August 1, 2015

ഇരട്ട നീതിയെക്കുറിച്ച് ചർച്ച വേണം, പക്ഷേ യാക്കൂബ് മേമനെ ഗാന്ധിയാക്കരുത്

യാക്കൂബ് മേമനെ തൂക്കിലേറ്റിയതിനെത്തുടർന്ന് ഉയർന്നു വരുന്ന ചർച്ചകൾ ചിലയിടങ്ങളിലെങ്കിലും അല്പം വഴി തിരിയുന്നുണ്ടോ എന്ന ആശങ്കയിൽ നിന്നുള്ള ഒരു കുറിപ്പായി മാത്രം ഇതിനെ കണ്ടാൽ മതി. ഒരു വിധിയോട് താത്വികമായി യോജിക്കുന്നവരും വിയോജിക്കുന്നവരും ഉണ്ടാവാം. അതുകൊണ്ട് തന്നെ അഭിപ്രായ പ്രകടനങ്ങൾക്ക് വിലക്കുകളില്ല, അതിരുകളുമില്ല. ഇന്ത്യ ഒരു ജനാധിപത്യ രാജ്യമാണ്. ആ ജനാധിപത്യ വ്യവസ്ഥയുടെ പരിരക്ഷയിലുള്ള ഒരു കോടതി സംവിധാനമാണ് ഇന്ത്യയിലുള്ളത്. കോടതി എങ്ങിനെയാവണമെന്നും നിയമങ്ങളെന്താവണമെന്നും ആത്യന്തികമായി തീരുമാനിക്കുന്നത് ജനങ്ങൾ തന്നെയാണ്. അവർ തിരഞ്ഞെടുക്കുന്ന പ്രതിനിധികളാണ്. അതുകൊണ്ട് തന്നെ കോടതികളെക്കുറിച്ചും നിയമങ്ങൾ നടപ്പിലാക്കുന്നതിലെ ശരി തെറ്റുകളെക്കുറിച്ചും  സംസാരിക്കുവാൻ അടിസ്ഥാനപരമായി ഒരു പൗരന് അവകാശമുണ്ട്‌. അതയാൾക്ക്‌ ജനാധിപത്യ വ്യവസ്ഥ നല്കുന്ന മൗലിക അവകാശങ്ങളുടെ കൂടി ഭാഗമാണ്. എന്നാൽ ഉയർത്തപ്പെടുന്ന അഭിപ്രായങ്ങളുടെ സോഷ്യൽ ഇമ്പാക്റ്റ് എന്താണെന്ന് ചിന്തിക്കുകയും വിലയിരുത്തുകയും ചെയ്യേണ്ട ഒരു ഉത്തരവാദിത്വവും കൂടി ഒരു പൗരനുണ്ടെന്നു നാം മനസ്സിലാക്കണം.

രണ്ട് പതിറ്റാണ്ടിലധികം നീണ്ട നിയമ യുദ്ധത്തിനൊടുവിലാണ് യാക്കൂബ് മേമൻ തൂക്കിലേറ്റപ്പെട്ടത്. ആ വിധി നടപ്പിലാക്കുന്നതിന്റെ അവസാന ദിനത്തിലെ നാടകീയമായ സംഭവങ്ങളും അർദ്ധരാത്രിയിലെ അസാധാരാണമായ കോടതി വ്യവഹാരങ്ങളും സർക്കാറിന്റെയും കോടതിയുടേയും വധശിക്ഷ നടപ്പിലാക്കാനുള്ള അമിത ആവേശമായി പരക്കെ വിലയിരുത്തപ്പെട്ടിട്ടുണ്ട്. യാക്കൂബ് മേമന്റെ വധശിക്ഷയുടെ പുനപ്പരിശോധന ഹരജി പരിഗണിച്ച ബെഞ്ചിലുണ്ടായിരുന്ന ജസ്റ്റിസ് കുര്യൻ ജോസഫ് ഉയർത്തിയ ചില പരാമർശങ്ങളും ഇത്തരമൊരു ധാരണയ്ക്ക് കാരണമായിട്ടുണ്ട്. എന്നിരുന്നാലും മുംബൈ ബോംബ്‌ സ്ഫോടനങ്ങളിൽ യാക്കൂബ് മേമനും പങ്കുണ്ട് എന്ന് തന്നെയാണ് രണ്ട് പതിറ്റാണ്ട് നീണ്ട കോടതി വ്യവഹാരങ്ങളിൽ കണ്ടെത്തപ്പെട്ടിട്ടുള്ളത്. അദ്ദേഹത്തിന് ആ ഭീകര ആക്രമങ്ങളിൽ പങ്കുണ്ടായിരുന്നില്ല എന്നും അദ്ദേഹം തീർത്തും നിരപരാധിയാണ് എന്നും വധശിക്ഷയെ എതിർക്കുന്നവർക്ക് പോലും അഭിപ്രായമില്ല. അദ്ദേഹം ഒന്നാം പ്രതിയായിരുന്നില്ല എന്നത് മാത്രമാണ് അവർ ചൂണ്ടിക്കാട്ടുന്നത്. സ്വയം കീഴടങ്ങി എന്നതോ വിവരങ്ങൾ കൈമാറി എന്നതോ ചെയ്ത കുറ്റകൃത്യത്തിനുള്ള ന്യായീകരണമല്ല, അത്തരം കീഴടങ്ങലുകൾ തീവ്രവാദ പ്രവർത്തനങ്ങളെ ലഘുകരിക്കുന്നുമില്ല എന്ന് നാം മനസ്സിലാക്കണം.   

യാക്കൂബ് മേമനെ തൂക്കിലേറ്റിയ വാർത്ത വന്ന ഉടനെ ഞാനെന്റെ ഫേസ്ബുക്ക്‌ പേജിൽ കുറിച്ച വാചകങ്ങൾ ഇവിടെ പകർത്താം. "ഒരാളെ തൂക്കിലേറ്റുമ്പോൾ സ്വാഭാവികമായും ഉയരുന്ന വൈകാരികതയുണ്ട്, മനുഷ്യാവകാശ ചിന്തകളുണ്ട്. എന്നാൽ ആ വൈകാരികതകളും മനുഷ്യാവകാശ ചിന്തകളും കുറ്റവാളികളാൽ കൊലചെയ്യപ്പെട്ട നൂറുകണക്കിന് നിരപരാധികളുടെ ജീവനുകളെ മറക്കാൻ കാരണമാകരുത്. ഭീകരർ ഒരു ദയയും അർഹിക്കുന്നില്ല. കുറ്റം തെളിയിക്കപ്പെട്ടാൽ എത്രയും പെട്ടെന്ന് നീതി നടപ്പിലാക്കണം. ഒരു വധശിക്ഷക്കെതിരെ ശബ്ദിക്കുന്നവർ എണ്ണമറ്റ നിരപരാധികൾക്ക് 'വധശിക്ഷ' വിധിക്കുന്ന തീവ്രവാദികളെ പരോക്ഷമായി പിന്തുണയ്ക്കുകയാണ്. അത്തരം മനുഷ്യാവകാശങ്ങളിൽ എനിക്കൊട്ടും വിശ്വാസമില്ല. എന്നാൽ എനിക്കുള്ളത് ഇരട്ടനീതിയെക്കുറിച്ചുള്ള ചില ആശങ്കകളാണ്. 1993 ലെ സ്ഫോടനത്തിന് ഭീകരരെ പ്രേരിപ്പിച്ച മുംബൈ കലാപത്തിൽ നൂറുകണക്കിന് പേർ കൊല്ലപ്പെട്ടിട്ടുണ്ട്. ആ കലാപങ്ങൾ ആസൂത്രണം ചെയ്തവരെന്ന് ശ്രീകൃഷ്ണ കമ്മീഷനടക്കം കണ്ടെത്തിയ ആളുകൾക്ക് ത്രിവർണ പതാകയിൽ ആദരം നല്കുകയും യാക്കൂബ് മേമന് തൂക്കുകയർ നല്കുകയും ചെയ്യുമ്പോൾ ഉയരപ്പെടുന്ന ഇരട്ട നീതിയെക്കുറിച്ചുള്ള ചില ആശങ്കകൾ. ബാൽ താക്കറേ, മായാ കൊട്നാനി, അമിത് ഷാ എന്നിങ്ങനെ നിരവധി പേരുകൾ ഈ പട്ടികയിൽ വരുന്നുണ്ട്. പക്ഷേ അത്തരം പേരുകളൊക്കെ കോടതിയുടെ പിൻ വരാന്തകളിലൂടെ പുറത്തു പോയില്ലേ എന്ന ചോദ്യം ബാക്കിയാണ്. ഇന്ത്യൻ നീതിപീഠങ്ങളിൽ വിശ്വാസം നഷ്ടപ്പെട്ടു എന്ന് ഇതിനർത്ഥമില്ല. 'പൊതുബോധം' ജനിപ്പിക്കുന്ന പഴുതുകളിലൂടെ പലരും രക്ഷപ്പെടുന്നു. തൂക്കിലേറ്റപ്പെടുന്ന കുറ്റവാളികൾക്ക് വേണ്ടി ഒഴുക്കാൻ എന്റെ പക്കൽ ഒരിറ്റ് കണ്ണീരില്ല. എന്നാൽ നടപ്പിലാക്കപ്പെട്ട നീതിയോളം പ്രധാനമാണ് നടപ്പിലാക്കപ്പെടാത്ത നീതികളും എന്ന് പറയാതിരിക്കാനും കഴിയുന്നില്ല".

യാക്കൂബ് മേമൻ തൂക്കിലേറ്റപ്പെട്ട ശേഷം ന്യൂനപക്ഷങ്ങൾക്ക് നേരെയുള്ള ഭരണകൂട ഭീകരതയുടെ പ്രതീകമായി അദ്ദേഹത്തെ ഉയർത്തിക്കാട്ടുന്ന തരത്തിൽ വരുന്ന ചർച്ചകളും പ്രതികരണങ്ങളും സൃഷ്ടിക്കുന്നത് വളരെ അപകടകരമായ ചില പ്രവണതകളാണ്. യാക്കൂബ് മേമൻ ഒരു ഭീകര ആക്രമണക്കേസിലെ പ്രതിയാണ്. ഇന്ത്യക്കെതിരെ പാക്കിസ്ഥാനിൽ നിന്നുള്ള തീവ്രവാദികളുടെ പിന്തുണയോടെ ആക്രമണം നടത്തിയ ഒരു കേസിൽ രണ്ട് പതിറ്റാണ്ടിന്റെ നിയമ നടപകളിൽ കുറ്റം തെളിയിക്കപ്പെട്ട വ്യക്തിയാണ്. തന്റെ നിരപരാധിത്വം സ്ഥാപിക്കുവാൻ  വേണ്ടത്ര സമയവും പ്രഗത്ഭ നിയമ വിദഗ്ദരുടെ സഹായവും അദ്ദേഹത്തിന് ലഭിച്ചിട്ടുണ്ട്. ഇരുപത്തിയൊന്ന് വർഷത്തെ നിയമ നടപടികൾക്ക് ശേഷമാണ് അദ്ദേഹം തൂക്കിലേറ്റപ്പെട്ടത്. അത്തരമൊരു വ്യക്തിയെ ഒരു ദേശീയ നായകൻറെ ഇമേജ് നല്കി കൊണ്ടുള്ള  ബിംബവത്കരണം  മത ന്യൂനപക്ഷങ്ങളുടെ വൈകാരിക ചിന്തകളെ വഴി തിരിച്ചു വിടാനേ ഉപകരിക്കൂ. ഇന്ത്യൻ നിയമ വ്യവസ്ഥകളിലെ ഇരട്ട നീതിയെക്കുറിച്ച് നമ്മുടെ രാജ്യത്തിന്റെ സുരക്ഷാ പരിഗണനകളുടെ അകത്ത് നിന്ന് കൊണ്ടുള്ള വിമർശനങ്ങളാണ് ഉയർന്ന് വരേണ്ടത്. അത് ക്രിയാത്മകവും വിചാര പൂർണവുമായ വഴികളിലൂടെ വേണം പുരോഗമിക്കുവാൻ. മേമൻ സഹോദരന്മാർ തിരഞ്ഞെടുത്ത വഴി ഭീകരവാദത്തിന്റെതാണ്. ആ വഴിയിൽ നിന്ന് ഇന്ത്യയിലെ മതന്യൂന പക്ഷങ്ങൾക്കെന്നല്ല, ആർക്കും ഒരു പ്രചോദനവും ലഭിക്കാനില്ല. അതുകൊണ്ട് തന്നെ മേമന് വേണ്ടി കണ്ണീര് വീഴ്ത്തുന്നത് അപകടകരമാണ്. അത്തരം കണ്ണീരുകൾ സൃഷ്ടിക്കുന്ന വൈകാരിക തലങ്ങൾ വർഗീയതയും ഭീകര വാദവും വളർത്തുവാനേ ഉപകരിക്കൂ. മാത്രമല്ല, ആ കണ്ണീരുകളിലൂടെ ഭൂരിപക്ഷ വർഗീയതക്ക് കത്തിക്കയറാനും കഴിയും.

ഈയടുത്ത കാലത്തുണ്ടായ കേസുകളിലെ വധശിക്ഷകളിലുണ്ടായ ഇരട്ട സമീപനങ്ങളെക്കുറിച്ച് ഇന്ത്യയിലെ മതേതര ബുദ്ധിജീവികളും രാഷ്ട്രീയ നേതാക്കളും മനുഷ്യാവകാശ പ്രവർത്തകരും ശബ്ദമുയർത്തിയിട്ടുണ്ട്. സി പി എം നേതാവ് പ്രകാശ്‌ കാരാട്ട് അടക്കമുള്ള നേതാക്കൾ വോട്ട് ബാങ്ക് രാഷ്ട്രീയത്തിന്റെ ഭീതികളില്ലാതെ തന്നെ അക്കാര്യം തുറന്ന് പറഞ്ഞിട്ടുണ്ട്. അത്തരം ശബ്ദങ്ങളിലാണ് ഇന്ത്യൻ മതേതരത്വത്തിന്റെ പ്രതീക്ഷകളുള്ളത്. യാക്കൂബ് മേമന്റെ വസതിയുള്ള മുംബൈയിലടക്കം മുസ്‌ലിം സമൂഹം ഇതൊരു മത വൈകാരിക വിഷയമായി എടുത്തിട്ടില്ല എന്നതാണ് പ്രതീക്ഷ നല്കുന്ന മറ്റൊരു ഘടകം.   അതിന്റെ പേരിൽ തെരുവിലറങ്ങുകയോ കലാപങ്ങൾക്ക് ആഹ്വാനം ചെയ്യുകയോ ഉണ്ടായിട്ടില്ല. കേരളത്തിലും അത്തരത്തിലുള്ള പ്രകടമായ പ്രതികരണങ്ങൾ ഉണ്ടായിട്ടില്ല. എന്നാൽ സോഷ്യൽ മീഡിയയിൽ യാക്കൂബ് മേമനെ ഇരയായും ഹീറോയായും ഇതിഹാസവത്കരിക്കുവാനുള്ള ചില ശ്രമങ്ങൾ കാണുകയുണ്ടായി.  അതൊരു പക്ഷേ വരും നാളുകളിൽ കൂടുതൽ കാറ്റ് പിടിക്കാനുള്ള സാധ്യതകളുമുണ്ട്.

കൂടുതൽ ടൈഗർ, യാക്കൂബ് മേമൻമാരെ ഉണ്ടാക്കിയെടുക്കാൻ ശ്രമിക്കുക എന്നത് ഇന്ത്യയിലെ കാവി ഫാസിസത്തിന്റെ കൂടി താത്പര്യമാണ്. ഒരു മേമനുണ്ടായിക്കിട്ടിയാൽ മിനിമം പത്ത് ശതമാനം വോട്ടെങ്കിലും അവർക്ക് കൂടിക്കിട്ടും. ആ അജണ്ടയിൽ മുസ്‌ലിം ന്യൂനപക്ഷം വീണു കഴിഞ്ഞാൽ തീർന്നു. പിന്നെയൊരു മടക്കമില്ല. അത്തരം മേമൻമാർ ഉണ്ടായിക്കഴിഞ്ഞാൽ - അധികം വേണ്ട, ഒന്നോ രണ്ടോ മതി - ഫാസിസ്റ്റുകളുടെ സ്വപ്‌നങ്ങൾ ഒന്നൊന്നായി പൂവണിയും. കാര്യമായ ഒരു പ്രാചരണവും ഇല്ലാതെ തന്നെ അവർക്ക് മൂന്നിൽ രണ്ട് ഭൂരിപക്ഷം നേടിയെടുക്കാനും  കഴിയും. അച്ഛാ ദിൻ വന്നില്ലെങ്കിലും ബുരാ ദിൻ ദുരിതങ്ങളുടെ ആഴക്കഴത്തിൽ കിടന്നും ആളുകൾ അവർക്ക് വോട്ട് ചെയ്യും. അതുകൊണ്ട് തന്നെ അത്തരം അജണ്ടകളിൽ വീഴാതിരിക്കുക എന്നതാണ് യാക്കൂബ് മേമനെ ഇതിഹാസവത്കരിക്കുന്നവർ ചെയ്യേണ്ടത്. ഇന്ത്യൻ നിയമവ്യവസ്ഥകളിലും നീതിപീഠങ്ങളിലും പൂർണമായി വിശ്വാസം നഷ്ടപ്പെടേണ്ട മഹാസംഭവങ്ങളൊന്നും ഉണ്ടായിട്ടില്ല. കോടതിയിൽ കുറ്റം തെളിയിക്കപ്പെട്ട ഒരാൾ തൂക്കിലേറ്റപ്പെട്ടു. മറ്റ് ചില കേസുകളിൽ കുറ്റം തെളിയിക്കപ്പെട്ട ചിലർ പഴുതുകളിലൂടെ രക്ഷപ്പെട്ടു എന്നതാണ് ആശങ്ക ജനിപ്പിക്കേണ്ടത്. നിയമ സംവിധാനങ്ങളുടെ അത്തരം ഇരട്ട നീതികൾക്കെതിരെ ജനാധിപത്യ മതേതര സമൂഹത്തോടൊപ്പം ഐക്യപ്പെട്ട്‌ നീങ്ങണം. അത്തരം കുറ്റവാളികളേയും  നിയമത്തിന് മുന്നിൽ കൊണ്ടുവരാനുള്ള ശ്രമങ്ങൾക്ക് പേർത്തും പേർത്തും പിന്തുണ നല്കണം. മനുഷ്യാവകാശ പ്രവർത്തകരുടെ കരങ്ങൾക്ക് ശക്തി പകരണം. അതിനു പകരം ഇന്ത്യൻ സംവിധാനങ്ങൾക്കെതിരെ തീവ്രവാദത്തിന്റെ കരങ്ങൾക്ക് ശക്തി പകരാനാണ് ശ്രമിക്കുന്നതെങ്കിൽ അതോടെ തീരും എല്ലാം.

അറിയുക, എന്തൊക്കെ പരിമിതികളും പോരായ്മകളും ഉണ്ടെങ്കിലും മത ന്യൂനപക്ഷങ്ങൾക്ക് ഏറ്റവും സ്വസ്ഥതയുള്ള  ലോകത്തെ അപൂർവ്വം മണ്ണുകളിലൊന്നാണ് നമ്മുടെ പ്രിയ ഭാരതം. ഒരു മുസ്‌ലിം രാഷ്ട്രമായ പാക്കിസ്ഥാനിലെ മുസ്‌ലിംകളേക്കാൾ പതിന്മടങ്ങ്‌ സുരക്ഷിതരാണ്‌ ഇന്ത്യയിലെ മുസ്‌ലിംകൾ, അവിടത്തെ ന്യൂനപക്ഷങ്ങളെക്കാൾ വ്യക്തിത്വത്തോടെയും അഭിമാനത്തോടെയും ജീവിക്കുന്നവരാണ് ഇന്ത്യയിലെ ബഹുഭൂരിപക്ഷം മുസ്‌ലിംകളും. ഒറ്റപ്പെട്ട സംഭവങ്ങളെ കാണാതിരിക്കുന്നില്ല. അത്തരം വാർത്തകൾക്ക് നേരെ കണ്ണടക്കുന്നില്ല. അതിൽ മാനസിക വിഷമം ഇല്ലെന്ന് പറയുന്നില്ല.  ഒരു വിഷയം പറയുമ്പോൾ ഒറ്റപ്പെട്ട സംഭവങ്ങളല്ല, പൊതു അവസ്ഥകളെയാണ് മാനദണ്ഡമായി കാണേണ്ടത്. അതാണ്‌ ശാസ്ത്രീയവും ബുദ്ധിപരവുമായ വിശകലന രീതി. ഏതെങ്കിലും തരത്തിൽ പ്രശ്നങ്ങളില്ലാത്ത സമൂഹങ്ങൾ ഭൂമുഖത്തുണ്ടോ?. ഉള്ള പ്രശ്നങ്ങളെ കൂടുതൽ വഷളാക്കാതെയിരിക്കുമ്പോഴാണ് സമാധാനത്തിന്റെ സാധ്യതകൾ തെളിയുക. തിരിച്ചറിവുകൾ വളരെ പ്രധാനമാണെന്നർത്ഥം. പക്ഷേ അവ വൈകിയെത്തുന്നത് കൊണ്ട് കാര്യമില്ല. ഒരിക്കൽ കൂടി പറയുന്നു. യാക്കൂബ് മേമൻമാരിൽ നിന്ന് നമുക്കൊന്നും പഠിക്കാനില്ല. അവർക്ക് വേണ്ടി കണ്ണീര് വീഴ്ത്തുന്നതിലും കാര്യമില്ല. അവർ തെരഞ്ഞെടുത്ത വഴികളിൽ നിന്ന് മാറി നടക്കുന്നതിലാണ് നമ്മുടെ രാജ്യത്തിന്റെ താത്പര്യങ്ങൾ സംരക്ഷിക്കപ്പെടുക,  അതുവഴി ന്യൂനപക്ഷത്തിന്റെ താത്പര്യങ്ങളും.

Recent Posts
ബൽറാമിനോട് അടി ഇരന്ന് വാങ്ങിയ കെ സുരേന്ദ്രൻ
ചെമ്മണ്ണൂർ തട്ടിപ്പ് : ആ വാർത്തയെവിടെ മാധ്യമങ്ങളേ? 
മല്ലൂസിന്റെ വാട്സ്ആപ്പ് പരാക്രമങ്ങൾ
ഓരോ പൗരനും ഒരു പത്രമായി മാറുന്ന കാലം


Update - 2 Aug 2015
ഈ പോസ്റ്റ്‌ ഉയർത്തിയ ചില പ്രതികരണങ്ങൾക്ക് ഫെയ്സ്ബുക്ക്‌ പ്രൊഫൈലിൽ നല്കിയ മറുപടി ഇവിടെ പകർത്തുന്നു

പോസ്റ്റ്‌ വായിച്ച ഒരു സുഹൃത്ത് ഇന്നലെ ചോദിച്ചു. "എന്ത് കൊണ്ടാണ് നിങ്ങൾ എല്ലായ്പ്പോഴും ഒരു വശം മാത്രം ഹൈലൈറ്റ് ചെയ്ത് പറയുകയും മറുവശം മയപ്പെടുത്തി പറയുകയും ചെയ്യുന്നത്?". ഭൂരിപക്ഷ വർഗീയതയും ന്യൂനപക്ഷങ്ങളോടുള്ള ഇരട്ട നീതിയുടെ കാര്യവും ലഘൂകരിക്കുകയും അതിനെതിരെയുള്ള പ്രതികരണങ്ങളെ വലുതാക്കി കാണിക്കുകയും ചെയ്യുന്നത് എന്ത് കൊണ്ട് എന്നാണ് അദ്ദേഹത്തിന്റെ ചോദ്യത്തിന്റെ കാതൽ.

അദ്ദേഹത്തിന് ഞാൻ കൊടുത്ത മറുപടി ഇതാണ് ". എന്റെ പോസ്റ്റുകളിൽ പലപ്പോഴും ഒരു വശം മാത്രം പറയുകയോ മറുവശം മയപ്പെടുത്തി പറയുകയോ ചെയ്യാറുണ്ടെന്ന നിങ്ങളുടെ സന്ദേഹത്തെ അംഗീകരിക്കാനോ നിഷേധിക്കാനോ ഞാനില്ല. പക്ഷേ ഒരു കാര്യം വ്യക്തമായി പറയാൻ ആഗ്രഹിക്കുന്നു. എന്റെ നിലപാടുകൾ നമ്മുടെ നാട്ടിൽ സമാധാനം നിലനില്ക്കണം എന്ന അടിസ്ഥാന ആഗ്രഹത്തെ മുൻ നിർത്തിയുള്ളതാണ്. അതുകൊണ്ട് തന്നെ ആ ഒരു നിലപാട് തറയിൽ നിന്ന് കൊണ്ടുള്ള സമീപനങ്ങളാണ് ഞാൻ എടുക്കാറുള്ളത്. എരിതീയിൽ എണ്ണയൊഴിക്കാൻ വളരെ എളുപ്പമാണ്. പക്ഷേ കത്തുന്ന തീ കെടുത്തുക എന്നതാണ് പ്രയാസമുള്ള പണി. എന്റെ സോഷ്യൽ മീഡിയ ഇടപെടലുകളിൽ നിന്ന് ഒരാൾ പോലും തീവ്രവാദ പ്രവർത്തനങ്ങൾക്ക് അനുകൂലമായ പ്രചോദനം നേടാനിടയാവരുത് എന്ന കാര്യത്തിൽ എനിക്ക് നിർബന്ധമുണ്ട് എന്ന് മാത്രം പറഞ്ഞു കൊള്ളട്ടെ"

മറ്റൊന്ന് കൂടി പറയേണ്ടതുണ്ട്. മുമ്പ് എഴുതിയതാണ്. വീണ്ടും എഴുതാം. ഓരോ മത വിഭാങ്ങളിലും മുള പൊട്ടിവരുന്ന തെറ്റായ ചിന്താധാരകൾക്കെതിരെ ശബ്ദിക്കുവാൻ ഏറ്റവും കൂടുതൽ ശ്രമിക്കേണ്ടത് ആ മതവിശ്വാസികൾ തന്നെയാണ്. ഹൈന്ദവ വർഗീയതയ്ക്ക് എതിരെ ഫലപ്രദമായി ശബ്ദിക്കുവാൻ കഴിയുക ഹൈന്ദവ വിശ്വാസികൾക്കാണ്. അതവർ ചെയ്യട്ടെ. അവരിൽ ഭൂരിഭാഗവും അത് നിർവഹിക്കുന്നുണ്ട് എന്ന് തന്നെയാണ് ഞാൻ വിശ്വസിക്കുന്നത്. അതില്ലായിരുന്നവെങ്കിൽ സംഘ പരിവാറിന്റെ തീവ്ര സമീപനങ്ങളിൽ ഇന്ത്യൻ ജനാധിപത്യവും മതേതരത്വവും എന്നേ മണ്ണടിഞ്ഞു പോയേനെ. ഇന്ത്യൻ ജനാധിപത്യം ഏതാണ്ട് ഏഴ് പതിറ്റാണ്ടിനോട് അടുക്കുകയാണ്. സംഘപരിവാർ ആഹ്വാനങ്ങളെ നിരന്തരം തള്ളിക്കളഞ്ഞു കൊണ്ടാണ് ഭൂരിപക്ഷ ഹൈന്ദവ വിശ്വാസികളുള്ള ഇന്ത്യൻ ജനത ഈ ഏഴ് പതിറ്റാണ്ടുകൾ നമ്മുടെ മതേതരത്വത്തെ സംരക്ഷിച്ചു നിർത്തിയത്. അവർ ഇനിയും അത് ചെയ്യുമെന്നാണ് എന്റെ വിശ്വാസം. അവരെ മതേതര വിശ്വാസികളായി നിലനിർത്താൻ സഹായിക്കുക എന്നത് മതന്യൂനപക്ഷങ്ങളുടെ കൂടി ഉത്തരവാദിത്വമാണ്. അനീതികൾക്കെതിരെ ശബ്ദിക്കരുത് എന്നല്ല, ശബ്ദിക്കുന്നത്‌ അല്പം വിവേക പൂർണമായിരിക്കണം എന്നാണ്. നമ്മളെല്ലാം ഒന്നാണെന്ന ഒരു തോന്നൽ പ്രതികരണങ്ങളിൽ ഉണ്ടാവണം. നിങ്ങളും ഞങ്ങളും എന്ന ഒരു സമീപനം പാടില്ല.

വളരെ സജീവമായി എഫ് ബി യിൽ ഇടപെടുന്ന എന്റെ ചില സുഹൃത്തുക്കൾ ഉണ്ട്. മത ന്യൂനപക്ഷങ്ങൾക്ക് എതിരെയുള്ള ഓരോ സംഭവങ്ങളും ഹൈലൈറ്റ് ചെയ്ത് അവതരിപ്പിക്കുകയാണ് അവരുടെ രീതി. അവർ പറയുന്നതിൽ കൂടുതലും ശരിയായ കാര്യങ്ങളാണ് താനും. അതേ സമയം ന്യൂനപക്ഷങ്ങൾക്ക് ലഭിക്കുന്ന ഗുണകരമായ ഒരു വാർത്തയും അവർ ഹൈലൈറ്റ് ചെയ്യുകയുമില്ല. ഒരേ ദിശയിലുള്ള അവരുടെ നിരന്തര പോസ്റ്റുകൾ ന്യൂനപക്ഷ വിഭാഗങ്ങളിലെ ചെറുപ്പക്കാരിൽ ഉണ്ടാക്കുന്ന പ്രതിപ്രവർത്തനം എന്താണ് എന്ന് അവർ ആലോചിക്കുന്നേയില്ല. അത്തരം പ്രതിപ്രവർത്തനങ്ങളെ ക്രിയാത്മകമായി തണുപ്പിക്കുവാൻ ശ്രമിക്കുന്നവരെ ലൈക്കിനും കമന്റിനും വേണ്ടി നടക്കുന്ന 'മതേതര കോമാളികൾ' എന്ന് കളിയാക്കുകയും ചെയ്യുന്നു. അതേ അവസ്ഥ തന്നെ മറുപക്ഷത്തും ഉണ്ട്. സംഘ പരിവാർ തീവ്രതയെ ബുദ്ധിപരമായി പ്രതിരോധിക്കാൻ ശ്രമിക്കുന്ന ഹൈന്ദവ മതവിശ്വാസികൾക്കിടയിൽ നിന്നുള്ളവരും 'മതേതര കോമാളികളായി' മാറുന്നു.

പരിഹാസങ്ങൾ തുടരട്ടെ. അതിൽ പരാതിയൊന്നുമില്ല. ശരിയുടെ പക്ഷത്ത് നിലനില്ക്കാനും ആ നിലപാടുകളുമായി മുന്നോട്ട് പോകുവാനും അല്ലാഹുവേ നീ അനുഗ്രഹിക്കണമേ എന്നാണ് ഞാൻ എപ്പോഴും പ്രാർത്ഥിക്കാറുള്ളത്. എല്ലാ സുഹൃത്തുക്കൾക്കും ഈ സൗഹൃദ ദിനത്തിൽ ഹൃദ്യമായ ആശംസകൾ. (Posted in my Facebook profile on 2 Aug 2015)

33 comments:

  1. കുറ്റം ചെയ്യുന്ന എല്ലാവരും തന്നെ അതിന്റെ ശിക്ഷയിൽ നിന്നും രക്ഷപ്പെടുന്നതിനെ കുറിച്ചും മുൻകൂട്ടി ആലോചിച്ചിരിക്കും. ചിലർ അതിന് അധികാരം ഉപയോഗിക്കും. മറ്റ് ചിലർ പണവും സ്വാധീനവും വേറെ ചിലർ ബുദ്ധിയും. ഇതിലേതായാലും സംഗതി ഫലിച്ചാൽ അവർ രക്ഷപ്പെട്ടിരിക്കും. താക്കറെയും മേമനും ഒക്കെ ഉപയോഗിച്ചത് ഈ വഴികൾ തന്നെ. മേമന് എവിടെയോ പിഴച്ചു. പണി കിട്ടി. ദാറ്റ്സ് ഓൾ.
    അധികാരവും പണവും സ്വാധീനവും ഇല്ലാത്ത ലക്ഷക്കണക്കിന്‌ സാധാരണക്കാർ നിസാര കുറ്റങ്ങൾക്ക് പോലും ശിക്ഷിക്കപ്പെടുമ്പോൾ വലിയ കുറ്റങ്ങൾ ചെയ്തവർ പുല്ലു പോലെ നിയമക്കുടുക്കിൽ നിന്നും ഇറങ്ങി വരുന്നതാണ് യഥാർത്ഥ ഇരട്ടനീതി. അല്ലാതെ ഒരു പതിറ്റാണ്ടിനിടയിൽ രണ്ടോ മൂന്നോ വധശിക്ഷ നടപ്പാക്കുമ്പോൾ ഉയർന്നു വരേണ്ട ഒരു വിഷയം അല്ല അത്.

    ReplyDelete
  2. Neutral one... And dat neutral making special for me and others.... Great sir... Words of a true human being

    ReplyDelete
  3. ഇന്ത്യൻ നിയമ വ്യവസ്ഥകളിലെ ഇരട്ട നീതിയെക്കുറിച്ച് നമ്മുടെ രാജ്യത്തിന്റെ സുരക്ഷാ പരിഗണനകളുടെ അകത്ത് നിന്ന് കൊണ്ടുള്ള വിമർശനങ്ങളാണ് ഉയർന്ന് വരേണ്ടത്. അത് ക്രിയാത്മകവും വിചാര പൂർണവുമായ വഴികളിലൂടെ വേണം പുരോഗമിക്കുവാൻ. മേമൻ സഹോദരന്മാർ തിരഞ്ഞെടുത്ത വഴി ഭീകരവാദത്തിന്റെതാണ്. ആ വഴിയിൽ നിന്ന് ഇന്ത്യയിലെ മതന്യൂന പക്ഷങ്ങൾക്കെന്നല്ല, ആർക്കും ഒരു പ്രചോദനവും ലഭിക്കാനില്ല. അതുകൊണ്ട് തന്നെ മേമന് വേണ്ടി കണ്ണീര് വീഴ്ത്തുന്നത് അപകടകരമാണ്. അത്തരം കണ്ണീരുകൾ സൃഷ്ടിക്കുന്ന വൈകാരിക തലങ്ങൾ വർഗീയതയും ഭീകര വാദവും വളർത്തുവാനേ ഉപകരിക്കൂ. മാത്രമല്ല, ആ കണ്ണീരുകളിലൂടെ ഭൂരിപക്ഷ വർഗീയതക്ക് കത്തിക്കയറാനും കഴിയും

    ReplyDelete
  4. കൊല്ലപെട്ടവർക്ക് നീതി ലഭിക്കുന്നത്, അത് ചെയ്തവർക്ക്‌ തക്കതായ ശിക്ഷലഭിക്കുംപൊഴാണ്. ആ അർത്ഥത്തിൽ യാക്കൂബ് മേമന്റെ വധശിക്ഷ (അയാൾ കുറ്റവാളിയാണെങ്കിൽ ) വളരെ ഉചിതമായി. എന്നാൽ ഒരുവിഭാഗത്തിനു മാത്രം ഈ നീതി ലഭിക്കുകയും മറ്റവർക്ക് അത് നിഷേധിക്കാപ്പെടുക്കയും ചെയ്യുമ്പോഴാണ്, നീതി പീഠത്തോട് അമർഷം തോന്നുന്നത് !!

    ReplyDelete
  5. ഇരട്ട നീതി എന്നൊരു സംശയം തോന്നാൻ ഒരു കാരണം ഭരിക്കുന്ന സര്ക്കാര് അല്ലെ ? പക്ഷെ ഈ വിധി വന്നത് 2004 ഇൽ ! കോണ്‍ഗ്രസ്‌ ഭരണ കാലത്ത് ! ദയ ഹരജി തള്ളുന്നത് 2014 ഇൽ ! അതും കോണ്‍ഗ്രസ്‌ ഭരണ കാലം ! ദയാഹരജി നിരസിച്ചത്‌ ഇതേ പ്രസിഡന്റ്‌ ! എനിക്ക് തോന്നുന്നത് കോണ്‍ഗ്രസ്‌ ഇന്റെ കയ്യിൽ ഭരണം ഉള്ള കാലത്താണ് ഈ ശിക്ഷ നടപ്പിലാക്കിയത്‌ എങ്കിൽ ഇത്ര കോലാഹലം ഉണ്ടാകില്ലായിരുന്നു ! മുസ്ലിം ന്യുനപക്ഷം ഇത്ര അധികം വിഷമിക്കില്ലായിരുന്നു എന്നാണ് !

    ReplyDelete
    Replies
    1. This comment has been removed by the author.

      Delete
  6. ഭീകരവാദ കേസുകളിൽ പോലീസും കോടതിയും പറയുന്നത് അണ്ണാക്ക് തൊടാതെ വിഴുങ്ങി ജീവിക്കുന്നവര് മാലെഘാവും മെക്കാ മസ്ജിദും സംഝൊദാ എക്സ്പ്രസും ഒന്നു കണ്ണോടിച്ചു നോക്കുന്നത് നല്ലതാണു, എന്നിട്ട് മതി കോടതിയെ കുറിച്ചും പോലീസിനെ കുറിച്ചും നീതിന്യായ വ്യവസ്ഥയെ കുറിച്ചും ഗീർവാണം മുഴക്കാൻ, തെളിവുകളല്ല മുൻവിധികളും 'പൊതു ബോധത്തിന്റെ' സമ്മർധവുമാനു അഫ്സൽ ഗുരുവിനെയും യകൂബിനെയും കഴുമരതിലെറ്റിയത്.

    ReplyDelete
    Replies
    1. മുംബൈ സ്ഫോടനത്തിനു തലേ ദിവസം പാകിസ്ഥാനിലേക്ക് പോയി , കറാച്ചി എയർപോർടിൽ ഐ എസ ഐ എജെന്റ് സ്വീകരിച്ചു
      എമിഗ്രേഷൻ പോലും ഇല്ലാതെ പുറത്ത് കടന്നു
      ഈ എജെന്റ് ഏര്പ്പാട് ചെയ്ത വീട്ടില് താമസിച്ചു .
      പിനീട് പാകിസ്ഥാൻ പാസ്പോര്ട്ട് സ്വീകരിച്ചു
      ഐ എസ ഐ ചിലവിൽ ബാങ്കോക്കിൽ ഉല്ലാസയാത്ര നടത്തി
      തിരിച്ചു വന്നു പാകിസ്താനിൽ ബിസിനസ് തുടങ്ങി....

      ഇതൊന്നും കുറ്റപത്രത്തിലെ ആരോപണങ്ങൾ അല്ല
      യാകോബ് മേമൻ ഇന്ത്യ ടുഡേ ക്ക് നല്കിയ അഭിമുഖത്തിലെ മേമന്റെ വാക്കുകള ആണ്.

      എന്നിട്ടും ചിലര്ക്ക് മേമൻ നിരപരാധിയാണ് പോലും !!

      Delete
    2. നിരപരാധിയാണെന്ന് ആരെങ്കിലും പറഞ്ഞുവോ?

      Delete
    3. നിഷ്പക്ഷമായി പറയട്ടെ...1993- ൽ... 257പേർ രാഷ്ട്രപതിയോടോ. .സുപ്രീം കോടതിയോടോ...എന് തിന് അവരുടെ സ്വന്തം വീട്ടുകാരോടോ പോലും..ഒരു ദയാഹർജ്ജി കൊടുക്കാൻ കഴിയാതെയാണ് തൽക്ഷണം മരിച്ചത്.... അതിലും എത്രയോ ആളുകൾ പരിക്കേറ്റ് ജീവച്ഛവങ്ങളായി കിടക്കുന്നു. അതിൽ മുസ്ലീംങ്ങളും.. .ഹിന്ദുക്കളും..ഉണ്ട്... കാരണം കൊന്നവരുടെയും കൊല്ലിച്ച വരുടെയും മനസ്സിൽ അവർ ഇന്ത്യാക്കാർ മാത്രമായിരുന്നു. അത് മനസ്സിലാക്കാത്ത വരാണ് ഇന്ന് യാക്കുബിന്റെ വിധിയിൽ വർഗ്ഗീയത കാണുന്നത്... ഇതിനു ശേഷം നടന്ന വർഗ്ഗീയലഹളകളിൽ...ഒരു പാട് കുറ്റവാളികൾ...ഹിന്ദുവാവാം മുസ്ലീമാവാം...അവർക്കും തക്കതായ ശിക്ഷ ലഭിക്കാതിരിക്കുമ്പോൾ പ്രതികരിക്കാം... 27 വർഷമെത്തിയ ഈ കേസിൽ..യാക്കുബ്‌ മേമന്റെ കുടുംബത്തിലുള്ള വരടക്കം..എത്രയോ പേരെ ഇതേ ഇൻഡ്യൻ ജുഡീഷ്യറി വെറുതെ വിട്ടു...? അങ്ങിനെയെങ്കിൽ എല്ലാവരെയും തൂക്കികൊല്ലാൻ വിധിക്കാമായിരുന്നില്ലേ..? എന്നിട്ടും 2014 ജൂൺ രണ്ടിന് മേമന്റെ പുനപരിശോധന ഹർജ്ജിയിൽ ഈ ശിക്ഷ കോടതി സ്റ്റേ ചെയ്തു. കേസ് തുറന്ന കോടതിയിലേക്കു മാറ്റി. 2015 ഏപ്രിൽ 15 വരെ ഈ വാദം നടന്നു. എന്തിനു വേണ്ടി.. ആയിരം കുറ്റവാളികൾ രക്ഷിക്കപ്പെട്ടാലും ഒരു നിരപരാധി പോലും ശിക്ഷിക്കപ്പെടരുതെന്ന ഇന്ത്യൻ നീതിന്യായവ്യവസ്ഥയുടെ നീതി പരിപാലിക്കപ്പെടാൻ..!! ഓർക്കണം വിദേശ രാജ്യങ്ങളിലായിര ുന്നുവെങ്കിൽ..27 വർഷം പോയിട്ട്... 27 മണിക്കൂർ ഉണ്ടാകുമായിരുന്നില്ല..!! ഇനിയും എന്റെയോ..നിങ്ങള ുടെയോ..വേണ്ടപ്പെട്ടവർ ആ സ്ഫോടനത്തിൽ പെട്ടിരുന്നെങ്ക ിൽ..ഇന്ന് യാക്കൂബ് മേമനു വേണ്ടി സങ്കടപ്പെടുമായിരുന്നില്ല. ഇനിയും യാക്കൂബിന്റെ സഹോദരൻ ടൈഗർ മേമൻ...തീവ്രവാദികളുടെ സർവ്വേശ്വരൻ..ദാവീദ് ഇബ്രാഹിം ഇക്കാന്റെ കൂടെ അങ്ങ് പാക്കിസ്ഥാനിൽ...ഈ സ്ഫോടനമൊക്കെ ചെയ്തിട്ടും,,സു ഖമായി കഴിയുകയാണേയ്....!! ഓർക്കണം..!! പിന്നെ യാക്കൂബ് മേമൻ ഇന്ത്യയിലെ ഒരു ന്യൂനപക്ഷക്കാരനായതു കൊണ്ടു മാത്രമാണ് അയാളെ തൂക്കിലേറ്റുന്നതെന്ന് നിങ്ങൾ പറയുമ്പോൾ.... അതേ ന്യൂനപക്ഷത്തിൽ പെട്ട ഒരു വിശിഷ്ട വ്യക്തിയെയാണു അതെ രാജ്യം പരമോന്നത ബഹുമതികളൊ ടു കൂടി രണ്ടര ഏക്കർ സ്ഥലത്ത് ഭാരതമണ്ണിൽ കബറടക്കുന്നത്.. എന്നു കൂടി ഓർത്തു വെയ്ക്കുക.

      Delete

  7. അറിയുക, എന്തൊക്കെ പരിമിതികളും പോരായ്മകളും ഉണ്ടെങ്കിലും മത ന്യൂനപക്ഷങ്ങൾക്ക് ഏറ്റവും സ്വസ്ഥതയുള്ള ലോകത്തെ അപൂർവ്വം മണ്ണുകളിലൊന്നാണ് നമ്മുടെ പ്രിയ ഭാരതം.
    Well said!

    ReplyDelete
  8. കുറ്റവാളികൾ ശിക്ഷിക്കപ്പെടണം... അതിൽ തർക്കമില്ല.... ശിക്ഷകൾക്ക് പരിധിയും പരിമിതിയും ഉണ്ടാവുന്നത് മറ്റു വല്ല മാനദണ്ഢങ്ങൾ ആവരുത്...

    ബഷീർക്ക നന്നായി പറഞ്ഞു...

    ReplyDelete
  9. Salute Mr Basheer ................. This is the real thought of an Indian citizen, who believes in India's secularism and integrity. Hats off .........

    @ Manoj Kumar

    ReplyDelete
  10. അടിപൊളി... പൊളിച്ചടുക്കി...

    എന്നെക്കൊണ്ട് പറ്റുന്നത് ഞാനും ചെയ്തിട്ടുണ്ട്... !!!
    https://www.facebook.com/jasirsabri/posts/10154012284995130

    ReplyDelete
  11. യാക്കൂബ് മേമന്‍ മുസ്ലീം ആണ് എന്ന രീതിയില്‍ കാര്യങ്ങള്‍ കാണുന്നത് ശരിയല്ല.പക്ഷേ ഉറങ്ങിക്കിടന്നിരുന്ന ജഡ്ജിയെ പാതിരാത്രിയില്‍ വിളിച്ചെഴുന്നേല്‍പ്പിച്ചു കേസ്സ് തീര്‍പ്പാക്കുന്ന ചീഫ് ജസ്റ്റീസിന്‍റെ "നീതിബോധത്തിന്" ന്യായീകരണമില്ല.വധ ശിക്ഷ കുറച്ചു ദിവസം നീണ്ടു പോയിരുന്നെങ്കില്‍ എന്താ ആകാശം ഇടിഞ്ഞു വീഴുമായിരുന്നോ?

    ReplyDelete
  12. നമ്മൾ കേരളീയര്ക്ക് ഇത്തരം പരാമർശങ്ങളിൽ നിന്ന്‌ മാറി നിന്നാൽ എന്ത് പറ്റും എന്ന് എനിക്ക് മനസിലാകുന്നില്ല,
    നമുക്ക് ഒരു നല്ല പാരമ്പര്യം ഇല്ലേ അത് തേച്ചു മായ്ച്ചു കളയണോ?
    മറ്റൊരു രാഷ്ട്രീയ പാര്ട്ടിയുണ്ടാകിയ (മൗലിക അവകാശം) ഒരാളെ നമ്മൾ തന്നെ കൊന്നില്ലേ?സ്കൂളിൽ കുട്ടികളുടെ മുമ്പിൽ വച്ച് നമ്മൾ അധ്യാപകനെ കൊന്നില്ലേ? അഞ്ചു വിദ്യാർഥികളെ വെടിവച്ചു കൊന്നില്ലേ? പറഞ്ഞാൽ തീരില്ല എന്നറിയാം,ഇതിന്റെ ഉത്തരവാദി കളൊക്കെ ഇപ്പോൾ എവിടെയാ പാകിസ്താനിൽ ആണോ ? അതോ സൗധിയിലൊ? അവരെയൊക്കെ ശിക്ഷിക്കണോ? വേണ്ട അല്ലെ,
    ഭാരതത്തിൽ നടക്കുന്ന ഇത്തരം സംഭവങ്ങൾ മുന്കൂട്ടി അറിഞ്ഞ(പങ്കാളി അല്ലെങ്കിലും) ഒരാൾ അത് ഒഴിവാക്കാൻ ശ്രമിച്ചില്ലെങ്കിൽ അവനാണ് ശരിക്കും ആ സംഭവതിന്റെ ഒന്നാം പ്രതി എന്നാണ് എനിക്ക് തോന്നുന്നത്, കാരണം അവനു കിട്ടുന്ന അവസരങ്ങളാണ് അവനെ ദാവുദും, ചൊട്ടായും ഒക്കെ ആകുന്നത്

    ReplyDelete
  13. What you said is really true. I am in Australia and met a Pakistani software engineer and I asked him how often you go to your country. He said I don't like my country I can't go there and live in Pakistan. So despite the little things India is paradise for everyone who can live with pride. You can't find this in any other Muslim countries in the world.

    ReplyDelete
  14. Sensible article out of all sensationalism. Hope jaundice affected both sides see the proper vision though all these chaose

    ReplyDelete
  15. 😏 feeling പുച്ചം 😏

    ...........................................................

    രാജ്യത്തിൻറെ നിയമ വ്യവസ്ഥകളോട് ബഹുമാനം പുലർത്തുകയും നിരപരാധി എന്നതിനാൽ താനൊരിക്കലും സിക്ഷിക്കപ്പെടില്ല എന്ന് വിശ്വസിച്ച് അന്വേഷണത്തിന് തനിക്കറിയാവുന്ന മുഴുവുൻ വിവരങ്ങളും കൈമാറുകയും ചെയ്ത യാകൂബ് മേമൻ ഇന്ത്യൻ നിയമങ്ങളെ അധികാരികളാൽ പരിഹസിക്കപ്പെടും വിധം തൂക്കിലേറ്റി കൊലചെയ്യപ്പെട്ടു.

    ആരാണ് യാകൂബ്...? അയാൾ എപ്പോൾ മുതലാണ് എൻറെ കാഴ്ചകളിൽ പതിയാൻ തുടങ്ങിയത്...?
    ദിനപത്രത്തിൻറെ ആദ്യ പേജുകളിൽ അയാളുടെ വാർത്തകൾ കണ്ടപ്പോഴൊക്കെ ഹെഡിങ്ങിൽനിന്ന് മുമ്പൈ സ്ഫോടനക്കേസിലെ പ്രതി എന്ന് മാത്രം മനസ്സിലാക്കി രാജ്യത്തെ നടുക്കിയ സ്ഫോടനക്കേസിലെ പ്രതി എന്ന മുൻധാരണയോടെ തൂക്കിലേറ്റുകയോ കുരിശിൽ തറക്കുകയോ ചെയ്യട്ടെ എന്ന് മനസ്സിൽ കരുതി അവഗണിക്കുകയായിരുന്നു.
    ഫൈസ്ബുക്കിൽ ഒറ്റനോട്ടത്തിൽ അയാളെ തൂക്കിലേറ്റുന്നതിനെതിരെന്ന് തോന്നിയ പല പോസ്റ്റുകളും കാണുമ്പോൾ അയാളുടെ മുസ്ലിം നാമം ഇവരെ അലോസരപ്പെടുത്തുന്നുണ്ടാവാം എന്ന് കരുതി അവഗണിച്ചു.
    തൂക്കിലേറ്റിയതിൽ പല രാഷ്ടീയ പ്രമുഖരുടെയും അഭിപ്രായങ്ങളിൽ അയാളോട് കാണിക്കുന്ന സിമ്പതി മുസ്ലിം പ്രീണനമായാണ് എനിക്ക് തോന്നിയത്.
    മേമൻ അവസാനമായി മകളോട് പറഞ്ഞത് എന്ന കാപ്ഷനിൽ കണ്ട വാർത്ത മരണം മുന്നിൽ കാണുമ്പോൾ മകളോട് എന്തായിരിക്കും ഒരു പിതാവിന് പറയാനുണ്ടാവുക എന്ന ആകാംക്ഷയാണ് അതു വായിക്കാൻ പ്രേരിപ്പിച്ചത്.
    നമ്മുടെ കുടുംബത്തിൻറെ മാനം നശിപ്പിക്കുന്ന ഒന്നും ഞാൻ ചെയ്തിട്ടില്ല എന്ന ആ വാക്ക് മനസ്സിൽ പതിഞ്ഞപ്പോൾ റിലേറ്റടായ മറ്റു ആർടിക്കുകളും വായിക്കുകയുണ്ടായി.
    നിരപരാധിത്വം തെളിയിക്കാൻ കഴിയാത്ത ആൾ അപരാധി ആണ് എന്നതിന് തെളിവ് നിങ്ങൾ അവിടെ പോയത് എന്തിന് ഇവരെ പരിചയപ്പെട്ടത് എങ്ങനെ എന്നീ ചോദ്യങ്ങൾ മാത്രമാവുമ്പോൾ തൂക്കിലേറ്റി കൊലപ്പെടുത്താതെ ജയിലിലെങ്കിലും ജീവിക്കാൻ അനുവതിക്കാമായിരുന്നു.
    ബാബരീ മസ്ജിദ് കേസ് മലേഗാവ് കേസ് തുടങ്ങി ഗുജറാത്ത് കലാപത്തിലെ പ്രതികൾ സിക്ഷിക്കപ്പെടാതെ സധൈര്യം വിലസുമ്പോൾ പുച്ചം തോന്നുന്നു ഈ നിയമ വ്യവസ്ഥയോട്.
    ഗുജറാത്ത് കലാപത്തിൻറെ സൂത്രധാരൻ അമിത്ഷായെയും നരേന്ദ്രമോഡിയെന്ന ഗൂഡാലോചനക്കാരനെയും തൂക്കിലേറ്റുമോ...
    വേണ്ട... ജയിലിലടക്കുമോ...
    അതും വേണ്ട രാജ്യത്തെ ജനാധിപത്യ മതേതരത്വ വിശ്വാസികളെ പരിഹസിക്കാതെ അധികാരം ഉപേക്ഷിക്കുമോ...
    അറ്റ്ലീസ്റ്റ് മാന്യമായി അന്വേശണത്തെ നേടുമോ...

    😏😏😏😏😏

    By. SALAHUYAMANI.

    ReplyDelete
  16. പോസ്റ്റിൽ പറഞ്ഞവ എല്ലാം വ്യക്തം

    തൂക്കലിലെ രാഷ്ട്രീയം ചർച്ച ചെയ്യപ്പെടേണ്ടത് തന്നെ. അവ പറയാതിരിക്കാനാവില്ലാ തന്നെ.. അതുകൊണ്ടാണല്ലോ പല പ്രമുഖരും ഇവയെ കുറിച്ച് സംസാരിച്ചതും പ്രതികരിച്ചതും.

    (മുസ്ലീം നാമധാരികൾ ഇവയിലൂന്നൊയ ചർച്ചകളിൽ കൈകൊള്ളുന്ന ധാരണകളെ മറ്റൊരു തലതിൽ തന്നെ വിലയിരുത്തപ്പെടുന്നു. അക്കാരണത്താൽ തന്നെ മൃതു സമീപനം ഇത്തരം പോസ്റ്റുകളിൽ പ്രതീക്ഷിച്ചു)

    ReplyDelete
  17. "കൂടുതൽ ടൈഗർ, യാക്കൂബ് മേമൻമാരെ ഉണ്ടാക്കിയെടുക്കാൻ ശ്രമിക്കുക എന്നത് ഇന്ത്യയിലെ കാവി ഫാസിസത്തിന്റെ കൂടി താത്പര്യമാണ്. ഒരു മേമനുണ്ടായിക്കിട്ടിയാൽ മിനിമം പത്ത് ശതമാനം വോട്ടെങ്കിലും അവർക്ക് കൂടിക്കിട്ടും. ആ അജണ്ടയിൽ മുസ്‌ലിം ന്യൂനപക്ഷം വീണു കഴിഞ്ഞാൽ തീർന്നു. പിന്നെയൊരു മടക്കമില്ല. അത്തരം മേമൻമാർ ഉണ്ടായിക്കഴിഞ്ഞാൽ - അധികം വേണ്ട, ഒന്നോ രണ്ടോ മതി - ഫാസിസ്റ്റുകളുടെ സ്വപ്‌നങ്ങൾ ഒന്നൊന്നായി പൂവണിയും. കാര്യമായ ഒരു പ്രാചരണവും ഇല്ലാതെ തന്നെ അവർക്ക് മൂന്നിൽ രണ്ട് ഭൂരിപക്ഷം നേടിയെടുക്കാനും കഴിയും. അച്ഛാ ദിൻ വന്നില്ലെങ്കിലും ബുരാ ദിൻ ദുരിതങ്ങളുടെ ആഴക്കഴത്തിൽ കിടന്നും ആളുകൾ അവർക്ക് വോട്ട് ചെയ്യും"

    മേൽ പറഞ്ഞ കാര്യങ്ങൾ ബോംബെ സ്ഫോടനങ്ങൾ ക്ക് ശേഷം സംഭവിച്ചോ ?
    ബോംബെ മുസ്ലിങ്ങൾ അരക്ഷിതാവസ്ഥയിൽ ആയോ അതോ കൂടുതൽ സുരക്ഷിതരായോ ?
    പിന്നീട് ബോംബെയിൽ കലാപങ്ങൾ ഉണ്ടായോ ?
    ബോംബെ സ്ഫോടനങ്ങളെ തുടർന്ന് കാര്യമായ ഒരു പ്രാചരണവും ഇല്ലാതെ തന്നെ ഫാസിസ്റ്റുകൾക്ക് മൂന്നിൽ രണ്ട് ഭൂരിപക്ഷം നേടിയെടുക്കാൻ കഴിഞ്ഞോ ?
    **********************************************************************************************************************************************
    "യാക്കൂബ് മേമൻമാരിൽ നിന്ന് നമുക്കൊന്നും പഠിക്കാനില്ല. അവർക്ക് വേണ്ടി കണ്ണീര് വീഴ്ത്തുന്നതിലും കാര്യമില്ല. അവർ തെരഞ്ഞെടുത്ത വഴികളിൽ നിന്ന് മാറി നടക്കുന്നതിലാണ് നമ്മുടെ രാജ്യത്തിന്റെ താത്പര്യങ്ങൾ സംരക്ഷിക്കപ്പെടുക, അതുവഴി ന്യൂനപക്ഷത്തിന്റെ താത്പര്യങ്ങളും."

    ഗുജറാത്ത് കലാപ ശേഷം മുസ്ലിങ്ങൾ മേൽ പറഞ്ഞ കര്യങ്ങൾ അനുവർത്തിച്ചു .
    എന്നാൽ സംഭവിച്ചതോ ?....

    ഫാസിസ്റ്റുകളുടെ സ്വപ്‌നങ്ങൾ ഒന്നൊന്നായി പൂവണിഞ്ഞു . അവർക്ക് മൂന്നിൽ രണ്ട് ഭൂരിപക്ഷം നേടിയെടുക്കാനും കഴിഞ്ഞു . അച്ഛാ ദിൻ വന്നില്ലെങ്കിലും ബുരാ ദിൻ ദുരിതങ്ങളുടെ ആഴക്കഴത്തിൽ കിടന്നും ആളുകൾ അവർക്ക് വോട്ട് ചെയ്തു .


    "അറിയുക, എന്തൊക്കെ പരിമിതികളും പോരായ്മകളും ഉണ്ടെങ്കിലും മത ന്യൂനപക്ഷങ്ങൾക്ക് ഏറ്റവും സ്വസ്ഥതയുള്ള ലോകത്തെ അപൂർവ്വം മണ്ണുകളിലൊന്നാണ് നമ്മുടെ പ്രിയ ഭാരതം. ഒരു മുസ്‌ലിം രാഷ്ട്രമായ പാക്കിസ്ഥാനിലെ മുസ്‌ലിംകളേക്കാൾ പതിന്മടങ്ങ്‌ സുരക്ഷിതരാണ്‌ ഇന്ത്യയിലെ മുസ്‌ലിംകൾ, അവിടത്തെ ന്യൂനപക്ഷങ്ങളെക്കാൾ വ്യക്തിത്വത്തോടെയും അഭിമാനത്തോടെയും ജീവിക്കുന്നവരാണ് ഇന്ത്യയിലെ ബഹുഭൂരിപക്ഷം മുസ്‌ലിംകളും."

    ദളിതർക്ക് മേൽപ്പറഞ്ഞ അവസ്ഥ ഇന്ത്യയിൽ കാണാൻ കഴിയുന്നില്ല.
    സത്യത്തിൽ ഇന്ത്യൻ മുസ്ലിങ്ങളെ കുറിച്ചുള്ള ഭയമാണോ അവർക്ക് സുരക്ഷിതത്വവും വ്യക്തിത്വവും അഭിമാനവും നല്കുന്നത് ?
    ഈ ഭയം നഷ്ടപ്പെടുന്നത് ദളിതരുടെ അവസ്ഥയിലേക്ക് മുസ്ലിങ്ങളെ എത്തിക്കുമോ ?

    ഈ സംശയങ്ങൾക്ക് ഒരു വിശദീകരണം ആവശ്യപ്പെടുന്നു .

    ReplyDelete
  18. ഈ പോസ്റ്റ്‌ ഉയർത്തിയ ചില പ്രതികരണങ്ങൾക്ക് ഫെയ്സ്ബുക്ക്‌ പേജിൽ നല്കിയ മറുപടി ഇവിടെ പകർത്തുന്നു

    പോസ്റ്റ്‌ വായിച്ച ഒരു സുഹൃത്ത് ഇന്നലെ ചോദിച്ചു. "എന്ത് കൊണ്ടാണ് നിങ്ങൾ എല്ലായ്പ്പോഴും ഒരു വശം മാത്രം ഹൈലൈറ്റ് ചെയ്ത് പറയുകയും മറുവശം മയപ്പെടുത്തി പറയുകയും ചെയ്യുന്നത്?". ഭൂരിപക്ഷ വർഗീയതയും ന്യൂനപക്ഷങ്ങളോടുള്ള ഇരട്ട നീതിയുടെ കാര്യവും ലഘൂകരിക്കുകയും അതിനെതിരെയുള്ള പ്രതികരണങ്ങളെ വലുതാക്കി കാണിക്കുകയും ചെയ്യുന്നത് എന്ത് കൊണ്ട് എന്നാണ് അദ്ദേഹത്തിന്റെ ചോദ്യത്തിന്റെ കാതൽ.

    അദ്ദേഹത്തിന് ഞാൻ കൊടുത്ത മറുപടി ഇതാണ് ". എന്റെ പോസ്റ്റുകളിൽ പലപ്പോഴും ഒരു വശം മാത്രം പറയുകയോ മറുവശം മയപ്പെടുത്തി പറയുകയോ ചെയ്യാറുണ്ടെന്ന നിങ്ങളുടെ സന്ദേഹത്തെ അംഗീകരിക്കാനോ നിഷേധിക്കാനോ ഞാനില്ല. പക്ഷേ ഒരു കാര്യം വ്യക്തമായി പറയാൻ ആഗ്രഹിക്കുന്നു. എന്റെ നിലപാടുകൾ നമ്മുടെ നാട്ടിൽ സമാധാനം നിലനില്ക്കണം എന്ന അടിസ്ഥാന ആഗ്രഹത്തെ മുൻ നിർത്തിയുള്ളതാണ്. അതുകൊണ്ട് തന്നെ ആ ഒരു നിലപാട് തറയിൽ നിന്ന് കൊണ്ടുള്ള സമീപനങ്ങളാണ് ഞാൻ എടുക്കാറുള്ളത്. എരിതീയിൽ എണ്ണയൊഴിക്കാൻ വളരെ എളുപ്പമാണ്. പക്ഷേ കത്തുന്ന തീ കെടുത്തുക എന്നതാണ് പ്രയാസമുള്ള പണി. എന്റെ സോഷ്യൽ മീഡിയ ഇടപെടലുകളിൽ നിന്ന് ഒരാൾ പോലും തീവ്രവാദ പ്രവർത്തനങ്ങൾക്ക് അനുകൂലമായ പ്രചോദനം നേടാനിടയാവരുത് എന്ന കാര്യത്തിൽ എനിക്ക് നിർബന്ധമുണ്ട് എന്ന് മാത്രം പറഞ്ഞു കൊള്ളട്ടെ"

    മറ്റൊന്ന് കൂടി പറയേണ്ടതുണ്ട്. മുമ്പ് എഴുതിയതാണ്. വീണ്ടും എഴുതാം. ഓരോ മത വിഭാങ്ങളിലും മുള പൊട്ടിവരുന്ന തെറ്റായ ചിന്താധാരകൾക്കെതിരെ ശബ്ദിക്കുവാൻ ഏറ്റവും കൂടുതൽ ശ്രമിക്കേണ്ടത് ആ മതവിശ്വാസികൾ തന്നെയാണ്. ഹൈന്ദവ വർഗീയതയ്ക്ക് എതിരെ ഫലപ്രദമായി ശബ്ദിക്കുവാൻ കഴിയുക ഹൈന്ദവ വിശ്വാസികൾക്കാണ്. അതവർ ചെയ്യട്ടെ. അവരിൽ ഭൂരിഭാഗവും അത് നിർവഹിക്കുന്നുണ്ട് എന്ന് തന്നെയാണ് ഞാൻ വിശ്വസിക്കുന്നത്. അതില്ലായിരുന്നവെങ്കിൽ സംഘ പരിവാറിന്റെ തീവ്ര സമീപനങ്ങളിൽ ഇന്ത്യൻ ജനാധിപത്യവും മതേതരത്വവും എന്നേ മണ്ണടിഞ്ഞു പോയേനെ. ഇന്ത്യൻ ജനാധിപത്യം ഏതാണ്ട് ഏഴ് പതിറ്റാണ്ടിനോട് അടുക്കുകയാണ്. സംഘപരിവാർ ആഹ്വാനങ്ങളെ നിരന്തരം തള്ളിക്കളഞ്ഞു കൊണ്ടാണ് ഭൂരിപക്ഷ ഹൈന്ദവ വിശ്വാസികളുള്ള ഇന്ത്യൻ ജനത ഈ ഏഴ് പതിറ്റാണ്ടുകൾ നമ്മുടെ മതേതരത്വത്തെ സംരക്ഷിച്ചു നിർത്തിയത്. അവർ ഇനിയും അത് ചെയ്യുമെന്നാണ് എന്റെ വിശ്വാസം. അവരെ മതേതര വിശ്വാസികളായി നിലനിർത്താൻ സഹായിക്കുക എന്നത് മതന്യൂനപക്ഷങ്ങളുടെ കൂടി ഉത്തരവാദിത്വമാണ്. അനീതികൾക്കെതിരെ ശബ്ദിക്കരുത് എന്നല്ല, ശബ്ദിക്കുന്നത്‌ അല്പം വിവേക പൂർണമായിരിക്കണം എന്നാണ്. നമ്മളെല്ലാം ഒന്നാണെന്ന ഒരു തോന്നൽ പ്രതികരണങ്ങളിൽ ഉണ്ടാവണം. നിങ്ങളും ഞങ്ങളും എന്ന ഒരു സമീപനം പാടില്ല.

    വളരെ സജീവമായി എഫ് ബി യിൽ ഇടപെടുന്ന എന്റെ ചില സുഹൃത്തുക്കൾ ഉണ്ട്. മത ന്യൂനപക്ഷങ്ങൾക്ക് എതിരെയുള്ള ഓരോ സംഭവങ്ങളും ഹൈലൈറ്റ് ചെയ്ത് അവതരിപ്പിക്കുകയാണ് അവരുടെ രീതി. അവർ പറയുന്നതിൽ കൂടുതലും ശരിയായ കാര്യങ്ങളാണ് താനും. അതേ സമയം ന്യൂനപക്ഷങ്ങൾക്ക് ലഭിക്കുന്ന ഗുണകരമായ ഒരു വാർത്തയും അവർ ഹൈലൈറ്റ് ചെയ്യുകയുമില്ല. ഒരേ ദിശയിലുള്ള അവരുടെ നിരന്തര പോസ്റ്റുകൾ ന്യൂനപക്ഷ വിഭാഗങ്ങളിലെ ചെറുപ്പക്കാരിൽ ഉണ്ടാക്കുന്ന പ്രതിപ്രവർത്തനം എന്താണ് എന്ന് അവർ ആലോചിക്കുന്നേയില്ല. അത്തരം പ്രതിപ്രവർത്തനങ്ങളെ ക്രിയാത്മകമായി തണുപ്പിക്കുവാൻ ശ്രമിക്കുന്നവരെ ലൈക്കിനും കമന്റിനും വേണ്ടി നടക്കുന്ന 'മതേതര കോമാളികൾ' എന്ന് കളിയാക്കുകയും ചെയ്യുന്നു. അതേ അവസ്ഥ തന്നെ മറുപക്ഷത്തും ഉണ്ട്. സംഘ പരിവാർ തീവ്രതയെ ബുദ്ധിപരമായി പ്രതിരോധിക്കാൻ ശ്രമിക്കുന്ന ഹൈന്ദവ മതവിശ്വാസികൾക്കിടയിൽ നിന്നുള്ളവരും 'മതേതര കോമാളികളായി' മാറുന്നു.

    പരിഹാസങ്ങൾ തുടരട്ടെ. അതിൽ പരാതിയൊന്നുമില്ല. ശരിയുടെ പക്ഷത്ത് നിലനില്ക്കാനും ആ നിലപാടുകളുമായി മുന്നോട്ട് പോകുവാനും അല്ലാഹുവേ നീ അനുഗ്രഹിക്കണമേ എന്നാണ് ഞാൻ എപ്പോഴും പ്രാർത്ഥിക്കാറുള്ളത്. എല്ലാ സുഹൃത്തുക്കൾക്കും ഈ സൗഹൃദ ദിനത്തിൽ ഹൃദ്യമായ ആശംസകൾ. (Posted in my Facebook profile on 2 Aug 2015)

    ReplyDelete
    Replies
    1. താങ്കളുടെ ഉദ്ദേശ ശുദ്ധിയെ ചോദ്യം ചെയ്യുന്നില്ല ...
      പക്ഷെ അതിനു താങ്കൾ നിരത്തിയ ന്യായങ്ങളും , കാരണങ്ങളും ,പരിഹാരവും വിപരീത ഫലം ചെയ്യും ...
      ശിരോ വസ്ത്രമായാലും , ഇരട്ട നീതിയായാലും സ്ഫോടനം നടത്തൽ അല്ലാഹുവിന്റെ കല്പനയ്ക്ക് എതിരാണ്.
      അടിച്ചൊതുക്കപ്പെട്ടവരായി ജീവിക്കലും അങ്ങനെ തന്നെ.
      വി മുരളീധരൻ പറഞ്ഞതാണ് ഇക്കാര്യത്തിൽ മുസ്‌ലിംകൾ ചെയ്യേണ്ടത് .

      അവിശ്വാസികളുടെ ഇടയില്‍ തന്നെ ജീവിച്ചുകൊണ്ട്‌) സ്വന്തത്തോട് അന്യായം ചെയ്തവരെ മരിപ്പിക്കുമ്പോള്‍ മലക്കുകള്‍ അവരോട് ചോദിക്കും: നിങ്ങളെന്തൊരു നിലപാടിലായിരുന്നു? അവര്‍ പറയും: ഞങ്ങള്‍ നാട്ടില്‍ അടിച്ചൊതുക്കപ്പെട്ടവരായിരുന്നു. അവര്‍ (മലക്കുകള്‍) ചോദിക്കും: അല്ലാഹുവിന്‍റെ ഭൂമി വിശാലമായിരുന്നില്ലേ? നിങ്ങള്‍ക്ക് സ്വദേശം വിട്ട് അതില്‍ എവിടെയെങ്കിലും പോകാമായിരുന്നല്ലോ. എന്നാല്‍ അത്തരക്കാരുടെ വാസസ്ഥലം നരകമത്രെ. അതെത്ര ചീത്ത സങ്കേതം! (97)
      (ഖുർആൻ Surah An-Nisa’, 97)

      Delete
    2. അതു തന്നെ അല്ലേ ഇവിടെ തീരെ സഹിക്കാത്തവർക്ക് പാകിസ്ഥാനിലോ മറ്റോ പോകാമല്ലോ എന്ന് പലരും പലപ്പോഴും പറഞ്ഞത്?

      Delete
    3. ഈ പറയുന്നവരുടെ തറവാടൊന്നുമല്ലല്ലോ ഇന്ത്യ

      Delete
    4. ഇന്ത്യൻ പൌരത്വം ഉപേക്ഷിക്കാൻ തീരുമാനിക്കുന്നവർ, ഇന്ത്യ വിട്ടു പാകിസ്ഥാനിൽ പോണോ, അതല്ല വേറെ വല്ല "സ്റ്റേറ്റിലും " പോണോ, എന്ന കാര്യത്തിൽ മറ്റുള്ളവരുടെ ഉപദേശം സ്വീകരിക്കാൻ സാധ്യതയില്ല !
      കാര്യങ്ങൾ പഴയ പോലെയല്ല...
      നീതിയുടെയും സ്വാതന്ത്രത്തിന്റെയും പ്രയോഗത്തിൽ ഒരു വലിയ തിരഞ്ഞെടുപ്പ് ഉയർത്തുന്ന വെല്ലുവിളിയുടെ വക്കിലൂടെയാണ് ഇന്ത്യയടക്കമുള്ള ലോക രാഷ്ട്രങ്ങൾ കടന്നു പോകുന്നത് .
      അത് കൊണ്ട് തന്നെ , വള്ളിക്കുന്നി ന്റെ ഉപദേശങ്ങൾ പ്രജകളെക്കാൾ ഭരണ കർത്താക്കൾക്ക് ഫലം ചെയ്യാനാണ് സാധ്യത.

      Delete
  19. ഒരു ഓണ ചിന്ത.
    മേമൻ ഒരു പായസം മാത്രം അതിനു മുമ്പ് കിട്ടേണ്ട ചോറ് സാമ്പാർ പുളിശേരി അവിയൽ കൂടാതെ രസം ഒന്നും കിട്ടാത്ത തിലുളള ഒരു അസ്കിരത

    ReplyDelete
  20. ഒരു ഓണ ചിന്ത.
    മേമൻ ഒരു പായസം മാത്രം അതിനു മുമ്പ് കിട്ടേണ്ട ചോറ് സാമ്പാർ പുളിശേരി അവിയൽ കൂടാതെ രസം ഒന്നും കിട്ടാത്ത തിലുളള ഒരു അസ്കിരത

    ReplyDelete
  21. 27 കോടി ജനങ്ങൾക്ക്‌ കാവൽ നിൽക്കുന്ന ജവന്മ്മാരെ തിവ്രവാദികൾ കൊന്നൊടുക്കുമ്പോൾ ഒരുത്തനും കണ്ണ് നീർ പൊഴിക്കില്ല. എന്നാൽ ഒരു പാകിസ്ഥാൻ തിവ്രവാദി അതിർത്തി കടന്നു വന്നു ഭാരതത്തിൽ അങ്ങോളം സ്പോടന പരമ്പരകൾ സൃഷ്ടിച്ചു അസംഖ്യം പേരെ കൊന്നൊടുക്കുമ്പോൾ അവനു വേണ്ടി വാദിക്കാൻ ഷേവ് ഗാസയും ചൈന മാതൃ രാജ്യമായി കരുതുന്ന കൊടിച്ചി പട്ടികളും നിരത്തിൽ ഇറങ്ങും. എല്ലാ ദേശ ദ്രോഹികളെയുംഅവര്ക്ക് കുഴലൂതുന്ന ഓണ്‍ലൈൻ വേശ്യകളേയും ഭാരതത്തിൽ നിന്ന് തൂത്തു എറിയണം

    ReplyDelete