March 16, 2010

അസ്ന പരീക്ഷ എഴുതുകയാണ്.

അസ്നയെ ഓര്‍ക്കാന്‍ ഒരവസരവും കൂടി വന്നിരിക്കുന്നു. അവള്‍ ഇപ്പോള്‍ എസ് എസ് എല്‍ സി പരീക്ഷ എഴുതുകയാണ്. കണ്ണൂരിലെ അക്രമ രാഷ്ട്രീയത്തിന് ഇരയായി കാല്‍ മുറിച്ച് മാറ്റപ്പെട്ട ആ കൊച്ചു കുഞ്ഞ് വേച്ച് വേച്ച് നടന്ന് പത്താം ക്ലാസ്സുകാരിയായിരിക്കുന്നു. ഒന്നാം ക്ലാസ്സില്‍ പഠിക്കുമ്പോഴാണ് അവളുടെ വലതു കാല്‍ ബോംബേറില്‍ നഷ്ടപ്പെട്ടത്. പൂവത്തൂരിലെ പഞ്ചായത്ത് തെരെഞ്ഞുടുപ്പില്‍ ബൂത്ത് പിടുത്തം നടന്നു എന്ന് ആക്രോശിച്ചു ഒരു കൂട്ടം മനുഷ്യ മൃഗങ്ങള്‍ അവള്‍ കളിച്ചു കൊണ്ടിരുന്ന വീട്ടു മുറ്റത്തേക്ക് ബോംബു എറിയുകയായിരുന്നു. "അരുത്, കുട്ടികളുണ്ട് "എന്ന് അമ്മ ശാന്ത അലമുറയിട്ടെങ്കിലും ആര് കേള്‍ക്കാന്‍?. ബൂത്ത് പിടിച്ചവര്‍ ആ വീട്ടുമുറ്റത്ത് കൂടിയായിരുന്നത്രേ ഓടിപ്പോയത്!!!

ബൂത്ത് എന്താണെന്ന് പോലും അറിയാത്ത ആ കൊച്ചു കുഞ്ഞിന്റെ ജീവന്‍ ദൈവം ബാക്കിയാക്കി. രാഷ്ട്രീയ കേരളത്തിനു അതൊരു സാധാരണ ദിവസം മാത്രമായിരുന്നു. പതിവ് സമരം. പതിവ് അക്രമം. പതിവ് പ്രസ്താവനകള്‍, പതിവ് പ്രതിഷേധങ്ങള്‍, പക്ഷെ കാല്‍ മുറിച്ച് മാറ്റപ്പെട്ട ഒരു കൊച്ചു കുഞ്ഞിന് അതൊരു പതിവ് ദിവസമായിരുന്നില്ല. അതവളുടെ ജീവിതത്തിന്‍റെ നിറം കെടുത്തിയ ദിനമാണ്. സ്വപ്‌നങ്ങള്‍ കരിഞ്ഞുണങ്ങിയ ദിനമാണ്. ജീവിതം മുഴുക്കെ കൂടെക്കഴിയാന്‍ വേദന വിരുന്നു വന്ന ദിനമാണ്. മുറ്റത്ത് കളം വരച്ച് കൂട്ടുകാര്‍ ചാടിക്കളിക്കുമ്പോഴൊക്കെ കവിളില്‍ കണ്ണീര് വീഴ്ചക്ക് തുടക്കം കുറിച്ച ദിനമാണ്. 

കൃത്രിമക്കാലിന്റെ പിന്‍ബലത്തില്‍ അവള്‍ മുന്നോട്ട് വെച്ച ഓരോ അടിയും നമ്മുടെ രാഷ്ട്രീയ സംസ്കാരത്തിന്‍റെ തരിശ് നിലങ്ങളെ ഉഴുതുമറിക്കാന്‍ പര്യാപ്തമായിരുന്നു. അവള്‍ ഒരടി മുന്നോട്ട് വെക്കുമ്പോള്‍ കണ്ണും കാതുമില്ലാത്ത രാഷ്ട്രീയക്കാരന്റെ വികൃത മുഖത്താണ് അടി വീഴുന്നത്. തോറ്റു കൊടുക്കാന്‍ തയ്യാറില്ലാത്ത നിശ്ചയദാര്‍ഢ്യവും മനക്കരുത്തുമാണ് അവളെ ഇന്നൊരു പത്താം ക്ലാസ്സുകാരിയാക്കിയത്. ഡോക്റ്റര്‍ ആവണമെന്ന് അവള്‍ ആഗ്രഹിക്കുന്നു.

അസ്നക്ക് നന്നായി പരീക്ഷ എഴുതാന്‍ കഴിയട്ടെ. ഉയര്‍ന്ന മാര്‍ക്കോടെ ജയിച്ചു വരട്ടെ എന്ന് ഞാന്‍ പ്രാര്‍ഥിക്കുന്നു . നമ്മുടെ സംസ്കാരത്തിന്‍റെ ബോധമണ്ഡലങ്ങള്‍ക്ക് ദീപ്തി പകരാന്‍ ഒരു വിളക്കായി അസ്ന എന്നും നമ്മോടൊപ്പമുണ്ടാവട്ടെ. അവള്‍ക്ക് എല്ലാവിധ ആശംസകളും


Update: 03 May 2010
Asna got excellent result. She scored A+ in all subjects.

23 comments:

  1. അവള്‍ ഒരടി മുന്നോട്ട് വെക്കുമ്പോള്‍ കണ്ണും കാതുമില്ലാത്ത രാഷ്ട്രീയക്കാരന്റെ വികൃത മുഖത്താണ് അടി വീഴുന്നത്. തോറ്റു കൊടുക്കാന്‍ തയ്യാറില്ലാത്ത നിശ്ചയദാര്‍ഢ്യവും മനക്കരുത്തുമാണ് അവളെ ഇന്നൊരു പത്താം ക്ലാസ്സുകാരിയാക്കിയത്. പത്ത് വർഷം മുൻപ് നടന്ന ആ സംഭവം ഇന്നും മനസ്സിൽ വേദന പടറ്ത്തുന്നു.. എന്തുകൊന്ദും അഭിനന്ദനാറ്ഹമായ പോസ്റ്റ്... അസ്നക്ക് വിജയാശംസകള് ന്നേരുന്നു..

    ReplyDelete
  2. വേദനകൾ വരികളിലേക്ക് പകരുമ്പോൾ കണ്ണു നനയുന്നോ, മനസ്സ് വിങ്ങുന്നോ. കാരുണ്യത്തിന്റെ ഉള്ള ഒരംശം നാമോരോരുത്തർക്കും കൈമോശം വരാതിരിക്കട്ടെ.

    ReplyDelete
  3. ഞങ്ങളും അസ്രയ്ക്ക് നല്ല രീതിയില്‍ പരീക്ഷ എഴുതാന്‍ വേണ്ടി പ്രാര്ത്ഹിക്കുന്നു. അവളുടെ നിശ്ചയ ദാര്ധ്യത്തിനു അഭിവാദ്യങ്ങളും.

    ReplyDelete
  4. അസ്നക്ക് നന്മകളും വിജയങ്ങളും ഉണ്ടാവട്ടെ ......ആശംസകളോടെ .

    ReplyDelete
  5. രാഷ്ട്രീയ ഭീകന്മാരെ കാലം പഠിപ്പിക്കുക തന്നെ ചെയ്യും, അവര്‍ ചെയ്തത് എത്ര വലിയ ക്രൂരതയാണെന്ന്

    ReplyDelete
  6. നമ്മുടെ സംസ്കാരത്തിന്‍റെ ബോധമണ്ഡലങ്ങള്‍ക്ക് ദീപ്തി പകരാന്‍ ഒരു വിളക്കായി അസ്ന എന്നും നമ്മോടൊപ്പമുണ്ടാവട്ടെ. അവള്‍ക്ക് എല്ലാവിധ ആശംസകളും.

    ReplyDelete
  7. മറവിയുടെ
    മഞ്ഞു വീഴ്ചയില്‍
    യാഥാര്‍ത്യങ്ങള്‍
    മറഞ്ഞുപോകാതിരിക്കാന്‍
    ഇത്തരം ചികയലുകള്‍ നല്ലതാണ്
    ഓര്‍മ്മകള്‍
    കൂടുതല്‍ സാന്ദ്രമാകും

    ReplyDelete
  8. രാഷ്ട്രീയം തലയില്‍ കയറിയാല്‍ പിന്നേ മറുപുറത്ത് നില്കുന്നവരെല്ലാം തന്റെ ശത്രുക്കളാണ് എന്ന കാഴ്ചപ്പാടാണ് മിക്കവാറും എല്ലാ പാര്ടികല്‍കും. തട്ടിയവനെ കിട്ടിയില്ലെങ്കില്‍ കിട്ടിയവനെ തട്ടുക എന്ന തന്ത്രം. എത്രയോ ആളുകള്‍ ഇങ്ങിനെ രാഷ്ട്രീയത്തിന്റെ ബലിക്കല്ലില്‍ ആഹുതി ചെയ്തിട്ടുണ്ട്. എത്രയോ ആളുകള്‍ ജീവച്ഛവമായി ഇന്നും ജീവിക്കുന്നു. പാലക്കാട്‌ സിരജുന്നിസയും ഇത് പോലെ ഒരു രക്തസാക്ഷി ആണല്ലോ. ഏതായാലും അസ്നമാര്‍ നമ്മുടെ കണ്ണ് തുറപ്പിക്കേണ്ടതുണ്ട് . അനാവശ്യമായി ഒരുത്തനെയും ആക്രമിക്കില്ല എന്ന ഒരു തീരുമാനം എടുക്കാന്‍ നമുക്ക് കഴിയില്ലേ. ആര്‍ക്ക് വേണ്ടിയാണ് നാം ഈ വക തോന്നിവാസങ്ങള്‍ ചെയ്യുന്നത്. അതുകൊണ്ട് നാം എന്ത് നേടുന്നു.

    ReplyDelete
  9. കണ്ണുള്ളവരേ കാണുക..

    ReplyDelete
  10. അസ്നക്ക് ആശംസകള്‍ ...

    ReplyDelete
  11. അസ്നക്ക് ആശംസകള്‍... ഈ ഓര്‍മ്മപ്പെടുത്തലിന് നന്ദി...

    ReplyDelete
  12. അസ്നയുടെ മനക്കരുത്തിന്, നിശ്ചയദാര്‍ഢ്യത്തിനു അഭിനന്ദനങ്ങള്‍.
    ജീവിതത്തില്‍ സര്‍വ മേഖലകളിലും വിജയങ്ങള്‍ ഉണ്ടാവട്ടെ എന്നാശംസിക്കുന്നു.

    ReplyDelete
  13. അസ്നയെ ഓര്‍മ്മിക്കാന്‍ മലയാളിക്ക് ഇത് പോലെ ചില ഓര്‍മ്മ പെടുതലുകള്‍ വേണ്ടി വന്നിരിക്കുന്നു എന്നതിലൂടെ മനുഷ്യതം നഷ്ടപെട്ട മലയാളിയുടെ വികൃതമുഖം ഒരിക്കല്‍ കൂടി അനാവരണം ചെയ്യപെടുകയാണ്

    ReplyDelete
  14. അസ്നക്ക് ആശംസകള്‍
    എല്ലാ പരീക്ഷണങ്ങളില്‍ നിന്നും അവള്‍ക്ക് വിജയം മാത്രം ഉണ്ടാവട്ടെ.

    ReplyDelete
  15. i remember now

    all about ASNA

    SARFUDEEN KALIKAVU

    ReplyDelete
  16. മനസ്സിലെന്നും നൊമ്പരവും പേറി വേച്ചു നടക്കുന്ന അസ്ന മോള്‍ക്ക്‌ കരുത്തായി അവളുടെ വിദ്യാഭ്യാസം മാറട്ടെ എന്ന് പ്രാര്‍ത്ഥിക്കുന്നു. ഇത്തരം ജീവ കാരുണ്യ വാര്‍ത്തകള്‍ കാലും കയ്യും ഉള്ളവര്‍ക്ക് മുമ്പില്‍ വീണ്ടും എത്തിച്ച ബഷീര്കക്ക് എന്റെ കണ്ണീര്‍ പൂക്കള്‍ !

    ReplyDelete
  17. അസ്നയ്ക്ക് ആശംസകളുമായി എത്തിയ എല്ലാവര്ക്കും എന്റെ ആശംസകള്‍.

    ReplyDelete
  18. അവള്‍ക്ക് എല്ലാവിധ ആശംസകളും.

    ReplyDelete
  19. ചിന്ന വയസ്സിലെ ഇത്രയതികം പരീക്ഷഞങ്ങള്‍ ധീരമായി കടന്നെത്തി പത്തിന്‍ പരീക്ഷയിലെതി നില്‍കുന്ന അസ്നക് ഒരു നൂരാശംസകള്‍

    ReplyDelete
  20. നമ്മുടെ സംസ്കാരത്തിന്‍റെ ബോധമണ്ഡലങ്ങള്‍ക്ക് ദീപ്തി പകരാന്‍ ഇനിയുമെത്ര അസ്നമാരുടെ ജീവിതം ഹോമിക്കപ്പെടണം !!

    കുഞ്ഞു പെങ്ങള്‍ക്ക് വിജയാശംസകള്‍.

    ReplyDelete
  21. കൃത്രിമക്കാലിന്റെ പിന്‍ബലത്തില്‍ അവള്‍ മുന്നോട്ട് വെച്ച ഓരോ അടിയും നമ്മുടെ രാഷ്ട്രീയ സംസ്കാരത്തിന്‍റെ തരിശ് നിലങ്ങളെ ഉഴുതുമറിക്കാന്‍ പര്യാപ്തമായിരുന്നു. അവള്‍ ഒരടി മുന്നോട്ട് വെക്കുമ്പോള്‍ കണ്ണും കാതുമില്ലാത്ത രാഷ്ട്രീയക്കാരന്റെ വികൃത മുഖത്താണ് അടി വീഴുന്നത്. തോറ്റു കൊടുക്കാന്‍ തയ്യാറില്ലാത്ത നിശ്ചയദാര്‍ഢ്യവും മനക്കരുത്തുമാണ് അവളെ ഇന്നൊരു പത്താം ക്ലാസ്സുകാരിയാക്കിയത്.


    ജീവിതമാവുന്ന പരീക്ഷയില്‍/പരീക്ഷണത്തില്‍
    ജയിച്ചു മുന്നേറുന്ന സഹോദരിക്ക്
    ഒരു വിജയാശംസ ആവശ്യമെന്ന് തോന്നുന്നില്ല.
    പതറാതെ മുന്നേറാന്‍ കരുത്തുണ്ടാവട്ടെ..

    കറുത്ത ഓര്‍മകള്‍ മാഞ്ഞു തുടങ്ങിയിരുന്നു.
    ഓര്‍മപ്പെടുത്തലിന് നന്ദി.
    ഇതൊക്കെ
    നാം അങ്ങനെയങ്ങ് മറന്നു കളഞ്ഞാലെങ്ങനെ...
    കേരള ചരിത്രത്തില്‍ വെന്തു കിടക്കുന്ന ഒരധ്യായം..

    ReplyDelete
  22. aa rashtreeya branthanmar ippol lajjikkunnunndavum.. ithra cheriya oru kuttiyude munnil thothupoyadinu....

    ReplyDelete