October 7, 2010

ഐ ലവ് യു പറയേണ്ടതെങ്ങിനെ?

അസ്ഥാനത്ത്‌ പ്രയോഗിച്ച് അര്‍ത്ഥം നഷ്ടപ്പെട്ട പദങ്ങളില്‍ ഓസ്കാര്‍ കിട്ടേണ്ടത് ‘I Love You’ വിനാണ്.  ഞാന്‍ നിന്നെ സ്നേഹിക്കുന്നു എന്ന് പറയുന്നത് പോലെ അര്‍ത്ഥസമ്പുഷ്ടമായ ഒരു വാക്കുണ്ടോ?. ലോകത്തിലെ ഏത് മനുഷ്യനും മറ്റൊരു മനുഷ്യനോട് പറയാവുന്ന ഏറ്റവും മനോഹരമായ ഡയലോഗാണിത്. ഒരാള്‍ക്ക് മറ്റൊരാളോട് ‘ഐ ലവ് യു’ എന്ന വികാരം ഉണ്ടാവുമ്പോഴാണ് അയാളിലെ മനുഷ്യത്വം പൂര്‍ണമാവുന്നത്. ഈ ബഷീറിനിതെന്തു പറ്റി? സോക്രട്ടീസ് ആവാനുള്ള വല്ല പരിപാടിയും ഉണ്ടോ എന്നായിരിക്കും നിങ്ങളുടെ മനസ്സ് ചോദിക്കുന്നത്. അതെ.. ഇന്ന് ഞാന്‍ അല്പം ഫിലോസഫി പറയാന്‍ തന്നെയാണ് പോകുന്നത്. താല്പര്യം ഇല്ലാത്തവര്‍ ഇവിടെ വെച്ച് വായന നിര്‍ത്തി വീട്ടീപോണം. വായിച്ചു കഴിഞ്ഞ ശേഷം എന്റെ പിടലിക്ക് പിടിക്കാന്‍ വരുന്നതിനേക്കാള്‍ നല്ലത് അതാണ്‌.

നേപ്പാളിലെ മുന്‍ പ്രധാനമന്ത്രി ബി പി കൊയിരാള ഒരിക്കല്‍ ഒ വി വിജയനോട് പറഞ്ഞ ഒരു തമാശയുണ്ട്.  തന്‍റെ പട്ടാള മേധാവികളുടെ യോഗത്തില്‍ കൊയിരാള ഇങ്ങനെ പറഞ്ഞു “നേപ്പാളിന് ഒരു സൈന്യത്തിന്റെ ആവശ്യമില്ല. നമുക്ക് സൈന്യത്തെ പിരിച്ചു വിടാം”. സദസ്സ് സ്വാഭാവികമായും പ്രക്ഷുബ്ദമായി. പട്ടാളക്കാരോട് പത്ത്‌ ദിവസം പട്ടിണി കിടക്കാന്‍ പറഞ്ഞാല്‍ അവരത് കൂളായി കേള്‍ക്കും. തോക്കെടുക്കരുത് എന്ന് പറഞ്ഞാല്‍ പറഞ്ഞവനെ തട്ടും. അത് ഏത് രാജ്യത്തെയും പട്ടാളക്കാരന്‍റെ മനസ്സാണ്. അങ്ങിനെയുള്ള പട്ടാളക്കാരോട് സൈന്യത്തെ തന്നെ പിരിച്ചു വിടണം എന്ന് പറഞ്ഞാലുണ്ടാകുന്ന പുകില് ഊഹിക്കാവുന്നതല്ലേയുള്ളൂ. ചുട്ട് പഴുത്ത്‌ നില്‍ക്കുന്ന സൈനിക മേധാവികളോട് കൊയിരാളയുടെ ചോദ്യം. “എങ്കില്‍ പറയൂ, ഇന്ത്യന്‍ സൈന്യത്തെ എതിര്‍ത്തു തോല്‍പ്പിക്കാന്‍ നിങ്ങള്‍ക്കാവുമോ?”. ആര്‍ക്കും ഉത്തരമില്ല. “അത് വയ്യെങ്കില്‍ ചൈനീസ് സൈന്യത്തെ തോല്പിക്കാനാവുമോ” വീണ്ടും മൌനം. സ്വപ്നത്തില്‍ പോലും കാണാന്‍ പറ്റാത്ത കാര്യങ്ങളാണ് പ്രധാനമന്ത്രി ആവശ്യപ്പെടുന്നത്!!.

നേപ്പാളിന്‍റെ രണ്ടു അയല്‍ക്കാര്‍ ഇന്ത്യയും ചൈനയുമാണ്. ഈ രണ്ടു രാഷ്ട്രങ്ങളെയും എതിര്‍ക്കാന്‍ കെല്‍പ്പില്ലാത്ത നേപ്പാളിന് ഒരു സൈന്യത്തിന്റെ ആവശ്യമുണ്ടോ എന്നായിരുന്നു കൊയിരാളയുടെ ചോദ്യം.  ഉള്ളത് കൊണ്ട് കഞ്ഞി കുടിച്ച് ബാക്കി സമയം പ്രാര്‍ത്ഥിച്ച് കഴിയുന്നതല്ലേ നല്ലത് എന്നതാണ് ആ ചോദ്യത്തിന്‍റെ ശരിയായ അര്‍ത്ഥം. ഇത് നേപ്പാളിനോട് മാത്രം ചോദിക്കേണ്ട ചോദ്യമല്ല. ഇതേ ചോദ്യം പാക്കിസ്ഥാനോടും ബംഗ്ലാദേശിനോടും ചോദിക്കാം. അല്പം മാറ്റം വരുത്തിയാല്‍ ഇന്ത്യയോടെന്നല്ല ചൈനയോട് വരെ ചോദിക്കാം. ലോകത്തിന്‍റെ മിലിട്ടറി ഭൂപടത്തില്‍ ഇടം പിടിക്കാന്‍ ജനങ്ങളെ പട്ടിണിക്കിട്ട് തോക്ക് വാങ്ങുന്ന എത്രയോ രാജ്യങ്ങള്‍ ഭൂമുഖത്തുണ്ട്. അവരോടോക്കെയും ഈ ചോദ്യം ചോദിക്കാവുന്നതാണ്. ഒരു ഇന്ത്യക്കാരന് പാക്കിസ്താന്‍കാരനോട് ഐ ലവ് യു ഡാ പറയാന്‍ കഴിയില്ലേ? തെക്കന്‍ കൊറിയ വടക്കന്‍ കൊറിയയോട് ഐ ലവ് യു പറഞ്ഞാല്‍ ഭൂമിയുടെ കറക്കം നില്‍ക്കുമോ? ഒറ്റ ഐ ലവ് യു കൊണ്ട് ലോകത്ത് എത്ര കോടി ലാഭിക്കാന്‍ പറ്റും?.  എന്റെ ചിന്തകള്‍ കാട് കയറുന്നുണ്ടെങ്കില്‍ അല്പം ക്ഷമിക്കൂ..        

യൂനിസെഫിന്റെ കണക്കുകള്‍ പ്രകാരം ലോകത്ത് ഓരോ ദിവസവും ഇരുപത്തി അയ്യായിരം കുഞ്ഞുങ്ങള്‍ പട്ടിണി കിടന്നു മരിക്കുന്നുണ്ട്. അതായത് ഓരോ നാല് സെക്കന്‍റിലും ഒരു കുഞ്ഞ് വീതം മരിക്കുന്നു!. ഈ കുറിപ്പ് വായിക്കാന്‍ നിങ്ങള്‍ അഞ്ചു മിനുട്ട് എടുക്കുമെങ്കില്‍ ആ സമയത്തിനകം ലോകത്ത് എഴുപത്തി അഞ്ച് കുഞ്ഞുങ്ങള്‍ പട്ടിണി കിടന്ന് മരിച്ചിട്ടുണ്ടാവും!!. ഐക്യ രാഷ്ട്ര സഭയുടെ കീഴിലുള്ള ഏജന്‍സിയുടെ കണക്കാണിത്. ലോക ജനസംഖ്യയുടെ നാല്പതു ശതമാനം വരുന്ന ദരിദ്ര നാരായണന്മാര്‍ ലോക വരുമാനത്തിന്റെ അഞ്ചു ശതമാനം കൊണ്ടാണ് ജീവിച്ചു പോകുന്നത്. ഇരുപതു ശതമാനം വരുന്ന ധനികരുടെ കൈവശമാണ്  ലോക വരുമാനത്തിന്റെ മൂന്നില്‍ രണ്ടു ഭാഗവും. ഈ കണക്കുകളെയൊക്കെ മറികടക്കുന്നതാണ് ലോക രാജ്യങ്ങളുടെ മിലിട്ടറി ചിലവുകള്‍.  സ്റ്റോക്ഹോം ഇന്റര്‍നാഷണല്‍ പീസ്‌ റിസര്‍ച്ച് ഇന്‍സ്റ്റിറ്റ്യൂട്ട് (സിപ്രി) യുടെ ആധികാരിക കണക്കുകള്‍ പ്രകാരം  രണ്ടായിരത്തി ഒമ്പതില്‍  ലോകം സൈനിക ആവശ്യങ്ങള്‍ക്ക് വേണ്ടി ചിലവഴിച്ചത് ഒന്നര ട്രില്യന്‍ ഡോളറാണ്. (ഒരു ട്രില്യന്‍ എത്രയാണെന്ന് പറയണമെങ്കില്‍ ഞാന്‍ രണ്ടാമതും കോളേജില്‍ പോകേണ്ടി വരും). ഈ തുകയെ ഇപ്പോഴത്തെ ലോക ജനസംഖ്യ കൊണ്ട് ഹരിച്ചാല്‍ ഒരാള്‍ക്ക്‌ ഇരുനൂറ്റി ഇരുപത്തിയഞ്ച്‌ ഡോളര്‍ ലഭിക്കുമത്രെ. ലോകത്തെ പട്ടിണി കിടക്കുന്ന മുഴുവന്‍ മനുഷ്യര്‍ക്കും വയറൊട്ടാതെ കഴിയാന്‍ ഈ മിലിട്ടറി ചെലവുകളുടെ ഒരു ചെറിയ ശതമാനം മതി എന്ന് ചുരുക്കം.  

പുലിസ്റ്റര്‍ സമ്മാനം ലഭിച്ച കെവിന്‍ കാര്‍ട്ടറുടെ ഫോട്ടോ.
ആഫ്രിക്കയിലെ കുഞ്ഞുങ്ങളുടെ ദുരവസ്ഥയില്‍ മനം നൊന്ത് കെവിന്‍ പിന്നീട് ആത്മഹത്യ ചെയ്തു.  

ഓരോ നാല് സെക്കന്‍റിലും മരിച്ചു വീഴുന്ന ഒരു കുഞ്ഞിനു ഈ കണക്കുകള്‍ അറിയില്ലെങ്കിലും അവന്റെ മരണം ഈ കണക്കുകളുടെ കൂടി ഭാഗമാണ്.  കുടിവെള്ളം കിട്ടാതെ, കിടപ്പാടമില്ലാതെ, ഉണ്ണാനും ഉടുക്കാനും ഇല്ലാതെ എത്രയെത്ര ആയിരങ്ങള്‍ നമുക്ക് ചുറ്റും ഉണ്ട്. അവര്‍ക്കൊക്കെ അവകാശപ്പെട്ട ഈ ഭൂമിയുടെ സമ്പത്ത് പരസ്പരം കൊന്നൊടുക്കാനുള്ള ആയുധങ്ങള്‍ക്ക് വേണ്ടി ചിലവഴിക്കുമ്പോള്‍ മരിക്കുന്നത് ഐ ലവ് യു ആണ്. ഇരുപത്തി ഒന്നാം നൂറ്റാണ്ട് പടി കയറി വന്നത് എഴുത്തും വായനയും അറിയാത്ത നൂറു കോടി മനുഷ്യരുമായാണ്. ലോക മിലിട്ടറി ബഡ്ജറ്റിന്‍റെ ഒരു ശതമാനം മതിയത്രേ ഇവരെയൊക്കെയും സാക്ഷരരാക്കാന്‍.  

പട്ടിണി കിടന്നു എഴുന്നേല്‍ക്കാന്‍ വയ്യാതെ ഇരിക്കുന്ന ആഫ്രിക്കയിലെ കുഞ്ഞിനെ കൊത്തിതിന്നാന്‍ കഴുകന്‍ കാത്തിരിക്കുന്ന ചിത്രത്തിന് പുലിസ്റ്റര്‍ അവാര്‍ഡ്‌ കിട്ടി. പത്രങ്ങളുടെ ഫ്രണ്ട്‌ പേജില്‍ അതിന്റെ കളര്‍ ഫോട്ടോ നാം ആസ്വദിച്ചു. ഇമെയിലുകളില്‍ ഫോര്‍വേഡ് കളിച്ചു. പക്ഷെ ആ കുഞ്ഞിനോട് ആരും ഐ ലവ് യു പറഞ്ഞില്ല. കഴുകന്‍ ആസ്വദിച്ചിരിക്കാന്‍ ഇടയുള്ള ആ കുഞ്ഞും ഈ ഭൂമിയുടെ അവകാശിയായിരുന്നു. എല്ലും തോലുമായ അമ്മമാരുടെ മുല ഞെട്ടുകളില്‍ നിന്നും പാലിന് പകരം രക്തം നുണയേണ്ടി വരുന്ന പതിനായിരക്കണക്കിന് കുഞ്ഞുങ്ങള്‍. ഒരു ആന്‍റി ബയോട്ടിക് ഗുളിക പോലും ലഭിക്കാതെ രോഗവും വേദനയും തിന്ന് കാണുന്നവരെയൊക്കെ ദൈന്യമായി നോക്കുന്ന പിഞ്ചു പൈതങ്ങള്‍. അവര്‍ക്കൊക്കെയും വേണ്ടത് ലോക മനസ്സാക്ഷിയുടെ ഒരു ഐ ലവ് യു ആണ്.


ലോകത്തിന്റെ മിലിട്ടറി ചിലവുകള്‍ വെട്ടിച്ചുരുക്കാനോ അവക്കെതിരില്‍ പ്രതിഷേധം സംഘടിപ്പിക്കാനോ നമുക്ക് കഴിഞ്ഞു എന്ന് വരില്ല. പക്ഷെ തീരാദുരിതവുമായി നമുക്ക് ചുറ്റും കഴിയുന്ന എണ്ണമറ്റ മനുഷ്യരില്‍ ഒരാളോട് വല്ലപ്പോഴും ഒരു ഐ ലവ് യു പറയാന്‍ നമുക്ക് കഴിയില്ലേ?. വാര്‍ദോബില്‍ നിരനിരയായി അടുക്കി വെച്ച വസ്ത്രങ്ങള്‍ക്കിടയില്‍ നിന്ന് ഏത് തിരഞ്ഞെടുക്കണം എന്നത് നമ്മില്‍ പലര്‍ക്കും കണ്‍ഫ്യൂഷന്‍ ഉണ്ടാക്കുന്ന ഒന്നാണ്. കീറിപ്പറഞ്ഞ ഒരേ ഉടുപ്പ് തന്നെ എന്നും ധരിക്കുകയും ദിനേന ഉടുപ്പുകള്‍ മാറ്റുന്ന നമ്മുടെ കുഞ്ഞുങ്ങളെ ആര്‍ത്തിയോടെ നോക്കുകയും ചെയ്യുന്ന അയല്‍വീട്ടിലെ കൊച്ചു കുഞ്ഞിന്‍റെ മുഖം എന്നെങ്കിലും നമ്മുടെ ശ്രദ്ധ ആകര്‍ഷിച്ചിട്ടുണ്ടോ?. ഒരു പുത്തനുടുപ്പ് നല്‍കി ആ കുഞ്ഞിനോട് 'ഐ ലവ് യു' പറയാന്‍ എത്ര പേര്‍ക്ക് കഴിഞ്ഞിട്ടുണ്ട്. ലോകത്തെ ദുരിതങ്ങള്‍ പാടെ മായ്ച്ചു കളയാന്‍ ആര്‍ക്കും ആവില്ല. പക്ഷെ വല്ലപ്പോഴും ഒരു ഐ ലവ് യു പറയാന്‍ നമുക്കൊക്കെയും കഴിയും. കഴിയണം. ഗുഡ് ബൈ.

69 comments:

  1. കാണല്ലേ എന്ന് കരുതി ഒഴിവാക്കുന്ന ഫോട്ടോസ് ആണ് ഇതെല്ലാം.
    വീണ്ടും കാണിച്ചു വിഷമിപ്പിച്ചു. പോട്ടെ, നല്ലൊരു കാര്യം പറയാന്‍ വേണ്ടിയല്ലേ.
    ലേഖനം നന്നായി.

    ReplyDelete
  2. All the great things are simple, and many can be expressed in a single word: freedom; justice; honor; duty; mercy; hope”

    ReplyDelete
  3. Im new reader

    ആദരാഞലികല്

    ReplyDelete
  4. തലക്കെട്ട്‌ കണ്ടപ്പോള്‍ ഒന്ന് സംശയിച്ചു. വായിച്ചപ്പോഴാണ് കാര്യം മനസ്സിലായത്‌. ചിന്തിപ്പിക്കുന്ന ലേഖനം. പതിവ് വള്ളിക്കുന്ന് ശൈലിയില്‍ നിന്ന് ഒരു മാറ്റം ഉണ്ട്.

    ReplyDelete
  5. എല്ലും തോലുമായ അമ്മമാരുടെ മുല ഞെട്ടുകളില്‍ നിന്നും പാലിന് പകരം രക്തം നുണയേണ്ടി വരുന്ന പതിനായിരക്കണക്കിന് കുഞ്ഞുങ്ങള്‍. ഒരു ആന്‍റി ബയോട്ടിക് ഗുളിക പോലും ലഭിക്കാതെ രോഗവും വേദനയും തിന്ന് കാണുന്നവരെയൊക്കെ ദൈന്യമായി നോക്കുന്ന പിഞ്ചു പൈതങ്ങള്‍. അവര്‍ക്കൊക്കെയും വേണ്ടത് ലോക മനസ്സാക്ഷിയുടെ ഒരു ഐ ലവ് യു ആണ്.

    ReplyDelete
  6. വളരെ വളരെ ശരിയാ‍യ കാര്യം. പക്ഷേ നമ്മളൊന്നും അതിനു മിനക്കെടുന്നില്ലെന്നതല്ലേ സത്യം. മനസ്സു തുറന്നു് ഒരു ദിവസം ഒരാളോടെങ്കിലും ഐ ലവ് യു പറയാൻ കഴിഞ്ഞിരുന്നെങ്കിൽ!

    ReplyDelete
  7. സ്നേഹം മനസ്സിന്റെ ഉള്ളറയില്‍ മാത്രം സൂക്ഷിച്ചു, ഒട്ടും പ്രകടിപ്പിക്കാത്ത, പിശുക്കി മാത്രം നല്‍കുന്ന, മലയാളീ മനസ്സിനോട് ആരാ ഒന്ന് ' ഐ ലവ് യു' പറയാന്‍ പഠിപ്പിക്കുക..അതിനൊരു ചെലവും ഇല്ലല്ലോ...
    ബഷീറിയന്‍ ചിന്തകള്‍ക്ക് അഴകും അലകും വെച്ച പോസ്റ്റിനു അഭിനന്ദനം. (ഞാനിന്നു ഒരു ഐ ലവ് യു പറയാന്‍ ഒരു രസീട്ട് ബുക്കുമായി വരുന്നുണ്ട്..അവിടെ കണ്ടേക്കണേ ..).

    ReplyDelete
  8. പറഞ്ഞ് പറഞ്ഞ് നമുക്കിടയിൽ ദരിദ്രരില്ലാത്ത അവസ്ഥയാണ് ഇന്ന് നമുക്ക് ചുറ്റും. ആഫ്രികയിലും മറ്റും ദരിദ്രരെ സൃഷ്ടിച്ചത് ആ രാജ്യത്തെ വിഭവങ്ങളെ കൈകലാക്കാൻ മത്സരിച്ച രാഷ്ട്രങ്ങളിം രാഷ്ട്ര തലവന്മാരുമാണ്. ആ വിഷയത്തിൽ നമുക്കൊന്നും ചെയാൻ കഴിയുകയില്ല.
    നമുക്ക് കഴിയുന്നത് താങ്കൾ പറഞ്ഞത് പോലെയുള്ള ലവ് ആണ്. എന്നാൽ കഴിഞ്ഞ് റംസാൻ മാസത്തിൽ ഞാൻ അനുഭവിച്ചത് പട്ടിണികളുടെ ഓട്ടമല്ല. മറിച്ച് സുഖവാളന്മാരുടെ ഓട്ടമാണെന്ന് തെറ്റിദ്ധരിക്കാന്മാത്രം!! രാവിലെ ആളുകൾ കൂട്ടമായി ഇറങ്ങുന്നു.. മുസ്ലിംങ്ങളാണവർ. റംസാനിന്റെ കൂലി വാങ്ങികൂട്ടാൻ ഇറങ്ങിപുറപെടേണ്ടവർ.. പക്ഷെ വീട് വീടാന്തരം തെണ്ടിതിരിയുന്നു. കണ്ട കാഴ്ച്ച, വൈകുന്നേരം സൂപ്പർ ബേക്കറികളിൽ കയറി റെഡിമെയ്ഡ് പത്തിരിയും ബ്രഡും വാങ്ങി സ്വന്തമായി ഭക്ഷണം പോലും പാകം ചെയ്യാനുള്ള സമയം നാല്പത് വീടുകൾക്ക് വേണ്ടി നീക്കിവെക്കുന്നു. ഈ പുണ്യമാസത്തിൽ ലഭിച്ചവയാകെട്ടെ, അഹന്തനടിക്കാൻ പെരുന്നാളിനടിച്ച് പൊടിക്കാൻ വേണ്ടിയും.. ആർക്കാണ് ഇന്ന് ശരിക്കും ദാരിദ്രമുള്ളത്?? ഒന്ന് സഹായത്തിന് പോലും ആരെയും കിട്ടാതെ ആയി.
    എല്ലാം അണുകുടുംബം. പരസ്പര സഹായം നിലച്ചു. പാവപെട്ടവരില്ലാതായതോടെ ആശ്രയ ജീവിതമില്ലാതെയായി, സഹായത്തിനാളെ കിട്ടാതെ വലയുന്നവരാണിന്ന് നമുക്ക് ചുറ്റും. ബക്ഷണമുണ്ടാക്കുന്ന ഭാര്യയോ ഉമ്മയോ രോഗിയായാൽ ഹോട്ടലിനെ ആശ്രയിക്കേണ്ട ഗതികേട്.
    നന്നായി അധ്വോനിക്കുന്നതിന്റെ പരിണിതഫലമായി ലഭിച്ച ഊരവേദന കാരണം മുറ്റവും വീടിനകവും വൃത്തിയാക്കാനാളില്ലാതെ കഷ്ടപെടുന്നവർ എത്രയോ കൂടിവരുന്നു.
    അടുത്ത് കാലം വരെ വീട്ടിൽ ഉമ്മാക്ക് സഹായത്തിന് വന്ന സ്ത്രീ പറഞ്ഞത് അവർ മകളെ ലക്ഷങ്ങളും സ്വർണ്ണ്ങ്ങളുമെല്ലാം കൊടുത്ത് വലിയ മണിമാളികകളുള്ള വീട്ടിലേക്ക് എത്തിച്ചതോടെ മറ്റു വീട്ടിൽ ജോലിക്ക് പോകുന്നത് മകൾക്കിഷ്ടമില്ലാതെയായി.. അങ്ങിനെ അവരും സഹായം നിർത്തി.
    പ്രതീക്ഷയുണ്ടായിരുന്ന വേറെ ഒരു സ്ത്രീ ഉണ്ടായിരുന്നു. അവരുടെ വീട്ടിൽ കരന്റില്ലാത്തതിന് മകളെ ത്രിശൂരിലുള്ള ഹോസ്റ്റലിൽ നിറുത്തിയാണ് ഡോക്ടറാക്കാൻ പഠിപ്പിക്കുന്നത്. ട്യൂഷൻ നൽകിയ ആദ്യ പരീക്ഷയിൽ റേങ്ക് കുറഞ്ഞതിനാലാണ് സൌകര്യങ്ങളുള്ള ഹോസ്റ്റലിൽ ചേർത്തിയതത്രെ. അവർ പഠിക്കട്ടെ.. അവരെ സഹായിക്കാനും എല്ലാവരും റെഡിയാണ്. എന്നാൽ നാളെ അവർ ഡോക്ടറായി വന്നാൽ ഈ ഉമ്മയുടെ സേവനം ഇല്ലാതാവുമോ എന്നാണ് പേടി. എന്നാൽ അവർക്കും തിരക്കാണ്. പണികൾ വേറെയുണ്ടെന്ന്.
    അടുത്ത പ്രദേശങ്ങൾ വരെ തിരക്കി.. ഒരൊറ്റ കുട്ടിയേയും കിട്ടിയില്ല.
    സമൂഹത്തിൽ പല തരത്തിലുള്ള വരെ ദൈവം സൃഷ്ടിച്ചത് ഇല്ലാതായി കൊണ്ടിരിക്കുന്നു. ഇന്ന് പഞ്ചായത്ത് തലത്തിൽ ജോലി ലഭിക്കുന്നു. കാശും പെൻശനുമെല്ലാം ലഭിക്കുന്ന ജോലി കിട്ടുമ്പോ ആർക്കാ മറ്റുള്ളവരെ സഹായിക്കാൻ സമയം? പറയുന്ന കാശ് കൊടുത്താൽ സഹായത്തിനാളെ കിട്ടാനില്ലാത്ത അവസ്ഥ.
    എവിടെയാണ് ദരിദ്രർ ഇന്ന്?? ദാരിദ്രവും പട്ടിണിയുമല്ല പ്രശനം. ലവ് മനുഷ്യ മനസ്സുകളിൽ നിന്നും മരിച്ചു. സഹായിക്കാൻ ആളില്ലാതെ ബുദ്ധിമുട്ടുന്നു. അനാവശ്യമായി സുഖിക്കാൻ വേണ്ടി വീട്ട് പണിക്ക് നോക്കുന്നവരുടെ കാര്യമല്ല. അസുഖം മൂലം കഷ്ടപെടുന്നവരുടെ അവസ്ഥ. ഒറ്റകുടിലുകാരയ ബന്ധുക്കൾക്ക് അവരുടേതായ പ്രശ്നങ്ങൾ… പരസ്പരം എത്തിനോക്കി വിവരങ്ങളറിയുന്നു എന്നതിനപ്പുറം ഒന്നുമില്ല.
    എല്ലാവർക്കും കാശുണ്ട്. പഠിപ്പുണ്ട്. മക്കളെ ഉയർന്ന നിലവാരത്തിൽ പഠിപ്പിക്കുന്നു. പക്ഷെ പുരോഗതിയില്ലാത്തത് പരസ്പര സഹായങ്ങൾക്കാണ്. മാനുഷിക മൂല്ല്യങ്ങൾ തകർന്ന് താഴേക്ക് പോകുന്നു. അതാണ് ഞാൻ കണ്ട മലബാറിന്റെ അവസ്ഥ.

    ReplyDelete
  9. കണ്ണേ മടങ്ങുക - പോസ്റ്റിലെ വിഷയം ഏറെ ഏറെ ചിന്തനീയം ബഷീര്‍ ഭായി. സഹജീവികളെപ്പറ്റി ഒരല്‍പം ചിന്ത ആവശ്യപ്പെടുന്ന ഈ പോസ്റ്റിനു അഭിനന്ദനങ്ങള്‍. കോടികള്‍ അമ്മാനമാടി കലാകായിക മാമാങ്കങ്ങള്‍ നടത്തുന്നതിനേക്കാള്‍, ചേരികളില്‍ മാലിന്യ കൂമ്പാരങ്ങളില്‍ രോഗങ്ങളോടും പട്ടിണിയോടും പൊരുതുന്ന ജീവിതങ്ങളെപ്പറ്റി, അവരുടെ പുനരധിവാസത്തെപ്പറ്റി ചിന്തിക്കാന്‍ കഴിയുന്ന ഔജിത്യ ബോധവും വികസന അജണ്ടയുമുള്ള ഒരു എകാതിപതിയായ രാജാവ് ഇന്ത്യയില്‍ തിരിച്ചു വന്നെങ്കില്‍ എന്ന് ഞാന്‍ ആഗ്രഹിച്ചു പോകുന്നു.

    ജനാതിപത്യത്തിലെ "അടിമത്ത"ത്തെക്കാള്‍ ഇന്ത്യയിലെ ദരിദ്ര നരായണന്മാര്‍ക്ക് നല്ലത് എകാതിപത്യത്തിലെ സുരക്ഷിതത്വമാണെന്നു ഇപ്പോഴത്തെ രാഷ്ട്രീയ കോമാളികള്‍ നമ്മെ ഓര്‍മ്മിപ്പിക്കുന്നു. കട്ടു മുടിച്ചും ഗുണ്ടായിസം കാണിച്ചും അവര്‍ അടിസ്ഥാന വര്‍ഗത്തെ എന്നും അടിയില്‍ തന്നെ നിര്‍ത്താന്‍ ശ്രമിക്കുന്നു.

    പാവപ്പെട്ടവന്റെ പിച്ചച്ചട്ടിയില്‍ കയ്യിട്ടുവാരി അവര്‍ കാണിക്കുന്ന cwg പോലുള്ള പൊങ്ങച്ചത്തിന്റെ പുറംപൂച്ചല്ല യഥാര്‍ത്ഥ ഇന്ത്യ എന്ന് ലോക രാഷ്ട്രങ്ങള്‍ക്ക് അറിയാം. ദാരിദ്ര്യമാണ് തുടച്ചു നീക്കേണ്ടത്, അല്ലാതെ ദാരിദ്രരെയല്ല എന്ന സാമാന്യ ബോധമെങ്കിലും അധികാരി വര്‍ഗത്തിന് ഉണ്ടായിരുന്നെങ്കില്‍......... !!

    ReplyDelete
  10. ബെഞ്ചാലിയുടെ സുദീര്‍ഘമായ കമന്റ്‌ പ്രശ്നത്തിന്റെ ഒരു വശം മാത്രമാണ് കാണുന്നത് എന്ന് തോന്നുന്നു. ജോലിക്ക് ആളെക്കിട്ടാത്ത അവസ്ഥയുണ്ട്. ശരി തന്നെ. എന്നാല്‍ ദുരിതങ്ങള്‍ ആരോടും പുറത്തുപറയാതെ സ്വയം അനുഭവിച്ചു തീര്‍ക്കുന്ന പതിനായിരങ്ങള്‍ നമുക്ക് ചുറ്റുമുണ്ട്. കാണുമ്പോള്‍ നല്ല വസ്ത്രവും ഒരു വേള നല്ല വീടും കാണുമായിരിക്കും. പക്ഷെ വീട്ടില്‍ തീ പുകഞ്ഞിട്ടുണ്ടാവില്ല. പഴയ കാലത്തെ പട്ടിണിയുടെ രൂപ ഭാവങ്ങള്‍ ഇപ്പോള്‍ ഇല്ല എന്നത് ശരിയാണ്. പക്ഷെ പാര്‍പ്പിടം, വസ്ത്രം, മരുന്ന്, സ്കൂള്‍ തുടങ്ങി നിത്യ ജീവിതത്തിലെ അത്യാവശ്യങ്ങള്‍ക്ക് വകയില്ലാതെ കഴിയുന്ന ഒരു വലിയ വിഭാഗത്തെ കണ്ടില്ലെന്നു നടിക്കരുത്.

    ReplyDelete
  11. @ സലീം ഇ.പി.
    താങ്കളുടെ സ്നേഹം രസീറ്റ് ബുക്കിലാണ് അല്ലേ. ഒരു ബുക്ക് എന്ടടുത്തും ഉണ്ട്. ജാഗ്രതൈ..

    @ Akbar
    "കോടികള്‍ അമ്മാനമാടി കലാകായിക മാമാങ്കങ്ങള്‍ നടത്തുന്നതിനേക്കാള്‍, ചേരികളില്‍ മാലിന്യ കൂമ്പാരങ്ങളില്‍ രോഗങ്ങളോടും പട്ടിണിയോടും പൊരുതുന്ന ജീവിതങ്ങളെപ്പറ്റി, അവരുടെ പുനരധിവാസത്തെപ്പറ്റി ചിന്തിക്കാന്‍ കഴിയുന്ന ഔജിത്യ ബോധവും വികസന അജണ്ടയുമുള്ള ഒരു എകാതിപതിയായ രാജാവ് ഇന്ത്യയില്‍ തിരിച്ചു വന്നെങ്കില്‍ എന്ന് ഞാന്‍ ആഗ്രഹിച്ചു പോകുന്നു".

    i wish too...

    ReplyDelete
  12. >>ലോകത്തെ ദുരിതങ്ങള്‍ പാടെ മായ്ച്ചു കളയാന്‍ ആര്‍ക്കും ആവില്ല. പക്ഷെ വല്ലപ്പോഴും ഒരു ഐ ലവ് യു പറയാന്‍ നമുക്കൊക്കെയും കഴിയും. കഴിയണം<<

    തീര്‍ച്ചയായും...പൊങ്ങച്ചത്തിന് വേണ്ടി ചിലവാക്കുന്ന ലക്ഷങ്ങളുടെ ചെറിയ ഒരു ഭാഗമെങ്കിലും ഓരോരുത്തരും പട്ടിണി കിടക്കുന്ന സ്വന്തം അയല്‍വാസിയോട് ഐ ലവ് യു പറയാന്‍ ഉപയോഗിച്ചിരുന്നെങ്കില്‍..............

    Nice post...........

    ReplyDelete
  13. ഞാൻ പറഞ്ഞത് അനുഭവിച്ചറിഞ്ഞ മലബാറിന്റെ കാര്യമാണ്. വീട്ടിൽ തീ പുകഞ്ഞിട്ടില്ലെങ്കിൽ അത് അഹന്തകാരണമാണ്. ഇന്ന് ജോലി ലഭിക്കാത്ത അത്യാവശ്യം ശംബളം ലഭിക്കാത്ത അവസ്ഥ കേരളത്തിലില്ല. ജോലിയോന്നും ചെയ്യാതെ ആരോടും ഒന്നും പറയാതെ വീട്ടിലൊന്നും ഉണ്ടാക്കാൻ കഴിയില്ല. ശ്രമിക്കേണ്ടത് മനുഷ്യരാണ്. സൃഷ്ടിച്ച ദൈവം ഒന്നും തൊള്ളയിലിട്ട് തരില്ല. അവനവനുള്ള വിഭവങ്ങൾ ദൈവം ഈ ഭൂമിയിൽ സൃഷ്ടിച്ചിട്ടുമുണ്ട്. അത് കണ്ടത്തേണ്ട മനുഷ്യൻ വൈറ്റ് കോളർ ജോലിയും നോക്കി അഹന്തകാരണം വീട്ടിലിരുന്നാൽ അതിന്റെ പേരിൽ സഹതപിക്കാൻ ഞാനില്ല.

    ReplyDelete
  14. എത്ര തന്നെ കാണരുതെന്ന് നാം ആഗ്രഹിക്കുമ്പോഴും ആധുനിക ലോകത്ത് ആരും അവാർഡിനായി പകർത്താത്ത നമ്മുടെ കണ്ണു കൊണ്ട് ഒപ്പിയെടുക്കുന്ന യാഥാർഥ്യങ്ങളുടെ ഒരു നേർക്കഴ്ചയാണു ബഷീർ”ക്ക” ഇവിടെ നൽകിയത്... ചിന്തിക്കാനും പ്രവർത്തിക്കാനും നമ്മുക്ക് പ്രചോദനമാവുക

    ReplyDelete
  15. i want to say, i love u i love u i love u i love u i love u i love u i love u i love u i love u i love u i love u i love u i love u i love u i love u i love u i love u i love u i love u i love u i love u

    ReplyDelete
  16. ഓരോരുത്തരും തങ്ങളുടെ ചുറ്റുപാടുകളില്‍ നിന്ന് ഐ ലവ് യു പറഞ്ഞു തുടങ്ങിയാല്‍ പിന്നെ ഐ ലവ് യു പറയാന്‍ ആളില്ലാതാകും. അതാണ്‌ ആദ്യം വേണ്ടത്.

    ഇതെഴുതിയ ബഷീര്‍ ഭായിക്ക് എന്റെ ഐ ലവ് യു!

    ReplyDelete
  17. @ അരസികന്‍
    ഇത്രയൊന്നും താങ്ങാനുള്ള കരുത്ത് എനിക്കില്ല കെട്ടോ.

    ReplyDelete
  18. ഐലവ്യൂന്ന് അങ്ങട്ട് എടുത്ത് ചാടി പറയാന്‍ വരട്ടെ. ഈ ilu പറയുന്നതിന് മുമ്പ് സ്വന്തം കെട്ട്യോളോട് ഒരു ഡബിള്‍ ഐലവ്യൂന്ന് പറഞ്ഞ് പറ്റുമെങ്കില്‍ ഒരു ..മ്മയും കൊടുത്ത് അവിടെ ഉറപ്പിച്ചിരുത്തന്നത് നല്ലതായിരിക്കും എന്ന് ഒരു ചെറിയ സന്ദേഹം ഇല്ലാതില്ല! അല്ലെങ്കില്‍ പുള്ളിക്കാരി ആരോടെങ്കിലും ത്രിബിള്‍ ഐലവ്യൂ അടിച്ച് പോയിക്കാണും. അതാ ജനുസ്സ്!! so... ye ilu ilu kya he...? iloo iloo
    -------------------------------_------

    Above is just for fun :)
    As far as this post is concerned, very touching & thought-provoking. Wish if anyone can, after reading this, extend his hands towards deprived...!!

    ReplyDelete
  19. സമത്വസുന്ദരമായ ഒരു ലോകം സ്വപ്നം കാണാനേ കഴിയൂ. പിന്നെ, എല്ലാര്‍ക്കും അവരാല്‍ ആവും വിധം എന്തെങ്കിലും ചെയ്യാം.

    ReplyDelete
  20. യുദ്ധ സഹാജര്യങ്ങളിലെങ്കിലും അയല്‍ രാജ്യങ്ങലെ ക്കാളും സൈനികവും , ആയുധ ബലവും കൂട്ടാന്‍ വ്യഗ്രത കാണിക്കുന്ന ലോക രാജ്യങ്ങള്‍ സൈനിക ശക്തിക്ക് വേണ്ടി ആവശ്യത്തിലും അധികം ചിലവാക്കുന്ന പണം തന്നെ മതിയാവും അവരുടെ രാജ്യത്തിലെ പട്ടിണി മരണങ്ങള്‍ ഇല്ലാതാക്കാന്‍.
    "ലോകത്തെ ദുരിതങ്ങള്‍ പാടെ മായ്ച്ചു കളയാന്‍ ആര്‍ക്കും ആവില്ല. പക്ഷെ വല്ലപ്പോഴും ഒരു ഐ ലവ് യു പറയാന്‍ നമുക്കൊക്കെയും കഴിയും' - നമുക്ക് കഴിയണം
    ചിന്തിപ്പിക്കുന്ന ലേഖനം. Nice post

    ReplyDelete
  21. മന്സിനേ പറിച്ചു നട്ടവന്‍ അതൊരു മരമാക്കിമാറ്റി ,മരം വിശ്രമിക്കാനവസരം നല്‍കിയപ്പോള്‍ യാത്രയില്‍ ശ്രദ്ദിക്കപ്പെടാതിരുന്ന പുറം കായ്ചകളിലേക്ക് ചിലര്‍ നോക്കിയിരിക്കുന്നു,ബഷീര്‍ വളരേ നന്നായിട്ടുണ്ട്

    ReplyDelete
  22. ഈ ഫോട്ടോസ് മുമ്പ് എല്ലാവരും ഫോര്‍വേഡ് ചെയ്തു കളിച്ചതാണ്, ആരും തന്നെ ഇതിന്റെ ദയനീയ സ്ഥിതി വേണ്ട പോലെ ഉള്കൊണ്ടിട്ടുണ്ടാവില്ല,തീര്‍ച്ചയായും ഈ പോസ്റ്റ്‌ വീണ്ടും എല്ലാവരെയും വിഷയത്തിന്റെ പ്രാധാന്യം മനസ്സിലാക്കാന്‍ ഉപകരിക്കട്ടെ എന്ന് ആഗ്രഹിക്കുന്നു...നമ്മുടെ ചുറ്റിലും ഇത്തരത്തില്‍ ഇല്ലങ്കിലും വളരെ അധികം പ്രയാസം അനുഭവിന്ക്കുന്ന കുട്ടികള്‍ ഉണ്ടെന്നത് സത്യമാണ്, നാം അത് കാണാതെ പോകരുത്..

    ReplyDelete
  23. അക്ഷരങ്ങള്‍ അച്ചടിച്ച്‌ കൂട്ടിയ പുസ്ത്തക താളുകളില്‍ നിന്നും നീ പഠിച്ച ലോകം അല്ല നാം ഇന്ന് കാണുന്ന ലോകം..മറ്റു രാജ്യങ്ങളിലെ പാവപ്പെട്ടവന്റെ സാമ്പത്തിക സ്രോതസ്സുകളെ സ്വന്തം വരുതിയിലാക്കാന്‍ ലോക പോലീസുകാര്‍ നടത്തുന്ന യുദ്ദത്തിലും ഉപരോധങ്ങളിലും ആയിരക്കണക്കിന് പിഞ്ചു കുഞ്ഞുങ്ങള്‍ മരിച്ചു വീഴുന്ന ഈ ലോകം..

    ഇറാക്കിലും അഫ്ഗാനിസ്ഥാനിലും അമേരിക്കന്‍ മിലിട്ടറി ബേസിന്റെ കാന്റീനില്‍ നിന്നും
    കൊണ്ട് തള്ളുന്ന ഭക്ഷണ അവശിഷ്ട്ടങ്ങള്‍ ,ഈ ലോക മുതലാളി ചമയുന്നവരുടെ എച്ചിലുകള്‍ ,പെറുക്കി തിന്നാന്‍ ,അത് കൊണ്ട് പോയി കുഞ്ഞുങ്ങളെ തീറ്റിക്കാന്‍ ബാഗുമായി കാത്തു കിടക്കുന്ന പാവപ്പെട്ട അമ്മമാരുടെ ഈ ലോകം,...

    ഇതൊക്കെ കാണാന്‍ ഇവരോട് ഐ ലവ് യു പറയാന്‍ തന്റെ അയല്‍ രാജ്യത്തിലെ പാവപ്പെട്ടവന്റെ നെഞ്ചിലേക്ക് വെടിയുതിര്‍ക്കാന്‍ ലോകത്തിലെ ഏറ്റവും മുന്തിയ തോക്കിനു വേണ്ടി പണം മുടക്കുന്ന നമ്മുടെ രാജ്യങ്ങള്‍ക്ക് കണ്ണ് ഉണ്ടാവില്ല ..മനസ്സുണ്ടാവില്ല..

    ReplyDelete
  24. Very nice writing ........highly informatiive thanks

    ReplyDelete
  25. i love you toooooooooooooooooooooo

    ReplyDelete
  26. ഇത് വായിച്ചപ്പോള്‍ ഉള്ളിലൊരു വിഷമം, എങ്കിലും നന്നായിരിക്കുന്നു. എന്റെ ഒരനുഭവം ഇത് വായിച്ചപ്പോള്‍ ഞാന്‍ ഓര്‍ക്കുന്നു. അത് ഞാന്‍ എന്റെ ബ്ലോഗില്‍ കുറിച്ചിട്ടുണ്ട് നോക്കുക

    ReplyDelete
  27. കെവിൻ ആത്മഹത്യ ചെയ്തതാണെന്ന് ഇപ്പോഴാണ് ഞാനറിയുന്നത്..

    ഈ പറഞ്ഞ ഒന്നര ട്രില്യൺ ഡോളർ സ്വിസ് ബാങ്കുകളിൽ മാത്രം ഇന്ത്യൻ കള്ളപ്പണക്കാർ നിക്ഷേപിച്ചിട്ടുണ്ട്..

    ReplyDelete
  28. നന്മയുള്ള മനസ്സില്‍ നിന്നേ നല്ല ചിന്തകളുണ്ടാകൂ! എന്നിരുന്നാലും ഇത്തരം നല്ല ലേഖനങ്ങള്‍ വായിക്കുന്നവരുടെ മനസ്സും നന്നാവും എന്ന് കരുതാം. ഭാവുകങ്ങള്‍!

    ReplyDelete
  29. ഭീകരത ഉണ്ടാക്കുന്നതും തകര്കുന്നതും ലോകത്തിലെ ഏറ്റവും വലിയ വ്യവസായമായ 'ആയുധ നിര്‍മാണം' ആണ്. കുത്തക മാധ്യമങ്ങള്‍, സുരക്ഷ എജെന്സികള്‍, രാഷ്ട്രീയ നേതാക്കള്‍, വാടകയ്ക്ക് എടുക്കാവുന്ന ബുദ്ധി ജീവികള്‍ എന്നിവര്കൊക്കെ ഈ കൂട്ട് കച്ചവടത്തില്‍ പങ്കുണ്ട്. രസകരമായി ഇക്കാര്യം എഴുതിയതിനു നന്ദി. ഇത് സംബന്ധമായി എന്റെ വീക്ഷണം കാണുക.
    ഭീകരതയുടെ പ്രഭവ കേന്ദ്രങ്ങള്‍

    ReplyDelete
  30. മിസ്റ്റര്‍ ബഷീര്‍ പ്രസക്തമായ പോസ്റ്റു സഗൗരവം വായിച്ചു. നന്ദി

    ReplyDelete
  31. ഭരണ കൂടങ്ങളുടെ അവജ്ഞയും ക്രൂരസമീപനങ്ങളും
    ചരിത്രത്തിന്‍റെ ഭാഗമെന്നോണം തുടര്‍ന്ന് കൊണ്ടേയിരിക്കും. ചില്ലു കൊട്ടാരങ്ങളില്‍ വാഴുന്ന പ്രഭുക്കളുടെ കണ്ണുകളില്‍ നിന്ന് കനിവിന്‍റെ കണ്ണീരു വീഴാന്‍ ഒരല്പം വിയര്‍ക്കേണ്ടി വരും. അഫ്ഗാനിലും ഇറാഖിലും ഫലസ്തീനിലുമെല്ലാം
    ദുരിതങ്ങളുടെ കൊടുമുടികള്‍ തീര്‍ക്കുകയും പ്രകൃതി വിഭവങ്ങളില്‍ കണ്ണുനട്ട് ലോകത്തിന്‍റെ വിവിധ കോണുകളില്‍ അശാന്തിയുടെ ഹൈബ്രിഡ് വിത്തുകള്‍ വിതക്കുകയും പോസ്റ്റില്‍ സൂചിപ്പിച്ച മനുഷ്യപ്പെക്കോലങ്ങളെ സൃഷ്ടിക്കുകയും ചെയ്യുന്ന അമേരിക്കയുടെ പ്രസിഡണ്ടിന് 2009-ലെ സമാധാനത്തിനുള്ള നൊബേല്‍ സമ്മാനം കൊടുത്തു കൊണ്ട് ....for his extraordinary efforts to strengthen international diplomacy and cooperation between people...എന്ന് വിളിച്ചു കൂവിയ ലോകമാണിത്.

    സമ്പത്ത് ധനവാന്‍റെ കയ്യില്‍ മാത്രം ഒതുങ്ങാതിരിക്കാനും അത് അര്‍ഹമായ കരങ്ങളില്‍ എത്തിച്ചേരാനും
    ഉതകുന്ന നിര്‍ബന്ധ നിയമങ്ങളുണ്ടാകണം. വരുമാനത്തില്‍ നിശ്ചിത പരിധിയെത്തിക്കഴിഞ്ഞാല്‍ രണ്ടര മുതല്‍ അഞ്ചു ശതമാനം വരെ പാവങ്ങളുടെ അവകാശമാണെന്ന് ഇസ്ലാം അനുശാസിക്കുന്നുണ്ട്. എത്ര മുസ്ലിംകള്‍ ഇതിനു തയ്യാറാവുന്നു
    എന്ന ചോദ്യം പ്രസക്തമാണെന്നു ഞാന്‍ വിശ്വസിക്കുന്നു. നമുക്ക് നമ്മിലേക്ക്‌ നോക്കുക്ക. അര്‍ത്ഥപൂര്‍ണ്ണമായ വല്ലതും ചെയ്യുക. അതാവും ഏറെ ക്രിയാത്മകം!!

    ReplyDelete
  32. @ Pony Boy:
    അതെ കെവിന്‍ കാര്‍ട്ടറുടെ മരണം ലോകത്തെ ഞെട്ടിപ്പിച്ച ഒരു ആത്മഹത്യയായിരുന്നു. പ്രശസ്തവും വിവാദവുമായ ആ ചിത്രത്തിന് പുലിസ്റ്റര്‍ സമ്മാനം കിട്ടി രണ്ടു മാസത്തിന് ശേഷമാണ് അദ്ദേഹം ആത്മഹത്യ ചെയ്യുന്നത്. കുഞ്ഞിന്റെ ജീവന്‍ രക്ഷിക്കാന്‍ ശ്രമിക്കാതെ ആ ദുരവസ്ഥയെ വിറ്റ് കാശാക്കി എന്ന് പലരും കെവിനെ വിമര്‍ശിച്ചു. ഒരു വേള ആ വിമര്‍ശങ്ങള്‍ ആവാം കെവിനെ മരണത്തിലേക്ക് നയിച്ചത്. പക്ഷെ, കെവിന്റെ ആ ചിത്രം ലോക മനസ്സാക്ഷിയുടെ ശ്രദ്ധ ആഫ്രിക്കയിലേക്ക് തിരിച്ചു എന്നതാണ് സത്യം. കെവിന്‍ ഒരിക്കല്‍ എഴുതി.
    "depressed . . . without phone . . . money for rent . . . money for child support . . . money for debts . . . money!!! . . . I am haunted by the vivid memories of killings & corpses & anger & pain . . . of starving or wounded children, of trigger-happy madmen, often police, of killer executioners . . . "

    ReplyDelete
  33. @ വിനോദ്
    താങ്കളുടെ ബ്ലോഗ്‌ സന്ദര്‍ശിച്ചു. വളരെ touching ആയ ഒരു അനുഭവമാണ് നിങ്ങള്‍ പകര്‍ത്തിയത്.

    ReplyDelete
  34. very informative article. a variety stuff from you.

    ReplyDelete
  35. വന്നു വന്നു ബഷീര്‍ സാഹിബ്‌ സോഷ്യലിസം പറഞ്ഞു തുടങ്ങിയോ! ;)

    നല്ല ചിന്തകള്‍!

    ReplyDelete
  36. ഐലവ് എന്തെന്ന് അറിയമ്മെങ്കിൽ ആദ്യം ഇന്ത്യ എന്തെന്ന് പഠിക്കണമെന്ന് ആരും പറഞ്ഞില്ലാല്ലോ വള്ളികുന്നാ.

    ReplyDelete
  37. അന്യോന്യം സ്നേഹിച്ചാല്‍ യുദ്ധത്തെക്കുറിച്ച് ചിന്തിക്കുകയേ വേണ്ട. പട്ടാളക്കാരെയും മിലിട്ടറി ചിലവും കുറയ്ക്കാം. അവിടെയാണ് ബഷീര്‍ എഴുതിയ 'ഐ ലവ്' വിന്റെ പ്രാധാന്യം. ലേഖനം വളരെ നന്നായി.

    ReplyDelete
  38. This comment has been removed by the author.

    ReplyDelete
  39. cwg യുടെ കൊടികളും, കോടികളും രാഷ്ട്ര തലസ്ഥാനത്തെ 'ആവേശത്തിന്റെ കൊടുമുടിയില്‍' എത്തിക്കുന്ന ഒരു സവിശേഷ സാഹചര്യത്തില്‍ , ബജറ്റിന്റെ സിംഹഭാഗവും ആയുധങ്ങള്‍ വാരിക്കൂട്ടുവാന്‍ നീക്കിവെക്കപ്പെടുന്ന ആഗോള ചുറ്റുപാടില്‍ B.V. യുടെ കുറിപ്പ് സന്ദര്ഭോചിതവും, കണ്ണു തുറപ്പിക്കുന്നതുമാണ്; കൂടെ നല്‍കിയ ചിത്രങ്ങള്‍ കണ്ണു നനയിപ്പിക്കുന്നതും! ഹൃദയഭേദകമായ ദൃശ്യങ്ങള്‍ക്ക് മലയാള പത്രങ്ങള്‍ നല്‍കാറുള്ള 'ക്യാച് വേര്‍ഡ്' ആയ കുമാരനാശാന്റെ പ്രശസ്തമായ 'കണ്ണേ മടങ്ങുക' എന്ന വരി അക്ബര്‍സാബ് ഉദ്ധരിച്ചു കഴിഞ്ഞു.

    ആഫ്രിക്കന്‍ ദൃശ്യം സൃഷ്ടിച്ച മനോവേദനയില്‍ വിഷാദ രോഗിയായിത്തീര്‍ന്ന കാര്‍ട്ടര്‍ ആത്മഹത്യ ചെയ്തു! പക്ഷെ ഫോട്ടോയിലെ ആ കുട്ടിയെക്കുറിച്ച് ആരും അന്വേഷിച്ചു പോലുമില്ല. ഒരു മാധ്യമ സ്ഥാപനത്തില്‍ നിന്നും അതിനു 'ഫോളോ-അപ്പു'കള്‍ വന്നില്ല. സഹജീവിയുടെ ദു:ഖപൂര്‍ണ്ണമായ അവസ്ഥയില്‍ നിസ്സംഗ ഭാവത്തോടെ പ്രതികരിക്കുന്ന, എന്നാല്‍ അനാവശ്യ ചിലവുകള്‍ക്ക് കോടികള്‍ ചിലവഴിക്കുന്ന ഒരു സംവിധാനത്തോടു കലഹിക്കുന്ന വള്ളിക്കുന്നിന്റെ അക്ഷരങ്ങള്‍ മൂര്‍ച്ചയോടെ കുത്തി നോവിക്കുന്നത് നാമോരോരുത്തരുടെയും പ്രതികരണശേഷി ഇല്ലായ്മയെയാണ്‌, മറ്റുള്ളവന്റെ ദയനീയാവസ്ഥക്ക് നേരെ കണ്ണു മുറുക്കിച്ചിമ്മുന്ന, അവരുടെ ദീന വിലാപങ്ങള്‍ക്ക്‌ നേരെ കാതു പൊത്തുന്ന ആധുനികന്റെ മനുഷ്യത്വമില്ലായ്മയെയാണ്.

    ചരിത്രത്തിന്റെ താളുകളില്‍ സ്വര്‍ണ്ണനിറമുള്ള അക്ഷരങ്ങള്‍കൊണ്ട് എഴുതപ്പെട്ട രണ്ടു ചരിത്ര സംഭവങ്ങള്‍ ഓര്‍മ്മ വരുന്നു: അന്ന്, ആ പെരുന്നാള്‍ സുദിനത്തില്‍ ഈദ് നമസ്കാരം കഴിഞ്ഞു പുറത്തിറങ്ങിയ പ്രവാചകന്‍റെ ദൃഷ്ടി ഒരു അനാഥ ബാല്യത്തില്‍ ഉടക്കി നിന്നു. കീറിപ്പറിഞ്ഞ വസ്ത്രം ധരിച്ച ആ പിഞ്ചു കുട്ടിയുടെ കണ്ണുകള്‍ കാരുണ്യത്തിനു വേണ്ടി പരതുന്നുണ്ടായിരുന്നു. പ്രവാചകന്‍റെ നയനങ്ങള്‍ സജലമായി; അദ്ദേഹം ആ കുട്ടിയെ വാരിപ്പുണര്‍ന്നു; വീട്ടില്‍ കൊണ്ടുപോയി, വസ്ത്രവും ഭക്ഷണവും നല്‍കി. ' I LOVE YOU' എന്നതിന്‍റെ അക്ഷരവും അര്‍ത്ഥവും ആണ് അവിടെ കണ്ടത്!
    നൂറ്റാണ്ടുകള്‍ക്കു ശേഷം, ഒരു ദക്ഷിണേന്ത്യന്‍ പര്യടനത്തിനിടയില്‍ മാറ്റി ഉടുക്കുവാന്‍ മറുതുണി യില്ലാത്തതിനാല്‍ തന്റെ അലക്കിയ വസ്ത്രം ഉണങ്ങുന്നതുവരെ വെള്ളത്തില്‍ കാത്തിരുന്ന ഒരു വൃദ്ധയുടെ ദൃശ്യം മനസ്സില്‍ സൃഷ്ടിച്ച നൊമ്പരം ജീവിത കാലം മുഴുവന്‍ ഒരു 'അര്‍ദ്ധ നഗ്നനായ ഫക്കീര്‍' ആയി ജീവിക്കുവാന്‍ ഹേതുവാക്കിയ ഗാന്ധിജിയുടെ സൌമ്യ ദീപ്ത സാന്നിധ്യം!

    നന്ദി ബഷീര്‍ സാബ്! ഉറങ്ങുന്ന സഹജീവി ബോധത്തെ തലയ്ക്കു കൊട്ടി ഉണര്ത്തിയത്തിനു. താങ്കളുടെ ഈ കുറിപ്പിലെ അക്ഷരങ്ങള്‍ക്ക് നനവുണ്ട്; വാക്കുകളില്‍ ഈര്‍പ്പമുണ്ട്.

    ReplyDelete
  40. @ Noushad Kuniyil
    "ആഫ്രിക്കന്‍ ദൃശ്യം സൃഷ്ടിച്ച മനോവേദനയില്‍ വിഷാദ രോഗിയായിത്തീര്‍ന്ന കാര്‍ട്ടര്‍ ആത്മഹത്യ ചെയ്തു! പക്ഷെ ഫോട്ടോയിലെ ആ കുട്ടിയെക്കുറിച്ച് ആരും അന്വേഷിച്ചു പോലുമില്ല. ഒരു മാധ്യമ സ്ഥാപനത്തില്‍ നിന്നും അതിനു 'ഫോളോ-അപ്പു'കള്‍ വന്നില്ല"

    കമ്മന്റ്സ് കോളത്തെ ഏറെ ദീപ്തമാക്കുന്ന വരികളാണ് താങ്കള്‍ കുറിക്കാറുള്ളത്‌. 'പോസ്റ്റുമാന്‍' ആയ ഞാന്‍ അവയ്ക്ക് മുന്നില്‍ പലപ്പോഴും നിഷ്പ്രഭനായിപ്പോകുന്നു. താങ്കള്‍ നിര്‍ലോഭം ചൊരിയുന്ന അഭിനന്ദനങ്ങളുടെ പുറത്താണ് അല്പമെങ്കിലും പിടിച്ചു നില്‍ക്കുന്നത്. നന്ദി.

    ReplyDelete
  41. വളരെ പ്രസക്തമായ ലേഖനം.C.W.G ഉത്ഘാടനത്തില്‍ പക്കിസ്ഥാനു കിട്ടിയ തകര്‍പ്പന്‍ കയ്യടിയില്‍ ജനങ്ങളുടെ ഈ വികാരം കുറച്ചൊക്കെ പ്രതിഫലിപ്പിക്കാന്‍ കഴിഞ്ഞു എന്നു തോന്നുന്നു. അതുപോലെത്തന്നെ C.W.G യോടനുബന്ധിച്ച് ദില്ലിയില്‍നടന്ന എല്ലാ ഫെസ്റ്റിവലുകളിലും
    മതസൗഹാര്‍ദ്ദം അറിഞ്ഞോഅറിയാതെയോ വിഷയമായിരുന്നു. ഹിന്ദു ഗായകര്‍ അമീര്‍ ഖുസ്റുവിന്റെയും മറ്റു സൂഫികളുടെയും കലാം പാടി മതസൗഹാര്‍ദ്ദ്ത്തെപ്പറ്റി പറഞ്ഞപ്പോള്‍ മുസ്ലീം ഗായകര്‍ രാമനെയും കൃഷ്ണനെയും കുറിച്ചാണ് പാടിയത്.വളരെയധികം സന്തോഷത്തോടെയാണ് ഇത് ജനങ്ങള്‍ ഉള്‍ക്കൊണ്ടത്. ആരും വേണ്ടെന്നു വെച്ചിട്ടാവില്ല . പലപ്പോഴും നമ്മുടെ ചെറിയ ചെറിയ പ്രശ്നങ്ങളെ വളരെ വലുതാക്കി കാണുന്നതു കൊണ്ടാണ് മറ്റുള്ളവരുടെ പ്രശ്നങ്ങള്‍ കാണാന്‍ കഴിയാതെ പോകുന്നതെന്ന് തോന്നുന്നു. ഉള്ളവനില്‍ നിന്നു ഇല്ലാത്തവനിലേക്കുള്ള ദൂരം കുറവാണെന്നും
    മതം ഒരുവിശ്വാസം അഥവാ ജീവിതത്തില്‍ നാം ഉള്‍ക്കൊള്ളുന്ന ചില ഇഷ്ടങ്ങള്‍ മാത്രമാണ് എന്നും നമ്മുടെ കുട്ടികളെയെങ്കിലും മനസ്സിലാക്കിക്കാറായാല്‍ നാളെ ഒരുപക്ഷെ കൂടുതല്‍ നന്നായേക്കാം.

    ReplyDelete
  42. നല്ല പോസ്റ്റ്‌. കൊടിയുടെ നിറം നോക്കി,മതം, ജാതി തുടങ്ങിവയ നോക്കി, അവയ്ക്ക് വേണ്ടി സംവാദം നടത്തി, പട പൊരുതി തളരുന്നതിന്നു പകരം, എന്തെല്ലാം നല്ല കാര്യംങ്ങള്‍ ചെയാം !!!! http://boologakarunyam.blogspot.com വഴിയും മറ്റും നമ്മടെ ബൂലോകത്ത് നിന്ന് കുറെ പേര്‍ സഹജീവികളോട് ഐ ലവ് യു എന്ന് പറയാറുണ്ട്.

    ReplyDelete
  43. അജി ചേട്ടന്‍ മെയില്‍ ചെയ്തത് വായിച്ചപ്പോള്‍ ( i love you ) ഒന്ന് വിസിടണം എന്ന് തോന്നി , നന്മ ഏറെയുല്ല ഒരു വായനാ ലോകം അതാണിവിടെ വന്നപ്പോള്‍ കിട്ടിയത് , നല്ല വായനകള്‍ എന്നും സ്മരിക്കപെടും , സത്യം കണ്ടാല്‍ അത് വിളിച്ചു പറയാനുള്ള ആര്‍ജവം ദാറ്റ് ഈസ്‌ ഗുഡ് . അതാണ്‌ മെടല്‍ പട്ടിക ഉള്പെടുതത്തില്‍ എടിടര്‍ക്കും എഴുതി എന്ന് പറഞ്ഞപ്പോള്‍ തോനിയത്. നന്നായിട്ടുണ്ട്
    പിന്നെ ഞാനൊരു ബ്ലോഗര്‍ അല്ല പിന്നെ ഓപ്പണ്‍ ഐ ഡി കിട്ടാന്‍ ഒന്നുണ്ടാക്കി എന്ന് മാത്രം

    ReplyDelete
  44. ഹൃദയം നുറുക്കുന്ന ഇത്തരം കാഴ്ചകള്‍ .....നിറഞ്ഞ വയറോടെ ഇരിക്കുന്നവന് ദാരിദ്ര്യത്തിന്റെ നോവുകള്‍ മനസ്സിലാകുമോ?

    ReplyDelete
  45. @ പ്രയാണ്‍
    Yes, I agree with you.
    കോമണ്‍വെല്‍ത്ത് ഉദ്ഘാടന ചടങ്ങില്‍ പാക്കിസ്ഥാന് കിട്ടിയ കയ്യടി ഒരു ഇന്ത്യന്‍ 'കോമണ്‍മാന്റെ' മനസ്സാണ് കാണിക്കുന്നത്. സ്നേഹത്തോടെ കഴിയാന്‍ അവര്‍ ആഗ്രഹിക്കുന്നു. അതിര്‍ത്തികള്‍ തിരിച്ചു സ്നേഹിക്കാനും വെറുക്കാനും സംരക്ഷിക്കാനും കൊല്ലാനും രാഷ്ട്രീയക്കാര്‍ക്ക് സാധിച്ചേക്കും. പക്ഷെ 'കോമണ്‍മാന്' സാധിക്കില്ല.

    ReplyDelete
  46. basheerka kannu nanaju poyi oru vichindanam nadatthan udakunnathanu ee post nannayittundu iniyum pradeeshikkunnu
    by Naseem

    ReplyDelete
  47. വളരെ നല്ല ചിന്ത...
    ആശംസകൾ...

    ReplyDelete
  48. Bhsheer bhai,,thangalude ee lekhanam prashamsaneeyamaanu.Thurannu pidicha kaanukalode chuttilum nokkumpol kanunna ee dhayaneeya kaazhchakal charcha cheyyappedendathu thanne.Enkilum 100 koodiyil mele janasankya ulla ee India maharajyathu joilyulla,varumanamulla oru 50 crore aalukalenkilum kuranjathu kaanille,,,avarellam oraazhcha oru roopa nammude rajyathe pattini kidakkunna kunjungalkku vendi maati vachal,orazhcha 50 crore roopa maatti vekkan kazhiyille. appo oru maasam ethrayaayi. Ingane namukk cheyyan kazhinjal pattini maranangal oru paridhi vare namukk ozhivaakkan kazhiyille.Sahajeevikalode karunayillatha nammude manasannu aadhyam maattendathu,. Thangalude lekhanathinu ente aathmarthamaya abinanthanangal

    ReplyDelete
  49. ഇപ്പോളാ ഇത് കണ്ടത്. ഈ പോസ്റ്റിനു എന്റെ 100 മാര്‍ക്ക്‌.. ഐ ലവ് യു

    ReplyDelete
  50. kannu nirayicha lekhanam. nalla chinta
    oppam kevin cartere kurich kooduthal manassilaakkanum ithu upakarichu. thanks

    ReplyDelete
  51. സ്വന്തം കണ്മുന്നിലുള്ളവരോട് പോലും ഒന്ന് പുഞ്ചിരിക്കാന്‍ മടിക്കുന്ന സമൂഹത്തില്‍ അന്യരോടുള്ള സ്നേഹത്തിനെന്തു വില ???

    ReplyDelete
  52. ആരോടാണീ ചോദ്യങ്ങളൊക്കെ? സ്വന്തം വരുമാനത്തിന്റെ ഒരു ശതമാനം പോലും പാവപ്പെട്ടവര്‍ക്ക് കൊടുക്കാന്‍ നൂറുവട്ടം ആലോചിക്കുന്നവരാണ് മിക്കവാറും. മാറി മാറി വരുന മൊബൈലുകള്‍ മാറ്റാനും, ബ്രാന്‍ഡഡ് വസ്ത്രങ്ങളും ഷൂസുകളും മാത്രം വാങ്ങാന്‍ ഒട്ടനവധി പണം വാരിയെറിയാനും, വീകെന്റുകളില്‍ കുടുമ്പവുമൊത്ത് "ഡൈന്‍ ഔട്ട്" ചെയ്യാനും, മക്കള്‍ക്ക് കളിപ്പാട്ടം വാങ്ങാനും പണം കോരിയെറിയാന്‍ യാതൊരു മടിയുമില്ലാത്തവരോട് സോമാലിയപ്പിരിവിന്റെ കാര്യം പറഞ്ഞപ്പോള്‍ നിരത്തിയ കഷ്ടപ്പാടുകള്‍ കേട്ട് അവര്‍ക്കായി പുതിയൊരു ഫണ്ട് തുടങ്ങിയാലോ എന്നു കരുതിപ്പോയി!! ഒരാള്‍ ഒരു കുഞ്ഞിനെയെങ്കിലും പരിരക്ഷിച്ചിരുനെങ്കില്‍......

    ReplyDelete
  53. ഐ ലവ് യു

    ReplyDelete
  54. In fact we had a fundraising program in our Masjid too (here in NY) but in Ramadan. It was really touching to listen to the Ex PM of Somalia and interacting with the Somalian community here to know more about life in Somalia.

    The ironical part was that, after the program there was an iftar. While we were removing plates from tables after Ifatr, I was shocked to see that more than 50% of plates were having 2-3 chicken pieces (no even bitten), 1-2 burgers etc.. and we were forced to throw those into garbage. That's we- we know that millions around us are starving everyday, we listen to that, we will go back home and continue wasting our food.

    Even if we can't say an I LOVE YOU, at least if these incidents could open our eyes that we won't waste food any more.. but sadly it never happens.. (including myself)!

    There is another interesting perspective to this. Recently it is found that there is significant amount of oil reserve in Africa. But Uncle Sam doesn't seem to be much keen as much as he was interested in Iraq.

    I had written a post after the program. Read it here, if time permits.

    ReplyDelete
  55. ഇത് വരെ ഞാന്‍ പറഞ്ഞ എല്ലാ ഐ ലവ് യു കളും തിരിചെടുത്തിരിക്കുന്നു...ആ പട്ടിണിപ്പാവങ്ങള്‍ക്കു എന്റെ വക ഒരു ഐ ലവ് യൂ ബഷീര്കാ...http://parappanadan.blogspot.com

    ReplyDelete
  56. ഈ ഫിലോസഫി കുറേ ആളുകള്‍ വായിക്കുകയും അറ്റ്‌ലിസ്റ്റ് ഒരു i love you എങ്കിലും പറയുകയും ചെയ്തിരുന്നെങ്കില്‍. വാക്കുകളിലെ ഭംഗിക്ക് അപ്പുറത്ത്‌ ഈ ഫിലോസഫി കണ്ണുകളെ ഈറന്നിയിപ്പിക്കുന്നു. i love you alllllllllllllllllll

    need love by giving love

    ReplyDelete
  57. ഈ പോസ്റ്റിനും ഇത് എഴുതിയ മാഷോടും ഞാന്‍ ഐ ലവ് യു പറയില്ല.കാരണം ഇതില്‍ ദാരിദ്ര്യത്തിന്റെ കണിക പോലും ഇല്ല..മറിച്ചു ഇതില്‍ ചിന്തയുടെയും പ്രഘോഷനതിന്റെയും സമ്പ ന്നതയാ ണി തില്‍.........

    ReplyDelete
  58. Oru chan vayarinnu vendi keyunnavar oru baghath. Arbhadathinnu parakkam payunnavar oru baghath. eee lokham evide chennavasanikkum !!

    ReplyDelete
  59. ഇത് എഴുതിയ ബഷീര്‍ക്കാക്കും ഇത് വായിച്ചവര്‍ക്കും എന്റെ വക ഒരു ഹൃദയം നിറഞ്ഞ ഐ ലവ് യു.......

    ReplyDelete
  60. Poverty is as a result of lack of love for others. Those who have does not want to share with those who has not. Most government policies in all countries of the world are not for the interest of the poor. This is an honest and shocking reality. I love this post. Very powerful.

    ReplyDelete
  61. moneee basheeree....ninakke bhayankar valiya ore "I LOVE YOU"

    ReplyDelete
  62. ഓരോ നാല് സെക്കന്‍റിലും മരിച്ചു വീഴുന്ന ഒരു കുഞ്ഞിനു ഈ കണക്കുകള്‍ അറിയില്ലെങ്കിലും അവന്റെ മരണം ഈ കണക്കുകളുടെ കൂടി ഭാഗമാണ്. കുടിവെള്ളം കിട്ടാതെ, കിടപ്പാടമില്ലാതെ, ഉണ്ണാനും ഉടുക്കാനും ഇല്ലാതെ എത്രയെത്ര ആയിരങ്ങള്‍ നമുക്ക് ചുറ്റും ഉണ്ട്. അവര്‍ക്കൊക്കെ അവകാശപ്പെട്ട ഈ ഭൂമിയുടെ സമ്പത്ത് പരസ്പരം കൊന്നൊടുക്കാനുള്ള ആയുധങ്ങള്‍ക്ക് വേണ്ടി ചിലവഴിക്കുമ്പോള്‍ മരിക്കുന്നത് ഐ ലവ് യു ആണ്.

    ReplyDelete