പന്നിപ്പനി അഥവാ ഗുഡ് ഫ്രൈഡേ

കുട്ടികളെ ഇങ്ങനെയൊക്കെ പഠിപ്പിച്ചാല്‍ പന്നിപ്പനിയല്ല അതിലപ്പുറവും വരും.

പേരിലെ ഗുലുമാല്..

പന്നിപ്പനി എന്ന് മലയാളത്തില്‍ പറയുമ്പോള്‍ കേള്‍ക്കാനും പറയാനും ഒരു സുഖമുണ്ട്. H1N1 എന്ന് പറയാന്‍ നാവു വടിക്കുന്നവരും വടിക്കാത്തവരും ഒരുപോലെ കുഴയും.. ആരാണാവോ ഈ പേരിട്ടത്?. ഇംഗ്ലീഷില്‍ Pig Flu എന്ന് പറഞ്ഞാല്‍ എത്ര സിമ്പിള്‍ ആയിരുന്നു. പക്ഷെ കൊന്നാലും സായിപ്പ് Swine Flu എന്നെ പറയൂ. Swine എന്നാല്‍ പന്നി എന്ന് ഡിക്ഷ്ണറിയില്‍ അര്ത്ഥം കാണുമായിരിക്കും. എന്നാലും Pig എന്ന് പറയുന്നതിന്റെ ഒരു സുഖമുണ്ടോ..

പന്നിയെ തിന്നുന്ന സായിപ്പില്‍ നിന്നാണ് ഈ രോഗം വന്നതെന്നത് മറച്ചു വെക്കാനുള്ള ഒരു കളിയാണോ H1N1 എന്ന ഈ പേര് ?.. ഒരു സി ബി ഐ അന്വേഷണത്തിനു വകുപ്പുണ്ട്‌. അഭയയും ലാവ്ളിനുമൊന്നും ഈ മണ്ടന്മാര്‍ക്കു കണ്ടെത്താന്‍ കഴിയില്ല. ഡിക്ഷ്ണറി നോക്കി കളിക്കുന്ന ചെറുകിട പരിപാടികള്‍ അവരെക്കൊണ്ടു പറ്റും. ദുഃഖ വെള്ളിയെ ഗുഡ് ഫ്രൈഡേ എന്നാക്കിയത് പോലെ പലപ്പോഴും വിവരമില്ലാത്ത കളികള്‍ കളിക്കും സായിപ്പ്. ഭാഷ സായിപ്പിന്റെ സ്വന്തം ആണെങ്കിലും അത് ഉപയോഗിക്കുന്ന നമുക്കുമില്ലേ ചില അവകാശങ്ങള്‍ ? H1N1 എന്നതിന് പകരം Pig Flu എന്ന് പറഞ്ഞാല്‍ ആകാശം ഇടിഞ്ഞു വീഴുമോ ?.