June 1, 2015

മല്ലൂസിന്റെ വാട്സ്ആപ്പ് പരാക്രമങ്ങൾ

വാട്സ്ആപ്പ് പോലൊരു കിടിലൻ സാങ്കേതിക വിനിമയ സൗകര്യം ഈ അടുത്ത കാലത്തൊന്നും നമുക്ക് കിട്ടിയിട്ടില്ല. ഇതുപോലൊരു പാരയും ഈ അടുത്ത കാലത്തൊന്നും വന്നിട്ടില്ല. അപാര ഉപകാരിയാണ്,  എന്നാൽ അതിലേറെ മുടിഞ്ഞ ശല്യവുമാണ്‌. ഉപകാരം കാരണം വലിച്ചെറിയാൻ വയ്യ,  ഉപദ്രവം കാരണം അടുപ്പിക്കാനും വയ്യ. അഞ്ച് കാശിന്റെ ചിലവില്ലാതെ വീഡിയോയും ഫോട്ടോകളും ഓഡിയോകളും ഷെയർ ചെയ്യാം. ചാറ്റാം, ചീറ്റാം, ടെക്സ്റ്റാം, പ്രസംഗിക്കാം.. അങ്ങനെ എന്തും ചെയ്യാം.  നെറ്റ് കണക്ഷൻ ഉണ്ടായാൽ മതി.  ആരുടെയെങ്കിലും വൈഫൈയിൽ ചുളുവിൽ കൊത്താൻ പറ്റിയാൽ സംഗതി കമ്പ്ലീറ്റ് ഫ്രീ.. ഫ്രീയായി കിട്ടുന്നത് ഉപയോഗിക്കുമ്പോഴാണല്ലോ എപ്പോഴും ഓവറായി പോകാൻ സാധ്യതയുള്ളത്. കയ്യീന്ന് കാശ് പോകുന്ന സംഗതിയാണെങ്കിൽ അംബാനിയേട്ടനാണെങ്കിൽ പോലും ശ്രദ്ധിച്ചേ കൈകാര്യം ചെയ്യൂ. കാശ് ചിലവാക്കി ഫോണ്‍ വിളിക്കുമ്പോൾ അത്യാവശ്യ സംഗതികൾ ചോദിച്ച് പെട്ടെന്ന് ഫോണ്‍ വെക്കും. നെറ്റിൽ നിന്ന് ഫ്രീ വിളിക്കുമ്പോൾ വെറുപ്പിച്ച് കയ്യിൽ തരും. അത് അതിന്റെ ഒരു ആഗോള നിയമമാണ്. വാട്സ് ആപ്പിന്റെ കാര്യത്തിലും സംഭവിക്കുന്നത്‌ മറിച്ചല്ല.

ഈയിടെ ഞങ്ങളൊരു വാട്സ്ആപ്പ് ഗ്രൂപ്പ് തുടങ്ങി. ഒരു ചെറുകിട നിക്ഷേപ സംരഭത്തിന്റെ സാധ്യതകൾ ആരായുന്നതിന് വേണ്ടി ഏതാണ്ട് ഇരുപത്തിയഞ്ചോളം പേർ ചേർന്ന് കൊണ്ട് ഒരു ഗ്രൂപ്പ്.  ഗ്രൂപ്പ് മുതലാളി (അതായത് അഡ്മിൻ) ആദ്യ പോസ്റ്റിൽ തന്നെ നയം വ്യക്തമാക്കി. 'നിക്ഷേപ സാധ്യതയുമായി  ബന്ധപ്പെട്ട വിവരങ്ങൾ മാത്രം ഷെയർ ചെയ്യാനുള്ള ഗ്രൂപ്പാണിത്. മറ്റൊന്നും ഷെയർ ചെയ്യരുത്'. ആളുകളെയെല്ലാം ചേർത്ത് പത്ത് മിനിട്ട് കഴിഞ്ഞിട്ടില്ല. ആദ്യത്തെ വീഡിയോ എത്തി. ഏതോ ഒരു മത നേതാവിന്റെ പ്രഭാഷണമാണ്. നിക്ഷേപം എങ്ങിനെ നടത്തണം എന്നതിന്റെ മതവിധികൾ വല്ലതുമാകും എന്ന് കരുതി തുറന്ന് നോക്കിയപ്പോൾ മറ്റൊരു മതഗ്രൂപ്പിന്റെ നേതാവിനെ പുളിച്ച തെറിയിൽ അഭിഷേകം ചെയ്യുന്നതാണ്. കൊടുങ്ങല്ലൂർ ഭരണിയുടെ ഭാഷയിൽ കരഘോഷങ്ങൾ ഏറ്റുവാങ്ങിയുള്ള പ്രഭാഷണം. അത് ഡിലീറ്റ് ചെയ്യുമ്പോഴേക്ക് അടുത്തത്‌ എത്തി. അന്റാർട്ടിക്കയിൽ ഒരു ഹിമക്കരടി ചാടാൻ കഴിയാതെ കുടുങ്ങിക്കിടക്കുന്നു. അടിയന്തിരമായി വല്ലതും ചെയ്തിട്ടില്ലെങ്കിൽ നിക്ഷേപം വെള്ളത്തിലാകുമെന്നർത്ഥം... പിന്നീടെത്തിയത്  കേന്ദ്ര മന്ത്രിമാരുടെ പേരും അവരുടെ വിലാസവും ടെലിഫോണ്‍ നമ്പറും. ദോഷം പറയരുതല്ലോ, പ്രധാനമന്ത്രി മൻമോഹൻ സിംഗ് തന്നെയാണ്. മാറ്റമൊന്നും സംഭവിച്ചിട്ടില്ല. നാലാമതെത്തിയത് ഒരു പ്രസവ വാർത്തയാണ്. 'നാജു പ്രസവിച്ചു. പെണ്‍കുട്ടി. അൽ ഹംദുലില്ലാ'.. ആരാണ് നാജു എന്ന് ചോദിക്കരുത്.. ഏതോ ഒരു നാജു. എവിടെയോ പ്രസവിച്ചു.  ആ  വിവരം ഉടനെ ഈ ഗ്രൂപ്പിൽ ഒന്ന് അറിയിച്ചേക്കാമെന്ന് ഒരുത്തന് തോന്നി. അത്ര തന്നെ.  ഹാലിയുടെ കോമറ്റ് പോലെ നൂറ്റാണ്ടിൽ വല്ലപ്പോഴും വരുന്ന അപൂർവ പ്രതിഭാസമാണല്ലോ ഈ പ്രസവം എന്ന് പറയുന്നത്. ഇങ്ങനെ ഒരു ദിവസത്തിനുള്ളിൽ ഏതാണ്ട് അമ്പതിലധികം മെസ്സേജുകൾ.. പടച്ചോന്റെ കൃപ കൊണ്ട് നിക്ഷേപവുമായി ബന്ധപ്പെട്ട ഒരൊറ്റ മെസ്സേജും ആ ഗ്രൂപ്പിൽ ഇതുവരെ വന്നിട്ടില്ല. അഡ്മിനെ ഒരു ദിവസം വഴിയിൽ വെച്ച് കണ്ടപ്പോൾ ഞാൻ ചോദിച്ചു.. എങ്ങനുണ്ട്.. എങ്ങനുണ്ട്.. കിട്ടിയ മറുപടി ഞാനിവിടെ എഴുതുന്നില്ല. ഇതാണവസ്ഥ. മിക്കവാറും വാട്സ്ആപ്പ് ഗ്രൂപ്പുകളുടെ സ്ഥിതിയിതാണ്. ജോയിൻ ചെയ്‌താൽ ചെയ്തവൻ പെട്ടു...

ആരും ഒന്നും വായിക്കുകയോ കാണുകയോ ചെയ്യുന്നില്ല. എന്നാൽ എല്ലാവരും കയ്യിൽ കിട്ടുന്നതെന്തും   എല്ലാവർക്കും ഷെയർ ചെയ്തു കൊടുക്കുന്നു. ഞാൻ നിങ്ങൾക്ക് ഇന്നലെ അയച്ചത് നിങ്ങൾ എനിക്ക് ഇന്ന് ഇങ്ങോട്ട് അയച്ചു തരും. നിങ്ങൾക്ക് എന്താണ് അയച്ചു തന്നതെന്ന് എനിക്കോ എനിക്ക് എന്താണ് അയച്ചതെന്ന് നിങ്ങൾക്കോ ഓർമയില്ല. പക്ഷേ ദിവസം ചുരുങ്ങിയത് പത്തെണ്ണം വീതം പരസ്പരം ഷെയർ ചെയ്യുന്നുണ്ട്. ഒരുതരം ഷെയർ മാനിയ. അറ്റ കൈക്ക് ഉപ്പ് തേക്കാത്ത വേന്ദ്രന്മാർ പോലും ഷെയറിംഗിന്റെ കാര്യത്തിൽ ഉദാരമനസ്കരാണ്‌. സരിതയുടെ ഐറ്റമാണ് കിട്ടിയതെങ്കിൽ അതും വെച്ച് ചാമ്പും.. മുന്നും പിന്നും നോട്ടമില്ല. ഷെയർ ചെയ്യണം. അത്ര തന്നെ. തന്റെ കയ്യിൽ കിട്ടിയ സാധനം മറ്റുള്ളവർക്ക് കൊടുക്കാൻ പറ്റുന്നതാണോ, അത് ഷെയർ ചെയ്തിട്ട് അവന് വല്ല ഉപകാരവുമുണ്ടോ എന്നൊന്നും നോട്ടമില്ല. ദിവസം പത്തു വീഡിയോ എങ്കിലും ഷെയർ ചെയ്ത് കിട്ടുന്നവരുടെ മെമ്മറി ഫുള്ളാക്കണം. ദാറ്റ്സ് ഓൾ.. "ഈ മെസ്സേജ് പത്ത് ഗ്രൂപ്പുകളിൽ ഷെയർ ചെയ്‌താൽ നിങ്ങൾക്ക് ജോലിയിൽ കയറ്റം കിട്ടും. നാളെ ലോട്ടറി അടിക്കും. മറ്റന്നാൾ ഭാര്യ ഗർഭിണിയാകും. ഷെയർ ചെയ്തില്ലെങ്കിൽ രണ്ട് ദിവസത്തിനകം നിങ്ങളെ പാമ്പ് കടിക്കും. ഇത് ഷെയർ ചെയ്യാതെ പരിഹസിച്ച ഒരാൾ കോഴിക്കോട് നീർക്കോലി കടിച്ചു മരിച്ചു. കാസർക്കോട് വേറൊരാൾ ചാണകക്കുഴിയിൽ വീണു" ഇങ്ങനെ പല വിധ പ്രലോഭനങ്ങളുമായാണ് മെസ്സേജുകൾ വരിക. തലയ്ക്കകത്ത്‌ ചാണകക്കുഴിയുള്ള വട്ടന്മാർ ഉടനേ അതങ്ങ് ഷെയർ ചെയ്യും.

പൊട്ടന്മാരെ പറ്റിക്കാൻ ചില വിരുതന്മാർ തയ്യാറാക്കി വിടുന്ന ഹോക്സ് മെയിലുകൾ ചൂടോടെ ഷെയർ ചെയ്യുന്നവരാണ് പലരും. ഉദാഹരണമായി കഴിഞ്ഞ ദിവസം  എനിക്കൊരാൾ അയച്ചു തന്ന മെസ്സേജ് നോക്കാം. എ ടി എമ്മിൽ നിന്ന് കാശെടുക്കുമ്പോൾ കള്ളൻ പിടിച്ചാൽ പിൻ നമ്പർ തലതിരിച്ച് അടിച്ചാൽ മതി. ഉടനെ  പോലീസിൽ വിവരമെത്തും. മാത്രമല്ല, കാശ് എ ടി എമ്മിൽ നിന്ന് പുറത്ത് വരാതെ കുടുങ്ങിക്കിടക്കുകയും ചെയ്യും. ചിത്രസഹിതമാണ് മെസ്സേജ്. കൂടെ, ഉടനെ ഷെയർ ചെയ്യൂ, സുഹൃത്തുക്കളെ രക്ഷിക്കൂ എന്നൊരു കല്പനയും. നാലഞ്ചു വർഷമായി ഓടിക്കൊണ്ടിരിക്കുന്ന ഒരു എമണ്ടൻ വങ്കത്തമാണിത്. പണ്ട് അമേരിക്കയിൽ ഏതോ ഒരു ചങ്ങാതി ഇത്തരത്തിൽ ഒരു സോഫ്റ്റ്‌വെയർ ഉണ്ടാക്കിയിട്ടുണ്ട് എന്നതൊഴിച്ചാൽ ഈ സംവിധാനം ഇന്ത്യയിലെന്നല്ല, എവിടെയും എ ടി എമ്മുകളിൽ നിലവിലില്ല. പിൻനമ്പർ തലതിരിച്ച് അടിക്കുന്ന സമയം കൊണ്ട് തലതിരിച്ച് കള്ളന്റെ തലമണ്ടക്ക്  അടിക്കാൻ പറ്റിയാൽ രക്ഷപ്പെടാൻ സാധ്യതയുണ്ട്, അതൊന്ന് പരീക്ഷിച്ചോളൂ എന്ന് അയാൾക്ക് ഞാൻ മറുപടി നല്കി. പിന്നീടയാൾ എനിക്ക് മെസ്സേജുകൾ അയച്ചിട്ടില്ല.

അനാവശ്യ വീഡിയോകളും ചിത്രങ്ങളും കൊണ്ട് മെമ്മറി നിറയുമെന്നത് മാത്രമല്ല, ചിലപ്പോൾ കാശും പോയിക്കിട്ടും. എന്റെ സുഹൃത്ത് നൂറ് റിയാൽ മൊബൈലിൽ ചാർജ് ചെയ്ത ശേഷം സുഖമായി കിടന്നുറങ്ങിയതാണ്. രാവിലെ നാട്ടിലേക്ക് വിളിക്കാൻ നോക്കുമ്പോൾ ബാലൻസ് ഇരുപത്തിരണ്ട് റിയാൽ.. ബാക്കി പൈസയൊക്കെ വാട്സ് ആപ്പ് വിഴുങ്ങിയതാണ്. വൈഫും വൈഫൈയും കൂടെയില്ലാത്തയാളാണ്. പക്ഷേ മൊബൈൽ ഡാറ്റ ഓണ്‍ ആയിരുന്നു. പുള്ളി മെമ്പറായ അറുപതിനായിരത്തി പതിനാറ് ഗ്രൂപ്പുകളിൽ നിന്നുള്ള മെസ്സേജുകളും വീഡിയോകളും നേരം വെളുക്കുന്നതിനു മുമ്പ് തന്നെ ലോഡായി റെഡിയായിട്ടുണ്ട്. ഏതോ മുജ്ജന്മ ഭാഗ്യം കൊണ്ടാണ് ഇരുപത്തിരണ്ട് റിയാൽ ബാക്കിയായത്.

മിംസ് ആശുപത്രിയിൽ അത്യാസന്ന നിലയിൽ കിടക്കുന്ന കുഞ്ഞിന് ഒ നെഗറ്റീവ് രക്തം വേണം. ലേഡി ഡോക്ടറുടെ നമ്പറും വിലാസവും അടക്കമാണ് മെസ്സേജ് പറപറക്കുന്നത്. "ഇതുവരെ കണ്ടുപിടിക്കപ്പെടാത്ത പ്രത്യേക രോഗമാണ്. പന്ത്രണ്ട് മണിക്കൂറിനുള്ളിൽ രക്തം കിട്ടിയില്ലെങ്കിൽ കുട്ടി മരിക്കും". കണ്ണീരൊലിച്ച് വീഴുന്ന തരത്തിലാണ് എഴുത്ത്. പക്ഷേ ഈ പന്ത്രണ്ട് മണിക്കൂർ എന്നത് കഴിഞ്ഞ കൊല്ലം ഓപ്പറേഷൻ നടക്കുന്നതിന്റെ തലേന്ന് രാത്രിയിലെ പന്ത്രണ്ട് മണിക്കൂറാണ്.. കൊല്ലം ഒന്ന് കഴിഞ്ഞിട്ടും വാട്സ് ആപ്പിലെ പന്ത്രണ്ട് മണിക്കൂർ തീർന്നിട്ടില്ല. പന്ത്രണ്ട് കൊല്ലം കഴിഞ്ഞാലും ഈ മെസ്സേജ് ചൂടോടെ ഓടും.  ഇപ്പറയുന്ന കുട്ടി മരിച്ചിട്ട് തന്നെ ആറു മാസം കഴിഞ്ഞു. എന്നിട്ടും ഡോക്ടറുടെ മൊബൈലിലേക്ക് വിളിയോട് വിളിയാണ്. കാരണം 'ഷെയർ ബിസിനസ്സ്' മുറക്ക് നടന്നു കൊണ്ടിരിക്കുകയാണ്. രക്തം കൊടുക്കാൻ തയ്യാറായി വിളിക്കുന്നവരാണെന്ന് കരുതരുത്. കുട്ടിയുടെ അസുഖമെന്താണ്?, അവർ എവിടുത്തുകാരാണ് എന്നൊക്കെ അറിയാനുള്ള 'ജിജ്ഞാസ' കൊണ്ട് വിളിക്കുന്നവരാണ്!!.. കൂട്ടത്തിൽ ലേഡി ഡോക്ടറെ പരിചയപ്പെടലും നടക്കും!!!.  ഗതിയില്ലാതെ ഡോക്ടർ മൊബൈൽ നമ്പർ മാറ്റി. ഇനി മേലാൽ രോഗി ചത്താലും വാട്സ്ആപ്പിലേക്ക് നമ്പർ കൊടുക്കില്ല എന്ന് ശപഥവും ചെയ്തു.

സിനിമാ നടി ഭാവനയുടെ കുട്ടിക്കാലത്തെ ഒരു ചിത്രം വെച്ച് ഈ കുട്ടിയെ അറിയുന്നവർ ഉടൻ ബന്ധപ്പെടുക എന്നൊരു പോസ്റ്റ്‌ കഴിഞ്ഞ ദിവസം കണ്ടു. കാസർക്കോട് നാടോടികളുടെ കയ്യിലാണത്രേ 'ഭാവന'യുള്ളത്. ഉടൻ ഷെയർ ചെയ്യൂ, നിങ്ങളുടെ ഒരു ഷെയർ ഒരമ്മക്ക് മകളെ തിരിച്ചു കിട്ടാൻ കാരണമായേക്കും എന്ന് തേനൊലിപ്പിക്കുന്ന ഒരടിക്കുറിപ്പുമുണ്ട് താഴെ. കയ്യിൽ കിട്ടേണ്ട താമസം ഇത്തരം അസംബന്ധങ്ങൾ ഷെയർ ചെയ്യാനും കുറെ പൊട്ടന്മാർ. ഞങ്ങളുടെ നാട്ടിൽ  നിന്ന് ആറു മാസം മുമ്പ് ചാടിപ്പോയ പെണ്ണിന്റെ കഥ ഈയിടെയാണ് വൈറലായത്. ഒരു 'പരോപകാരി' ആ പഴയ വാർത്തയെടുത്ത് വാട്സ്ആപിൽ തേച്ച് പിടിപ്പിച്ചതാണ്. കൂട്ടത്തിൽ ഏതോ ഒരു വിദ്വാൻ ആ വാർത്തയോടൊപ്പം നെറ്റിൽ നിന്ന് കിട്ടിയ പല ചൂടൻ രംഗങ്ങളും കൂട്ടിച്ചേർത്ത് ഒരു കീച്ചങ്ങ് കീച്ചി.. ഞരമ്പുകൾക്ക് പ്രിയപ്പെട്ട വാർത്ത.. മാത്രമല്ല കഥാപാത്രം ഗൾഫ്കാരന്റെ ഭാര്യയും. . പോരേ പൂരം. സംഗതി വൈറലോട്‌ വൈറൽ..  ഇത്തരം ഇക്കിളി പീസുകളാണ് കേരളത്തിൽ പെട്ടെന്ന് വൈറലാകുന്നത്. സരിതയുടെ ക്ലിപ്പുകൾ മൊബൈലുകളിൽ നിന്ന് മൊബൈലുകളിലേക്ക് പറന്ന വേഗത കണക്ക് കൂട്ടിയാൽ ലോകത്ത് ഏറ്റവും കൂടുതൽ ഞരമ്പ്‌ രോഗികൾ തിങ്ങിപ്പാർക്കുന്നത് കേരളത്തിലാണെന്ന് ഉറപ്പിച്ച് പറയാൻ പറ്റും. സുനാമി പോലെയെത്തിയ സരിതയുടെ വാട്സ് ആപ്പിന്റെ കാര്യം മുമ്പ് ഈ ബ്ലോഗിൽ എഴുതിയിട്ടുണ്ട്.

ഒരു ലേഖനത്തോടോ കുറിപ്പിനോടോ ചെയ്യുന്ന സാമാന്യ മര്യാദയാണ് അത് ഷെയർ ചെയ്യുമ്പോൾ എഴുതിയ വ്യക്തിയുടെ പേരോ പ്രസിദ്ധീകരിച്ച മാധ്യമത്തിന്റെ പേരോ അതിനൊപ്പം ചേർക്കുക എന്നത്. അത് ഒഴിവാക്കി ഷെയർ ചെയ്യുക എന്നത് എഴുത്തിന്റെ സംസ്കാരത്തോട്‌ ചെയ്യുന്ന വലിയ ക്രൂരതയാണ്. എന്നാൽ ഇന്ന് നടക്കുന്ന വാട്സ്ആപ്പ് ഷെയറുകളിൽ ഭൂരിഭാഗവും അങ്ങിനെയുള്ളതാണ്. ആരെഴുതി, എവിടെയെഴുതി, എപ്പോൾ എഴുതി?  ഒരു  വിവരവും കാണില്ല. അതുകൊണ്ട് തന്നെ ഒന്നിന്റെയും നിജസ്ഥിതി പരിശോധിക്കാനും കഴിയില്ല. ഈ ബ്ലോഗിൽ എഴുതിയ പല പോസ്റ്റുകളും തിരിഞ്ഞ് മറിഞ്ഞ് എനിക്ക് തന്നെ കിട്ടാറുണ്ട്. 'പ്രവാചകനെ സ്നേഹിച്ചോളൂ, പക്ഷെ മനുഷ്യരെ കൊല്ലരുത്' എന്ന പോസ്റ്റാണ് അവസാനമായി ഇങ്ങനെ കിട്ടിയത്. അയച്ചത് മറ്റാരുമല്ല, എന്റെ അളിയൻ തന്നെ. അതിന്റെ താഴെ ഒരു കമന്റും. "നല്ല ചിന്ത. എഴുതിയത് ആരാണെന്ന് അറിയില്ല". ഞാൻ പറഞ്ഞു. ന്റെ പൊന്ന് ചങ്ങായീ, ഇത് ഞാൻ തന്നെ എഴുതിയതാണ്..അളിയനാണെന്ന് കരുതി ഇമ്മാതിരി ആപ്പ് വെക്കരുത് :) .

വാട്സ്ആപ്പിൽ മിനിമം പാലിക്കേണ്ട ചില മര്യാദകൾ ചുരുക്കിപ്പറഞ്ഞുകൊണ്ട് അവസാനിപ്പിക്കുകയാണ്. എന്ത് ഷെയർ ചെയ്യുന്നതിന് മുമ്പും അതിന്റെ സത്യാവസ്ഥ കഴിയുന്നത്ര ഉറപ്പ് വരുത്താൻ ശ്രമിക്കുക. രണ്ട് വർഷം പഴക്കമുള്ള 'ജോലി ഒഴിവുണ്ട്'   'രക്തം ആവശ്യമുണ്ട്' 'വിവാഹാലോചനകൾ ക്ഷണിക്കുന്നു' തുടങ്ങിയ സന്ദേശങ്ങൾ ഷെയർ ചെയ്യാതിരിക്കുക. ഇതൊക്കെ കണ്ട് ഏതെങ്കിലും പാവങ്ങൾ  പെണ്ണ് ആലോചിച്ചു ചെല്ലുമ്പോൾ നായിക ആറു മാസം ഗർഭിണിയായിരിക്കും, ഒക്കത്ത് വേറൊരു കുഞ്ഞുമുണ്ടാകും. വെറുതേ ആളുകളെ വട്ടം കറക്കാതിരിക്കുക. ഒരു ലേഖനമോ കുറിപ്പോ ഷെയർ ചെയ്യുമ്പോൾ അതെഴുതിയ ആളുടെ പേര് ചേർക്കുക. അടിയന്തിര സന്ദേശങ്ങൾ ഷെയർ ചെയ്യുമ്പോൾ എഴുതുന്ന തിയ്യതി വെക്കുക. ഏതെങ്കിലും ഗ്രൂപ്പിലേക്ക് ഒരു മെസ്സേജ് അയക്കുന്നതിന് മുമ്പ് ആ ഗ്രൂപ്പിന്റെ ലക്ഷ്യവും ഉദ്ദേശ്യവും എന്താണെന്ന് മനസ്സിലാക്കി അതിനു അനുഗുണമായത് മാത്രം അങ്ങോട്ട്‌ അയക്കുക. ബസറയിലേക്ക് കാരക്ക കയറ്റാതിരിക്കാൻ പ്രത്യേകം ശ്രദ്ധിക്കുക.  ഒരു ഫോട്ടോയോ വാർത്തയോ ഷെയർ ചെയ്യുമ്പോൾ അതാരെയെങ്കിലും വ്യക്തിപരമായി അപഹസിക്കുന്നതോ പരിഹസിക്കുന്നതോ അല്ലെന്ന് ഉറപ്പ് വരുത്തുക. ആരുടേയും സ്വകാര്യതയെ ആഘോഷിക്കുവാൻ അവരെത്ര  മോശക്കാരായാലും ശരി, നമുക്കവകാശമില്ലെന്ന് ഓർക്കുക, വർഗീയതയും വിദ്വേഷവും പ്രചരിപ്പിക്കുന്ന സന്ദേശങ്ങൾ ഒരിക്കലും കൈമാറാതിരിക്കുക. ഒരു സന്ദേശത്തിന്റെ കൂടെയും ഇത് പത്ത് പേർക്ക് നിർബന്ധമായും ഷെയർ ചെയ്യണം എന്നെഴുതാതിരിക്കുക. ഷെയർ ചെയ്യേണ്ട ഉരുപ്പടിയാണ് എന്ന് വായിക്കുന്നവർക്ക് തോന്നിയാൽ നിങ്ങൾ പറയാതെ തന്നെ അവരത് ഷെയർ ചെയ്തോളും. ഇപ്പറഞ്ഞതിനെയെല്ലാം ഒറ്റവാചകത്തിൽ ഒതുക്കിപ്പറഞ്ഞാൽ അതിതാണ്, ഒന്നും ഓവറാക്കാതിരിക്കുക, ആരെയും ബെർപ്പിക്കാതിരിക്കുക.

Related Posts
വാട്സ് ആപ്പിലെ സരിത

Recent Posts
ഓരോ പൗരനും ഒരു പത്രമായി മാറുന്ന കാലം
ഉർവശിയെന്ന 'പ്രമുഖ'യും പത്രങ്ങളുടെ റിപ്പോർട്ടിംഗ് രീതിയും
മാറേണ്ടത് നമ്മളാണ്, ബി ബി സി യല്ല

29 comments:

  1. ബഷീര്ക്ക... വളരെ നല്ല പോസ്റ്റ്‌ ..... എല്ലാവരെയും നമുക്ക് മാറ്റാൻ പറ്റൂല .... അത് കൊണ്ട് വാട്സപ്പ് ഉപദ്രവങ്ങളിൽ നിന്ന് എങ്ങനെ രക്ഷപ്പെടാം എന്ന് കൂടെ കൂട്ടിച്ചേർത്താൽ നന്നാവും... എന്റെ വാട്സപ്പിൽ ഓട്ടോ ഡൌണ്‍ലോഡ് ഇല്ല... അതങ്ങ് ഓഫ്‌ ചെയ്തു.. ഡെയിലി 10 gb ക്ലീൻ ചെയ്യേണ്ട അവസ്ഥ ആയിരുന്നു മുംബ്... ഇപോ നോ പ്രോബ്ലം.....

    ReplyDelete
  2. ഈ കൂട്ടത്തിൽ വരുന്ന ഒന്നാണ് Petrol Price in different countries

    ReplyDelete
  3. ഈ കൂട്ടത്തിൽ വരുന്ന ഒന്നാണ് Petrol Price in different countries

    ReplyDelete
  4. മല്ലുസില്‍ പലരും ഇങ്ങിനോയോക്കെയാണ്. മുത്രം ഒഴിക്കരുതെന്ന ബോര്‍ഡ് കാണുമ്പോള്‍ മുത്രശങ്ക ഉണ്ടാവുകയും അവിടെത്തന്നെ പരിപാടി ഒപ്പിക്കുകയുംചെയ്യും. നോ പാര്‍ക്കിംഗ് എഴുതി വെച്ചെത്കണ്ടെന്ന ഭാവം തന്നെനടിക്കില്ല. മാലിന്യങ്ങളും മറ്റും പൊതു വഴിയില്‍ തള്ളാന്‍ പ്രത്യേക താല്‍പര്യം കാണിക്കും. പരസ്പരം തെറി പറയാന്‍ അവസരം കിട്ടിയാല്‍ പിന്നെ പറയുകയും വേണ്ട. ഇങ്ങിനെ പൊതുവേ കാണുന്ന, കേള്‍ക്കുന്ന കാര്യങ്ങള്‍ സാമുഹ മാധ്യമങ്ങളില്‍ കയറുമ്പോള്‍ അതിലും മികവോടെ പ്രകടിപ്പിക്കുന്നു. അല്ലെങ്കിലും സംസ്കാരം എന്നൊന്നുള്ളത് കുടെപ്പിറപ്പല്ലേ.........

    ReplyDelete
  5. ഷെയർ മാനിയയെ ഒരു സാമൂഹ്യസേവനമായി കണക്കാക്കുന്ന പാവങ്ങളുടെ തലക്ക് കിട്ടിയ ഒരു അടിയായിപ്പോയി ഈ പോസ്റ്റ്‌. സ്വയം മെനഞ്ഞെടുത്ത വിഡ്ഢിത്തം, അനേകം ആൾക്കാരെ മണ്ടന്മാരാക്കി, ലോകം മൊത്തം പറന്നു നടക്കുന്നത് കാണുമ്പോൾ ആത്മസംതൃപ്തി അനുഭവിക്കുന്ന ഒരുപാട് പേരുണ്ട് നമുക്ക് ചുറ്റും.
    ഓ, പറയാൻ മറന്നു.
    നേപ്പാളിൽ ഇനി ഒരിക്കലും ഭൂകമ്പം ഉണ്ടാവില്ലെന്ന് നാസ പ്രഖ്യാപിച്ചു. ഐ.എസ്.ആർ.ഒ ഈ വാർത്ത സ്ഥിരീകരിച്ചു. ഈ സദ്‌വാർത്ത പരമാവധി ഷെയർ ചെയ്യൂ. പ്ലീസ്.

    ReplyDelete
    Replies
    1. >> നേപ്പാളിൽ ഇനി ഒരിക്കലും ഭൂകമ്പം ഉണ്ടാവില്ലെന്ന് നാസ പ്രഖ്യാപിച്ചു. ഐ.എസ്.ആർ.ഒ ഈ വാർത്ത സ്ഥിരീകരിച്ചു. ഈ സദ്‌വാർത്ത പരമാവധി ഷെയർ ചെയ്യൂ. പ്ലീസ്. << Ha..ha.. Kidu

      Delete
    2. ഈ സോഷ്യല്‍ മീഡിയ ഉള്ളത് കൊണ്ട് ഓരോ മതക്കാര്‍ക്കും വലിയ അനുഗ്രഹമാണ്. നമ്മുടെകൌമിനെ തന്നെ നോക്കൂ

      ഒരിക്കല്‍ പോലും പള്ളിയില്‍ പോയില്ലെങ്കിലും നിസ്കാരത്തിന്‍റെ മഹത്വം പറയുന്ന പോസ്റ്റുകള്‍ നിറച്ചു മറ്റുള്ളവരുടെ മുമ്പില്‍ വലിയ ഭക്തനാകാം

      വീട്ടില്‍ വരുന്ന പാവപ്പെട്ടവന് ഒരു ചില്ലിക്കാശു കൊടുത്തില്ലെങ്കിലും ദൈന്യതയുടെ ചിത്രങ്ങള്‍ എന്നും പോസ്റ്റ് ചെയ്ത് വലിയ ധര്മ്മിഷ്ട പരിവേഷം നേടാം.

      സ്വന്തം വീടിന്റെ പകുതി ഒഴിഞ്ഞു കിടക്കുമ്പോഴും അയല്ക്കാ രന്‍ മുസ്ലിം അന്തിയുറങ്ങാന്‍ കൂരയില്ലാതെ നരകിക്കുന്നത് കണ്ടില്ലെന്നു നടിക്കുന്നവര്‍ പോലും നടുക്കടലില്‍ കിടക്കുന്ന രോഹിന്ഗ്യ ന്‍ മുസ്ലിമിന്റെ‍ നരകിക്കുന്ന ഫോട്ടോ ഷെയര്‍ ചെയ്തു പുണ്യം നേടാം.

      ചിലരുടെ ഫേസ് ബുക്ക് അക്കൌണ്ട് നോക്കിയാല്‍ തോന്നും മരിച്ചു ചെന്ന് പടച്ചോന്‍ നന്മ തിന്മയുടെ കണക്കു നോക്കുന്നത് ഫേസ് ബുക്ക് അക്കൌണ്ട് നോക്കിയാണെന്നു

      Delete
  6. ഉപകാരം കാരണം വലിച്ചെറിയാൻ വയ്യ, ഉപദ്രവം കാരണം അടുപ്പിക്കാനും വയ്യ.... അതാണ്‌ പലരുടെയും ഇന്നത്തെ അവസ്ഥ..

    ReplyDelete
  7. സംഗതിയൊക്കെ വളരെ ശരിയാ... മെസ്സേജ് അയക്കുന്നയാളുടെ വകതിരിവാണ് ഇതിൽ ഏറ്റവും പ്രധാനമെങ്കിലും ചില കാര്യങ്ങൾ ശ്രദ്ധിച്ചാൽ മെസ്സേജ് കിട്ടുന്നയാൾക്ക് അത്യാവശ്യം കാശും സമയവും ലാഭിക്കാം.

    വൈഫൈ ഇല്ലാതെ ഡാറ്റ പാക്കേജ് ഉപയോഗിക്കുമ്പോൾ വീഡിയോകളും ചിത്രങ്ങളും ഡൌണ്‍ലോഡ് ആകാതിരിക്കാനുള്ള കിടിതാപ്പ് വാട്ട്‌സപ്പിൽ തന്നെയുണ്ട്‌. അതേപോലെ സമയവും സൗകര്യവും ഇല്ലാത്തപ്പോൾ ഗ്രൂപ്പ്‌ മെസ്സേജുകൾ ശല്യപ്പെടുത്താതെയിരിക്കാൻ അതു മ്യൂട്ട് ചെയ്യാൻ പറ്റും. ഞരമ്പുരോഗികളുടെ നമ്പർ ബ്ലോക്ക്‌ ചെയ്യാനുള്ള സംവിധാനമുണ്ട്. ഫോണിലേക്ക് വരുന്ന ഡാറ്റ സേവ് ചെയ്യാതിരിക്കാനുള്ള ഓപ്ഷൻ തിരഞ്ഞെടുത്താൽ ഫോണിൻറെ സ്ടോറേജ് സ്പേസ് ലാഭിക്കാം.

    ReplyDelete
  8. ഒന്നും ഓവറാക്കാതിരിക്കുക, ആരെയും ബെർപ്പിക്കാതിരിക്കുക... ഗ്രൂപിന്നു പുറത്തു പോകണംന്നു വെച്ചാ അതിലുള്ളവരെ ബെര്‍പ്പിക്കലും ആവും.. Media auto-download ആണ് ഏക ആശ്വാസം..

    ReplyDelete
  9. മലയാളികള്‍ മനസ്സലിവിലും പ്രസിദ്ധരാണല്ലോ!
    ആശംസകള്‍

    ReplyDelete
  10. കിട്ടുന്ന ഇത്തരം കാര്യങ്ങളിലെ ലോജിക്കോ യധസ്തിഥിയോ അയച്ച ആളോട് ചോദിച്ച് പോയാൽ
    "മാഷെ.. എനിക്ക് കിട്ടിയതു ഞാൻ അയച്ചു എനേ ഉള്ളൂ. താല്പര്യമെങ്കിൽ താങ്കൾക്ക് വായിക്കാം. അല്ലാതെ അതിന്റ് കാര്യം പറഞ്ഞു എന്റെ മെക്കട്ട് കയറാൻ നിക്കണ്ടാ"
    വളരെ ആതികാരികമായ ഈ മറുപടി കയ്യിലുള്ളപ്പോ എന്ത് വങത്തരവും ആർക്കും അയക്കാലോ.

    എങ്ങാനും ബിരിയാണി കിട്ടിയാലോ എന്ന മട്ടിലുള്ള സലീം കുമാറുമാരാ നാമെല്ലാരും.. പോഴന്മാർ..!

    ReplyDelete
  11. ചിലർക് വായിക്കുക പോലും ഇല്ല വല്ല സാധനവും കയറ്റി അയക്കുന്ന പൊലെ കയറ്റി അയക്കും എല്ലാ ഗ്രൂപ്പിലെക്കും

    ReplyDelete
  12. ഇപ്പോൾ പുതിയ trend ബർമമ യിലെ photos ആണു, ചൈന യിലെ ഭൂകമ്പതിന്റെ യും, ആഫ്രിക്കയിൽ ചുട്ടു കൊന്നതും, എന്തിനു പറയണം കേരളത്തിലെ ഒരു ബൈക്ക് അഭ്യാസം പൊലും ഈ മണ്ണൂണ്ണീകൾ റോഹിംഗ്യ മുസ്ലിങ്ങളെ രക്ഷിക്കൂ എന്നും പറഞ്ഞു മോങ്ങി തീർക്കുകയാ.... ചിത്രത്തിന്റെ ആധികാരികത എന്താണെന്ന് പൊലും അറിയാതെ...

    ReplyDelete
  13. സത്യം.... ഞാനും മീഡിയാ ഓട്ടോ ഡൗൺലോഡ് ഒഴിവാക്കി... പിന്നെ മെസ്സേജിനൊന്ന് എന്ന നിലക്കുള്ള കൂക്കി വിളി (നോട്ടിഫിക്കേഷൻ) മ്യൂട്ട് ചെയ്തിട്ടും ഉണ്ട്.... വിരലിലെണ്ണാവുന്നവ മാത്രമേ ഷെയർ ചെയ്തിട്ടും ഉണ്ടാവുകയുള്ളൂ......

    ഗ്രൂപ്പുകളുടെ അതിപ്രസരം തന്നെ വില്ലൻ..... ഉറങ്ങിക്കിടക്കുന്ന ആളുകൾ എപ്പോഴെങ്കിലും അതിലെ അംഗങ്ങൾ തമ്മിൽ "ചില്ലറ" അസ്വാരസ്യങ്ങൾ ഉണ്ടാവുമ്പൊഴേക്കും ചാടി എഴുന്നേറ്റ് അതേറ്റു പിടിക്കും... പിന്നെ തുരുതുരാ മെസ്സേജുകളുടെ പൂരമാവും... പലപോഴും ലെഫ്റ്റ് അടിച്ചു പോരാറാണു പതിവ്...

    ReplyDelete
  14. താങ്കളുടെ ഈ ബ്ലോഗ് പോസ്റ്റ് ഇപ്പൊ വാട്സപ്പിൽ ചൂടോടെ താഴെ " ഇത് ആര് എഴുതിയതാണ് എന്ന് അറിയില്ല" എന്ന കുറിപ്പോടെ ഷെയർ ചെയ്തു കൊണ്ടിരിക്കുന്നു, ഇന്ന് രാവിലെ എനിക്ക് കിട്ടിയത എന്റെ നാട്ടുകാരന്റെ അടുത്ത് നിന്ന്, അവനോട് ചോദിച്ചപ്പൊ അവൻ പറയാ, ഞാൻ ഇതിന്റെ നാല് വരി മാത്രേ വായിച്ചൊള്ളൂ, ഞാൻ പറഞ്ഞപോഴ പുള്ളി വായിക്കുന്നത്, എനിട്ട് നിങ്ങളെ ബ്ലോഗ് ലിങ്ക് കൂടി കൊടുത്തപ്പൊ എന്നെ വിളിച്ച് പറയാം .... കൊള്ളാലോ!!! ഇത് ഇയാൾ എഴുതിയതാണോ? ഹൊ എനിക്കിത് മറ്റൊരാൾ അയച്ചു തന്നതാന്ന്......... ഇതാണ് സത്യം, ചുമ്മാ അങ്ങ് ഷെയർ, പോസ്റ്റിൽ പറഞ്ഞപോലെ തന്നെ..........
    https://www.facebook.com/photo.php?fbid=1015259168515001&set=p.1015259168515001&type=1&theater

    ReplyDelete
    Replies
    1. പടച്ചോനെ.. ഈ പോസ്റ്റിനും ആ ഗതി വന്നൂ, ല്ലേ..

      Delete
    2. എനിക്കും കിട്ടി നാലഞ്ച് തവണ. ഒന്നിലും എഴുതിയ വ്യക്തിയുടെ പേരോ ലിങ്കോ ഇല്ല.

      Delete
  15. 20 MB video with no description.

    പിന്നെ ഹാപ്പി ബര്‍ത്ത്ഡേ നാജു
    ഹാപ്പി ബര്‍ത്ത്ഡേ നാജു
    happy birthday naju
    hbd naju
    ഹാപ്പി ബര്‍ത്ത്ഡേ നാജു smiley smiley
    ഹാപ്പി ബര്‍ത്ത്ഡേ നാജു
    happy birthday naju




    ReplyDelete
  16. വാട്സ്ആപ്പിൽ മിനിമം പാലിക്കേണ്ട ചില മര്യാദകൾ: എന്ത് ഷെയർ ചെയ്യുന്നതിന് മുമ്പും അതിന്റെ സത്യാവസ്ഥ കഴിയുന്നത്ര ഉറപ്പ് വരുത്താൻ ശ്രമിക്കുക. രണ്ട് വർഷം പഴക്കമുള്ള 'കാണ്മാനില്ല' 'ജോലി ഒഴിവുണ്ട്' 'രക്തം ആവശ്യമുണ്ട്' ' തുടങ്ങിയ സന്ദേശങ്ങൾ ഷെയർ ചെയ്യാതിരിക്കുക. വിവാഹാലോചനകൾ ക്ഷണിക്കുന്നു എന്ന പോസ്റ്റ്‌ ഡേറ്റ് നോക്കി മാത്രം പോസ്റ്റ്‌ ചെയ്യുക ഏതെങ്കിലും പാവങ്ങൾ പെണ്ണ് ആലോചിച്ചു ചെല്ലുമ്പോൾ നായിക ആറു മാസം ഗർഭിണിയായിരിക്കും, ഒക്കത്ത് വേറൊരു കുഞ്ഞുമുണ്ടാകും. വെറുതേ ആളുകളെ വട്ടം കറക്കാതിരിക്കുക. ഒരു ലേഖനമോ കുറിപ്പോ ഷെയർ ചെയ്യുമ്പോൾ അതെഴുതിയ ആളുടെ പേര് ചേർക്കുക. അടിയന്തിര സന്ദേശങ്ങൾ ഷെയർ ചെയ്യുമ്പോൾ എഴുതുന്ന തിയ്യതി വെക്കുക. ഏതെങ്കിലും ഗ്രൂപ്പിലേക്ക് ഒരു മെസ്സേജ് അയക്കുന്നതിന് മുമ്പ് ആ ഗ്രൂപ്പിന്റെ ലക്ഷ്യവും ഉദ്ദേശ്യവും എന്താണെന്ന് മനസ്സിലാക്കി അതിനു അനുഗുണമായത് മാത്രം അങ്ങോട്ട്‌ അയക്കുക. ബസറയിലേക്ക് കാരക്ക കയറ്റാതിരിക്കാൻ പ്രത്യേകം ശ്രദ്ധിക്കുക. ഒരു ഫോട്ടോയോ വാർത്തയോ ഷെയർ ചെയ്യുമ്പോൾ അതാരെയെങ്കിലും വ്യക്തിപരമായി അപഹസിക്കുന്നതോ, പരിഹസിക്കുന്നതോ അല്ലെന്ന് ഉറപ്പ് വരുത്തുക. ആരുടേയും സ്വകാര്യതയെ ആഘോഷിക്കുവാൻ അവരെത്ര മോശക്കാരായാലും ശരി, നമുക്കവകാശമില്ലെന്ന് ഓർക്കുക, വർഗീയതയും വിദ്വേഷവും പ്രചരിപ്പിക്കുന്ന സന്ദേശങ്ങൾ ഒരിക്കലും കൈമാറാതിരിക്കുക. ഒരു സന്ദേശത്തിന്റെ കൂടെയും ഇത് പത്ത് പേർക്ക് നിർബന്ധമായും ഷെയർ ചെയ്യണം എന്നെഴുതാതിരിക്കുക. അങ്ങനെ എഴുതിയ ഒരു സന്ദേശവും ഷെയർ ചെയ്യാതിരിക്കുക. ഷെയർ ചെയ്യേണ്ട ഉരുപ്പടിയാണ് എന്ന് വായിക്കുന്നവർക്ക് തോന്നിയാൽ നിങ്ങൾ പറയാതെ തന്നെ അവരത് ഷെയർ ചെയ്തോളും. ഇപ്പറഞ്ഞതിനെയെല്ലാം ഒറ്റവാചകത്തിൽ ഒതുക്കിപ്പറഞ്ഞാൽ അതിതാണ്, ഒന്നും ഓവറാക്കാതിരിക്കുക, ആരെയും ബെർപ്പിക്കാതിരിക്കുക. ഇതിനൊക്കെ പുറമേ ഏതെങ്കിലും ഗ്രൂപ്പിൽ നിങ്ങൾ ചേർന്നാൽ നിങ്ങളുടെ മൊബൈലിൽ മീഡിയ ഓട്ടോ ഡൌണ്‍ലോഡ് ആക്കാതിരിക്കുക .For more reading : http://goo.gl/PVa5ov

    ReplyDelete
  17. ഈ അടുത്തൊരു മെസ്സേജ് വന്നു ..

    '' ഡോക്ടർ സർജറിക്കിടെ സേഫ്റ്റി പിൻ മറന്നു വെച്ചത് കൊണ്ട് അത്യപത്തിലായ കുഞ്ഞിന്റെ ഓപറേഷന് ലക്ഷങ്ങൾ വേണം . അത് കൊണ്ട് വാട്സ് അപ് കമ്പനി ഈ വാര്ത്ത ഓരോരുത്തർ ഷെയർ ചെയ്യുന്നതിനോടൊപ്പം ഒരു രൂപ കുട്ടിയുടെ സഹായത്തിനായി നല്കും . എല്ലാവരും എത്രയും പെട്ടെന്ന് ഷെയർ ചെയ്യുക എന്ന്''

    ഒരു കുഞ്ഞുന്റെ ദയനീയത വിറ്റ് കാശ് ആക്കേണ്ട ഗതികേട് മന സാക്ഷി ഉള്ള ഒരു മനുഷ്യനും ( മെസ്സേജ് ഉണ്ടാക്കിയവൻ ആ ഗണത്തിൽ പെട്ടവനല്ല ) ഉണ്ടെന്ന തോന്നുന്നില്ല . പിന്നെയല്ലേ ഒരു വാട്സ് അപിന്റെ അമരക്കാർ .. ആ ചിത്രം എടുത്ത് ഗൂഗിൾ ഇമേജ് സെർച്ച്‌ ചെയ്തു നോക്കുമ്പോഴുണ്ട് അതെ ഫോട്ടോ വെച്ച് നിരവധി വാർത്തകൾ .. വാർത്തകൾ പലതാണെങ്കിലും എല്ലാത്തിലും നിസ്സഹായയായ ആാ കുരുന്നിന്റെ ദൈന്യതയാര്ന്ന കണ്ണുകൾ ഉണ്ട് .

    '' കാള പെറ്റെന്ന് കേട്ടാൽ ഉടനെ ഷെയർ ചെയ്യുന്ന കാലമാണ് ''

    ReplyDelete
  18. മെസ്സേജും ഫോട്ടോയും ഒക്കെ ഡിലിറ്റ് ചെയ്തു മടുത്തു, ഇപ്പോള്‍ ചിലവന്മാരെ ബ്ലോക്കിയിട്ടുന്ദ്, വാട്സപ്പ് ചിലപ്പോള്‍ പാരയാണ്.. അതിലേറെ നല്ലതുമാണ്

    ReplyDelete
  19. ഈ പോസ്റ്റ്‌ വായിച്ചവരുടെ ഗ്രൂപ്പ്, ഇതില്‍ കമന്റ്‌ ചെയ്തവരുടെ ഗ്രൂപ്പ്, അതിനുള്ളില്‍ തന്നെ രാഷ്ട്രീയം പറഞ്ഞു പുറത്താക്കപ്പെട്ടവരുടെ വേറൊരു ഗ്രൂപ്പ്, അതിനുള്ളില്‍ മതവും ജാതിയും പറയാന്‍ വെവ്വേറെ ഗ്രൂപ്പ്... അല്ലാ, അങ്ങനെയെങ്കിലും കുറച്ചുപേര്‍ ഒരുമയോടെ നില്‍ക്കുമല്ലോ!

    ReplyDelete
  20. ഉചിതമായ പോസ്റ്റ്..., സത്യത്തിൽ വാട്ട്സാപ്പിൽ വരുന്ന ഓരോ കമന്റും അതയക്കുന്ന വ്യക്തിയുടെ വ്യക്തിത്തത്തെ പെട്ടെന്ന് മനസ്സിലാക്കാൻ നമുക്കാകും.

    ReplyDelete
  21. Useful Whatsapp public groups: http://grouplokam.blogspot.com/

    ReplyDelete