July 8, 2017

മാടമ്പള്ളിയിലെ യഥാർത്ഥ രോഗി

കേരള മുൻ ഡി ജി പി ടി പി സെൻകുമാർ സമകാലിക മലയാളം വാരികക്ക് നൽകിയ അഭിമുഖം ഞെട്ടലോടെയാണ് വായിച്ചത്. വർഷങ്ങളോളം കേരള പോലീസിന്റെ തലപ്പത്തുണ്ടായിരുന്ന ഒരാളുടെ സാമൂഹിക വീക്ഷണങ്ങൾ എന്താണെന്നും വിവിധ മതവിഭാഗങ്ങളോടുള്ള കാഴ്ചപ്പാടുകൾ എന്താണെന്നും ഭീതിയോടെ തിരിച്ചറിയേണ്ട അവസ്ഥാവിശേഷമാണ് ആ അഭിമുഖം കേരളക്കരക്ക് നല്കിയിരിക്കുന്നത്. വളരെ മതേതരവും നിഷ്പക്ഷവുമായിരുന്ന കേരളത്തിലെ പോലീസിനെ അടിമുടി സംഘിവത്കരിക്കുവാൻ ശ്രമിക്കുന്നത് ആരാണെന്ന ചോദ്യം കുറേക്കാലമായി നമ്മുടെ സാമൂഹികാന്തരീക്ഷത്തിൽ ഉയർന്ന് വന്നതാണ്. ആർക്കും ഉത്തരം കണ്ടെത്താൻ കഴിയാതിരുന്ന ചോദ്യം. ഇപ്പോൾ ആ ചോദ്യത്തിന് ഏതാണ്ടൊരു ഉത്തരമായിരിക്കുന്നു.  മാടമ്പള്ളിയിലെ യഥാർത്ഥ രോഗികൾ  മറ നീക്കി പുറത്ത് വന്ന് കൊണ്ടിരിക്കുന്നു. ഇതുവരെ ചികിത്സിച്ചിരുന്നത് യഥാർത്ഥ രോഗിയെ ആയിരുന്നില്ല എന്ന ഒരു തിരിച്ചറിവ് കൂടി ഇതോടൊപ്പമുണ്ടാകണം എന്നർത്ഥം. ഡി ജി പി പറഞ്ഞ ജനസംഖ്യാ കണക്കുകളിൽ നിന്ന് തുടങ്ങാം.  അഭിമുഖത്തിലെ പ്രൈം ഫോക്കസ് അതാണ്.

"കേരളത്തിലെ ഇപ്പോഴത്തെ ജനസംഖ്യാ ഘടന നോക്കൂ. നൂറ് കുട്ടികള്‍ ജനിക്കുമ്പോള്‍ 42 മുസ്‌ലിം കുട്ടികളാണ്. മുസ്‌ലിം ജനസംഖ്യ 27 ശതമാനമാണ്. 54 ശതമാനമുള്ള ഹിന്ദുക്കളുടെ ജനന നിരക്ക് 48 ശതമാനത്തില്‍ താഴെയാണ്. 19.5 ശതമാനമുള്ള ക്രിസ്ത്യാനികളുടെ ജനന നിരക്ക് 15 ശതമാനം. ഭാവിയില്‍ വരാന്‍ പോകുന്നത് ഏത് രീതിയിലുള്ള മാറ്റമായിരിക്കും" രണ്ടാഴ്ച മുമ്പ് റിട്ടയർ ചെയ്ത  ഒരു ഡി ജി പിയുടെ ഉത്കണ്ഠയാണ്. ജനിക്കുന്ന കുഞ്ഞുങ്ങളുടെ മതം നോക്കി അവരുടെ ശതമാനം നോക്കി കേരളത്തെക്കുറിച്ച് ഉത്കണ്ഠപ്പെടുന്ന ഒരു പോലീസ് മേധാവിയുടെ മാനസിക നില എന്തായിരിക്കുമെന്ന് നമുക്ക് മനസ്സിലാക്കാവുന്നതാണ്.  അതുകൊണ്ട് അതിനെക്കുറിച്ച് കൂടുതൽ പറയുന്നില്ല.

ഈ കണക്കുകൾ ഉദ്ധരിച്ച ശേഷം അദ്ദേഹം പറഞ്ഞിരിക്കുന്നത് ഞെട്ടിപ്പിക്കുന്ന മറ്റൊരു കാര്യമാണ്.

"ക്രിസ്ത്യാനികളുടെ ജനന നിരക്ക് കുറയുമ്പോഴും ജനസംഖ്യ കുറയാത്തത് അവര്‍ കുറേയൊക്കെ മതപരിവര്‍ത്തനം നടത്തിക്കുന്നതുകൊണ്ടാണ്"

അതായത് ഡി ജി പി യുടെ കണക്ക് പ്രകാരം 19.5 ശതമാനമുള്ള ക്രിസ്ത്യാനികൾക്കിടയിലെ ജനനനിരക്ക് 15 ശതമാനമാണ്. അതായത് നാലര ശതമാനത്തിന്റെ ആനുപാതിക കുറവ്. കേരളത്തിന്റെ മൂന്നരക്കോടി ജനസംഖ്യയിൽ ആ നാലര ശതമാനം എന്ന് വെച്ചാൽ ഏതാണ്ട് പതിനഞ്ച് ലക്ഷം വരും. പതിനഞ്ച് ലക്ഷം പേരെ മതപരിവർത്തനം നടത്തിയിട്ടാണ് ക്രിസ്ത്യാനികൾ അവരുടെ ജനസംഖ്യ കുറക്കാതെ നോക്കിയത് എന്നർത്ഥം. എവിടെ നിന്നാണ് ഡി ജി പി ക്ക് ഈ മതപരിവർത്തനത്തിന്റെ കണക്കുകൾ കിട്ടിയത്.  അഭിമുഖത്തിൽ ഒരിടത്ത് അദ്ദേഹത്തിന് വാട്സ്ആപ്പിൽ കിട്ടിയ മെസ്സേജുകളെ ക്വാട്ട് ചെയ്ത് അഭിപ്രായങ്ങൾ പറയുന്നുണ്ട്. ഈ മതപരിവർത്തന കണക്കുകളും ഏതെങ്കിലും സംഘി അദ്ദേഹത്തിന് വാട്സ്ആപ്പിൽ കൊടുത്തതാണോ? അതോ ഡി ജി പിയെന്ന നിലക്ക് അദ്ദേഹം ശേഖരിച്ചതോ? കേരള സമൂഹത്തെ അദ്ദേഹം ബോധ്യപ്പെടുത്തേണ്ടതുണ്ട്.

മുസ്‌ലിം ജനനനിരക്കിനെക്കുറിച്ച് പറഞ്ഞതിലും ചില വശപ്പിശകുകൾ കാണുന്നുണ്ട്. ക്രിസ്ത്യാനികളിൽ നാലര ശതമാനത്തിന്റെ കുറവ് ഉള്ളത് പോലെ ഹിന്ദുക്കളുടെ ജനനനിരക്കിൽ സെൻകുമാർ കണ്ടെത്തിയിട്ടുള്ള കുറവ് ആറ് ശതമാനമാണ്. ഈ കുറവ് വന്ന ആറ് ശതമാനവും നാലര ശതമാനവും മുസ്‌ലിം വിഭാഗത്തിലെ ജനനനിരക്കിലേക്ക് കൂട്ടിയാൽ തന്നെ സെൻകുമാർ പറയുന്ന നാല്പത്തിരണ്ട്‍ ശതമാനത്തിലേക്ക് എത്തില്ല. സെൻകുമാറിന്റെ കണക്ക് പ്രകാരം ശതമാനം കൂട്ടിയാൽ അത് നൂറിൽ നിൽക്കില്ല താനും!!. ശതമാനക്കണക്ക് നൂറ്റിയഞ്ചിലേക്ക് പോകും (42 + 48 + 15). അവ പരിശോധിക്കേണ്ടതുണ്ട്.



മുൻ ഡി ജി പി പറയുന്ന മറ്റൊരു കാര്യം ശ്രദ്ധിക്കുക.

"പശുവിനു വേണ്ടി മനുഷ്യരെ കൊല്ലുകയാണെന്ന് റമദാന്‍ പ്രസംഗത്തില്‍ പറയുന്നതിന്റെ ക്ലിപ്പിങ് ഈയിടെ കണ്ടു. അതിന്റെ പ്രത്യാഘാതം വലുതായിരിക്കും. അങ്ങനെയുള്ള ആള്‍ക്കാര്‍ക്കെതിരേ നടപടിയെടുക്കുകയും ബാക്കിയുള്ളവരുടെ നിലപാട് മാറ്റാന്‍ ശ്രമിക്കുകയും വേണം."

ഇത് കേട്ടാൽ തോന്നുക പശുവിന്റെ പേരിൽ ഇന്ത്യയിൽ കൊലകൾ നടന്നിട്ടില്ലെന്നും അവയൊക്കെ കെട്ടുകഥകൾ ആണെന്നുമാണ്. അടുക്കളയിൽ ബീഫ് സൂക്ഷിച്ചുവെന്ന് ആരോപിച്ച് മുഹമ്മദ് അഖ്ലാഖ് എന്ന പാവം മനുഷ്യനെ ആൾകൂട്ടം അടിച്ചു കൊന്നത് മുതൽ തീവണ്ടിയിൽ യാത്ര ചെയ്യുന്ന ജുനൈദിനെ ബീഫ് തിന്നുന്നവനെന്ന് പറഞ്ഞു കഴിഞ്ഞ പെരുന്നാൾ തലേന്ന് അടിച്ചു കൊന്നതടക്കം എണ്ണമറ്റ പശുക്കൊലപാതകങ്ങളുടെ ഭീതിതമായ ഇന്ത്യൻ അവസ്ഥയിൽ അതിനെതിരെ ശബ്ദമുയർത്തുന്നവർക്കെതിരെ നടപടി എടുക്കണമെന്ന്. അതായത് അടിച്ചു കൊല്ലുന്ന ആൾക്കൂട്ട ഭീകരതയെ കണ്ടു നിന്ന് രസിക്കണമെന്ന്.. ഒരു കടുത്ത സംഘിയിൽ നിന്ന് പോലും കേൾക്കാൻ സാധ്യതയില്ലാത്ത വാക്കുകളാണ് സർവീസിൽ നിന്ന് പുറത്തിറങ്ങിയ ഉടനെ ഡി ജി പി യിൽ നിന്ന് കേട്ടിരിക്കുന്നത്. ബെഷട് ഡി ജി പീ,  ബെഷട്..  ഒരു സമുദായത്തോട് എത്രമാത്രം പകയും വിദ്വേഷവും മനസ്സിൽ വെച്ചുകൊണ്ടാകണം ഇതുപോലെയുള്ള ഓഫീസർമാർ അവരുടെ സർവീസ് കാലത്ത് പ്രവർത്തിച്ചിട്ടുണ്ടായിരിക്കുക എന്നൂഹിക്കാവുന്നതാണ്.

കോടതി വ്യക്തമായ അന്വേഷണം നടത്തി സത്യാവസ്ഥയില്ലെന്ന് പറഞ്ഞു തള്ളിക്കളഞ്ഞ ആരോപണമാണ് ലൗ ജിഹാദിന്റേത്. സംഘികൾ ഉന്നയിക്കുന്ന ആ ആരോപണവും അഭിമുഖത്തിൽ സെൻകുമാർ മുസ്‌ലിം സമുദായത്തിന്റെ പുറത്ത് കെട്ടിവെക്കാൻ ശ്രമിക്കുന്നുണ്ട്. അഭിമുഖത്തിനിടക്ക് അദ്ദേഹം പറയുന്ന മറ്റൊരു വാചകവും ശ്രദ്ധേയമാണ്. "അവരിലും നല്ല ആളുകളുണ്ട്". അതായത് മുസ്ലിംകളിലും നല്ലവരുണ്ട് എന്ന്.. കള്ളന്മാരിലും ചില മര്യാദക്കാരുണ്ട് എന്ന് പറയുന്ന ടോണിൽ.

സെൻകുമാർ പറഞ്ഞിരിക്കുന്ന മറ്റൊരു കാര്യം ഇതാണ്.

"മതതീവ്രവാദം നേരിടാന്‍ ആദ്യം വേണ്ടത് ആരോപണ വിധേയമാകുന്ന സമുദായത്തിന്റെ പൂര്‍ണ പിന്തുണയാണ്. അല്ലെങ്കില്‍ നടക്കില്ല. ഒരു ഡീ റാഡിക്കലൈസേഷന്‍ പ്രോഗ്രാം നടപ്പാക്കണം. ഇപ്പോള്‍ത്തന്നെ സംസ്ഥാനവ്യാപകമായി 512 പേരെ അതിനു വേണ്ടി പ്രത്യേകം തെരഞ്ഞെടുത്ത് കാര്യങ്ങളൊക്കെ പറഞ്ഞുകൊടുത്ത് നിയോഗിച്ചിട്ടുണ്ട്. പത്രത്തില്‍ കൊടുത്ത് വലിയ വാര്‍ത്തയൊന്നുമാക്കേണ്ട എന്ന് തീരുമാനിച്ചതുകൊണ്ടാണ്. ആദ്യം വേണ്ടത് മുസ്‌ലിം സമുദായത്തില്‍ നിന്നുതന്നെയുള്ള ചില ആളുകളെ, അവരിലും നല്ല ആളുകളുണ്ട്, അവരെ ഉപയോഗിച്ചു വേണം മതതീവ്രവാദത്തെ കണ്‍ട്രോള്‍ ചെയ്യാന്‍."

ഹമീദ് ചേന്ദമംഗലൂരും എം എൻ കാരശ്ശേരിയും മതേതര വീക്ഷണം പുലർത്തുന്ന മുസ്ലിംകളെന്ന് അദ്ദേഹം അഭിമുഖത്തിൽ പറയുന്നുണ്ട്. അതിൽ തന്നെ കാരശ്ശേരിക്ക്  പകുതി മാർക്കേ കൊടുത്തിട്ടുള്ളൂ. ഫുൾ മാർക്ക് കിട്ടിയിട്ടുള്ളത് ഹമീദ് ചേന്ദമംഗലൂരിനാണ്. ഈ ഹമീദ് ചേന്ദമംഗലൂരെങ്ങാനും കേരളത്തിൽ ജനിച്ചിട്ടില്ലായിരുന്നുവെങ്കിലുള്ള ദുര്യോഗം ആലോചിച്ചു നോക്കൂ. കേരളത്തിലെ തൊണ്ണൂറ് ലക്ഷം മുസ്ലിംകളിൽ ഒരെണ്ണം പോലും മതേതരനായി ഉണ്ടാവുമായിരുന്നില്ല. കേരളത്തിലെ മുസ്ലിംകളെ ഇത്തരമൊരു ദുരന്തത്തിൽ നിന്ന് രക്ഷിച്ച ഹമീദ് ചേന്ദമംഗലൂരിന് മിനിമം ഒരു ഭാരത രത്ന പുരസ്കാരമെങ്കിലും പ്രധാനമന്ത്രി മോഡിയെക്കൊണ്ട് കൊടുപ്പിക്കണം.

അദ്ദേഹം പറഞ്ഞ കാര്യത്തിലേക്ക് തന്നെ വരാം. "ഒരു ഡീ റാഡിക്കലൈസേഷന്‍ പ്രോഗ്രാം നടപ്പാക്കണം. ഇപ്പോള്‍ത്തന്നെ സംസ്ഥാനവ്യാപകമായി 512 പേരെ അതിനു വേണ്ടി പ്രത്യേകം തെരഞ്ഞെടുത്ത് കാര്യങ്ങളൊക്കെ പറഞ്ഞുകൊടുത്ത് നിയോഗിച്ചിട്ടുണ്ട്." അതായത് ഹമീദ് ചേന്ദമംഗലൂർ ഒഴിച്ച് കേരളത്തിലെ ബാക്കി എല്ലാ മുസ്ലിംകളേയും ('അര കാരശ്ശേരി'യടക്കം) 'ഡീറാഡിക്കലൈസ്' ചെയ്യാൻ പുള്ളി നിയോഗിച്ച അഞ്ഞൂറ്റി പതിനഞ്ച് പേർ ആരാണെന്ന് സഖാവ് പിണറായി ഒന്ന് പരിശോധിക്കുന്നത് നല്ലതാണ്.  ആ  515 പേർ ഏത് വകുപ്പിലാണ് ഉള്ളത് എന്നും അവർ സെൻകുമാർ ജോലിയേല്പിച്ച ശേഷം ഇതുവരെ എന്താണ് ചെയ്തത് എന്നും ഒരു റിപ്പോർട്ട് വാങ്ങണം. ഇന്ത്യൻ സമൂഹത്തിനു അത്തരമൊരു ഡീ റാഡിക്കലൈസേഷന്‍ പ്രോഗ്രാമിന്റെ അത്യാവശ്യമുള്ള സമയമാണ് ഇത്. സെൻകുമാറിന്റെ ഈ പ്രോഗ്രാം ദേശീയാടിസ്ഥാനത്തിൽ നടപ്പിലാക്കാൻ പറ്റുമോ എന്നും നോക്കണം.

Varthamanam Daily - 10 July 2017

ഡി ജി പി സ്ഥാനത്ത് നിന്ന് അദ്ദേഹത്തെ മാറ്റിയപ്പോൾ ഉണ്ടായ ബഹളങ്ങളെത്തുടർന്ന് മുഖ്യമന്ത്രി പിണറായി വിജയൻ നിയമസഭയിൽ പറഞ്ഞ ഒരു വാചകമുണ്ട് "നിങ്ങൾ വല്ലാതെ ബഹളം വെക്കേണ്ട അയാൾ നിങ്ങടെ കയ്യിലല്ല ഇപ്പോ മറ്റാളുകളുടെ കൈയ്യിലാണു നിങ്ങളേക്കാൾ കടുത്ത രാഷ്ട്രീയം അദ്ദേഹത്തിന്റെ കൈയ്യിലുണ്ട്‌ അത്‌ ഓർമ്മിച്ചോ.."

അത്തരമൊരു ഓർമപ്പെടുത്തൽ മുമ്പ് നടത്തിയ സ്ഥിതിക്ക് ഇദ്ദേഹത്തെക്കുറിച്ച വ്യക്തമായ ധാരണ മുഖ്യമന്ത്രിക്ക് മുന്നേ ഉണ്ടായിരുന്നെന്നർത്ഥം. അതിനാൽ തന്നെ അദ്ദേഹത്തിൻറെ കാലത്ത് ചുമത്തപ്പെട്ട തീവ്രവാദ കേസുകളേയും യു എ പി എ കേസുകളേയും വ്യക്തമായി പഠിക്കാൻ മുഖ്യമന്ത്രി തയ്യാറാവണം. പുനഃപരിശോധന ആവശ്യമുള്ള കേസുകൾ അവയിലുണ്ടെങ്കിൽ വേണ്ട നിയമനടപടികൾ സ്വീകരിക്കണം.

ഇത്രയും പറഞ്ഞതിൽ നിന്നും സെൻകുമാർ അഭിമുഖത്തിൽ പറഞ്ഞ എല്ലാ കാര്യങ്ങളോടും വിയോജിക്കുന്നു എന്നർത്ഥമില്ല. തീവ്രവാദ ചിന്താഗതികൾ വളർത്തുവാൻ ശ്രമിക്കുന്നവർ മുസ്‌ലിം സമുദായത്തിലുണ്ട്. അതിൽ പണ്ഡിതന്മാരും പ്രഭാഷകരുണ്ട്. (ഈ ബ്ലോഗിൽ തന്നെ പല തവണ അത്തരം വിഷയങ്ങൾ ചർച്ച ചെയ്തിട്ടുണ്ട്). അവർക്കെതിരെയുള്ള പോരാട്ടം ഫലപ്രദമാകണമെങ്കിൽ മുസ്‌ലിം സമൂഹത്തിന്റെ പിന്തുണയോടെ തന്നെ നടത്തണം. ഈ ഒരു പോയിന്റിൽ സെന്കുമാറിനോട്‌ യോജിപ്പുണ്ട്. എന്നാൽ സമുദായത്തിലെ ഒരു ചെറിയ ന്യൂനപക്ഷത്തിന്റെ പോലും പിന്തുണ അവകാശപ്പെടാൻ സാധിക്കാത്ത അത്തരം തീവ്രചിന്താഗതിക്കാരെ ഈ സമുദായത്തിന്റെ മൊത്തം പ്രതീകമായി അവതരിപ്പിക്കരുത്. അത് ആ സമുദായത്തോട് മാത്രമല്ല, മത സൗഹാർദ്ദത്തിന് പേര് കേട്ട ഈ സംസ്‌ഥാനത്തിലെ മൊത്തം ജനങ്ങളേയും അപമാനിക്കുന്നതിനു അപഹസിക്കുന്നതിനും തുല്യമാണ്.

Recent Posts
തും ബിൽകുൽ ഹം ജയ്സേ നിക് ലേ
പോടാ, പോയി ചാകെടാ !  

Related Posts
അൽ കഴുതകൾ' അഥവാ ഇസ്ലാമിന്റെ നവസംരക്ഷകർ
ചുട്ടു കൊല്ലുന്നവർക്ക് ചൂട്ട് പിടിക്കുന്നവരോട്
ഈ ഭ്രാന്തിനെ മനുഷ്യവംശം എങ്ങിനെ നേരിടും?  

22 comments:

  1. ഒരു സമുദായത്തോട് എത്രമാത്രം പകയും വിദ്വേഷവും മനസ്സിൽ വെച്ചുകൊണ്ടാകണം ഇതുപോലെയുള്ള ഓഫീസർമാർ അവരുടെ സർവീസ് കാലത്ത് പ്രവർത്തിച്ചിട്ടുണ്ടായിരിക്കുക എന്നൂഹിക്കാവുന്നതാണ്.

    ReplyDelete
    Replies
    1. ഡി ജി പി യുടെ കണക്ക് പ്രകാരം 19.5 ശതമാനമുള്ള ക്രിസ്ത്യാനികൾക്കിടയിലെ ജനനനിരക്ക് 15 ശതമാനമാണ്. അതായത് നാലര ശതമാനത്തിന്റെ ആനുപാതിക കുറവ്. കേരളത്തിന്റെ മൂന്നരക്കോടി ജനസംഖ്യയിൽ ആ നാലര ശതമാനം എന്ന് വെച്ചാൽ ഏതാണ്ട് പതിനഞ്ച് ലക്ഷം വരും. പതിനഞ്ച് ലക്ഷം പേരെ മതപരിവർത്തനം നടത്തിയിട്ടാണ് ക്രിസ്ത്യാനികൾ അവരുടെ ജനസംഖ്യ കുറക്കാതെ നോക്കിയത് എന്നർത്ഥം.

      Delete
    2. ഈ കണക്കിൽ ഒരു പിശകില്ലേ. 19 .5 ശതമാനം ടോട്ടൽ പോപുലേഷൻ ആണ്. 15 ശതമാനം ജനനനിരക്കും . ഇതിൽ ഈ 4 .5 ശതമാനം 15 ലക്ഷം ആണോ സർ ?

      Delete
    3. മത പരിവർത്തനത്തിലൂടെ ജനസംഖ്യാ അനുപാതം ക്രിസ്ത്യാനികൾ നിലനിർത്തിക്കൊണ്ടിരിക്കുന്നു എന്ന് പറഞ്ഞാൽ ജനിച്ച കുട്ടികളെ മതം മാറ്റുന്നതിനെക്കുറിച്ചല്ല, മൊത്തം ജനസംഖ്യയിലെ മതം മാറ്റത്തെക്കുറിച്ചായിരിക്കണമല്ലോ ഉദ്ദേശിച്ചിരിക്കുക. അതുകൊണ്ടാണ് കണക്ക് അങ്ങിനെ കൂട്ടിയത്. ഏതായാലും കണക്കുകൾ എങ്ങിനെയാണ് ഉദ്ദേശിച്ചതെന്ന് വിശദീകരിക്കേണ്ടത് പറഞ്ഞ ഡി ജി പി തന്നെയാണ്. അതുണ്ടാവുമോ എന്ന് നോക്കാം.

      Delete
    4. ഇതാണ് തുമ്മിയാൽ തെറിക്കുന്ന മതേതരത്വം. കണക്കുകൾ വെച്ച് പറഞ്ഞാൽ രോഗി ആക്കുക. ഇല്ലെങ്കിൽ സംഘി ആക്കുക. 30 ശതമാനത്തിനു താഴെ വരുന്ന മുസ്ലിം ജനസംഖ്യ 41 ശതമാനം ജനന നിരക്കിൽ . 54 ശതമാനം വരുന്ന ഹിന്ദുക്കൾക്ക് 42 . ഇസ്രായേൽ പറയുന്ന ഡെമോഗ്രാഫിക് ബോംബ് ആണ് ഇത്.

      Delete
    5. സെൻകുമാറിനെ പോലുള്ളവർ അവർക്ക് കാണാൻ ഇഷ്ടമുള്ളത് മാത്രമേ കാണൂ.

      എന്തായാലും വളരെ ആശങ്കയോടെ പറയട്ടെ; മതപരമായ ധ്രുവീകരണത്തിന് വേണ്ടിയുള്ള ശ്രമങ്ങൾ കൊണ്ടുപിടിച്ച് നടക്കുന്നുണ്ടെന്ന് ഞാനും ഭയപ്പെടുന്നുണ്ട്. അതിന്റെ ദൂഷ്യം മിയ്‌ക്കവരും കരുതുന്നത് പോലെ ഏതെങ്കിലും ഒരു മതത്തിന് പൂർണ്ണമായ അധീശത്വം ലഭിയ്‌ക്കും എന്നതല്ല. മറിച്ച്, ഹിന്ദുവോ മുസ്ലീമോ ക്രിസ്ത്യാനിയോ സിഖോ പോലെ സങ്കുചിത വർഗ്ഗീയ ചിന്തയുടെ ഇരയേതെങ്കിലുമാകാതെ, ഒരു പച്ച മനുഷ്യനായി മാത്രം സമാധാനത്തോടെ ജീവിയ്‌ക്കാൻ നമ്മുടെ നാട്ടിലും പറ്റാതാകുന്ന അവസ്ഥയിലേയ്‌ക്കാകും ഇതൊക്കെ നമ്മെ കൊണ്ടെത്തിയ്‌ക്കുക.

      സെൻ കുമാറിനെ പോലുള്ളവർ കാണാത്ത ചിലത് കൂടി പറയട്ടെ. എന്റെ അടുത്ത ചില സുഹൃത്തുക്കളുണ്ട്, അവരിൽ മുസ്‌ലിം നാമധാരികളായ പലരുമുണ്ട്. അവരുടെ ജീവിതവും പശ്ചാത്തലവുമൊന്നും സെൻ കുമാറിനെ പോലുള്ളവർ കാണാൻ ശ്രമിയ്‌ക്കുമെന്ന് എനിയ്‌ക്ക്‌ തോന്നുന്നില്ല. ഒന്നോ രണ്ടോ മക്കൾ മാത്രം, ചില മക്കൾ ഇതര മതത്തിൽ നിന്ന് വിവാഹം ചെയ്‌തിരിയ്‌ക്കുന്നു. ഇത് കേട്ടാലുടനെ ചിലർക്ക് തോന്നാം, അത് ആ പങ്കാളിയെ തങ്ങളുടെ മതത്തിലേയ്‌ക്ക് മാറ്റി എടുക്കാനുള്ള തന്ത്രമായിരിയ്‌ക്കും എന്ന്. പക്ഷെ ആ ഊഹം തെറ്റാണ്. ആരും മതം മാറിയിട്ടില്ല, അവരവർ ജനിച്ച് വളർന്ന മതത്തിൽ എന്നതിനേക്കാൾ, വെറും മനുഷ്യരായി തന്നെ അവർ ജീവിയ്‌ക്കുന്നു.

      ഹിന്ദു മേൽക്കോയ്മയ്‌ക്ക് വേണ്ടി സെൻ കുമാറിനെക്കാൾ ഒക്കെ വളരെ സമർത്ഥമായി ന്യായങ്ങളും സ്ഥിതിവിവര കണക്കുകളും നിരത്തുന്ന വളരെ അധികം പേരുണ്ട്. അതേ പോലെ തന്നെ ഇസ്ളാമിസത്തിനു വേണ്ടി വാദിയ്‌ക്കുന്നവരും ധാരാളമുണ്ട്. ഇവരിൽ ചിലരൊക്കെ തുറന്ന് പറയുന്നത് കൊണ്ട് നാം ആ വികല വാദങ്ങൾ കേൾക്കുന്നു. എന്നാൽ കുറെയധികം പേര് സ്വന്തം സമൂഹത്തിന്റെയും കുടുംബങ്ങളുടെയും സ്വകാര്യ സദസ്സുകളിൽ മാത്രം വിഷം വിളമ്പുന്നവരായും ഉണ്ട്. അവരെ നമ്മളാരും കാണുന്നില്ല, കേൾക്കുന്നില്ല. ഇവരുടെയൊക്കെ ഇടയിലാണ് അല്പസ്വല്പം സ്ഥിര ബുദ്ധിയും വിവേകവുമുള്ള കുറച്ച് പേര് ആർക്കും വേണ്ടാത്തവരായി, എന്നാൽ എല്ലാവരെയും ഒരേ പോലെ കാണുന്ന വിഡ്ഢികളായി ജീവിയ്‌ക്കുന്നത്. തോൽക്കാനും പിന്തിരിയാനും തയ്യാറല്ലാത്ത ഒരു ന്യൂനപക്ഷം. അവരാണ് സത്യത്തിൽ ഇവിടുത്തെ യഥാർത്ഥ ന്യൂനപക്ഷം; അല്ലാതെ ഏതെങ്കിലും മത വിഭാഗത്തിൽ പെടുന്നവരല്ല. അവർ എന്ന് ഭൂരിപക്ഷമാകുന്നോ അന്ന് മാത്രമേ വിവേകത്തോടെ നമ്മുടെ സമൂഹം ചിന്തിയ്‌ക്കാൻ പ്രാപ്തരായി എന്ന് കരുതാനാകൂ.

      അത് വരെ പലരും നമ്മുടെ സമൂഹത്തിന്റെ വൈകാരിക ഭൂമിയിൽ ഇത്തരം വിത്ത് എറിഞ്ഞു കൊണ്ടിരിയ്‌ക്കും; അത് മുളയ്‌ക്കാതെയും വളരാതെയും ഇരിയ്‌ക്കണമെങ്കിൽ നിതാന്ത ജാഗ്രതയുള്ള ആ ന്യൂനപക്ഷം ഉറക്കമൊഴിച്ച് ഇരുന്നേ മതിയാകൂ. Venugoplan KB

      Delete
  2. സമകാലിക മലയാളം അഭിമുഖം വായിക്കാത്തവർക്ക് "ഈ ലിങ്ക് വഴി വായിക്കാം"

    ReplyDelete
  3. പുള്ളിക്കാരൻ പറഞ്ഞതിലെ എല്ലാ കാര്യങ്ങളോടും യോജിപ്പിലെങ്കിലും കുറച്ചൊക്കെ സത്യമാണെന്നു അറിയാം പക്ഷെ സമ്മതിക്കാൻ വയ്യ അല്ലെ ? .ഇപ്പോഴും ഐസിസ് വാർത്തകൾ വരുമ്പോൾ അതിനെ വെള്ള പൂശാൻ എന്ന രീതിയിൽ ഉപയോഗിക്കുന്ന ഒന്നാണ് RSS വർഗീയത .ഭൂരിപക്ഷ വർഗീയതയെ എതിര്കുവേന്നെ രീതിയിൽ കുറെ ആൾകാർ സ്വന്തം മതത്തിലെ വർഗീയതയെ സപ്പോർട്ട് ചെയ്യുന്നുണ്ട് . അത് നല്ലതാണെന്നാണോ നിങ്ങൾ പറയുന്നത് RSS നെയും ബിജെപി യെയും ഏറ്റവും കൂടുതൽ എതിർത്തത് കേരളത്തിലെ ഹിന്ദു സമൂഹമാണ് അത്തരമൊരു കാഴ്‌ചപ്പട് ന്യൂനപക്ഷ സമുദായത്തിലെ എല്ലാരും വച്ച പുലർത്തുന്നുമില്ല പരസ്യമായി തള്ളി കളയാൻ പോലും തയ്യാറല്ല അത് നാട്ടിൽ ഉണ്ടാകുന്ന ദോഷം ആരും ചർച്ച ചെയ്യണ്ടേണ്ടനോ .കേരളത്തിലെ ന്യൂനപക്ഷങ്ങൾ ആട്ടവും സുരക്ഷിതരാണ് കേരളത്തിനെ സാമൂഹികവും രാഷ്ട്രീയവും ആയ കാര്യങ്ങൾ കൊണ്ട് താനേ എന്നിട്ട് പോലും ഇരവാദം ഉയർത്തി വർഗീയതയെ സപ്പോർട്ട് ചെയ്യുണ്ടുണ്ട ഐസിസ് റിക്രൂട്മെന്റിനെ കുറിച്ച പോലും ഈ നാട്ടിൽ ആരോഗ്യപരമായ ഒരു ചർച്ചയും നടന്നിട്ടില്ല .പിന്നെ ക്രിസ്ത്യൻ മതം മാറ്റം ഡി ഈ നാട്ടിലും എപ്പോൾ നോർത്ത് യിലും അച്ചന്മാർ പയറ്റുന്ന തന്ത്രം തന്നെ ആണ് ക്രിസ്റ്യനിസത്തെ ഹിന്ദുവത്കരിക്കുക .ഭജന തൊട്ട് തുലാഭാരം വരെ നടത്തുന്ന പള്ളികൾ ഉണ്ട് അത് ഇദ്ദേഹം ഉയർത്തി കൊണ്ട് വരേണ്ട ഓർ വിഷയം അല്ല പക്ഷെ .

    ReplyDelete
    Replies
    1. My dear bjp ye hindukkal ethirkunnundenkil enganaa avar valarunnath.keralathile eth muslimkal aanu isis ne supportiyath,missing case is missing case,sanyasathilekk povunna muslimkalum und,dammaji salafi I think.avar aarodum bandappedilla,most of the muslims are against sanyasam.kure media report undennu shari thanne,policinum mediakkum ulla munvidhi ariyamallo.pinne india is home to second largest muslim population,kerala muslims are international,may be there is chances for them to join this anti muslim isis which kills muslims,even hindus and christians joined,israel and west is believed to behind them.study who created alqaeeda,who was behind 9/11,why putin killed by slow poison for exposing his terrorism politics in uk.study how govt.s using terrorism and war to create and hide corruption including bangaru laxman tehelca case.most of ther terrorism corporate govt.s are directly or indirectly behind it.ask hindu families living in muslim majority area here,and gulf.I know most of the hindus are good only politicians make issues like muslims

      Delete
    2. If very few people go for go raksha or isis not muslims or hindus are responsible.it is police duty.we all should unite against it

      Delete
  4. രാജസ്ഥാനിൽ ഒരു ജഡ്ജ് വിരമിക്കുമ്പോൾ പറഞ്ഞ വാക്കുകകൾ ചർച്ചായപ്പോൾ അദ്ദേഹം കൈകാര്യം ചെയ്ത കേസിനെ കുറിച്ച് മാധ്യമങ്ങളിൽ ചർച്ച യായിരുന്നു അത് പോലെ സെൻകുമാർ കൈകാര്യം ചെയ്തു സംഘികളെ രക്ഷിച്ചെടുത്തതും , നിരപരാധികളായ യുവാക്കളെ തീവ്ര വാദ ബന്ധം ആരോപിച്ചു കുടിക്കിയ കേസുകളും എല്ലാം ചർച്ച ആവേണ്ടതുണ്ട് .

    ReplyDelete
  5. മുസ്ലിം സമുദായത്തിലെ
    നല്ലയാളുകളെ തെരഞ്ഞെടുക്കാനുള്ള
    മത്സരം നടന്നു കൊണ്ടിരിക്കുകയാണ്.
    #നിങ്ങൾക്കുമാവാം_ബെസ്റ്റ്_കോയ
    എന്നാണ് പരിപാടിയുടെ പേര്.... :P
    റിട്ടയർ ചെയ്ത് വീട്ടിലിരിക്കുന്ന DGP
    സെൻകുമാറാണ് ഈ #കലാപരിപാടിയുടെ
    പ്രായം ചെന്നവർ; സോറി പ്രായോജകൻ!

    എലിമിനേഷൻ റൗണ്ടിൽ #പ്രമുഖ ബുദ്ധിജീവികളായ ഹമീദ് ചേന്ദമംഗലൂരും, കാരശ്ശേരി മാഷും ഇടം നേടിയിട്ടുണ്ട്..

    ബേജാറാവണ്ട.....നിങ്ങൾക്കുമാവാം
    #Best_കോയ പരിപാടിയിൽ നിങ്ങൾക്കും പങ്കെടുക്കാം. നിങ്ങൾ ചെയ്യേണ്ടത് ഇത്ര
    മാത്രം....

    ഒന്നും മാണ്ട കോയാ.... ഹമീദ് മാഷും,
    കാരശ്ശേരിമാഷും ചെയ്യുന്ന പോലെ
    ചെയ്താൽ മതി. പേര് കൊണ്ട് മാത്രം
    മുസ്ലിമാവാൻ ശ്രമിക്കുക. ഇടയ്ക്കിടെ
    ഇസ്ലാമിനെ വിമർശിക്കുക... സമുദായത്തെ
    അടിക്കാൻ കിട്ടുന്ന ഒരു വടിയും
    പാഴാക്കരുത്....

    ഈ പരിപാടിയിൽ വിജയിക്കുന്നവർക്ക്
    എന്നും ബീഫ് കഴിക്കാൻ അനുമതി...
    സംഘപരിവാറിൽ നിന്നുള്ള പൂർണ
    സംരക്ഷണം. തുടങ്ങി നിരവധി
    സമ്മാനങ്ങൾ

    വേഗമാവട്ടെ!

    ReplyDelete
  6. കാലങ്ങൾക്ക് ശേഷം ബ്ലോഗിൽ ഒരു കമന്റ്...

    കുമ്മൻ മന്ത്രിസഭയിലെ ആഭ്യന്തിരനെ കിട്ടിയതിൽ സംഘികൾക്ക് സന്തോഷിക്കാം...

    ReplyDelete
  7. പന്നി പ്രസവം !!

    ഒരിക്കൽ ന്യയോർക്കിലെ ഒരു ട്രെയിനിൽ വച്ച് അറിയാതെ അടുത്തു നിന്നൊരാളുടെ കാലിൽ ചവിട്ടി. ക്ഷമ ചോദിക്കാൻ മുതിരുന്നതിനു മുൻപെ അയാൾ തെറി തുടങ്ങി. തെറിയെന്നു വെച്ചാൽ നല്ല എമണ്ടൻ തെറി. പാവത്തിനെ കുറ്റം പറയാൻ പറ്റില്ല. 110 കിലോ കയറിയപ്പൊ റോഡ് റോളറിൻറെ അടിയിൽ പെട്ട പോലായിട്ടുണ്ടാവണം. തെറി ഇങ്ങനെ അനർഗ്ഗള നിർഗ്ഗളം പ്രവഹിക്കുകയാണ്. അപ്പനും അമ്മയ്‌‌ക്കും കൂടാതെ മൊത്തം ഇൻഡ്യക്കാർക്കിട്ടും കിട്ടുന്നുണ്ട്. നല്ല ഒന്നാന്തരം വംശീയ അധിഷേപം. പൊട്ടൊറ്റൊ സ്കിൻ, മസാല മണം എന്നൊക്കെ നിരുപദ്രവകരമായ തെറികൾ അവസാനം ഇൻഡ്യൻ ജനസംഖ്യയിൽ എത്തി. അന്ന് ആ മഹാനുഭാവൻ ഉപയോഗിച്ചു കേട്ട വാക്കാണ് "പന്നി പെറുന്ന" പോലെ പ്രസവിക്കുന്നവൻറെ മോനെ എന്നത്.

    രണ്ട് ഡോക്ടറേറ്റൊക്കെ ഉള്ള ഒരാൾ മലപ്പുറത്തെ സ്ത്രീകളെ കുറിച്ച് ഇതേ വാചകം ഈ കഴിഞ്ഞ ദിവസം പറഞ്ഞത് കേട്ടപ്പോൾ ദെജാവു അടിച്ചു പോയി. ആ പ്രയോഗം ചെന്ന് കൊണ്ടവരുടെ വികാരം കൄത്യമായി എനിക്ക് മനസ്സിലാകും. ഞാനും ഇര ആയതാണല്ലൊ.

    ഭാഗ്യത്തിന് ഗോപാലകൄഷ്ണനുള്ള ഉത്തരം ഒരു ചെറിയ ഗൂഗിൾ സേർച്ച് അകലെയുണ്ട്. മലപ്പുറത്തെ ഫെർട്ടിലിറ്റി റേറ്റ് എന്താണ്. റീപ്ലേസ്മെൻറ് റേറ്റ് എത്രയാണ്. ജനസംഖ്യാ വർദ്ധന തോത് എത്രയാണ് എന്നീ മൂന്നു കാര്യങ്ങൾ കണ്ട് പിടിച്ചാൽ ഗോപാലകൄഷ്ണനുള്ള ഉത്തരമായി. ഇനി സേർച്ച് ചെയ്ത് കണ്ട് പിടിക്കാൻ ബുദ്ധിമുട്ടണമെന്നുമില്ല. തുടർന്ന് വായിക്കുക.

    ഒരു സ്ത്രീക്ക് എത്ര കുട്ടികൾ എന്ന കണക്കാണ് ഫെർട്ടിലിറ്റി റേറ്റ്. റീപ്ലേസ്മെൻറ് റേറ്റ് അൽപം കൂടെ ഗഹനമാണ്. ഒരു ഭാര്യയും ഭർത്താവും അടങ്ങുന്ന കുടുംബത്തിനു രണ്ട് കുട്ടികൾ ഉണ്ടായി എന്ന് വെയ്‌‌ക്കുക. മാതാപിതാക്കൾ മരിക്കുമ്പോൾ അവരെ അവരുടെ മക്കൾ വെച്ച് റീപ്ലേസ് ചെയ്യും. റീപ്ലേസ്മെൻറ് റേറ്റ് 2 ആണെങ്കിൽ ജനസംഘ്യാ വർദ്ധനവുണ്ടാകില്ല. 2 പേർ മരിക്കുമ്പോൾ, 2 പേരെ വെച്ച് റീപ്ലേസ് ചെയ്യുന്നു എന്നർത്ഥം. പക്ഷെ വിവാഹിതരാകുന്ന എല്ലാവർക്കും കുട്ടികളുണ്ടാകുന്നില്ല. പല കുട്ടികളും ശൈശവത്തിൽ മരിച്ചു പോകുകയും ചെയ്യും. അതിനാൽ ഫെർട്ടിലിറ്റി റേറ്റ് 2 എന്നതിൽ അൽപം കൂടിയിരിക്കും. അത് 2.08 ആക്കി നിർത്തിയാൽ ജനസംഖ്യാ വർദ്ധന കണ്ട്രോൾ ചെയ്യാമെന്നാണ് സാമൂഹ്യ ശാസ്ത്രജ്ഞൻമ്മാരുടെ ഒരു അനുമാനം. (continued)

    ReplyDelete
  8. മലപ്പുറത്തിൻറെ ഫെർട്ടിലിറ്റി റേറ്റ് നിലവിലെ സെൻസ്സസ് പ്രകാരം 2.4 ആണ്. അതായത് ഒരു സ്‌‌ത്രീക്ക് ഏകദേശം രണ്ടര കുട്ടികൾ എന്നാണ് കണക്ക്. ഗോപാലകൄഷ്ണൻറെ വാദം ശരിയാകണമെങ്കിൽ ചുരുങ്ങിയത് 4.5 എങ്കിലും ഫെർട്ടിലിറ്റി റേറ്റ് വേണം. അതായത് ഒരോ തലമുറയും മുൻപത്തെ തലമുറയുടെ ഇരട്ടി ആകുമെന്നർത്ഥം. ഒരോ സെൻസ്സസ്സ് പ്രകാരം ഈ തോത് കുറയുന്നു എന്നാണ് കണക്കുകൾ കാണിക്കുന്നത്. 1974 മുതൽ 1980 വരെയുള്ള കാലഘട്ടത്തിലെ കണക്കു പ്രകാരം 4.3 ആയിരുന്ന റേറ്റ് 2005 ലെ കണക്ക് പ്രകാരം 2.4 ആയി കുറഞ്ഞു. പതിനൊന്ന് കൊല്ലത്തിനു ശേഷം ഇത് ഇനിയും കുറഞ്ഞിരിക്കാനാണ് സാദ്ധ്യത. ഗോപാലകൄഷ്ണന് താരാത്മ്യം ചെയ്യാൻ ഇൻഡ്യയിലെ മറ്റ് സംസ്ഥാനങ്ങളുടെ ഫെർട്ടിലിറ്റി റേറ്റ് താഴെ കമൻറ് ചെയ്തിട്ടുണ്ട്. (പെട്ടെന്ന് കണ്ട ഒരു സംസ്ഥാനത്തിൻറെ കണക്ക് പറയാം, ഗുജറാത്. 2.31 ആണ് 2013 ലെ കണക്ക്)

    ജനസംഖ്യാ വർദ്ധനത്തിൻറെ തോതെടുക്കുക. ഇൻഡ്യയിലെ ജനസംഖ്യാ വർദ്ധനവിലെ ഏറ്റവും വലിയ ഇടിവ് രേഖപ്പെടുത്തിയ ഒരു ഡിസ്‌‌ട്രിക്ടാണ് മലപ്പുറം. 1981-1991 ൽ വളർച്ചാ സൂചികയിൽ 28.87% രേഖപ്പെടുത്തിയ സ്ഥലം 11.65% കുറഞ്ഞ് 2001 ൽ 17.22% ൽ നിൽക്കുന്നു. അതായത് ഗോപാലകൄഷ്ണൻറെ വാദങ്ങൾ അംഗീകരിക്കണമെങ്കിൽ ഓരോ സെൻസ്സസ്സ് കഴിയുമ്പഴും ഈ ശതമാനം ഉയർന്നു ഉയർന്നു വരണം.

    ഇത്രയൊക്കെ മേൻമ മലപ്പുറത്തിന് അവകാശപ്പെടാമെങ്കിലും ഇനിയും ബഹു ദൂരം പോകാനുണ്ട്. കേരളത്തിലെ ഫെർട്ടിലിറ്റി റേറ്റ് 1.7 ആണ്. ഇൻഡ്യയുടെ 2013 ലെ നാഷണൽ ആവറേജിനെക്കാളും (2.34) ഒരൽപം മുകളിലാണ് ഇപ്പഴും മലപ്പുറം. (തത്കാലം 2005 ലെ കണക്ക് തന്നെ ഞാനിവടെ ഉപയോഗിക്കുന്നു. 2013 ലെ ഇൻഡ്യൻ ആവറേജിനോട് 2005 ലെ മലപ്പുറത്തിൻറെ ആവറേജ് കംപയർ ചെയ്യുന്നതിലെ പിശക് തത്കാലം വിസ്മരിക്കുക). എന്നാലും ഗോപാലകൄഷ്ണൻ ആരോപിക്കുന്ന പോലൊരു വളർച്ചാനിരക്കിൻറെ ഏഴയലത്ത് മലപ്പുറം ഇല്ല എന്ന് അസന്ദിഗ്ദ്ധമായി പറയാൻ കഴിയും.

    കേരളം ആരോഗ്യ മേഖലയിൽ കൈവരിച്ച അഭൂതപൂർവ്വമായ വളർച്ചയാണ് മലപ്പുറത്തിൻറെ നേട്ടങ്ങൾക്ക് കാരണം. ഇതിലെ വിരോധാഭാസം, ഈ നേട്ടങ്ങളുടെ ഒരു പങ്ക് അവകാശപ്പെടാവുന്ന ഒരു വ്യക്തിയാണ് ഗോപാലകൄഷ്ണൻ. (പുള്ളി ആരോഗ്യ മേഖലയിൽ ജോലി ചെയ്തിരുന്ന ഒരു ഫാർമസ്സിസ്‌‌റ്റ് ആണെന്നാണ് ഞാൻ മനസ്സിലാക്കുന്നത്.). പുള്ളിയുടെ പ്രസ്താവന മലർന്നു കിടന്ന് തുപ്പുന്ന പരിപാടിയായി പോയി. ഇനി ഇത്തരം പ്രസ്താവനകൾ വിശ്വസിക്കുന്നതിന് മുൻപ് ഗഹനമായി പഠനം ഒന്നും നടത്തണ്ട. ഒരൽപം കോമണ് സെൻസ് ഉപയോഗിക്കുക. സ്വന്തം സുഹൄദ് വലയത്തിൽ ഒന്ന് തിരഞ്ഞ് നോക്കുക. പത്തു മക്കളുള്ള, നാലു ഭാര്യമാരുള്ള എത്ര മലപ്പുറം മുസ്ലീമുകളെ നേരിട്ടറിയാം ?. വലിയ സ്‌‌റ്റാറ്റിസ്‌‌റ്റിക്സിൻറെ പിൻബലമൊന്നുമില്ലാതെ പേഴ്സണൽ അനക്ഡോട്ടൽ എവിഡൻസ്സുകളിൽ നിന്ന് കണ്ട് പിടിക്കാവുന്നതേ ഉള്ളു. എന്നിട്ടും നിങ്ങൾക്ക് വിശ്വാസം വരുന്നില്ലെങ്കിൽ എൻറെ കൂടെ വാ. ന്യൂയോർക്കിലെ തിരക്കുള്ള ട്രെയിനിൽ ആരുടെയെങ്കിലും കാലിൽ ഒന്ന് ചവിട്ടി നോക്കിയാൽ മതി. (By Ranjith Antony in FB)

    ReplyDelete
  9. "പശുവിനു വേണ്ടി മനുഷ്യരെ കൊല്ലുകയാണെന്ന് റമദാന്‍ പ്രസംഗത്തില്‍ പറയുന്നതിന്റെ ക്ലിപ്പിങ് ഈയിടെ കണ്ടു. അതിന്റെ പ്രത്യാഘാതം വലുതായിരിക്കും. അങ്ങനെയുള്ള ആള്‍ക്കാര്‍ക്കെതിരേ നടപടിയെടുക്കുകയും ബാക്കിയുള്ളവരുടെ നിലപാട് മാറ്റാന്‍ ശ്രമിക്കുകയും വേണം."

    ---------------------------------------------
    എങ്കിൽ മോഡിക്കെതിരെ സെൻകുമാർ നടപടി എടുക്കണം...... മോഡിയാണ് പശുവിന്റെ പേരിലുള്ള കൊലപാതകങ്ങൾ അനുവദിക്കാൻ പറ്റില്ലെന്നും കുറ്റവാളികളെ മാതൃകാപരമായി ശിക്ഷിക്കണമെന്നും ഈയിടെ പറഞ്ഞത് ..

    ReplyDelete
  10. Senseless Kumar will be joining the Sanghi brigade soon

    ReplyDelete
  11. സെന്‍കുമാറിനെ DGP സ്ഥാനത്ത് നിന്നും ഇപ്പോഴത്തെ മന്ത്രിസഭ നീക്കം ചെയ്ത് അയാള്‍ കേസുമായി പോയപ്പോള്‍ ഇവിടെ മുഖ്യമന്ത്രിക്ക് എതിരെ ഉണ്ടായ വിമര്‍ശനങ്ങളും ശകാരങ്ങളും തെറിവിളികളും ഓര്‍ത്ത് പോകുന്നു.....

    ReplyDelete
    Replies
    1. മന്ത്രിസഭ നീക്കം ചെയ്തത് ഇക്കാരണം കൊണ്ടാവില്ല. അതിന് കാരണം വേറെയാണ് അതുകൊണ്ടുതന്നെയാണ് അതിന് വ്യാപകമായ പിന്തുണ ലഭിച്ചതും.

      Delete
  12. അല്ലെങ്കിലും മറ്റുള്ളവർ പറയുന്നത് തെറ്റാണു എന്ന് സ്ഥാപിക്കാൻ ശ്രമിക്കുന്ന മുസ്ലിം മതത്തിലെ ലിബറൽ ആയവർ വായ തുറന്നു നമ്മൾക്ക് കുറച്ചു പ്രശ്നം'ഉണ്ട് എന്ന് മറ്റുള്ള മതങ്ങളിലെ ആളുകൾ പറയുന്ന മാതിരി പറഞ്ഞാൽ ഈ മതം എന്നെ നന്നായേനെ. അതെങ്ങിനെ തങ്ങൾ മാത്രമാണ് ശരി എന്ന് ബുദ്ധി ഉറക്കാത്ത കാലത്തു ഓതി പഠിപ്പിച്ചത് അല്ലെ. നല്ല വിദ്യാഭ്യാസം ഉള്ളവർ ചെറിയ പ്രായത് പഠിപ്പിക്കാത്തതിന്റെ പ്രശ്നം. ചൊട്ടയിലെ ശീലം ചുടല വരെ.

    ആദ്യം അങ്ങേരെ തെറി പറഞ്ഞവർ താഴെ ഉള്ള ലിങ്കിൽ പോയി പേജ് നമ്പർ 21 കാണുക

    http://www.ecostat.kerala.gov.in/docs/pdf/reports/vs/annualvitalstat_2015.pdf


    താങ്കളുടെ സ്റ്റാറ്റിസ്റ്റിക്‌സ് ഒക്കെ വല്ലാത്ത കേമം. അങ്ങേര് പറഞ്ഞത് എന്ത് താങ്കൾ മനസിലാക്കിയത് എന്ത്. ഈ ശതമാനത്തെ മൊത്തം ജനസംഖ്യ ആയി എടുത്ത കണക്കു അപാരം. ഇങ്ങനെ തന്നെ ഇളക്കി വിടണം ആളുകളെ

    ReplyDelete
  13. താങ്കള്‍ അവസാനത്തെ ഖണ്ഡികയില്‍ പറഞ്ഞ കാര്യം മാത്രമേ മുന്‍ DGP-യും പറഞ്ഞുള്ളൂ. അദേഹം പറഞ്ഞ ആ രോഗത്തെ പറ്റി താങ്കള്‍ക്കും, താങ്കള്‍ ഉള്‍പ്പെടുന്ന സമുദായ പ്രമാണിമാര്‍ക്കും വ്യക്തമായ അറിവും ഉണ്ട്. പക്ഷെ അതെല്ലാം മറച്ചു വെച്ചുകൊണ്ട് 'മാടമ്പിയിലെ രോഗി' എന്ന തലക്കെട്ടും വെച്ച് ഒരു ലേഖനം എഴുതിവിടുമ്പോള്‍ വര്‍ഗീയ ധ്രുവീകരണം തന്നെയാണ് താങ്കളും ലക്ഷ്യമിടുന്നത് എന്നത് തികച്ചും വ്യക്തമാണ്. സമുദായത്തിലെ യഥാര്‍ത്ഥ രോഗികള്‍ക്ക് ചികിത്സ നല്‍കുന്നതിനു പകരം, ഇത്തരം കൃമികടി ലേഖനങ്ങള്‍ എഴുതി സമൂഹത്തില്‍ വര്‍ഗീയ വേര്‍തിരിവുകള്‍ക്ക് ചുക്കാന്‍ പിടിക്കുന്നത് കാണുമ്പോള്‍, രോഗം ബഷീറിനും കൂടി ബാധിച്ചിരിക്കുന്നു എന്ന് വേണം കരുതാന്‍. ആ അഭിമുഖത്തില്‍ DGP പറഞ്ഞ മറ്റൊരു കാര്യം കൂടി ഓര്‍മ്മപ്പെടുതട്ടെ; "ഉള്ളിലെ രോഗം മറച്ചു വെച്ചുകൊണ്ട്, പുറമേ തൈലം പുരട്ടിയത്കൊണ്ട് യാതൊരു കാര്യവുമില്ല."

    ReplyDelete
  14. സെൻകുമാർ ഈ രോഗത്തിന് അടിമയായിരുന്നു എന്നത് വളരെ അടുത്ത ആളുകൾ മാത്രം അറിഞ്ഞിരുന്നു. ചെന്നിത്തലക്കും ചാണ്ടിക്കും ഇയാളുടെ രോഗം മൂർഛിച്ചതും അറിയാം.

    ReplyDelete