April 16, 2014

സുരാജിന് ദേശീയ അവാർഡ്, ന്റെ പടച്ചോനെ !

സുരാജിന്റെ കഷ്ടകാലം തുടങ്ങീന്നാ തോന്നണത്.. നിറയെ സിനിമകൾ, വൈവിധ്യമാർന്ന കഥാപാത്രങ്ങൾ. ആരെയും അസൂയപ്പെടുത്തുന്ന സൗഹൃദ വലയം. സൂപ്പർ മെഗാ സ്റ്റാറുകളുമായി മൂക്ക് തോണ്ടിക്കളിക്കാവുന്ന ചങ്ങാത്തം. ചുരുങ്ങിയ കാലങ്ങൾക്കുള്ളിൽ സുരാജ് വെട്ടിപ്പിടിക്കാത്ത മേഖലകളില്ല. ടി വി പരിപാടികൾ.. മോഹൻ ലാലിനും മമ്മൂട്ടിയോടും ഒപ്പമുള്ള സ്റ്റേജ് ഷോകൾ. അങ്ങനെയങ്ങിനെ ശുക്ര നക്ഷത്രം വെട്ടിത്തിളങ്ങി ക്കൊണ്ടിരിക്കുന്നതിനിടയിലാണ് ഇടിവെട്ട് പോലെ ഈ അവാർഡ് വാർത്തയെത്തിയിരിക്കുന്നത്. ഒരു കൊലച്ചതിയാണ് ദേശീയ അവാർഡ് കമ്മറ്റി സുരാജിനോട് ചെയ്തിരിക്കുന്നത്. ഇതുപോലൊരു ചതി വളർന്നു വരുന്ന ഒരു കലാകാരനോടും ചെയ്യാൻ പാടില്ലാത്തതാണ്. ഇനി സുരാജിന് ഒറ്റ സിനിമ കിട്ടാൻ പാടാണ്. പാവം ഇനിയെങ്ങിനെ ജീവിച്ചു പോകും?

നമുക്കറിയാം, സലീം കുമാറിന്റെ അഭിനയ ജീവിതം തകർത്തത് ഇതേ പോലൊരു അവാർഡാണ്. നിറയെ റോളുകളും കോമഡി പരിപാടികളുമായി കത്തി നില്ക്കുന്ന കാലത്താണ് സലീം കുമാറിന് ദേശീയ അവാർഡ് കിട്ടിയത്. അതോടെ മുഴുവൻ സൂപ്പർ താരങ്ങളും സലീം അഹമ്മദ് ഒഴിച്ചുള്ള മുഴുവൻ സംവിധായകരും സലിം കുമാറിന്റെ ശത്രുക്കളായി. സ്റ്റേജ് ഷോകൾ നിന്നു. ടെലിവിഷൻ പരിപാടികൾക്ക് വിളിക്കാതായി. അമ്മയുടെ യോഗത്തിൽ പിറകിലെ ബെഞ്ചിൽ ഇരിക്കേണ്ടി വന്നു. മാത്രമല്ല, ഒരു കോമാളി നടന് അവാർഡ് കൊടുത്തതിന്റെ പേരിൽ നിരവധി പേർ ജൂറിയുടെ തന്തക്ക്‌ വിളിച്ചു. അങ്ങനെ എന്തെല്ലാം പുകിലുകലാണ് അന്നുണ്ടായത്. അതിന്റെ തനിയാവർത്തനം തന്നെയല്ലേ ഇപ്പോഴും ഉണ്ടായത് എന്ന ഞെട്ടലിൽ നിന്നാണ് ഈ പോസ്റ്റിന്റെ ആദ്യ വാചകം ഞാൻ കുറിച്ചത്. സുരാജിന്റെ കഷ്ടകാലം തുടങ്ങീന്നാ തോന്നണത്..


സത്യത്തിൽ ഈ ജൂറിക്കൊക്കെ എന്തിന്റെ കുഴപ്പമാണ്. എത്രയെത്ര സൂപ്പർ സ്റ്റാറുകൾ മലയാളത്തിലുണ്ട്. അവർക്കൊക്കെ മാറി മാറി അവാർഡ് കൊടുത്താൽ ആകാശം ഇടിഞ്ഞു പൊളിഞ്ഞു വീഴുമോ? ഈ സിനിമ ഇൻഡസ്ട്രി തന്നെ നിലനിന്നു പോകുന്നത് അവരെക്കൊണ്ടല്ലേ. ഇനി ഒരു കോമഡി നടന് അവാർഡ് കൊടുത്തേ തീരൂ എന്നുണ്ടെങ്കിൽ അമ്മയുടെ പ്രസിഡന്റും ഭാവി എം പിയുമായ ഇന്നസെന്റിന് കൊടുക്കാമായിരുന്നില്ലേ. ഇത് സുരാജിനെ നശിപ്പിക്കുന്നതിന് വേണ്ടി കരുതിക്കൂട്ടി ചെയ്ത ഒരു പദ്ധതിയുടെ ഭാഗമാണെന്ന് ആരെങ്കിലും പറഞ്ഞാൽ അവരെ കുറ്റം പറയാൻ പറ്റില്ല.

സുരാജിനോട് പറയാനുള്ളത് വിഷമിക്കരുത് എന്നാണ്. ജീവിതത്തിൽ ഇതുപോലെ പല ദുരന്തങ്ങളും വരും. സമചിത്തതയോടെ വേണം അവയെയൊക്കെ നേരിടേണ്ടത്. ഇനിയുള്ള നാളുകളിൽ വളരെ തന്ത്രപരമായി വേണം മുന്നോട്ട് പോകാൻ. സലീം കുമാറിന് പറ്റിയ അബദ്ധം ഒരിക്കലും ആവർത്തിക്കരുത്. ഈ അവാർഡിന് ഒരിക്കലും ഞാൻ അർഹനല്ല എന്നും മമ്മുക്കയുടെയും ലാലേട്ടന്റെയും ഇന്നസെന്റ് ചേട്ടന്റെയും കാൽക്കീഴിൽ ഈ അവാർഡ് സമർപ്പിക്കുകയാണെന്നും ഒരു കാച്ച് കാച്ചണം. അവരാണ് അഭിനയത്തിന്റെ എ ബി സി ഡി പഠിപ്പിച്ച് തന്നത് എന്നും ഈ അവാർഡ് നേടിത്തന്നതിൽ അവരുടെ ശുപാർശകൾ വലിയ പങ്ക് വഹിച്ചിട്ടുണ്ടെന്നും പറയണം. ഒരവാർഡ് കിട്ടി അതിന്റെ ഹാങ്ങ് ഓവറിൽ വീട്ടിലിരിക്കുന്നതിനേക്കാൾ നല്ലതാണ് അല്പം ഡിപ്ലോമസി കാണിച്ച് പിടിച്ചു നില്ക്കുന്നത്. അവാർഡ് പ്രഖ്യാപിച്ചിട്ട് മണിക്കൂറുകൾ ആയിട്ടില്ല. ആദ്യ പ്രതികരണം മുതൽ വളരെ ശ്രദ്ധിച്ചു വേണം നടത്താൻ. താങ്കളുടെ അഭിനയവും കോമഡിയും ഏറെ ഇഷ്ടപ്പെടുന്നത് കൊണ്ടും മലയാള സിനിമയിലും ടി വി യിലും ഇനിയും താങ്കളെ കാണണമെന്ന് ആഗ്രഹിക്കുന്നത് കൊണ്ടും നല്കുന്ന ഉപദേശമാണ്. തെറ്റിദ്ധരിക്കില്ല എന്ന് കരുതുന്നു. 

42 comments:

  1. വരുന്നിടത്ത് വെച്ച് കാണാം ...
    ബരാള്ളത് ബജ്ജില്‍ തങ്ങൂല്ലല്ലോ

    ReplyDelete
  2. സലിംകുമാറിന് ഒരു കമ്പനിയായി

    ReplyDelete
  3. അങ്ങനേയും ഒരു ഭാഷ്യം ഉണ്ടല്ലേ...
    ശത്രുക്കൾ കൂടി ചെയ്തതായിരിക്കും...

    ReplyDelete
  4. This is a stupid award. He is famous for over acting and third class comedy. I am not against suraj. He is a good man. But he is not at all deserved such an award. Shame to Indian Cinema.

    ReplyDelete
    Replies
    1. താനാരുവാ . സത്യജിത് റെയോ ?

      Delete
    2. താന്‍ ആ സിനിമ കണ്ടോ.....കാണാതെ എന്ത് അഭിപ്രായമാടെയ് പറയുന്നത്....? കഷ്ടം....

      Delete
    3. താങ്കൾ ആദ്യം പോയി "പേരറിയാത്തവർ" സിനിമ കാണൂ. എന്നിട്ട് വിമർശിക്കാം. സുരാജ് കോമാളി വേഷം ചെയ്തിട്ടുണ്ടെങ്കിൽ അതും അഭിനയത്തിൻറെ ഭാഗമാണ്.

      Ashraf

      Delete
    4. Mr. Kumaran
      അദ്ദേഹത്തിന്റെ അഭിനയത്തെ ഇഷ്ടപ്പെടാം.. ഇഷ്ടപ്പെടാതിരിക്കാം. പക്ഷേ ഒരവാര്‍ഡ് ലഭിച്ചു എന്നതിന്റെ പേരില്‍ ഇങ്ങനെ പരിഹസിക്കുന്നത് കഷ്ടമാണ്. മുന്‍ സിനിമകളില്‍ കോമഡി റോളുകള്‍ ചെയ്തു എന്നത് പാപമല്ല. അവാര്‍ഡ് നിര്‍ണയത്തില്‍ അതൊരു മൈനസ് പോയിന്റുമല്ല. പേരറിയാത്തവര്‍ എന്ന സിനിമയിലെ അഭിനയത്തിനാണ് ഈ അവാര്‍ഡ് ജൂറി നല്കിയിരിക്കുന്നത്. അതൊന്ന് കണ്ട ശേഷം ഇത്തരം പ്രസ്താവനകള്‍ നടത്തുന്നതാവും നല്ലത്.

      Delete
    5. Pachaalam Bhaasi..... Sorajine abhinayam padippikaan angerude aduthu vittaal mathi

      Delete
    6. ethavanda ee kumaran...ninakku pattiya cinema krishnanum radhayum aanu...cinema kaanathe vimarshikkan irangiyirikunnu..kalla fraud

      Delete
  5. സുരാജ് വെഞ്ഞാറമൂടിനു അഭിനനദനങ്ങള്‍.അദ്ദേഹത്തിന്‍റെ നാട്ടുകാരന്‍ കൂടിയായതില്‍ തെല്ല് അഭിമാനനവും.കൈരളി ടി.വിയില്‍ 'കോമഡി തില്ലാന'അവതരിപ്പിക്കുന്ന കാലത്തേ പുള്ളിക്കാരനെ ഇഷ്ടമായിരുന്നു.ദേശീയപുരസ്കാരം നേടിയ എല്ലാര്‍ക്കും ആശംസകള്‍...

    ഏറ്റവും മികച്ച നടനും ചിത്രത്തിനും മറ്റു ഏര്‍പ്പാടുകള്‍ക്കുമൊക്കെ അവാര്‍ഡ് നല്‍കുന്നത് പോലെ ഏറ്റവും മോശം ചിത്രത്തിനും അവാര്‍ഡ് നല്‍കണം എന്നാണെന്‍റെ അഭിപ്രായം.ഹോളിവുഡില്‍ 'ഗോള്‍ഡന്‍ റാസ്ബെറി അവാര്‍ഡ്'നല്‍കുന്നപോലെ.മലയാളത്തിലും ഏതോ ഒരു തുക്കടാ ഫൌണ്ടേഷന്‍ ഇത്തരമൊരു അവാര്‍ഡ് കൊടുക്കുന്നതായി ഒരിക്കല്‍ വായിച്ചിട്ടുണ്ട്.മോഹന്‍ലാലിന്റെ 'അലക്സാണ്ടര്‍ ദ ഗ്രേറ്റ്'ആയിരുന്നു അത്തവണത്തെ ഏറ്റവും മോശം ചിത്രം.ഏറ്റവും പന്ന നടന്‍ സാക്ഷാല്‍ മോഹന്‍ലാലും !.ഈ വര്ഷം ആരും ഇങ്ങനെയൊരു അവാര്‍ഡ് നല്‍കാന്‍ ഉദ്ദേശിക്കുന്നതായി അറിവില്ല.അഥവാ ആര്‍ക്കെങ്കിലും അങ്ങനെയൊരു നീക്കമുണ്ടെങ്കില്‍ ഞാനൊരു പടത്തിന്റെ പേര് നിര്‍ദേശിക്കാം."ഒളിപ്പോര്",കഴിഞ്ഞ വര്ഷം ഞാന്‍ കണ്ടതില്‍ വെച്ച് ഏറ്റവും 'മികച്ച'ചിത്രം.എതിരഭിപ്രായമുണ്ടോ??!!

    ReplyDelete
    Replies
    1. valare shariyanu.. ente ammo onnum parayanda...

      Delete
    2. 100% correct..I hav never such a worst movie ...

      Delete
  6. അർഹതക്കുള്ള അംഗീകാരം............ സലീം കുമാറിൽ നിന്നും വ്യത്യസ്ഥനാണ് സുരാജ്... സലീം കുമാറിന്റെ അനാവശ്യമായ അഭിപ്രായ പ്രകടനങ്ങളാണ് അദ്ദെഹത്തിന്റെ ശത്രു ആയത്

    ReplyDelete
  7. സലീം കുമാർ ശരിക്കും അൽപനു അർത്ഥം കിട്ടിയപ്പോൾ അർദ്ധരാത്രി കുട പിടിക്കും എന്ന് പറഞ്ഞ പോലെ പെരുമാറുകയായിരുന്നു..... റോളും കൊണ്ട്‌ ചെല്ലുന്ന സംവിധായകരോട്‌ താങ്ങാൻ പറ്റാത്ത പ്രതിഫലവും ഡിമാന്റുകളും വെക്കുക ജാഡ കാണിക്കുക.... മുഴുവൻ സമയം മദ്യപിക്കുക സെറ്റിൽ അച്ചടക്കമില്ലാതിരിക്കുക..... താൻ ഏതോ വലിയ മതിൽ പൊളിച്ച ജയ്‌ ഹനുമാനാണു എന്നും കരുതി വായിൽ തോനുന്നത്‌ വിളിച്ച്‌ പറയുക....ഇതൊക്കെ സഹിച്ച്‌ സലീംക്കുമാറിനേ തന്നെ അഭിനയിപ്പിച്ചാലേ മലയാള സിനിമ നില നിൽക്കൂ എന്നൊന്നും ഇല്ലല്ലോ.... സിനിമക്ക്‌ നിലനിൽക്കാൻ സലീം കുമാറിനേ ആവശ്യമില്ല മറിച്ച്‌ സലീം കുമാറിനു നില നിൽക്കാൻ സിനിമയാണു ആവശ്യം .... ഇത്‌ മറന്നതാണു സലീം കുമാറിനു പറ്റിയത്‌.....

    ReplyDelete
  8. എന്തൊക്കെയായാലും അഭിനന്ദനങ്ങൾ അറിയിക്കട്ടെ...

    ReplyDelete
  9. This comment has been removed by the author.

    ReplyDelete
  10. ജൂറിയില്‍ മലയാളികള്‍ ഉണ്ടായിരുന്നെങ്കില്‍ സ്വരാജിനെ രക്ഷപ്പെടുത്തിയേനെ ?? ഏതായാലും കഷ്ട്ടായി.....

    ReplyDelete
  11. Sasi Lal, ChennaiApril 17, 2014 at 7:51 AM

    Basheer bai, what you have written is Real Fact. Super Mega stars and their coccus will try to oust him soon or later. wait and see

    ReplyDelete
  12. സുരാജിന് അവാര്‍ഡ്‌ കിട്ടി എന്ന് കേട്ടപ്പോഴേ സോഷ്യല്‍ മീഡിയയില്‍ പലരും അദ്ദേഹത്തെ കല്ലെറിയാന്‍ തുടങ്ങിയിരിക്കുന്നു. ചിത്രം കാണാതെ എന്തിനാണ് മനുഷ്യര്‍ ഇങ്ങനെ ഇളകി വശാകുന്നതെന്ന് മനസ്സിലാകുന്നില്ല .ഞാന്‍ അഭിമാനിക്കുന്നു. കാരണം ഇത്തവണത്തെ അവാര്‍ഡ്‌ ഒരു മലയാളിക്കായതില്‍

    ReplyDelete
  13. ദേശീയ അവാര്‍ഡുകളുടെ നിലവാരമാണോ ... അത് നിര്‍ണയിക്കുന്ന ജൂറിമാരുടെ നിലവാരമോ ...ഏതാണ് താഴ്ന്നത് ? അതോ മലയാള സിനിമയിലെ അഭിനയത്തിന്റെ , തമാശകളുടെ, നിലവാരം താഴ്ന്നോ ? അതോ സുരാജ് എന്ന നടന്‍ അത്രയ്ക്ക് വലിയ നടന്‍ ആണോ ? ഇന്നലെ മുതല്‍ ആലോചിക്കുന്ന ചോദ്യങ്ങള്‍ ! ശ്ച്ചേ ..ശ്ച്ചേ.. എന്നാലും ജൂറിമാരെ.... ......ആകപ്പാടെ കന്‍ഫൂഷ്യന്‍... പൊതുവെ എല്ലാവര്ക്കും ഇത് ഒരു ഷോക്ക് ആയെന്നു തോന്നുന്നു... ഒരു പക്ഷെ, "പേരറിയാത്തവര്‍" എന്ന സിനിമ കണ്ടാല്‍ എന്റെ അഭിപ്രായം മാറുമായിരിക്കും എന്ന ആശയോടെ... പ്രതീക്ഷയോടെ..... ആ സിനിമക്ക് വേണ്ടി കാത്തിരിക്കുന്നു...

    ReplyDelete
  14. ബഷീര്ക, ഈ അവാർഡ് ശരിക്കും ദഹിക്കുന്നില്ല. തിലകനും ജഗതിക്കും കിട്ടാത്ത അവാർഡ് സുരാജിന് കിട്ടാൻ എന്താണ് യോഗ്യത.

    ReplyDelete
    Replies
    1. തിലകനും ജഗതിക്കും കിട്ടാത്ത അവാർഡ് സുരേഷ് ഗോപിക്കും ധനുഷിനും ഒക്കെ കിട്ടിയപ്പോൾ ആർക്കും കുരു പൊട്ടിയതായി കണ്ടില്ല... തീർച്ചയായും തിലകനും ജഗതി ശ്രീകുമാറും ദേശീയ അവാർഡ് അർഹിക്കുന്നവരാണ്, എന്ന് വെച്ച് അവർക്ക് കിട്ടാതെ പോയത് വേറെ ഒരാൾക്ക് കിട്ടാൻ പാടില്ല എന്നുണ്ടോ?

      Delete
    2. മികച്ച നടനുള്ള അവാര്‍ഡ്‌ ആണ് സുരാജിന് നല്‍കിയത്. അല്ലാതെ മികച്ച ഹാസ്യ നടനുള്ള അവാര്‍ഡ്‌ അല്ല.

      Delete
    3. Ashraf, it is the award for last year movies only, not for entire india cinema era.

      Delete
    4. Dear Ashraf, Suraj is not even comparable to the great actors mentioned by you. But he got award for good acting( what the jury thought) in a movie made last year. Congratulate Suraj for bringing yet another national award for Kerala and Please try to clear your "digestion " problem.

      Delete
  15. സൂപ്പർ മെഗാ സ്റ്റാറുകളുമായി മൂക്ക് തോണ്ടിക്കളിക്കാവുന്ന ചങ്ങാത്തം. ഇനി കണ്ടാൽ മിണ്ടാത്ത ചങ്ങാതമാവും

    ReplyDelete
  16. സുരേഷ് ഗോപിക്ക് നാഷണല്‍ അവാര്‍ഡ് കൊടുക്കാമെങ്കില്‍ സുരാജിന് ആയിരം തവണ കൊടുക്കാം.

    ReplyDelete
    Replies
    1. മനസ്സിലായില്ല മല്ലൂ

      Delete
  17. സുരാജ് തീര്ച്ചയായും നല്ല അഭിനയ സിദ്ധി ഉള്ള നടനാണ് . പിന്നെ ഓരോ കൊല്ലത്തെയും ചിത്രങ്ങളിൽ ഏററവും നല്ല അഭിനയത്തിനാണ് അവാർഡു . അല്ലാതെ ഇത് ഇന്ത്യയിലെ എല്ലാ കാലത്തെയും മികച്ച നടനെ തിരെഞ്ഞെടുപ്പ് അല്ല. ഇതറിയാതെ മറ്റു നടന്മാരോട് താരതമ്യം ചെയ്യുന്നവരെ എന്ത് പറയാൻ?

    ReplyDelete
  18. സുരാജിന് അഭിനന്ദനങ്ങള്‍ നേര്‍ന്ന് കൊണ്ട് സംവിധായകന്‍ വിനയന്‍ എഴുതിയ Facebook കുറിപ്പ്

    സുരാജിന് അഭിനന്ദനങ്ങള്‍
    നാഷണല്‍ അവാര്‍ഡ് നേടിയ സുരാജ് വെഞ്ഞാറമൂടിനെ നിറഞ്ഞ ഹൃദയത്തോടെ അഭിനന്ദിക്കുന്നു. നായക കഥാപാത്രങ്ങള്‍ ചെയ്തുകൊണ്ടിരിക്കുന്ന മുന്‍നിരനായകന്‍മാര്‍ക്ക് ഇത്തരം അവാര്‍ഡുകള്‍ കിട്ടുമ്പോളുള്ളതിന്റെ ഇരട്ടി മൂല്യവും അഭിനന്ദനവും സലിം കുമാറിനും , സുരാജിനുമൊക്കെ ഇത്തരം അംഗീകാരം കിട്ടുമ്പോള്‍ നാം കൊടുക്കേണ്ടതാണ്. തറ കോമഡി ചെയ്യുന്നവരെന്നും , മിമിക്രിക്കാരെന്നുമൊക്കെ പറഞ്ഞ് സൈഡ്ലൈന്‍ ചെയ്തു നിര്‍ത്തിയിരിക്കുന്ന കലാകാരന്‍മാര്‍ ആ അഭിപ്രായത്തെ ഒക്കെ കടത്തിവെട്ടിക്കൊണ്ട് അംഗീകാരം നേടിയെടുക്കുമ്പോഴാണ് അതിന് മൂല്യം കൂടുന്നത്.

    ഡല്‍ഹിയില്‍ നിന്ന് തിരുവനന്തപുരത്തെത്തുമ്പോള്‍ മിമിക്രിക്കാരെന്നും തമാശക്കാരെന്നും ഉള്ള വേര്‍തിരിവ് ശരിക്കും പ്രകടമാകുന്നു എന്നതാണ് സത്യം. വാസന്തിയും ലക്ഷ്മിയും പിന്നെ ഞാനും എന്ന ചിത്രത്തിലെ മണിയുടെ അഭിനയത്തെ മിമിക്രി എന്നു പറഞ്ഞു കളിയാക്കിയ സംസ്ഥാന അവാര്‍ഡ് ജൂറിയുടെ കമന്റ് ഈ അവസരത്തില്‍ ഓര്‍ത്തുപോകുകയാണ് - ഏതായാലും അത്തരക്കാര്‍ക്ക് തിരിച്ചറിവുണ്ടാക്കാന്‍ കൂടി ഇത്തരം അവാര്‍ഡ് നിര്‍ണ്ണയം ഉപകാരപ്പെടട്ടെ. ഇതുപോലെ സീരിയസ്സായ അഭിനയവും കോമഡി കഥാപാത്രങ്ങളും ഒരുപോലെ കൊണ്ടുപോകാന്‍ കഴിഞ്ഞാല്‍ അതായിരിക്കും സുരാജിന്റെ വിജയവും , വ്യത്യസ്ഥതയും - സര്‍വ്വ വിജയാശംസകളും നേരുന്നു.... https://www.facebook.com/directorvinayan/posts/1428994677350317

    ReplyDelete
  19. പുള്ളിയുടെ അഭിനയം ആവര്‍ത്തന വിരസത തോന്നി തുടങ്ങിയ സമയത്ത് സെലെക്ടീവ് ആയി മാറി എന്നതാണ് പുള്ളിയുടെ വിജയം ..!!

    അഭിനന്ദനങ്ങള്‍ സുരാജ് ..!!

    ReplyDelete
  20. സുരാജിന് അഭിനന്ദനങ്ങള്‍ ..
    ഈ പോസ്റ്റിലെ ചില വരികള്‍ ചില ചിന്തകളിലേക്ക് വിഷുപ്പടക്കം പോലെ പൊട്ടി-ച്ചിരി-ക്കുന്നു.

    ReplyDelete
  21. സൂരജ് നന്നായി അഭിനയിച്ചിട്ടുണ്ടാവും എന്നു തന്നെ കരുതുന്നു.അവാര്‍ഡ് കിട്ടിയപ്പോള്‍ സലീം കുമാര്‍ കാണിച്ച "വെകിളി" ഇയാള്‍ കാണിക്കില്ലെന്നും ആശിക്കാം.പക്ഷേ 24 കാതം എന്ന വ്യാജ സിനിമയ്ക്ക് അവാര്‍ഡ് കൊടുക്കാന്‍ കാരണഭൂതനായ ആ മഹാശയന്‍റെ പേരറിഞ്ഞാല്‍ കൊള്ളാമായിരുന്നു.

    ReplyDelete
  22. ജൂറിമാരായി തലപ്പത്തിരിക്കുന്നവരൊന്നും പൊട്ടന്മാരല്ല. സുരാജ് തികച്ചും അര്ഹിക്കുന്ന അവാർഡാണത്. ഇനിയിപ്പോൾ വള്ളിക്കുന്നിനുള്ള അതേ ആശങ്കയാണ് എനിക്കും...ഉപദേശം കലക്കി...ഒരേ സമയം ചിരിയും,ചിന്തയും..

    "സുരാജിനോട് പറയാനുള്ളത് വിഷമിക്കരുത് എന്നാണ്. ജീവിതത്തിൽ ഇതുപോലെ പല ദുരന്തങ്ങളും വരും. സമചിത്തതയോടെ വേണം അവയെയൊക്കെ നേരിടേണ്ടത്. ഇനിയുള്ള നാളുകളിൽ വളരെ തന്ത്രപരമായി വേണം മുന്നോട്ട് പോകാൻ. സലീം കുമാറിന് പറ്റിയ അബദ്ധം ഒരിക്കലും ആവർത്തിക്കരുത്. ഈ അവാർഡിന് ഒരിക്കലും ഞാൻ അർഹനല്ല എന്നും മമ്മുക്കയുടെയും ലാലേട്ടന്റെയും ഇന്നസെന്റ് ചേട്ടന്റെയും കാൽക്കീഴിൽ ഈ അവാർഡ് സമർപ്പിക്കുകയാണെന്നും ഒരു കാച്ച് കാച്ചണം. അവരാണ് അഭിനയത്തിന്റെ എ ബി സി ഡി പഠിപ്പിച്ച് തന്നത് എന്നും ഈ അവാർഡ് നേടിത്തന്നതിൽ അവരുടെ ശുപാർശകൾ വലിയ പങ്ക് വഹിച്ചിട്ടുണ്ടെന്നും പറയണം. ശം കലക്കി...ഒരേ സമയം ചിരിയും,ചിന്തയും "

    എത്തവണത്തെയും പോലെ ഇത്തവണയും നിങ്ങൾ പറഞ്ഞു കഴിഞ്ഞിരിക്കുന്നു.അഭിനന്ദനങ്ങൾ...

    ReplyDelete
  23. വിഷയ ദാരിദ്രമോ????
    അങ്ങനെ ഒരു സംഭവം ഈ മലയാളലോകത്തുണ്ടോ .....

    Ziad Kochi

    ReplyDelete
  24. നടൻ സുരാജിനു കിട്ടിയ അവാർഡ്‌ മലയാളികൾക്ക്‌ അഭിമാനിക്കാൻ വക നൽകുമ്പോഴും സോഷ്യൽമീഡിയയിലടക്കം അദ്ദേഹത്തെ തെറിയഭിഷേകം ചെയ്യുന്നവരുടെ മനശ്ശാസ്ത്രം വിശകലനം
    ചെയ്യുന്നവർക്ക്‌ മലയാള സിനമയെ ഭരിക്കുന്ന പ്രമാണികത ഓർമ്മ വരിക സ്വാഭാവികം.സലീംകുമാർ പറഞ്ഞ പോലെ സുരാജ്‌ ഇനി വളരെയധികം സൂക്ഷിക്കേണ്ടിയിരിക്കുന്നു.സവർണ പാരമ്പര്യം ഇല്ലെൻ കിൽ മറ്റേത്‌ മേഖലയിലും പോലെ സിനിമയിലും സവർണർക്ക്‌ ദാസ്യവേല ചെയ്താലെ രക്ഷയുള്ളൂ എന്നതിനു ഉദാഹരണങ്ങളേറെ.സലീംകുമാറിന്റെ കരിയറിനേറ്റ പ്രഹരം തന്നെയായിരുന്നു ദേശീയ അവാർഡും തുടർന്നുണ്ടായ സവർണ്ണമനോഭാവവും.ദളിത്‌ പിന്നോക്ക ജീവിതം പ്രമേയമാക്കി മലയാളത്തിലിറങ്ങിയ സിനിമകൾ എന്തുകൊണ്ട്‌ നാം കാണുന്നില്ല ഇത്തരത്തിലുള്ള പാപ്പിലിയോബുദ്ധക്ക്‌ കേരള ചലച്ചിത്ര മേളയിൽ അവസരം നിഷേധിക്കപ്പെട്ടതും നമുക്കറിയാം.പുലയ സമുദായക്കാരിയായതിനാൽ മലയാളത്തിലെ അദ്യനായിക പി.കെ റോസിയെ മാറ്റിനിർത്തിയ സവർണ്ണ ചരിത്രരചയിതാവിനെയും മലയാളി മറന്നിട്ടില്ല.ഇങ്ങനെയൊക്കെയാണെങ്കിലും ജാതിവിവേചനം മനസ്സിൽ കൊണ്ട്‌ നടക്കാത്ത ഏതാനും സിനിമാപ്രവർത്തകർ മലയാളത്തിനുണ്ട്‌ എന്നു വിസ്മരിക്കുന്നില്ല.

    ReplyDelete
  25. സലിംകുമാറിനു അദ്ദേഹത്തിന്റെ മദ്യപാനമാണു വിനയായത്.

    ReplyDelete
  26. സുരാജിനോട് എനിക്ക് പറയാനുള്ളത് 'കല്യാണരാമ'നില്‍ സലിം കുമാര്‍ ദിലീപിനോട് പറഞ്ഞ ഡയലോഗ് ആണ് 'തളരരുത് രാമന്കുട്ടീ... തളരരുത്..' :)

    ReplyDelete
  27. ബഷീര്ക്ക, താങ്കള് പറഞ്ഞത് വെറും ആക്ഷേപഹാസ്യം ആയി തോന്നാമെങ്കിലും കാര്യമുണ്ട്. കൃത്രിമ വിനയം, പൊങ്ങച്ചം, പിന്നെ കാലഹരണപ്പെട്ട കുറെ പ്രോട്ടോക്കോളുകൾ ഇതൊക്കെ ആണ് മലയാള സിനിമാ മേഖലയിലെ വ്യക്തികൾ പാലിച്ചു വരുന്നത് എന്ന് ഇന്റസ്റ്റ്രിയിലെ ചില കിഴങ്ങന്മാർ ചാന്നലുകളിലും പിന്നെ ചില പൊതു പരിപാടികളിലും കാട്ടിക്കൂട്ടുന്ന കൊമാളിതരങ്ങളും കൊപ്രാട്ടികളും കണ്ടാല് തോന്നിപ്പോകും. പ്രട്യേര്കിച്ചു അമ്പതു കഴിഞ്ഞ യുവതാരങ്ങളുടെ കോപ്രായം....ഫഹദു ജെനെരേശൻ താരതമ്യേന മെച്ചം ആണ്.

    സലിം കുമാര് അവാര്ഡ് കിട്ടിയതിനു ശേഷം കുറെ വിടുവായത്തം കാണിച്ചു എന്നും പലപ്പോളും ഓവർ ആരുന്നെന്നും പറയുന്നുണ്ട് പലരും. എന്നാൽ വളഞ്ഞ നട്ടെല്ലുമായി "മംമുക്കയുടെയും ലാലിക്കയുടെം കാലു കഴുകിയ വെള്ളം കുടിക്കാൻ പോലും ഈ പാപിക്ക്‌ അര്ഹത ഇല്ല" എന്ന് പറയാതതാണോ അദ്ധേഹത്തിന്റെ കുറ്റം എന്നും ചിലപ്പോ തോന്നാറുണ്ട്.

    അതെന്തായാലും അവാര്ടിനോടുള്ള സുരാജിന്റെ പ്രതികരണം കണ്ടപ്പോ അദ്ദേഹം വളരെ പക്വത ഉള്ള വ്യക്തി ആണെന്നാണ്‌ മനസ്സിലാകുക, അത് കൊണ്ട് തന്നെ ആ അവാര്ട് ഒരു ഭാരമാകാതെ ഇനിയും സാമൂഹ്യ പ്രസക്തി ഉള്ള നല്ല വേഷങ്ങളില് ഇമേജിന്റെ ഒന്നും ഭാരമില്ലാതെ മൂപ്പര്ക്ക് പറ്റുമെന്നും പ്രത്യാശിക്കാം

    ReplyDelete
  28. ചില മാണിക്യങ്ങളെ നം കാണാതെ പോകുന്നു....അവസരം കിട്ടുമ്പോൾ അവ കുപ്പയിൽ നിന്നും പുറത്ത് വരുന്നു എന്ന് കരുതിയാൽ മതി...ശ്രീ.ഭരത് സുരാജിന് അഭിനന്ദനങ്ങൾ

    ReplyDelete