്കാൻ സുരേന്ദ്രന് അനിതര സാധാരണമായ കഴിവുണ്ട്. പക്ഷേ പറഞ്ഞിട്ടെന്ത് കാര്യം.  അതൊന്നും ബൽറാമിന്റെ അടുത്ത് വിലപ്പോയില്ല. 'കളിക്കേണ്ടവരോട് കളിക്കണം. അതല്ലെങ്കിൽ ചെകിടടക്കി കിട്ടും എന്ന് പണ്ടുള്ളവർ പറഞ്ഞ പോലായി കാര്യങ്ങൾ.  എല്ലാത്തിന്റെയും തുടക്കം ബി ജെ പി  ദേശീയ പ്രസിഡന്റ്‌ അമിത് ഷായുടെ (ബൽറാമിന്റെ ഭാഷയിൽ അമിട്ട് ഷാജി) ഒരു പ്രസ്താവനയിൽ നിന്നാണ്. ഇരുപത്തിയഞ്ച് കൊല്ലം കാത്തിരുന്നാലേ ഞങ്ങൾ പറഞ്ഞ 'അച്ഛാ ദിൻ' കടന്നു വരൂ എന്ന് പുള്ളി പ്രസ്താവിച്ചു. 'അച്ഛാ ദിൻ' എന്ന് കേൾക്കുന്നിടത്തൊക്കെ ബി ജെ പിക്കാരും സംഘികളും തലയിൽ മുണ്ടിട്ട് നടക്കുന്നതിനിടയിലാണ് അമിത് ഷായുടെ ഈ അമിട്ട് പൊട്ടിയത്. മോദിജിയുടെ ഒരു വർഷത്തെ ഭരണം കൊണ്ട് തന്നെ  ജനങ്ങൾ പൊറുതിയില്ലാതെ ചെയ്തു പോയ വോട്ടിനെ ശപിച്ചു കൊണ്ടിരിക്കുന്നതിനിടയിലാണ് ഒരു ഇരുപത്തിയഞ്ച് കൊല്ലം കൂടി ക്ഷമിക്കുവാൻ ബി ജെ പി പ്രസിഡന്റ്‌ ആജ്ഞാപിക്കുന്നത്. പോരേ പൂരം.

June 7, 2015

ചെമ്മണ്ണൂർ തട്ടിപ്പ് : ആ വാർത്തയെവിടെ മാധ്യമങ്ങളേ?

Latest Post
വിവാദ വീഡിയോ
മാധ്യമങ്ങളേ , നിങ്ങൾ മുക്കിയാൽ വാർത്ത മുങ്ങുമോ?

വാർത്ത മുക്കുന്നെങ്കിൽ ഇങ്ങനെ മുക്കണം. പൊടി പോലും കണ്ടു പിടിക്കാൻ പറ്റരുത്‌. വാർത്ത മുക്കുന്നതിൽ നമ്മുടെ മാധ്യമങ്ങൾ കൈവരിച്ച അസാധാരണ വൈഭവത്തെ വ്യക്തമായി തുറന്നു കാണിക്കുന്ന ഒരു എപ്പിസോഡാണ് ഈ ആഴ്ച നമുക്ക് മുന്നിലൂടെ കടന്നു പോയത്. ബോബി ചെമ്മണ്ണൂരിനെതിരെ സഖാവ് വി എസ് ഉന്നയിച്ച വൻ അഴിമതി ആരോപണമാണ് കേരള മാധ്യമങ്ങളുടെ മുക്കൽ പരമ്പരയിലെ ഏറ്റവും ലേറ്റസ്റ്റ് എൻട്രി. വെറുതേ പറഞ്ഞു പോയ ഒരാരോപണമല്ല, പ്രതിപക്ഷ നേതാവ് എഴുതിക്കൊണ്ട് വന്ന് പത്രസമ്മേളനത്തിൽ പരസ്യമായി ഉന്നയിക്കുകയും അതിന് ശേഷം രേഖകളോടെ കോപ്പികൾ പത്ര പ്രവർത്തകർക്ക് നല്കുകയും ചെയ്ത ആരോപണം. രണ്ടായിരം കോടി രൂപയുടെ സാമ്പത്തിക തട്ടിപ്പ് ഈ സ്വർണ വ്യവസായി നടത്തിയിട്ടുണ്ട് എന്നാണ് വി എസ് പറഞ്ഞത്. ഈ തട്ടിപ്പ് ചൂണ്ടിക്കാട്ടി തെളിവ് സഹിതം ആഭ്യന്തര വകുപ്പിന് ഒരു വ്യക്തി പരാതി നല്കുകയും അതിന്റെ അടിസ്ഥാനത്തിൽ പോലീസ് അന്വേഷണം ആരംഭിക്കുകയും ചെയ്തതാണ്. എന്നാൽ സർക്കാരിൽ സ്വാധീനം ചെലുത്തി ആ കേസ് ചെമ്മണ്ണൂർ മുക്കിയെന്നാണ് പ്രതിപക്ഷ നേതാവ് ആരോപിച്ചത്.  ഇപ്പോൾ വിവരാവകാശ നിയമപ്രകാരം അന്വേഷിച്ചപ്പോൾ ആ കേസിന്റെ ഫയൽ പോലും കാണാനില്ല എന്ന മറുപടിയാണത്രേ ലഭിച്ചത്. രണ്ടായിരം കോടി രൂപയുടെതെന്ന് ആരോപിക്കപ്പെടുന്ന ഈ അഴിമതി വാർത്ത എല്ലാ മാധ്യമ സിംഹങ്ങളും ഒന്നിച്ച് ചേർന്നാണ് മുക്കിയത്. അഴിമതിക്കെതിരെ അലമുറയിട്ട് ബ്രേക്കിംഗ് ന്യൂസുകളും എക്സ്ക്ലൂസീവുകളും തയ്യാറാക്കാറുള്ള ഒരു ചാനലുകാരനും ഈ വാർത്ത കൊടുത്തില്ല. വി എസ്സിന്റെ പത്രസമ്മേളനം ലൈവായികാണിച്ചുകൊണ്ടിരുന്ന മാധ്യമങ്ങൾ വിഷയം ചെമ്മണ്ണൂരിലേക്ക് എത്തിയപ്പോൾ ലൈവ് കവറേജ് കട്ട് ചെയ്തു കളഞ്ഞു.

June 1, 2015

മല്ലൂസിന്റെ വാട്സ്ആപ്പ് പരാക്രമങ്ങൾ

വാട്സ്ആപ്പ് പോലൊരു കിടിലൻ സാങ്കേതിക വിനിമയ സൗകര്യം ഈ അടുത്ത കാലത്തൊന്നും നമുക്ക് കിട്ടിയിട്ടില്ല. ഇതുപോലൊരു പാരയും ഈ അടുത്ത കാലത്തൊന്നും വന്നിട്ടില്ല. അപാര ഉപകാരിയാണ്,  എന്നാൽ അതിലേറെ മുടിഞ്ഞ ശല്യവുമാണ്‌. ഉപകാരം കാരണം വലിച്ചെറിയാൻ വയ്യ,  ഉപദ്രവം കാരണം അടുപ്പിക്കാനും വയ്യ. അഞ്ച് കാശിന്റെ ചിലവില്ലാതെ വീഡിയോയും ഫോട്ടോകളും ഓഡിയോകളും ഷെയർ ചെയ്യാം. ചാറ്റാം, ചീറ്റാം, ടെക്സ്റ്റാം, പ്രസംഗിക്കാം.. അങ്ങനെ എന്തും ചെയ്യാം.  നെറ്റ് കണക്ഷൻ ഉണ്ടായാൽ മതി.  ആരുടെയെങ്കിലും വൈഫൈയിൽ ചുളുവിൽ കൊത്താൻ പറ്റിയാൽ സംഗതി കമ്പ്ലീറ്റ് ഫ്രീ.. ഫ്രീയായി കിട്ടുന്നത് ഉപയോഗിക്കുമ്പോഴാണല്ലോ എപ്പോഴും ഓവറായി പോകാൻ സാധ്യതയുള്ളത്. കയ്യീന്ന് കാശ് പോകുന്ന സംഗതിയാണെങ്കിൽ അംബാനിയേട്ടനാണെങ്കിൽ പോലും ശ്രദ്ധിച്ചേ കൈകാര്യം ചെയ്യൂ. കാശ് ചിലവാക്കി ഫോണ്‍ വിളിക്കുമ്പോൾ അത്യാവശ്യ സംഗതികൾ ചോദിച്ച് പെട്ടെന്ന് ഫോണ്‍ വെക്കും. നെറ്റിൽ നിന്ന് ഫ്രീ വിളിക്കുമ്പോൾ വെറുപ്പിച്ച് കയ്യിൽ തരും. അത് അതിന്റെ ഒരു ആഗോള നിയമമാണ്. വാട്സ് ആപ്പിന്റെ കാര്യത്തിലും സംഭവിക്കുന്നത്‌ മറിച്ചല്ല.

May 13, 2015

ഓരോ പൗരനും ഒരു പത്രമായി മാറുന്ന കാലം

ദേശീയ ഗെയിംസിന്റെ തിരുവനന്തപുരത്തെ ഉദ്ഘാടന ചടങ്ങ്. കാത്ത് കാത്തിരുന്ന ലാലിസം സ്റ്റേജിലെത്തി. സി ഡി യിൽ നിന്ന് വരുന്ന പാട്ടിനനുസരിച്ച് മോഹൻലാൽ ചുണ്ടനക്കുന്നു. ഇടത് തോൾ അല്പം ചരിച്ച് സ്റ്റേജിൽ തെക്ക് വടക്ക് ഓടുന്നു. ദൃശ്യ മാധ്യമങ്ങളുടെ ലൈവ് കവറേജ് പൊടി പൊടിക്കുകയാണ്. ജനം ആർത്ത് വിളിക്കുന്നത്‌ കയ്യടിയാണെന്ന് തെറ്റിദ്ധരിച്ച്‌ ഒന്നിന് പിറകെ ഒന്നായി  ലാൽ നിർത്താതെ പാടുന്നു.  മഹാനടൻ കാഴ്ച വെക്കുന്ന 'മാന്ത്രികത'യെക്കുറിച്ച് ചാനൽ അവതാരകന്മാർ വാചാലരാകുന്നു. പത്ര ലേഖകന്മാർ തിരക്കിട്ട് റിപ്പോർട്ടുകൾ തയ്യാറാക്കുന്നു. "മലയാളത്തിന്റെ മഹാനടൻ അവതരിപ്പിച്ച ലാലിസം ദൃശ്യവിരുന്ന്, ആരവങ്ങളുടെ സാഗരമായി കിളിക്കൂട്‌.. ലാലിസം ഒഴുകിയെത്തിയപ്പോൾ കൈക്കുടന്ന നിവർത്തി കാണികൾ" എന്നിങ്ങനെ കിടിലൻ സാഹിത്യവും തലക്കെട്ടുകളും  വിളമ്പി പിറ്റേ ദിവസത്തേക്കുള്ള റിപ്പോർട്ടുകൾ അവർ ഒട്ടും മോശമാക്കിയില്ല. പെട്ടെന്നാണ് സോഷ്യൽ മീഡിയയിൽ നിന്ന് ഒരു സുനാമി പുറപ്പെട്ടത്‌.  ചാനൽ അവതാരകരുടെയും പത്രലേഖകരുടെയും അതിഭാവുകത്വവും ക്ലിഷേ പ്രയോഗങ്ങളും ഒട്ടുമില്ലാതെ അവർ ലാലിസത്തെ വിലയിരുത്തി. കണ്ടത് കണ്ടത് പോലെ പറഞ്ഞു. അറുബോറൻ പരിപാടിയാണ് മഹാനടൻ അവതരിപ്പിച്ചതെന്ന് സാഹിത്യമോ ചമത്കാരങ്ങളോ ചേർക്കാത്ത പച്ച മലയാളത്തിൽ എഴുതി. ഖജനാവിൽ നിന്നും ഇതിനായി ചിലവഴിച്ച തുക തിരിച്ചു പിടിക്കണമെന്നും അവർ ആവശ്യപ്പെട്ടു.

April 26, 2015

ഉർവശിയെന്ന 'പ്രമുഖ'യും പത്രങ്ങളുടെ റിപ്പോർട്ടിംഗ് രീതിയും

പത്രപ്രവർത്തന രംഗം പഴയത് പോലെയല്ല. അടിമുടി മാറ്റങ്ങൾക്ക് വിധേയമായിക്കൊണ്ടിരിക്കുന്ന ഒരു മേഖലയാണിത്. അച്ചടിയിലും പ്രസരണത്തിലും വന്ന നവ്യമായ സാങ്കേതിക സൗകര്യങ്ങൾ, വാർത്തകളും ദൃശ്യങ്ങളും നിമിഷങ്ങൾക്കുള്ളിൽ കൈമാറ്റം ചെയ്യാൻ സാധിക്കുന്ന ന്യൂ ജനറേഷൻ ടെക്നോളജികൾ, നവമാധ്യമങ്ങളുടെ കടന്നു വരവോടെ വാർത്തയുടെ സംസ്കാരത്തിൽ വന്ന പുതു ശൈലികൾ, മാധ്യമങ്ങൾ തമ്മിലുള്ള മത്സരത്തിലൂടെ വാർത്തയുടെ അവതരണത്തിലും ഗുണനിലവാരത്തിലും വേഗതയിലും വന്ന മാറ്റങ്ങൾ. ചുരുക്കിപ്പറഞ്ഞാൽ രണ്ട് പതിറ്റാണ്ട് മുമ്പുള്ള അവസ്ഥയുമായി തട്ടിച്ചു നോക്കിയാൽ വലിയ മാറ്റങ്ങൾക്ക് വിധേയമായ ഒരു മീഡിയയെയാണ് നമുക്കിപ്പോൾ കാണാൻ കഴിയുക. ഈ മാറ്റങ്ങളുടെ പെരുമഴക്കാലത്തിനിടയിലും ഒട്ടും മാറാതെ നില്ക്കുന്ന ചില പഹയന്മാരുണ്ട്, തുരുമ്പ് പിടിച്ച ചില രീതികളുണ്ട്, പഴകിപ്പുളിഞ്ഞ ചില ശൈലികളുണ്ട്, അത് ലോകാവസാനം വരെ നിലനില്ക്കുമെന്നാണ് ഇപ്പോഴത്തെ പോക്ക് കണ്ടാൽ തോന്നുന്നത്. അവയെക്കുറിച്ച് അല്പം പറയേണ്ടതുണ്ടെന്ന് തോന്നുന്നു.

March 5, 2015

മാറേണ്ടത് നമ്മളാണ്, ബി ബി സി യല്ല

കൊടിയ ലൈംഗിക പീഡനത്തിനിരയായി കൊല്ലപ്പെട്ട, 'ഡൽഹി പെണ്‍കുട്ടി' എന്ന് നാം വിളിച്ച ജ്യോതി സിംഗ് ഒരിക്കൽ തെരുവിലൂടെ നടന്ന് പോവുകയായിരുന്നു. പെട്ടെന്നാണ് പത്തോ പന്ത്രണ്ടോ വയസ്സ് പ്രായമുള്ള ഒരു പയ്യൻ അവളുടെ ബാഗും തട്ടിപ്പറിച്ച് ഓടിയത്.  ഒരു പോലീസുകാരൻ ആ പയ്യനെ ഓടിച്ചിട്ട്‌ പിടിച്ചു. പിടിച്ച ഉടനെ അയാൾ ആ കുട്ടിയെ അതിക്രൂരമായി അടിക്കാൻ തുടങ്ങി. ജ്യോതി ഓടിച്ചെന്ന് ആ പോലീസുകാരനെ തടഞ്ഞു. നിങ്ങൾ ഇങ്ങനെ ഇവനെ മർദ്ദിക്കുന്നത് വഴി അവനെന്ത് പാഠമാണ് പഠിക്കാൻ പോകുന്നത് എന്ന് ചോദിച്ചു. പോലീസുകാരനെ മാറ്റി നിർത്തി അവൾ ആ പയ്യനോട് ചോദിച്ചു. എന്തിനാണ് കുട്ടീ നീ ഇത് ചെയ്തത്?.. അവൻ പറഞ്ഞു. "എനിക്കും നിങ്ങൾ ധരിച്ച പോലുള്ള നല്ല വസ്ത്രം ധരിക്കണം. ചെരുപ്പ് വേണം. എനിക്കും ബർഗർ കഴിക്കണം". ജ്യോതി അവനെ കൂട്ടിക്കൊണ്ടു പോയി അവൻ ആവശ്യപ്പെട്ടതെല്ലാം വാങ്ങിച്ചു കൊടുത്തു. ഇനിയിത് പോലെ ജീവിതത്തിലൊരിക്കലും ഞാൻ ചെയ്യില്ല എന്ന് അവൻ ജ്യോതിയോട് പറഞ്ഞു. 'ഡൽഹി പെണ്‍കുട്ടി' എന്ന് മാത്രം വിളിച്ച് നമ്മുടെ മാധ്യമങ്ങൾ കുഴിച്ചുമൂടിയ ജ്യോതി സിംഗിനെ അടുത്തറിയാൻ, അവളുടെ അച്ഛനുമമ്മയും നെയ്തുകൂട്ടിയിരുന്ന സ്വപ്നങ്ങളെ തിരിച്ചറിയാൻ, പഠന വഴികളിൽ അവൾ സഹിച്ച ത്യാഗങ്ങളെത്രയെന്ന് മനസ്സിലാക്കാൻ, അവൾ കടന്ന് പോയ ദുരന്തങ്ങളുടെ ആഴമറിയാൻ, എല്ലാറ്റിലുമുപരി കുറ്റം ചെയ്തവരുടെ വിഷലിപ്തമായ  മനസ്സ് വായിക്കുവാൻ BBC യുടെ 'ഇന്ത്യയുടെ മകൾ' എന്ന ഡോക്യുമെന്ററിക്ക് കഴിഞ്ഞിട്ടുണ്ട്.

February 16, 2015

ഈ ഭ്രാന്തിനെ മനുഷ്യവംശം എങ്ങിനെ നേരിടും?

ഇരുപത്തിയൊന്ന് ക്രൈസ്തവരെ കഴുത്തറുത്ത് കൊന്നതിന്റെ ദൃശ്യങ്ങളാണ് ഐ എസ് ഭീകരരുടെ ഭ്രാന്തിൽ നിന്ന് പുറത്ത് വന്ന ഏറ്റവും പുതിയത്. ഇതുവരെയുള്ള ഐ എസ് കൂട്ടക്കൊലകൾ ഇറാഖിൽ നിന്നാണ് റിപ്പോർട്ട്‌ ചെയ്യപ്പെട്ടതെങ്കിൽ ലിബിയയിൽ നിന്നാണ് പുതിയ കഴുത്തറുക്കലുകളുടെ വീഡിയോ വന്നിട്ടുള്ളത്. ഇപ്പോൾ പുറത്ത് വന്നുകൊണ്ടിരിക്കുന്ന വാർത്തകളെ വിശ്വസിക്കാമെങ്കിൽ ഐ എസ് അവരുടെ ഓപ്പറേഷനുകൾ കൂടുതൽ പ്രദേശങ്ങളിലേക്കും രാഷ്ട്രങ്ങളിലേക്കും വ്യാപിപ്പിച്ചു കൊണ്ടിരിക്കുന്നു എന്നർത്ഥം.  വാക്കുകളും അക്ഷരങ്ങളും മരവിച്ചു നില്ക്കുന്ന സന്ദർഭങ്ങൾ ജീവിതത്തിൽ പലപ്പോഴും ഉണ്ടാകാറുണ്ട്. അത്തരമൊരു സന്ദർഭം കൂടി. എന്താണെഴുതുക?, മനുഷ്യ വംശത്തിന്റെ ഈ ശത്രുക്കളെ എന്തിനോടാണ്‌ ഉപമിക്കുക?. ഏത് പദം പ്രയോഗിച്ചാണ് ഈ മൃഗങ്ങളെ വിശേഷിപ്പിക്കുക?. വാക്കുകളില്ല, വാചകങ്ങളില്ല, ഭയത്തിന്റെ ഇരുണ്ട കയങ്ങളിൽ നിന്നുള്ള ഒരു ചെറിയ നെടുവീർപ്പ് മാത്രം.

February 10, 2015

ഡൽഹിയാണ് ഞങ്ങളുടെ തലസ്ഥാനം

എഴുപതിൽ അറുപത്തിയേഴ്‌ സീറ്റുകൾ. ആം ആദ്മി പാർട്ടിയുടെ കടുത്ത ആരാധകന്റെ ഭ്രാന്തമായ സ്വപ്നങ്ങളിൽ പോലും ഇത്തരമൊരു വിജയം കടന്നു വന്നിട്ടുണ്ടാകില്ല. ഡൽഹിയിലെ ഒരു കോടി കോടി മുപ്പത് ലക്ഷം ജനങ്ങൾ ഉത്തേജിപ്പിച്ചിരിക്കുന്നത് ഈ രാജ്യത്തെ നൂറ്റി ഇരുപത്തിയാറ് കോടി ജനങ്ങളുടെ പ്രതീക്ഷകളെയാണ്. ഉപരി വർഗത്തിനും മധ്യവർഗത്തിനും താഴെ നിസ്സഹായനായി നോക്കി നില്ക്കേണ്ടവനല്ല ആം ആദ്മിയെന്നും അവനും ഒരു ഉയിർത്തെഴുന്നേല്പ്പ് സാധ്യമാണെന്നും ഡൽഹി വിളിച്ചു പറയുന്നു. ഉപരി വർഗം, മധ്യ വർഗം, അടിസ്ഥാന വർഗം എന്നീ മൂന്ന് തട്ടുകളിൽ ഒരു ഭരണാധികാരിക്ക് ആരോടാണ് കൂടുതൽ പ്രതിബദ്ധത വേണ്ടതെന്ന് തിരിച്ചറിയുന്ന രാഷ്ട്രീയമാണ് കേജരി വാൾ മുന്നോട്ട് വെച്ചത്. അതിശക്തമായ മോഡി തരംഗത്തിനിടയിലും ഡൽഹിയിലെ ജനങ്ങൾ തിരിച്ചറിഞ്ഞത് ആ രാഷ്ട്രീയമാണ്. അഡാനിയും അംബാനിയും മുഖ്യ അജണ്ടയാകുന്ന രാഷ്ട്രീയത്തിനു പകരം കുടിവെള്ളവും വൈദ്യുതിയും പാചക വാതകവും മുഖ്യ അജണ്ടയാകുന്ന രാഷ്ട്രീയത്തെ പൊതുജനം ഇഷ്ടപ്പെട്ടു.

February 8, 2015

ബറാക്കേ, ഈ ചതി ഞങ്ങളോട് വേണ്ടായിരുന്നു

ഒബാമ ഇന്ത്യയിൽ വന്ന് നമ്മുടെ റിപ്പബ്ലിക് ദിനത്തിൽ പങ്കെടുത്ത് അടിച്ച് പൊളിച്ച് പോയതിന് ശേഷം ഇന്ത്യയെക്കുറിച്ച് ഒരു നല്ല വാക്ക് പറഞ്ഞിട്ടില്ല. എന്നാൽ കിട്ടുന്ന സന്ദർഭത്തിലൊക്കെ ഒന്നാന്തരം പാര വെക്കുവാൻ ശ്രമിക്കുന്നുണ്ട് താനും. ഇന്ത്യക്കാർ എന്ന നിലയ്ക്ക് നമുക്കെല്ലാവർക്കും സങ്കടമുണ്ടാക്കുന്ന ഒരു കാര്യമാണിത്. എന്താണ് മിസ്റ്റർ ഒബാമക്ക് പറ്റിയത്. നമ്മൾ കൊടുത്ത സ്വീകരണം ശരിയായില്ലേ?.. എന്തെങ്കിലും പിഴവുകൾ പറ്റിയോ?.. ആദരിക്കുന്നതിലും ഉപചരിക്കുന്നതിലും എന്തെങ്കിലും പാളിച്ച?. ഭക്ഷണം കൊടുത്തപ്പോൾ മുളകോ മല്ലിയോ ഇത്തിരി കൂടി?. ചായയിൽ മധുരം അല്പം കുറവ്?. ഏയ്‌.. സാധ്യതയില്ല. വാർത്തകളിൽ നമ്മൾ അങ്ങനെയൊന്നും കണ്ടിട്ടില്ല. ഇന്ത്യയിൽ വന്നിറങ്ങിയത് മുതൽ എയർ ഫോഴ്സ് വണ്ണിൽ തിരിച്ചു കയറുന്നത് വരെ ഭൂമിയിൽ മറ്റൊരു നേതാവിനും നമ്മൾ കൊടുത്തിട്ടില്ലാത്തത്ര ഗംഭീരമായാണ് സംഗതികളെല്ലാം നീക്കിയത്.  വരുമ്പോൾ തന്നെ പ്രോട്ടോക്കോൾ ലംഘിച്ച് പോലും നമ്മുടെ പ്രധാനമന്ത്രി എയർപോർട്ടിൽ എത്തി. കെട്ടിപ്പിടിച്ചു. ഉമ്മ വെച്ചു. കാലിൽ വീണില്ല എന്ന് മാത്രമേയുള്ളൂ.

February 5, 2015

ചുട്ടു കൊല്ലുന്നവർക്ക് ചൂട്ട് പിടിക്കുന്നവരോട്

കഴിഞ്ഞ ദിവസം എനിക്ക് നിരവധി പേരുടെ ഉപദേശം കേൾക്കേണ്ടി വന്നു. പ്രധാനപെട്ട ഉപദേശം ഇസ്ലാമിക്ക് സ്റ്റേറ്റ് ഭീകരരെ പന്നികൾ എന്ന് വിളിക്കരുത് എന്നതാണ്. വെറുതേ ചാടിക്കേറി വന്ന ഉപദേശമല്ല, അതിനൊരു കാരണമുണ്ടായിരുന്നു. ഐസിസ് ബന്ദിയാക്കിയ ജോർദാനിയൻ പൈലറ്റിനെ ഒരു ഇരുമ്പ് കൂടിലാക്കി പച്ചയ്ക്ക് കത്തിക്കുന്ന വീഡിയോ കാണാനിടയായി. പൊതുവേ ഇത്തരം ചിത്രങ്ങളും വീഡിയോകളും കണ്ടാൽ വഴിമാറി പോവുകയാണ് ഞാൻ ചെയ്യാറുള്ളത്. ഒരു ദൗർഭാഗ്യ നിമിഷത്തിൽ അതിലൊന്ന് ക്ലിക്ക് ചെയ്യാൻ തോന്നിയെന്ന് പറഞ്ഞാൽ മതിയല്ലോ.. കുറെ നേരത്തേക്ക് വല്ലാത്ത അസ്വസ്ഥത തോന്നി. ശ്വാസം മുട്ടുന്ന പോലെ.. ഒരു മനുഷ്യനെ പെട്രോൾ ഒഴിച്ച് ഒരു കൂട്ടിലാക്കി നിർത്തുന്നു. സായുധരായ കുറെ പേർ ചുറ്റും വളഞ്ഞു നില്ക്കുന്നു. പൂരത്തിൽ അമിട്ടിന് ദൂരെ നിന്ന് തിരി കൊളുത്തുന്ന പോലെ പന്തം കന്തിച്ച് പെട്രോൾ ഒഴിച്ച വൈക്കോലിൽ തീ കൊളുത്തുന്നു. തീ ആ മനുഷ്യ ദേഹത്തിലേക്ക് പാഞ്ഞു കയറുന്നു. ആ ഇരുമ്പ് കൂടിനുള്ളിൽ അങ്ങോട്ടുമിങ്ങോട്ടുമോടി ആ മനുഷ്യ ജീവൻ അലമുറയിട്ട് കത്തിത്തീരുന്നു. ഹൃദയം നുറുക്കുന്ന ഈ വീഡിയോ കണ്ട ഷോക്കിൽ ഫേസ്ബുക്കിൽ ഞാൻ ഇങ്ങനെ കുറിച്ചു.

"ജോർദാൻ പൈലറ്റിനെ ഐസിസ് ഭീകരർ ജീവനോടെ കത്തിക്കുന്ന വീഡിയോ കണ്ടു.. സാമ്രാജ്യത്വ ശക്തികളോ, മുതലാളിത്ത ശക്തികളോ ആരായിരുന്നാലും വേണ്ടില്ല, ഈ പന്നികളുടെ തലയിൽ ഒരാറ്റംബോംബ്‌ പൊട്ടിച്ചിരുന്നെങ്കിൽ എന്നാഗ്രഹിച്ചു പോകുന്നു".

February 2, 2015

ലാലിസം തെളിയിച്ചത് സോഷ്യൽ മീഡിയയുടെ കരുത്ത്

മോഹൻലാലിനെ ഇനിയും ക്രൂശിക്കുന്നതിൽ അർത്ഥമില്ല. കഴിഞ്ഞ രണ്ട് ദിവസത്തിനകം ഒരു പുരുഷായുസ്സിൽ കേൾക്കേണ്ടത് മുഴുവൻ അദ്ദേഹം കേട്ടു കഴിഞ്ഞു. സ്റ്റേജ് ഷോകൾ വിജയിക്കുന്നതും പൊട്ടുന്നതും ഒരു പുതുമയുള്ള കാര്യമല്ല. വിജയവും പരാജയവുമൊക്കെ മോഹൻലാലിന്റെ കരിയറിൽ നിരവധിയുണ്ടായിട്ടുണ്ട്. അതിലൊന്നായി ദേശീയ ഗെയിംസിന്റെ ഉദ്ഘാടന ചടങ്ങിനെ കണ്ടാൽ മതി. ഈ വിവാദത്തിൽ അദ്ദേഹത്തിൻറെ മനസ്സ് നൊന്തു എന്നത് ശരിയാണ്. താൻ വാങ്ങിയ ഒരു കോടി അറുപത്തി മൂന്ന് ലക്ഷം രൂപ സർക്കാരിന് തിരികെ കൊടുക്കുവാൻ അദ്ദേഹം തീരുമാനിച്ചത് ആ മനസ്സിന്റെ വേദനയെ കാണിക്കുന്നുണ്ട്. അത് നാമെല്ലാം മനസ്സിലാക്കുന്നു, ഉൾകൊള്ളുന്നു. അദ്ദേഹത്തിന്റെ  തീരുമാനത്തെ ആദരിക്കുകയും ബഹുമാനിക്കുകയും ചെയ്യുന്നു.. പ്രിയപ്പെട്ട ലാലേട്ടാ താങ്കളിലെ മഹാനടനെ കേരളം അവമതിച്ചിട്ടില്ല. ഒരിക്കലും അവമതിക്കുകയുമില്ല. താങ്കളിലെ  ഔചിത്യബോധമില്ലാത്ത പാട്ടുകാരനെയാണ് സോഷ്യൽ മീഡിയ  കളിയാക്കിയത്. പരിഹസിച്ചത്‌ ലാലെന്ന അഭിനയ പ്രതിഭയെയല്ല, ലാലിസമെന്ന അസംബന്ധത്തെയാണ്‌. അഭിനയം നന്നായാൽ നന്നായീന്ന് പറയും. പക്ഷേ അഭിനയത്തിനപ്പുറത്ത് നിങ്ങൾ കളിക്കുന്ന എല്ലാ സർക്കസ്സിനും കയ്യടിക്കാൻ ആളെ വേറെ നോക്കണം. അത് താങ്കൾ മനസ്സിലാക്കിയാൽ ഈ മാനസിക വിഷമം പമ്പ കടക്കും.  ഇവിടെ പറയാനുദ്ദേശിക്കുന്നത് മറ്റൊരു കാര്യമാണ്. അതിലേക്ക് കടക്കാം.

January 29, 2015

10 Facts Subramaniam Swamy should know about Malappuram

1) Malappuram District was formed in July 1969, since then no major communal violence has been reported from this piece of land.

2) Muslims constitute the majority of the population (68.53%), followed by the Hindu (29.17%) and Christian (2.22%) communities.

3) Malappuram District is one of the best places in India, which is famous for communal harmony and friendly co-existence of sectors of various faiths.

4) Literacy rate in Malappuram is 93.55, which is 20% above the national average.

5) Malappuram District was formed by the second Communist Government headed by the great reformist leader comrade E. M. S. Namboodiripad. He was born in Malappuram.

January 13, 2015

പ്രവാചകനെ സ്നേഹിച്ചോളൂ, പക്ഷേ മനുഷ്യരെ കൊല്ലരുത്

മുഹമ്മദ്‌ നബിയെ അപകീർത്തിപ്പെടുത്തുന്ന കാർട്ടൂണ്‍ പ്രസിദ്ധീകരിച്ചു എന്നതിന്റെ പേരിൽ പാരീസിലെ ഷാര്‍ളി എബ്‌ദോ വാരികയുടെ ഓഫീസിൽ ഇടിച്ചു കയറി ഭീകരർ പന്ത്രണ്ടു പേരെ വെടിവെച്ചു കൊന്ന സംഭവം ചില ഗൗരവ ചിന്തകൾ ഉയർത്തുന്നുണ്ട്. തോക്കിൻ കുഴലിലൂടെ സംരക്ഷിച്ചു നിർത്തേണ്ട ഒന്നാണോ മതവിശ്വാസം. പന്ത്രണ്ടു പേരെ വെടിവെച്ചു വീഴ്ത്തി അവരുടെ പ്രാണൻ എടുത്തുകഴിഞ്ഞതോടെ മുഹമ്മദ്‌ നബിയുടെ അഭിമാനം സംരക്ഷിക്കപ്പെട്ടുവോ?. മതങ്ങളെ വിമർശിക്കുന്നവരെയും പരിഹസിക്കുന്നവരെയും വെടിവെച്ചു വീഴ്ത്താൻ തുടങ്ങിയാൽ ലോക ജനസംഖ്യയുടെ എത്ര ശതമാനത്തെയാണ്‌ ഈ ഭൂമിയിൽ നിന്ന് ഉന്മൂലനം ചെയ്യേണ്ടി വരിക. ഏത് മതമാണ്‌ ഏത് ദർശനമാണ് ഇങ്ങനെയൊരു വിശ്വാസ സംരക്ഷണത്തെക്കുറിച്ച് കല്പിക്കുന്നത്?