വള്ളിക്കുന്ന്

നീസ മോളേ, നിന്റെ ഓര്‍മയ്ക്ക്..

2012-02-12T23:18:00.006+03:00

ഈ കുഞ്ഞിനെ ഞാന്‍ കണ്ടിട്ടില്ല. മരണ വിവരം കേട്ടപ്പോഴാണ് അവള്‍ക്കൊരു ബ്ലോഗ്‌ ഉണ്ടായിരുന്നുവെന്നും മനോഹരമായ കവിതകള്‍ എഴുതിയിരുന്നു എന്നും അറിഞ്ഞത്. ആ ബ്ലോഗ്‌ സന്ദര്‍ശിച്ചപ്പോള്‍ അതില്‍ ഒരു കവിത കണ്ടു. മരിക്കുന്നതിന്റെ മണിക്കൂറുകള്‍ക്കു മുമ്പ് എഴുതി പോസ്റ്റ്‌ ചെയ്ത ഒരു കവിത. അതിന്റെ തലക്കെട്ട്‌ 'ഒഴുക്ക്' എന്നാണ്. അതിലെ വരികള്‍ എന്നെ വല്ലാതെ ഉലച്ചു കളഞ്ഞു. രക്താര്‍ബുദം കീഴടക്കിയ ശരീരത്തിന്റെ ഓരോ ധമനികളില്‍ നിന്നുമുള്ള വേദന കുടിച്ചു വറ്റിക്കുന്നതിനിടയിലായിരിക്കുമോ ഈ പിഞ്ചു കുഞ്ഞിന്റെ വിരലുകളില്‍ നിന്ന് ഈ കവിത പിറന്നിരിക്കുക?.

"മിഴിനീര്‍ കുടംനിറഞ്ഞ് പൊട്ടി

കുലംകുത്തിയപ്പോള്‍

അവള്‍ പ്രതീക്ഷിച്ചിരുന്നില്ല

ആ പ്രവാഹത്തില്‍

താനും ഒലിച്ചുപോകുമെന്ന്"

രോഗം കീഴക്കിടക്കിയ തന്നെ പോന്നു പോലെ നോക്കുന്ന ഉമ്മയെ ഓര്‍ത്തു കൊണ്ട് തിരൂര്‍ തുഞ്ചന്‍ പറമ്പിലെ ബ്ലോഗേഴ്സ് മീറ്റില്‍ അവള്‍ പാടിയ കവിതയുടെ യു ടൂബ് ക്ലിപ്പും കണ്ണുകളെ വല്ലാതെ ആര്‍ദ്രമാക്കുന്നു.

ഈ മരണ വാര്‍ത്ത അറിഞ്ഞ ശേഷം ഫേസ്ബുക്ക്‌ പേജില്‍ ഞാനിട്ട സ്റ്റാറ്റസിനു താഴെ ശ്രീജിത്ത്‌ കൊണ്ടോട്ടി ഇങ്ങനെ എഴുതി. "ഇന്ന് വൈകുന്നേരം കിട്ടിയ ഹാഷിമിന്റെ മെയില്‍ വഴിയാണ് ഈ ദുഃഖവാര്‍ത്ത അറിയുന്നത്. നീസയെ മെഡിക്കല്‍ കോളേജില്‍ പ്രവേശിപ്പിച്ച വിവരം ഇന്നലെ രാത്രി സാബു കൊട്ടോട്ടി അറിയിച്ചിരുന്നു. സ്കൂള്‍ യുവജനോല്‍സവ വേദിയില്‍ കവിത ചൊല്ലി സമ്മാനം നേടിയ ആ കുഞ്ഞു കവയത്രിയുടെ പ്രതിഭ കണ്ട് അദ്ദേഹം തന്നെയാണ് അവള്‍ക്കൊരു ബ്ലോഗ്‌ ഉണ്ടാക്കികൊടുത്തതും, ബൂലോകത്തിന് പരിചയപ്പെടുത്തിയതും. എഴുത്തിനോടും, വായനയോടും അതിയായ താല്‍പര്യം സൂക്ഷിക്കുന്ന അവള്‍ക്ക് സ്വന്തമായി ഒരു ലാപ്‌ടോപ്‌ സംഘടിപ്പിച്ചു നല്‍കാനുള്ള ശ്രമങ്ങളും നടത്തിയിരുന്നു. രണ്ടാഴ്ച മുന്‍പ്‌ വിളിച്ചപ്പോള്‍ കൊട്ടോട്ടി ഇതേ കുറിച്ച് സൂചിപ്പിക്കുകയും, ശ്രമിക്കാം എന്ന് ഉറപ്പുനല്‍കുകയും ചെയ്തു. ബ്ലോഗില്‍ പ്രസിദ്ധീകരിച്ചത് കൂടാതെ നീസ എഴുതിയ നിരവധി കവിതകള്‍ അദ്ദേഹത്തിന്‍റെ കൈവശം പോസ്റ്റ്‌ ചെയ്യാനായി നല്‍കിയിട്ടുണ്ട്. കുറിച്ചുവച്ച കാവ്യശകലങ്ങളിലൂടെ ആ കുഞ്ഞുകവയത്രിയുടെ ഓര്‍മ്മകള്‍ ബൂലോകത്തില്‍ നിറഞ്ഞുനില്‍ക്കട്ടെ. എഴുതി പൂര്‍ത്തിയാകാത്ത ഒരു കവിതപോലെ, നമ്മെ വിട്ടകന്ന അക്ഷരങ്ങളെ സ്നേഹിച്ച ആ കുഞ്ഞുപെങ്ങളുടെ ഓര്‍മ്മകള്‍ക്ക് മുന്‍പില്‍ ബാഷ്പാഞ്ജലികള്‍ ..."

ഇതില്‍ കൂടുതലൊന്നും പറയാനില്ല. അവള്‍ക്കിനിയൊരു ലാപ്ടോപ് വേണ്ട.. വേദനയുടെ തുരുത്തുകളില്‍ ആശ്വാസമായി ഒരു ബ്ലോഗും വേണ്ട. കവിത നന്നായി എന്ന കമന്റും വേണ്ട. മരണത്തിന്റെ മാലാഖമാര്‍ അവളെ ദൈവസന്നിധിയില്‍ എത്തിച്ചിരിക്കുന്നു. സ്വര്‍ഗ്ഗത്തിന്റെ കവാടങ്ങള്‍ അവള്‍ക്കായി തുറന്നു കിടക്കപ്പെടട്ടെ എന്ന പ്രാര്‍ത്ഥനയോടെ..

വാലന്റൈന്‍ വരുന്നു, ഓടിക്കോ...

2012-02-11T09:02:00.000+03:00

Caution: This is a re-post (originally posted on 9 Feb 2010): വാലന്റൈന്‍ എന്നാല്‍ എന്താണെന്ന് ഈ അടുത്ത കാലം വരെ എനിക്കൊരു ഐഡിയയും ഇല്ലായിരുന്നു. വാലിന് ഇംഗ്ലീഷില്‍ ടെയില്‍ എന്ന് പറയും. വാലും ടെയിലും കൂട്ടിച്ചേര്‍ത്തുള്ള ഈ പരിപാടി വാലിന് തീ പിടിച്ച് ഓടുന്ന ആളുകളുടെത് ആയിരിക്കും എന്നായിരുന്നു ഞാന്‍ ധരിച്ചിരുന്നത്. എന്‍റെയൊരു കാര്യം.. ഈ പദത്തിന് പിന്നില്‍ ‘മഹത്തായൊരു’ കഥയുണ്ടെന്ന് പിന്നീടറിഞ്ഞു. പെണ്ണ് – കുടുംബം - പിടക്കോഴി എന്നിങ്ങനെ നാട്ടിലെ ആണുങ്ങളൊക്കെ ബിസിയായപ്പോള്‍ റോമിലെ ക്ലോഡിയസ് രണ്ടാമന്‍ ചക്രവര്‍ത്തിക്ക് യുദ്ധം ചെയ്യാന്‍ ആളെകിട്ടിയില്ലത്രേ. ഹീ ഗോട്ട് വെരി ആന്ഗ്രി യു നോ,.. വിവാഹം എന്ന ഏര്‍പ്പാട് തന്നെ പുള്ളി നിരോധിച്ചു. നിരോധിച്ചിട്ടും വിവാഹങ്ങള്‍ നടത്തിക്കൊടുത്ത വാലന്റൈന്‍ എന്ന പള്ളീലച്ചനെ ജയിലിലും അടച്ചു. അച്ഛനുണ്ടോ വിടുന്നു?.. പുള്ളി കേറി ജയില്‍ വാര്‍ഡന്റെ മകളെ ലൈനടിച്ച് ശരിയാക്കി.

പ്രേമത്തിനുണ്ടോ കണ്ണും മൂക്കും?. അവള്‍ക്ക് കണ്ണ് കാണില്ലായിരുന്നത്രേ!! (കണ്ണ് കാണുന്ന ആരേലും പള്ളീലച്ചനെ പ്രേമിക്കുവോ?. തിരക്കഥ എഴുതിയ ലവന് വിവരമുണ്ട്..) അച്ഛനല്ലേ.. നോ പ്രോബ്ലം.. അതിനും വഴി കണ്ടെത്തി. പ്രേമത്തിന്റെ പവര്‍ ദൈവികമായി കൂട്ടി പുള്ളിക്കാരത്തിക്ക് കാഴ്ച തിരിച്ചു കൊടുത്തു.. (റൊമ്പ അഴകാര്‍ന്ത തിരക്കഥൈ!!.. നൂറുക്ക് നൂറ്.. സാക്ഷാല്‍ രജനി സാറ് പോലും വീഴും..) ഇതറിഞ്ഞ ചക്രവര്‍ത്തി വാലന്‍റൈന്‍ അച്ഛന്റെ തല വെട്ടാന്‍ ഉത്തരവിട്ടു. തല വെട്ടുന്നതിന് ഒരു നിമിഷം മുമ്പ് കാമുകിക്ക് അച്ഛന്‍ ഒരു ലവ് ലെറ്റര്‍ കാച്ചി. ഫ്രം യുവര്‍ വാലെന്റൈന്‍ .. ആ കത്തില്‍ നിന്ന് പ്രചോദനം ഉള്‍ക്കൊണ്ട്‌ ഭൂമുഖത്തെ എല്ലാ കമിതാക്കളും ഫെബ്രുവരി പതിനാലിന് കത്തും, ഫ്ലവറും, പിന്നെ മറ്റു പലതും കൈ മാറുന്നു.. എന്തൊരു പവിത്രത.. എന്തൊരു സ്നേഹം.. ദൈവമേ.. ഇത്തരമൊരു പൊന്ന് പോലുള്ള ആചാരത്തെയാണല്ലോ പല മൂരാച്ചികളും പിന്തിരിപ്പന്‍മാരും എതിര്‍ക്കുന്നത്.?..

ട്യൂബ് ലൈറ്റ് പോലെയാണ് എന്റെ കാര്യം. കത്താന്‍ കുറച്ചു സമയമെടുക്കും. അതുകൊണ്ട് തന്നെ വേണ്ടാത്ത ഓരോ സംശയങ്ങളും തലയില്‍ കേറും. തല വെട്ടാന്‍ പോകുന്ന സമയത്ത് കൊടുക്കുന്ന സന്ദേശമാണ് വാലന്റൈന്‍ അച്ഛന്‍റെത്. ആ കണക്ക് വെച്ച് ഇപ്പോള്‍ സന്ദേശം കൊടുക്കുന്ന ലവന്മാരുടെയും ലവളുമാരുടെയും കാര്യവും പോക്കാകുമോ?. ഇണക്കുരുവിയുടെ കയ്യില്‍ വാലന്റൈന്‍ കാര്‍ഡ് കിട്ടുന്നതോടെ അത് എഴുതിയവന്റെ തല പോകുമെങ്കില്‍, ഇതിലെന്തോന്ന് സ്നേഹമെടേയ്.. ശ്ശെ.. ശ്ശെ.. എന്‍റെയൊരു കാര്യം..

പിന്നെയും ഒരു സംശയം. നൂറ്റാണ്ടുകള്‍ക്കു മുമ്പ് ജീവിച്ച റോമിലെ ചക്രവര്‍ത്തിയുടെ കാലത്ത് നടന്ന ഈ പ്രേമകഥ നമ്മുടെ നാട്ടിലെത്താന്‍ ഇത്രയും താമസിച്ചതെന്തെടെയ്.... നമ്മുടെ മുത്തച്ഛന്മാരുടെയും മുത്തശ്ശിമാരുടെയും ജീവിതം നായനക്കിച്ചതിന് ആര് ഉത്തരം പറയും?.. വാലന്റൈന്‍ ദിനത്തില്‍ ഒരു ഗിഫ്റ്റ്‌ പോലും കൊടുക്കാനാവാതെയല്ലേ അവരൊക്കെ മരിച്ചു പോയത്. കൊല്ലത്തില്‍ ഒരു ലവ് ലെറ്റര്‍ കൊടുത്തില്ലെങ്കില്‍ പിന്നെ എന്തോന്ന് സ്നേഹം. വാലന്റൈന്‍ കാര്‍ഡ്‌ കൈമാറി ടാ. ലവ് യൂ ടാ.. കിസ്സ്‌ യൂ ടാ,, എന്നെകിലും പറയാന്‍ കഴിഞ്ഞില്ലെങ്കില്‍ കെട്ടിത്തൂങ്ങി ചാവുന്നതല്ലേ നല്ലത്. വാലന്റൈന്‍ ദിനത്തെപ്പറ്റി മത്സരിച്ച്‌ എഴുതുന്ന നമ്മുടെ മാധ്യമങ്ങളൊക്കെ ഇത്രയും കാലം ഏത് അടുപ്പില്‍ ആയിരുന്നു?. എത്ര പേരുടെ ജീവിതമാണ് തുലച്ച് കളഞ്ഞത്.. സംശയങ്ങള്‍ പിന്നെയും നീളുകയാണ്.. എന്റെയൊരു കാര്യം.

ദേഷ്യം തോന്നരുത്.. എന്റെ ട്യൂബ് ഇനിയും കത്തിയിട്ടില്ല. പണ്ടത്തെ കാലത്ത്‌ ഒരു ശിശു ദിനം മാത്രമായിരുന്നു വന്നിരുന്നത്. ഇന്ന് എന്തൊക്കെ ദിനങ്ങളാണപ്പാ.. പൂച്ചകള്‍ക്ക് ഒരു ദിനം, പട്ടികള്‍ക്ക് വേറൊരു ദിനം. പെരുച്ചാഴികള്‍ക്ക് മറ്റൊന്ന്. എന്തിനേറെ എന്റെ ഗ്രാമത്തില്‍ സ്ഥിരമായി എത്താറുള്ള ദേശാടനക്കിളികള്‍ക്കുമുണ്ട് ഒരു ദിനം. തീര്‍ന്നില്ല .. അമ്മമാര്‍ക്ക് ഒരു ഡേ., അമ്മൂമ്മമാര്‍ക്ക് മറ്റൊരു ഡേ.. മുന്നൂറ്റി അറുപത്തി നാല് ദിവസം അമ്മൂമ്മയെ വൃദ്ധ സദനത്തില്‍ നിര്‍ത്തിയിട്ട് മുന്നൂറ്റി അറുപത്തഞ്ചാം ദിവസം മക്കളും പേരമക്കളും എല്ലാം കൂടെ ഒരു വരവുണ്ട്.. പൂമാല, അമ്മൂമ്മ ദിനത്തിന്‍റെ ഗ്രീറ്റിംഗ് കാര്‍ഡ്‌, ചോക്കലേറ്റ്‌, അവലോസുണ്ട.. പോരാത്തതിന് മാതൃഭൂമിയിലോ മനോരമയിലോ ഒരു കളര്‍ ഫോട്ടോ.. ഏഷ്യാനെറ്റില്‍ ഒരു വെടിക്കേഷന്‍.. എന്തൊരു ഹാപ്പി.. എന്തൊരു സായൂജ്യം.. ഇതൊന്നും മനസ്സിലാകാത്ത മൂരാച്ചികളെ വെടിവെച്ച് കൊല്ലണം. മുന്നൂറ്റി അറുപത്തഞ്ച് ദിവസവും വീട്ടില്‍ കഴിഞ്ഞ്, കപ്പയും പുഴുക്കും വിഴുങ്ങി, കണ്ടവരെ തന്നെ വീണ്ടും കണ്ട് ചടഞ്ഞു കൂടിയിരുന്ന പഴയ അമ്മൂമ്മമാര്‍ എന്തോരം ബോറടിച്ചിട്ടുണ്ട്ടാവും.? ആലോചിച്ചിട്ട് എനിക്ക് തല കറക്കം വരുന്നു.. കണ്ണില്‍ ഇരുട്ട് കേറുന്നു... എന്റെയൊരു കാര്യം.

ഒരു വര്‍ഷത്തില്‍ ആര്‍ക്കും വേണ്ടാത്ത അനാഥ ദിനങ്ങള്‍ ഇനിയും ബാക്കിയുണ്ടെങ്കില്‍ ആരെങ്കിലും മുന്‍കയ്യെടുത്ത് അവറ്റകള്‍ക്കും ഓരോ അവകാശികളെ ഉണ്ടാക്കി കൊടുക്കണം. കാമുകന്‍ ചാടിപ്പോയ കാമുകിക്ക് വേണ്ടി ഒരു ദിനം, അണ്ടി പോയ അണ്ണാന് വേണ്ടി ഒരു ദിനം, ഭാര്യമാരുടെ തല്ല് സ്ഥിരമായി കൊള്ളുന്ന വീര കേസരികള്‍ക്ക് ഒരു ദിനം. ഈ ദിനങ്ങളൊക്കെയുണ്ടായിട്ടും ഒരു ഗ്രീറ്റിംഗ് കാര്‍ഡ്‌ പോലും വാങ്ങിക്കാത്ത എന്നെപ്പോലുള്ള പൊട്ടന്മാര്‍ക്കും വേണം ഒരു ദിനം. പെട്ടെന്ന് ബുക്ക് ചെയ്തോളണം. നമ്മുടെ ജ്വല്ലറിക്കാര് ഒന്ന് രണ്ടു വര്‍ഷമായി ഒരു ദിവസം അടിച്ചെടുത്തിട്ടുണ്ട്. അക്ഷയ തൃതീയ. ഇനിയും നോക്കി നിന്നാല്‍ ബാക്കിയുള്ള ദിനങ്ങളും കാക്ക കൊത്തും.

നിങ്ങള്‍ എന്ത് പറഞ്ഞാലും ശരി, ഒരു കാര്യം ഞാന്‍ ഉറപ്പിച്ചു. ആരേലും കാര്‍ഡ്‌ തരാന്‍ ഒരുങ്ങിയാല്‍ - അതെന്റെ ഭാര്യയായാല്‍ പോലും - ഞാന്‍ ഓടും. വാലന്റൈന്‍ അച്ഛന്‍റെ ഗതി എന്റെ തലയില്‍ കിടന്ന് കറങ്ങുന്നുണ്ട്. എന്റെയൊരു കാര്യം..

വാര്‍ത്ത വായിക്കുമ്പോള്‍ കരയാന്‍ പാടുണ്ടോ?

2012-02-06T09:22:00.002+03:00

ഏഷ്യാനെറ്റിന്റെ ന്യൂസ് അവര്‍ സ്റ്റുഡിയോയില്‍ ഇരുന്നുകൊണ്ട് നമ്മുടെ വേണു മുമ്പ് ഹാര്‍മോണിയം വായിച്ചത് സോഷ്യല്‍ മീഡിയയില്‍ നല്ല ഹിറ്റായിരുന്നു. അത് ഹിറ്റാകാനുള്ള പ്രധാന കാരണം ന്യൂസ്‌ റൂമില്‍ ഇത്തരം കലാപരിപാടികള്‍ ഒന്നും പാടില്ല എന്ന ഒരു പൊതു വിശ്വാസം ഉള്ളത് കൊണ്ടാണ്. വാര്‍ത്ത വായിക്കുന്നതിനിടയില്‍ ചിരിക്കാനോ കരയാനോ പാടുണ്ടോ എന്നത് ഒരു വലിയ പ്രശ്നമാണ്. ഏത് തരം വാര്‍ത്തയായാലും വേണ്ടില്ല ഒരു തരം ജീവച്ഛവം പോലെ വായിച്ചങ്ങു പോകണം എന്നുള്ളതാണ് നമ്മുടെ ഒരു പരമ്പരാഗത ലൈന്‍. ദുഃഖ സൂചകമായ വാര്‍ത്ത വായിക്കുന്നതിനിടയില്‍ ചിരിക്കാന്‍ പാടില്ല എന്നത് മനസ്സിലാക്കാന്‍ എളുപ്പമുണ്ട്. 'ആഫ്രിക്കയില്‍ ഭൂകമ്പം അയ്യായിരം പേര്‍ മരിച്ചു' എന്ന ബ്രേക്കിംഗ് ന്യൂസ്‌ വായിക്കുമ്പോള്‍ ങ്ങ്യാ ഹ. ഹ.. എന്ന കലാഭവന്‍ മണിയുടെ ചിരി ചിരിച്ചാല്‍ പാര്‍ട്ടി തോറ്റപ്പോള്‍ വി എസ് ചിരിച്ചത് പോലെ ആകെ കുളമാകും.

എന്നാല്‍ ദുരന്ത വാര്‍ത്തകള്‍ വായിച്ച ശേഷം പൊട്ടിക്കരയാന്‍ പാടുണ്ടോ?. അഥവാ കരഞ്ഞാല്‍ എന്ത് ചെയ്യണം. അതുവരെയുള്ള ശമ്പളം കൊടുത്ത് പറഞ്ഞു വിടണോ? ഇതാണ് ചോദ്യം. പണ്ട് ഷാഹിന വാര്‍ത്ത വായനക്കിടയില്‍ നിര്‍ത്താതെ ചുമച്ചു. അതോടെ ഏഷ്യാനെറ്റ്‌ അവളുടെ വാര്‍ത്ത വായന നിര്‍ത്തി. ഹാര്‍മോണിയം വായനക്ക് ശേഷം വേണുവും ഏഷ്യാനെറ്റില്‍ വല്ലാതെ നിന്നിട്ടില്ല.

വേണുവിന്റെ വായന മുമ്പ് കണ്ടിട്ടില്ലാവര്‍ക്ക് വേണ്ടി ഒന്ന് കൂടെ ഇവിടെ ചേര്‍ക്കുന്നു. അവസാന ഭാഗത്താണ് വേണു ഫുള്‍ ഫോമില്‍ എത്തുന്നത്.

ഇതൊക്കെ ഇപ്പോള്‍ പറയാന്‍ ഒരു കാരണമുണ്ട്. കഴിഞ്ഞ ദിവസം വാര്‍ത്ത വായിക്കുന്നതിനിടയില്‍ സൗദിയില്‍ നിന്നുള്ള 'അല്‍ അഖ്ബാരിയ' ചാനലിന്റെ വാര്‍ത്താ വായനക്കാരി ഫൗസ് അല്‍ഖംഅലി വിതുമ്പിക്കരഞ്ഞു. കുടുംബാധിപത്യത്തിനെതിരെ സിറിയയില്‍ നടക്കുന്ന ജനകീയ പ്രക്ഷോഭത്തിനിടെ ഫിദാ അല്‍ ദിയാ എന്ന കൊച്ചു കുഞ്ഞിനെ സര്‍ക്കാര്‍ സൈന്യം വെടിവെച്ചു കൊല്ലുന്ന ഫൂട്ടേജ് കാണിക്കുന്നതിനിടെയാണ് ഫൗസ് നിയന്ത്രണം വിട്ടു കരഞ്ഞത്. പിതാവിന്റെ ഓരം ചേര്‍ന്ന് ഒളിച്ചിരുന്ന മുഹമ്മദ്‌ ദുറയെന്ന ഫലസ്തീനി ബാലനെ രണ്ടായിരം സെപ്റ്റംബര്‍ മുപ്പതിന് ഇസ്രാഈല്‍ സേന ദാരുണമായി വെടിവെച്ചു കൊന്നിരുന്നു. അതിനു സമാനമായി പിതാവിന് അരികില്‍ വെച്ചു തന്നെയാണ് ഈ കുഞ്ഞും കൊല്ലപ്പെട്ടത് എന്ന് പറഞ്ഞു കൊണ്ട് തുടങ്ങിയ വാര്‍ത്തയുടെ ദൃശ്യങ്ങള്‍ വരുന്നതിനിടയില്‍ അവര്‍ക്ക് വാചകങ്ങള്‍ മുഴുവിപ്പിക്കാനായില്ല. തുടര്‍ന്ന് മറ്റൊരു വാര്‍ത്തയിലേക്ക് നീങ്ങിയെങ്കിലും തേങ്ങി തേങ്ങിയുള്ള കരച്ചില്‍ നിന്നില്ല. അവസാനം ചാനലിനു കൊമേര്‍ഷ്യല്‍ ബ്രേക്ക് കൊടുത്ത് വാര്‍ത്താ സംപ്രേഷണം നിറുത്തിവേക്കേണ്ടി വന്നു!.

വീഡിയോ കാണുക

ഈ വീഡിയോ അറബ് ലോകത്ത് ഇപ്പോള്‍ നല്ല ഹിറ്റായിട്ടുണ്ട്‌. ഈ ഒറ്റ കരച്ചിലോടെ ഫൗസ് അല്‍ഖംഅലി പ്രേക്ഷകര്‍ക്ക്‌ ഏറെ പ്രിയങ്കരി ആയിക്കാണും എന്നതുറപ്പാണ്. ഏഷ്യാനെറ്റ് ചെയ്തത് പോലെ അഖ്ബാരിയ ചാനലുകാര്‍ ഫൗസിനെ പിരിച്ചു വിടുകയില്ല എന്നതും ഉറപ്പ്. വാര്‍ത്താ വായനക്കാരും മനുഷ്യരാണ്. അവര്‍ക്കും വിചാരങ്ങളും വികാരങ്ങളുമുണ്ട്. അതുകൊണ്ട് തന്നെ വല്ലപ്പോഴും അത് പ്രകടമാകുന്നത് വലിയ അപരാധമല്ല. വാര്‍ത്ത വായിക്കുമ്പോള്‍ സ്റ്റുഡിയോയില്‍ റൊബോട്ട് പോലെ ഇരുന്നാലേ നല്ല അവതാരകന്‍ / അവതാരക ആവൂ എന്ന ധാരണയാണ് നമ്മുടെ ചാനലുകളില്‍ ഉള്ള പലര്‍ക്കുമെന്നു തോന്നുന്നു. കൊന്നാലും മുഖത്തൊരു ഭാവഭേദം വരാന്‍ പാടില്ല.( ന്യൂസ് അവര്‍ ഫുലികളെയല്ല ഞാന്‍ ഉദ്ദേശിക്കുന്നത്) ബി ബി സി അടക്കമുള്ള പല വിദേശ ചാനലുകളിലും അവതാരകര്‍ അല്പം കൂടെ സജീവമായി വാര്‍ത്ത വായിക്കുന്നത് കാണാം. രണ്ടു പേര്‍ ഇരുന്നു അവതരിപ്പിക്കുന്ന വാര്‍ത്തയാണെങ്കില്‍ ചിരിക്കാനും അല്‍പ സ്വല്പം തമാശകള്‍ പറയാനും അവര്‍ തയ്യാറാകാറുണ്ട്. അവ വാര്‍ത്തകള്‍ക്ക് കുറേക്കൂടി സജീവത നല്‍കുന്നു.

ചില BBC ന്യൂസ്‌ റൂം തമാശകള്‍

സ്വാതന്ത്രത്തിന്റെ അര്‍ദ്ധ രാത്രിയില്‍ ചരിത്രപ്രസിദ്ധമായ പ്രസംഗം നടത്തിയപ്പോള്‍ (Tryst with Destiny) നെഹ്‌റുവിന്റെ കണ്ണുകള്‍ നിറഞ്ഞൊഴുകി എന്ന് ചരിത്രത്തിലുണ്ട്. ഗാന്ധിജിയുടെ മരണം ഓള്‍ ഇന്ത്യ റേഡിയോയിലൂടെ പ്രഖ്യാപിച്ചപ്പോഴും നെഹ്‌റു വിതുമ്പിയിട്ടുണ്ട്. എത്ര മാനസിക ശക്തിയുള്ള ആളുകളെയും ചില നേരങ്ങളില്‍ വികാരങ്ങള്‍ കീഴടക്കും. ഞാന്‍ പറഞ്ഞു വരുന്നത് ഇനി മുതല്‍ വാര്‍ത്ത വായിക്കുന്നവര്‍ കരച്ചിലും പിഴിച്ചിലുമായി ഒരു സീരിയല്‍ പരുവത്തില്‍ വാര്‍ത്ത വായിക്കണം എന്നല്ല. മുഖത്തു ഇച്ചിരിയൊരു ഭാവം ഉണ്ടായാല്‍ വായിക്കുന്നത് മനുഷ്യനാണ് എന്ന് ഒരു തോന്നലുണ്ടാക്കാന്‍ പറ്റും. വാര്‍ത്ത തുടങ്ങുമ്പോഴെങ്കിലും ഒന്ന് പുഞ്ചിരിച്ചാല്‍ അത്രയും നന്ന്. വാര്‍ത്താ വായനക്കും ഒരു ഹൃദയമുണ്ടെന്നു ഫൗസ് അല്‍ഖംഅലിയുടെ കരച്ചില്‍ ഓര്‍മപ്പെടുത്തുന്നു.

മ്യാവൂ: ബഷീര്‍ക്കാ, നിങ്ങള്‍ക്ക് വേറെ വിഷയം ഒന്നും ഇല്ലേ.. വെറുതെ ഓരോന്ന് പറഞ്ഞു നേരം പോക്കുന്നു. ഇ-മെയില്‍ വിവാദം, സഖാവ് ക്രിസ്തു തുടങ്ങി എന്തോരം വിഷയങ്ങള്‍ ഉണ്ട്. അതിനിടയിലാണ് ഒരു പെണ്ണിന്റെ കരച്ചിലുമായി വന്നിരിക്കുന്നത്. കഷ്ടം തന്നെ!!!.

തിരുകേശപ്പള്ളി: വൈ ദിസ്‌ കൊലവെറി?

2012-01-31T10:15:00.003+03:00

Comment Box Closed
കാന്തപുരത്തിന്റെ തിരുകേശപ്പള്ളിയെച്ചൊല്ലി മുടിഞ്ഞ വിവാദമാണ് ഇപ്പോള്‍ നടക്കുന്നത്. പത്രങ്ങളും ചാനലുകളുമൊക്കെ ഇപ്പോള്‍ മുടിപ്പള്ളിയുടെ പിന്നാലെയാണ്. ഈ വിഷയത്തില്‍ ഇത്രമാത്രം കൊലവെറി എന്തിനാണെന്ന് എനിക്ക് മനസ്സിലാവുന്നില്ല. ഞാന്‍ കാന്തപുരം ഉസ്താദിന്റെ കൂടെയാണ്. മുപ്പത്തി മുക്കോടി രാഷ്ട്രീയക്കാര്‍ക്കും പന്തീരായിരം കപടസന്യാസികള്‍ക്കും ആയിരത്തൊന്നു മനുഷ്യ ദൈവങ്ങള്‍ക്കും ഇന്ത്യന്‍ ഭരണഘടന പ്രകാരം നാട്ടുകാരെ പറ്റിച്ചു ജീവിക്കാന്‍ അവകാശമുണ്ടെങ്കില്‍ കാന്തപുരം ഉസ്താദിന് മാത്രം അപ്പണി പറ്റില്ല എന്ന് പറയുന്നത് ശുദ്ധ ചട്ടമ്പിത്തരമാണ്. ഓരോ ജനതക്കും അവരര്‍ഹിക്കുന്ന ഭരണാധികാരികളെ കിട്ടും എന്ന് പറയുന്ന പോലെ ഓരോ ജനതക്കും അവരര്‍ഹിക്കുന്ന ഉസ്താദുമാരെയും കിട്ടും. അങ്ങനെ നമുക്ക് കിട്ടിയ ഒരു ഉസ്താദാണ് കാന്തപുരം ഉസ്താദ്. വെറുതെ വിവാദമുണ്ടാക്കി ആ ഉസ്താദിന്റെ കഞ്ഞികുടി മുട്ടിക്കുന്നത്‌ പാതിരാ പ്രഭാഷണത്തിന്റെ ഭാഷയില്‍ പറഞ്ഞാല്‍ തികഞ്ഞ അദബ് കേടാണ്.

കാന്തപുരം ഉസ്താദിനെ ശരിക്ക് അറിയുന്നവരൊന്നും അദ്ദേഹത്തെ എതിര്‍ത്തു നാണം കെടാന്‍ മിനക്കെടില്ല. സെല്‍ഫ് മാര്‍ക്കറ്റിംഗിന് പതിനെട്ടല്ല നൂറ്റിപ്പതിനെട്ടു അടവുകള്‍ ഉണ്ടെന്നു കാണിച്ചു തന്ന ആളാണ്‌ ഉസ്താദ്. ഇക്കാര്യത്തില്‍ ഏത് 'ബാബ'യെയും 'അമ്മ'യെയും കവച്ചു വെക്കുന്ന ട്രാക്ക് റെക്കോര്‍ഡ്‌ അദ്ദേഹത്തിനുണ്ട്. നാല്പതു കോടിയുടെ പള്ളി ഉണ്ടാക്കുമെന്ന് ഉസ്താദ് പറഞ്ഞിട്ടുണ്ടെങ്കില്‍ അങ്ങനെയൊരു പള്ളി ഉണ്ടാക്കിയിരിക്കും!. നൂറ്റിനാല്പത് കോടി പിരിച്ചെന്നുമിരിക്കും!!. അതിനെതിരെ ആര് ഹാലിളകിയിട്ടും കാര്യമില്ല. തോളറ്റം വരെയാണ് പ്രവാചകന് മുടിയുണ്ടായിരുന്നതെന്നാണ് ചരിത്രം പറയുന്നത്. കാന്തപുരത്തിന്റെ കയ്യിലുള്ള മുടിയാകട്ടെ കാവ്യ മാധവന്റെ മുടിയോളം നീളമുണ്ട്. എന്നിട്ടും ഉസ്താദിന്റെ വാക്ക് വിശ്വസിച്ചു പതിനായിരങ്ങളാണ് തിരുകേശപ്പള്ളിയുടെ തറക്കല്ലിടല്‍ ചടങ്ങിനു കോഴിക്കോട്ടു എത്തിയത്. അതാണ്‌ ഞാന്‍ പറഞ്ഞത് കാന്തപുരം നിങ്ങള്‍ വിചാരിക്കുന്ന ആളല്ല. ആള് പുലിയാണ്.

നാല്‍പതു കോടി ചിലവില്‍ നിര്‍മിക്കുന്ന പള്ളിയുടെ മാതൃക

തൂങ്ങിക്കിടക്കുന്ന 'തിരുകേശം'

ദുഫായീലുള്ള ഖോജ അഹമദ് ഖസ്റജിയില്‍ നിന്നാണ് ഉസ്താദ് തിരുകേശം ഒപ്പിച്ചെടുത്തത് എന്നാണ് പറയുന്നത്. ദുഫായീ ഖോജ അത് ഒപ്പിച്ചെടുത്തത് ബോംബെയിലുള്ള ഏതോ ഒരു ജാലീവാലയില്‍ നിന്നാണ് എന്നും പറയുന്നു. ജാലീ എന്നാല്‍ ഹിന്ദിയില്‍ വ്യാജന്‍ എന്നാണ് അര്‍ത്ഥം!!. ഇതേ ജാലിയില്‍ നിന്ന് തന്നെ കാന്തപുരത്തെ എതിര്‍ക്കുന്ന 'സമസ്ത' സുന്നികളും തിരുമുടി വാങ്ങിച്ചിട്ടുണ്ട്. അത് പരസ്യമായി കത്തിച്ചു 'വ്യാജത്വം' തെളിയിക്കാനാണ് അവരുടെ ഫദ്ധതി. നബിയുടെ മുടി ആണെങ്കില്‍ അത് കത്തുകയോ അതിനു നിഴല്‍ ഉണ്ടാവുകയോ ഇല്ലത്രെ!

കേരളത്തിലെ പ്രമുഖ മുസ്ലിം സംഘടനകളെല്ലാം കാന്തപുരത്തിന്റെ മുടിക്കച്ചവടത്തെ എതിര്‍ക്കുന്നുണ്ട്. മരിച്ചു പോയ മഹാന്മാരുടെ പേരില്‍ പണിത ബിംബങ്ങളും പ്രതിമകളും തച്ചുടച്ച ശേഷം ലോക സൃഷ്ടാവായ ദൈവത്തെ വിളിച്ചു പ്രാര്‍ത്ഥിക്കുവാനാണ് പ്രവാചകന്‍ മുഹമ്മദ്‌ നബി പഠിപ്പിച്ചത്. കബറുകള്‍ കെട്ടിപ്പൊക്കുന്നതിനേയും അവ ആരാധനാ കേന്ദ്രമാക്കുന്നതിനെയും ശക്തമായി എതിര്‍ത്തിട്ടുള്ള ആളാണ്‌ പ്രവാചകന്‍. എന്റെ കബറിടം ഒരു ആരാധനാ കേന്ദ്രമായി മാറരുതേ എന്ന് അവസാന നിമിഷങ്ങളില്‍ പോലും അവിടുന്ന് പ്രാര്‍ത്ഥിക്കുകയുമുണ്ടായി. പ്രവാചകന്റെ തിരുശരീരം കുടികൊള്ളുന്ന സ്ഥലം ഒരു ആരാധനാ കേന്ദ്രമാക്കാന്‍ പാടില്ല എങ്കില്‍ ആ പ്രവാചകന്റെ മുടി കൊണ്ട് ഒരു പള്ളിയുണ്ടാക്കാന്‍ പറ്റുമോ?. ഇത്തരം ചോദ്യങ്ങള്‍ക്കൊന്നും മറുപടി പറഞ്ഞു സമയം കളയാന്‍ കാന്തപുരം ഉസ്താദ് മിനക്കെടാറില്ല. അതാണ്‌ ഞാന്‍ പറഞ്ഞത് കാന്തപുരം നിങ്ങള്‍ വിചാരിക്കുന്ന ആളല്ല. ആള് പുലിയാണ്.

പ്രവാചകന്റെ മുടിയോ ശരീരമോ അല്ല, അദ്ദേഹം കാണിച്ചു തന്ന ജീവിതമാണ് പ്രധാനമെന്ന് വിശ്വസിക്കുന്നവരാണ് യഥാര്‍ത്ഥ മുസ്ലിംകള്‍ . വ്യക്തി പൂജക്കും അന്ധ വിശ്വാസങ്ങള്‍ക്കുമെതിരെ നിരന്തരം പ്രബോധനം നടത്തിയ പ്രവാചകന്റെ അനുയായികള്‍ അദ്ദേഹത്തിന്റെ മുടിയെ തന്നെ കയറി പിടിക്കുമ്പോള്‍ തകരുന്നത് ഇസ്ലാമിക വിശ്വാസത്തിന്റെ അടിത്തറ തന്നെയാണ്. നബി പറഞ്ഞതിനും പ്രവര്‍ത്തിച്ചതിനുമെല്ലാം കടക വിരുദ്ധമായതു ചെയ്ത ശേഷം നബിയുടെ മുടി കിടന്ന വെള്ളം ഒരിറക്ക് കുടിച്ചാല്‍ സ്വര്‍ഗത്തിലേക്കുള്ള വിസ കിട്ടുമെന്ന് കരുതുന്ന പൊട്ടന്മാര്‍ ലോകത്ത് ഉള്ളിടത്തോളം കാലം ഇതുപോലുള്ള മുസ്ലിയാക്കന്മാര്‍ നാല്പതു കോടിയല്ല നാനൂറു കോടി പിരിച്ചു പുട്ടടിച്ചെന്നു വരും. അതുകൊണ്ട് ഉസ്താദിനെ വെറുതെ വിടുക. കൊല്ലുന്ന രാജാവിന് തിന്നുന്ന മന്ത്രി എന്ന് പറഞ്ഞ പോലെ ബുദ്ധി പണയം വെച്ച ജനങ്ങള്‍ക്ക്‌ അതിനനുയോജ്യനായ ഒരു ഉസ്താദ് ഉണ്ടാവേണ്ടത് ചരിത്രത്തിന്റെ ആവശ്യകതയാണ്. അതിനാല്‍ ദയവു ചെയ്തു എല്ലാവരും ഈ കൊലവെറി നിറുത്തുക. എന്നിട്ട് ഉച്ചത്തില്‍ വിളിക്കുക. കാന്തപുരം ഉസ്താദ് കീ ജായ്..

മ്യാവൂ : നാല്പതു കോടിയുടെ പള്ളിയില്‍ തിരുകേശത്തോടൊപ്പം ഉസ്താദിന്റെ അരക്കിലോ തിരുതാടിയും സൂക്ഷിച്ചു വെക്കുന്നത് നല്ലതാണ്. ഭാവിയില്‍ ഉപകാരപ്പെടും. ഇ കെ സുന്നികളുടെ മുടിഞ്ഞ പ്രചാരണം കൊണ്ട് തിരുകേശം ഇട്ട വെള്ളത്തിനു ഡിമാണ്ട് കുറഞ്ഞാല്‍ തിരുതാടി കലക്കിയ വെള്ളം കൊടുക്കാം. അത് ഡ്യൂപ്ലിക്കേറ്റ്‌ ആണെന്ന് ആരും പറയില്ലല്ലോ. യേത്?

മാഷേ, നിങ്ങള്‍ മരിക്കുന്നില്ല

2012-01-24T09:04:00.002+03:00

മാഷ്‌ ഇനിയില്ല. രോഗം അതീവ ഗുരുതരമാണ് എന്ന് സ്ഥിരീകരിക്കപ്പെട്ടിരുന്നതിനാല്‍ വേദനിപ്പിക്കുന്ന ഈ വാര്‍ത്ത ഏതു നിമിഷവും വരാം എന്ന് അറിയാമായിരുന്നു. എന്നാലും മരിച്ചു എന്ന് കേട്ടപ്പോള്‍ വല്ലാത്ത ഒരു നടുക്കമുണ്ട്. ശരീരം വിറയ്ക്കുന്ന പോലെ. വല്ലാത്ത ഒരു നിരാശ ചുറ്റും വന്നു പൊതിയുന്ന പോലെ. ആറ് പതിറ്റാണ്ടിലെറെക്കാലമായി നമ്മുടെ മണ്ണിന്റെ പ്രതികരണ സംസ്കാരത്തെ ജ്വലിപ്പിച്ചു നിര്‍ത്തിയ ഒരേ ഒരു മാഷ്‌.. ഒരു വടി പോലെ മെലിഞ്ഞുണങ്ങിയ ആ ശരീരത്തില്‍ നിന്നാണ് കേരളക്കരയുടെ സാമൂഹ്യ ചലനങ്ങളില്‍ പലപ്പോഴും കൊടുങ്കാറ്റുകള്‍ രൂപപ്പെട്ടത്.

ആര് യോജിച്ചാലും വിയോജിച്ചാലും മാഷ്‌ പറയാനുള്ളത് പറയും. ആ പറഞ്ഞ കാര്യത്തില്‍ ഉറച്ചു നില്‍ക്കും. സാഹിത്യവും സംസ്കാരവും രാഷ്ട്രീയവും വിദ്യാഭ്യാസവും സിനിമയും കലയും.. അഴീക്കോട് മാഷ്‌ ഇടപെടാത്ത മേഖലകള്‍ ഇല്ല. അദ്ദേഹത്തിന്‍റെ വാക്കുകള്‍ ചലനങ്ങളുയര്‍ത്താത്ത പൊതുവിഷയങ്ങള്‍ ഇല്ല. ഇനി ഇതുമോലൊരു മാഷ്‌ നമുക്കുണ്ടാവുകയില്ല. ഒരു സാഹിത്യകാരനോ രാഷ്ട്രീയക്കാരനോ സിനിമാക്കാരനോ മരിച്ചാല്‍ പകരം നില്‍ക്കാന്‍ പലരുമുണ്ടായി എന്ന് വരും. പക്ഷെ ഒരഴീക്കോട് മാഷിനു പകരം നില്‍ക്കാന്‍ ഇനി ഈ നൂറ്റാണ്ടില്‍ മറ്റൊരു മാഷുണ്ടാവില്ല എന്നതുറപ്പ്‌.

എന്റെ ഹോം ലൈബ്രറിയിലെ ഏറ്റവും പ്രിയപ്പെട്ട പുസ്തകങ്ങളില്‍ ഒന്ന് അഴീക്കോട് മാഷിനു പ്രമുഖര്‍ അയച്ച കത്തുകളുടെ സമാഹാരമാണ്. കറന്റ് ബുക്സ് പ്രസിദ്ധീകരിച്ച 'പ്രിയപ്പെട്ട അഴീക്കോടിന്' എന്ന പുസ്തകം. ആ പുസ്തകം ഞാന്‍ പല തവണ വായിച്ചിട്ടുണ്ട്. വായിച്ച് അത്ഭുതം കൂറിയിട്ടുണ്ട്. മാഷ്‌ ഇരുപതു വയസ്സുള്ള ഒരു പയ്യനായിരുന്നപ്പോള്‍ മഹാകവി ഉള്ളൂരും വള്ളത്തോളും ശങ്കരക്കുറുപ്പും അദ്ദേഹവുമായി കത്തിടപാടുകള്‍ നടത്തിയിരുന്നു. ഒരു കൊച്ചു പ്രതിഭയെ തിരിച്ചറിഞ്ഞ് ആ പ്രതിഭയുമായി സൗഹൃദം കൊതിച്ച മഹാ കവികള്‍. അഴീക്കോട് മാഷ്‌ ആരായിരുന്നു എന്നറിയാന്‍ ആ പുസ്തകമൊന്നു വായിച്ച് നോക്കണം.

മലയാളത്തിന്റെ മഹാസാഹിത്യകാരന്‍ വൈക്കം മുഹമ്മദ്‌ ബഷീര്‍ അഴീക്കോട് മാഷിനു എഴുതിയ രസകരമായ ഒരു എഴുത്ത് ഇവിടെ ചേര്‍ക്കട്ടെ.

പ്രിയപ്പെട്ട അഴീക്കോട്,
താങ്കള്‍ക്ക് സുഖവും സമാധാനവും ദീര്‍ഘായുസ്സും നേരുന്നു. ബേപ്പൂര്‍ നവാബ് എന്ന നിലക്ക് താങ്കള്‍ക്ക് ഒരു ബിരുദം തരാന്‍ സന്തോഷമുണ്ട്. 'പ്രസംഗ ചക്രവര്‍ത്തി സുകുമാര്‍ അഴീക്കോട്‌' എന്നാണ്. താങ്കള്‍ സന്തോഷത്തോടെ ആചന്ദ്രതാരം വാഴുക.

ഒരു താഴ്മയായ അപേക്ഷയുണ്ട്. ശ്രീമതി ഇന്ദിര ഗാന്ധിക്കുള്ള കത്ത് ഞാന്‍ എഴുതിയിട്ടുള്ളത് പോലെ തര്‍ജ്ജമ ചെയ്തു തരാന്‍ അപേക്ഷ. എഡിറ്റ്‌ ചെയ്തു കുറക്കേണ്ട എന്ന് സാരം. അത് പോലെ തന്നെ വേണം.

താങ്കള്‍ സദയം കൊണ്ടുവന്നു തന്നു കുഴമ്പ് പുരട്ടി തിരുമ്മി കുളിക്കുന്നുണ്ട്. കുളി കഴിയുമ്പോള്‍ സുഖം തോന്നും പിന്നീട് നടക്കുമ്പോള്‍ വേദന വരും. വരട്ടെ. പ്രായമാകുമ്പോള്‍ ഇങ്ങനെയൊക്കെയാണ്.

താങ്കളെ ക്കൊണ്ട് ഒരു പെണ്ണ് കെട്ടിക്കണമെന്ന് എന്റെ ഭാര്യ പറഞ്ഞു. ഞാന്‍ പറഞ്ഞു, ആ മനുഷ്യന്‍ സമാധാനമായി ജീവിച്ചോട്ടെ. അപ്പോള്‍ ഭാര്യ പിണങ്ങി. കുറെക്കഴിഞ്ഞു പറഞ്ഞു. വയസ്സാകുമ്പോള്‍ സുകുമാറിനെ ആര് നോക്കും. ഒരു ഭാര്യ അത്യാവശ്യമാണ്. ഞാന്‍ പറഞ്ഞു. എന്നെ നോക്കാന്‍ ആരുണ്ട്‌? നീ കയ്യും ഒടിച്ചു നടക്കുകയല്ലേ? അതുകൊണ്ട് ഒരു പെണ്ണ് കൂടി കെട്ടിക്കളയാം!

അപ്പോഴും പിണക്കം.

ഞാന്‍ എന്നാണ് വരേണ്ടത്? വിവരം അറിയിച്ചാല്‍ കൂനിക്കൂടി അവിടെ വരാം.

ക്ഷേമാശംസകളോടെ
വൈക്കം മുഹമ്മദ്‌ ബഷീര്‍

കോഴിക്കോട്
19-12-1980

തത്ത്വമസി ഞാന്‍ വായിച്ചിട്ടില്ല. എങ്കിലും മാഷുടെ നിരവധി പ്രഭാഷണങ്ങള്‍ നേരിട്ട് കേട്ടിട്ടുണ്ട്. അദ്ദേഹത്തിന്‍റെ പത്രാധിപത്യത്തിന് കീഴില്‍ കുറച്ചു കാലം പ്രവര്‍ത്തിക്കാനുള്ള (വര്‍ത്തമാനം പത്രത്തില്‍) ഭാഗ്യം ഉണ്ടായിട്ടുണ്ട്. തത്ത്വമസി വായിച്ച് മനസ്സിലാക്കാന്‍ വേണ്ട വകതിരിവ് എനിക്കില്ലാത്തത് കൊണ്ടാണ് ആ മഹാപുസ്തകം വായിക്കാതിരിക്കുന്നത്. അഴീക്കോട് മാഷിന്റെ ഓര്‍മ്മകള്‍ ലോകമുള്ളിടത്തോളം കാലം ജീവത്തായി നിലനിര്‍ത്താന്‍ ആ ഒരൊറ്റ പുസ്തകം മതി എന്ന് അത് വായിച്ചവര്‍ പറഞ്ഞിട്ടുണ്ട്. തത്ത്വമസി വായിച്ച് കൊണ്ടിരുന്ന ഒരു ആസ്വാദകന്‍ ഒരിക്കല്‍ മാഷിനു എഴുതി. "സാര്‍, ഞാന്‍ തത്ത്വമസി വായിച്ച് കൊണ്ടിരിക്കുകയാണ്. അങ്ങേക്ക് ഭാര്യ യില്ലാത്തത് കാരണം ഞങ്ങള്‍ക്ക് ഈ പുസ്തകം ലഭിച്ചു. എന്റെ ഭാര്യ പിരിഞ്ഞു പോയത് കാരണം ഞാനിത് വായിക്കുന്നു. നന്ദി"

അഴീക്കോട് മാഷിനെ പറ്റി കുഞ്ഞുണ്ണി മാഷ്‌ എഴുതിയ ഒരു കവിതയുണ്ട്. വായിക്കാന്‍ അല്പം ബുദ്ധിമുട്ടുമെങ്കിലും ആ രണ്ടു വരിയില്‍ എല്ലാമുണ്ട്.

അഴിയാക്കോടിഴയാക്കോ
ടുഴിയാക്കോടൊഴിയാക്കോടഴീക്കോട്

അതെ, കുഞ്ഞുണ്ണി മാഷ്‌ എഴുതിയ പോലെ അഴിയുകയും ഇഴയുകയും ഒഴിയുകയും ഉഴിയുകയും ചെയ്യാത്ത മാഷാണ് അഴീക്കോട് മാഷ്‌. മാഷുടെ വാദഗതികളോട് എല്ലാവരും യോജിച്ചു കൊള്ളണമെന്നില്ല. ഈ ബ്ലോഗിലും അദ്ദേഹത്തെ വിമര്‍ശിച്ചു നിരവധി പോസ്റ്റുകള്‍ എഴുതിയിട്ടുണ്ട്. എന്നാലും ആ വ്യക്തി പ്രഭാവത്തെ, നിലപാടുകളിലെ ആര്‍ജ്ജവത്തെ, അത് തുറന്നു പറയുന്നതിലെ ചങ്കൂറ്റത്തെ വിമര്‍ശിക്കുവാന്‍ ആര്‍ക്കും കഴിയാറില്ല.

മാഷിന്റെ ഭൗതിക ശരീരം ഏതാനും മണിക്കൂറുകള്‍ക്കുള്ളില്‍ മണ്ണായി മാറുമെങ്കിലും അദ്ദേഹം വിട്ടേച്ചു പോയ ധിഷണയുടെ സൗരഭ്യം ഒരിക്കലും മരിക്കില്ല. മരിക്കാത്ത ആ ഓര്‍മയ്ക്ക് മുന്നില്‍ ഒരായിരം കണ്ണീര്‍പൂക്കള്‍..

സൂക്ഷിക്കുക, ഭാര്യ ഫേസ്ബുക്കിലുണ്ട് !!.

2012-01-15T09:12:00.000+03:00

സഊദി അറേബ്യയിലെ പെണ്ണുങ്ങള്‍ ഇത്ര മാത്രം കൗശലക്കാരികളാണെന്ന് ഞാന്‍ കരുതിയിരുന്നില്ല. മിഡില്‍ ഈസ്റ്റിലെ ഏറ്റവും പ്രചാരമുള്ള ഇംഗ്ലീഷ് പത്രമായ അറബ് ന്യൂസില്‍ ഈയിടെ വന്ന ഒരു വാര്‍ത്തയാണ് അവരെക്കുറിച്ചുള്ള 'തെറ്റിദ്ധാരണകള്‍ ' നീക്കാന്‍ അവസരമുണ്ടാക്കിയത്. കട്ടിലില്‍ കിടക്കുന്ന ഭാര്യമാരെ വിട്ട് ഫേസ്ബുക്കിലെ അനോണിപ്പെണ്ണിന്റെ പിറകെ ഉമിനീരിറക്കി നടക്കുന്ന ഭര്‍ത്താക്കന്മാര്‍ കേരളത്തില്‍ മാത്രമല്ല സഊദി അറേബ്യയിലും ഉണ്ട്. അങ്ങിനെയുള്ള ചിലരെ കയ്യോടെ പിടികൂടിയാണ് സഊദി പെണ്ണുങ്ങള്‍ അവരുടെ സൈബര്‍ കഴിവ് തെളിയിച്ചത്.

അവരില്‍ ഒരാളുടെ മാത്രം കഥ പറയാം. ഫര്‍ത്താവ് ഫേസ്ബുക്കില്‍ നിന്ന് എഴുന്നേല്‍ക്കാതായപ്പോള്‍ ഫാര്യക്ക് സംശയമായി. ഇതിയാനു മുസ്‌ലി പവര്‍ അല്പം കൂടിയിട്ടുണ്ട്!. ഒന്ന് ടെസ്റ്റ്‌ ചെയ്തിട്ട് തന്നെ കാര്യം. അവള്‍ നേരെ പോയി ഒരു ഫേസ്ബുക്ക് അക്കൗണ്ട്‌ ഉണ്ടാക്കി. നെറ്റില്‍ നിന്ന് കാണാന്‍ കൊള്ളാവുന്ന ഒരു പെണ്ണിന്റെ ഫോട്ടോയെടുത്തു പ്രൊഫൈലില്‍ ഇട്ടു. ബ്ലാക്ക് ബെറിയില്‍ നിന്ന് ഭര്‍ത്താവിനു ഒരു ഫ്രണ്ട് റിക്വസ്റ്റ് അയച്ചു. അയക്കേണ്ട താമസം തൊട്ടപ്പുറത്തെ റൂമിലെ ലാപ് ടോപ്പില്‍ നിന്നും പുള്ളിക്കാരന്‍ എക്സപ്റ്റ് അടിച്ചു. പിന്നെ ചാറ്റായി, കൊച്ചു വര്‍ത്തമാനങ്ങളായി. ആശുപത്രി > പാലുകാച്ചല്‍ , പാല് കാച്ചല്‍ > ആശുപത്രി എന്ന് പറഞ്ഞ പോലെ ബ്ലാക്ക് ബെറി > ലാപ് ടോപ്‌, ലാപ് ടോപ്‌ > ബ്ലാക്ക് ബെറി. ഭര്‍ത്താവിന്റെ ഉള്ളിലിരുപ്പ് അറിയാനായി ബ്ലാക്ക് ബെറിയില്‍ നിന്ന് ഒരു ചോദ്യം പറന്നു. 'ഭാര്യ എങ്ങിനെയുണ്ട്?'. ഒരു സെക്കന്റില്‍ മറുപടിയെത്തി. ഭര്‍ത്താക്കന്മാരുടെ ടിപ്പിക്കല്‍ മറുപടി തന്നെ. "കെട്ടിക്കുടുങ്ങി! അഞ്ചു കാശിനു കൊള്ളില്ല"!!. സമ്മൂസക്ക് ഉള്ളി അരിയുന്ന പോലെ പഹയനെ അരിഞ്ഞു നുറുക്കാന്‍ കൈ തരിച്ചെങ്കിലും ബ്ലാക്ക് ബെറി നിയന്ത്രണം വിടാതെ പ്രതികരിച്ചു. 'അയ്‌വ, കുവൈസ്!!'. ദിവസങ്ങള്‍ കടന്നു പോയി. ചാറ്റ് മൂത്ത് മീറ്റിനുള്ള സമയമായി. സമയവും സ്ഥലവും നിശ്ചയിച്ചു. കുളിച്ചൊരുങ്ങി അത്തറ് പൂശി പുറപ്പെട്ട ഫര്‍ത്താവ് ഫേസ്ബുക്ക്‌ പ്രണയിനിയെ കണ്ട് ബോധം കെട്ട് വീണു!!. നാല് ഓപ്പറേഷന്‍ ചെയ്ത ശേഷമാണ് പുള്ളിക്ക് ബോധം തെളിഞ്ഞതത്രേ! (അറബ് ന്യൂസ്‌ സ്റ്റോറിയോട് 'ഇത്തിരി' എന്റെ വക കൂട്ടിയിട്ടുണ്ട് കെട്ടോ).

ഫേസ്ബുക്കില്‍ കളിക്കുമ്പോള്‍ ശ്രദ്ധിച്ചു കളിക്കണമെന്ന് ഞാന്‍ ഇതിനും മുമ്പും പറഞ്ഞിട്ടുണ്ട്. പതിനാറുകാരി തെസ്സ പിടിച്ച പുലിവാലിന്റെ കഥയും മുമ്പ് എഴുതിയിട്ടുണ്ട്. അറബികളില്‍ വള്ളിക്കുന്ന് ബ്ലോഗ്‌ വായിക്കുന്നവര്‍ വളരെ കുറവായത് കൊണ്ട് അവര്‍ക്ക് അബദ്ധങ്ങള്‍ പറ്റുന്നു എന്ന് മാത്രം. പണ്ടത്തെപ്പോലെയല്ല ഇപ്പോള്‍ കാര്യങ്ങള്‍ . മണ്ണില്‍ കാലു കൊണ്ട് ചക്രം വരച്ചു 'നാണ്‍ വന്നു' നില്‍ക്കുന്ന ഭാര്യമാരുടെ കാലമൊക്കെ കഴിഞ്ഞു. ഭര്‍ത്താവ് ഒരു ഫേക്ക് ഐഡി ഉണ്ടാക്കുമ്പോള്‍ നാലെണ്ണം ഉണ്ടാക്കുന്ന ലവളുമാരുടെ കാലമാണിത്. ലവന്‍ നൂറു ഫ്രണ്ട്സ് തികക്കാന്‍ ചക്രശ്വാസം വലിക്കുമ്പോള്‍ ലവള്‍ കൂളായി ആയിരം ഒപ്പിച്ചിരിക്കും. കാലം ഈസ്‌ ചേഞ്ചിംഗ് യു നോ .. അതുകൊണ്ടാണ് ഭാര്യയുടെമേല്‍ ഒരു കണ്ണ് വേണം എന്ന് പറയുന്നത്. അവളും ഫേസ്ബുക്കില്‍ ഉണ്ടാകാന്‍ സാധ്യതയുണ്ടെന്ന ബോധം വെച്ചു വേണം കരിമ്പിന്‍ തോട്ടത്തില്‍ ഇറങ്ങാന്‍.

ഫേസ്ബുക്കില്‍ രസകരമായ പലതും നടക്കുന്നുണ്ട്. സഊദി പെണ്ണ് ഉണ്ടാക്കിയ പോലുള്ള വ്യാജ ഐഡികളും പ്രൊഫൈലുകളും കൊണ്ട് അറബിക്കടല്‍ പോലെ പരന്നു കിടക്കുകയാണ് ഫേസ്ബുക്ക്‌. പഴയ കാര്‍ട്ടൂണ്‍ കഥാപാത്രം ലോലനെപ്പോലെ രാവിലെ എഴുന്നേറ്റു കണ്ണ് തിരുമ്മി ഞരമ്പ്‌ രോഗികള്‍ എഴുന്നേല്‍ക്കുന്നത് തന്നെ ചെല്ലക്കിളികളുടെ പ്രൊഫൈലിലേക്കാണ്. ഇത്തരം പ്രൊഫൈലുകളില്‍ തൊണ്ണൂറു ശതമാനവും മെയിഡ് ഇന്‍ കുന്നംകുളം ആണ്. ഒരാളെപ്പോലെ ലോകത്ത് ഏഴുപേര്‍ ഉണ്ടാകും എന്നാണു പറയാറ്. കാണാന്‍ കൊള്ളാവുന്ന പെണ്ണാണെങ്കില്‍ ഫേസ്ബുക്കില്‍ ഒരാളെപ്പോലെ എഴുനൂറു പേരുണ്ടാകും. ചില ഉദാഹരണങ്ങള്‍ കാണാം. (എന്റെ കണ്ടുപിടുത്തങ്ങള്‍ അല്ല. പലപ്പോഴായി മെയിലുകളില്‍ വന്നവയാണ്)

ഇത്തരം പ്രൊഫൈലുകളുടെ പിറകെ പോയി അവരുടെ പോസ്റ്റിനു ലൈക് അടിച്ചു നടക്കുകയാണ് ഫേസ്ബുക്ക് പൂവാലന്മാരുടെ പ്രധാന പണി. 'രാവിലെ കട്ടന്‍ ചായ കുടിച്ചു' എന്നൊരു സ്റ്റാറ്റസ് ഒരു ചെല്ലക്കിളി ഇട്ടു എന്നിരിക്കട്ടെ. പത്തു മിനുട്ടിനുള്ളില്‍ മിനിമം ഇരുനൂറു പൂവാലന്മാര്‍ ലൈക്‌ അടിച്ചിരിക്കും!. ഓണത്തിനു ബീവറേജ് സ്റ്റോറിനു മുന്നിലെന്ന പോലെ പിന്നെ ഒടുക്കത്തെ തിരക്കായിരിക്കും അവിടെ. കമന്റോട് കമന്റ്. അവിടെ അടി നടക്കുമ്പോള്‍ സ്റ്റാറ്റസ് ഇട്ട 'ചെല്ലക്കിളി' കട്ടന്‍ ചായ കുടിച്ച ശേഷം ബാര്‍ബര്‍ ഷോപ്പില്‍ താടി വടിക്കാന്‍ പോയിട്ടുണ്ടായിരിക്കും!!. അവനറിയാം സ്വന്തം ഫോട്ടോ വെച്ചു "രാവിലെ ഞാനൊരു ആറ്റം ബോംബു വിഴുങ്ങി" എന്ന് സ്റ്റാറ്റസ് ഇട്ടാല്‍ പോലും ഒരുത്തനും തിരിഞ്ഞു നോക്കില്ലെന്ന്!. ഇവിടെ ഒറ്റ കട്ടന്‍ചായ കൊണ്ടാണ് ഒരു പൂരത്തിനുള്ള ആളുകള്‍ എത്തിയിരിക്കുന്നത്. അപ്പോള്‍ പിന്നെ ശരിക്കുള്ള ശൃംഗാരം കാച്ചിയാലത്തെ കഥ പറയാനുണ്ടോ? ഇത്തരം അലമ്പ് പൂവാലന്മാരെ മാത്രമല്ല ചിലപ്പോള്‍ നമ്പര്‍ വണ്‍ കില്ലാഡികളെയും ഫേസ്ബുക്കില്‍ കാണാറുണ്ട്‌. ഈയടുത്ത് കേരളകൗമുദി പത്രത്തില്‍ ഒരു വാര്‍ത്ത ഉണ്ടായിരുന്നു. 'എന്റെ ഭാര്യ വില്‍പ്പനയ്ക്ക്, വില ആയിരം രൂപ' എന്നായിരുന്നു തലക്കെട്ട്‌. ഭാര്യയെ വില്‍പ്പനക്ക് വെച്ച ഒരു പ്രൊഫൈല്‍ ഫോട്ടോയെക്കുറിച്ചുള്ള റിപ്പോര്‍ട്ടായിരുന്നു അത്.

രണ്ട് ഡസണിലധികം പ്രൊഫൈലുകളിലാണ് ഇതേ പെണ്‍കുട്ടിയുടെ ഫോട്ടോയുള്ളത് എന്ന് റിപ്പോര്‍ട്ടില്‍ ഉണ്ട്. അതിലൊന്നിലാണ് മുകളില്‍ കൊടുത്ത വില്പനയുള്ളത്. ഞരമ്പ്‌ രോഗം കലശലായ ആളുകള്‍ പടച്ചു വിടുന്നതാണ് ഇത്തരം പ്രൊഫൈലുകള്‍ എന്ന് എല്ലാവര്‍ക്കും അറിയാം. എവിടുന്നോ കിട്ടിയ ഒരു ഫോട്ടോ എടുത്തു അങ്ങ് ചാമ്പുകയാണ്. ആരാന്റെ പെങ്ങളെ സൈബര്‍ ചന്തയില്‍ വില്പനയ്ക്ക് വെക്കാന്‍ പാസ്പോര്‍ട്ടും റേഷന്‍ കാര്‍ഡുമൊന്നും ആവശ്യമില്ലല്ലോ. ഫോട്ടോയില്‍ കാണുന്ന പെണ്‍കുട്ടി ഒരു പക്ഷെ ഇതൊന്നും അറിഞ്ഞിരിക്കണം എന്നില്ല. ഏതോ ശാലീന ഗ്രാമത്തില്‍ ജീവിക്കുന്ന ഫേസ്ബുക്കോ മൊബൈലോ ഇല്ലാതെ ഒരു കുട്ടിയുടെ ചിത്രമായിരിക്കാം അത്. പക്ഷെ ഫേസ്ബുക്കില്‍ അവള്‍ ഹോട്ട് പ്രോപര്‍ട്ടിയാണ്!.റാങ്ക് കിട്ടിയ കുട്ടികളുടെ പത്രത്തില്‍ വന്ന ഫോട്ടോയില്‍ നിന്നാണ് ഈയിടെ ഒരു പെണ്‍കുട്ടി ഫേസ്ബുക്കിലെ പ്രൊഫൈലുകളിലേക്ക് ചാടിയത്. നിരവധി ഞരമ്പുകള്‍ ആ കുട്ടിയെ വെച്ചു പ്രൊഫൈല്‍ കളിച്ചു.

പാവം പെണ്‍കുട്ടികളെ അപകീര്‍ത്തിപ്പെടുത്തുന്ന ഇത്തരം പ്രൊഫൈലുകള്‍ കണ്ടാല്‍ നമുക്ക് എന്ത് ചെയ്യാന്‍ കഴിയും എന്ന ചോദ്യം പ്രസക്തമാണ്. ഏറ്റവും ചുരുങ്ങിയത് ഇക്കാര്യം ഫേസ്ബുക്ക്‌ അധികൃതര്‍ക്ക് റിപ്പോര്‍ട്ട്‌ ചെയ്യാനെങ്കിലും നമുക്ക് സാധിക്കും. ഒരു മിനുട്ട് പോലും വേണ്ട ഇത് റിപ്പോര്‍ട്ട്‌ ചെയ്യുവാന്‍. അവരുടെ പ്രൊഫൈലില്‍ പോവുക. ഇടതു സൈഡ് ബാറില്‍ ഏറ്റവും താഴെയുള്ള Report/Block എന്ന ലിങ്കില്‍ ക്ലിക്കുക. അനുയോജ്യമായ കാരണങ്ങള്‍ക്ക് നേരെ ടിക്ക് മാര്‍ക്ക് ചെയ്തു സബ്മിറ്റ് ചെയ്യുക. കൂടുതല്‍ പേരുടെ റിപ്പോര്‍ട്ടിംഗ് ലഭിച്ചാല്‍ ബാക്കി പണി ഫേസ്ബുക്ക്‌ ചെയ്തു കൊള്ളും.

കൂടുതല്‍ ഗുരുതരമായ ഞരമ്പ്‌ ആണെന്ന് തോന്നിയാല്‍ ഒരു സ്ക്രീന്‍ ഷോട്ട് എടുത്ത് ബന്ധപ്പെട്ട സൈബര്‍ സെല്ലിന് ഒരു ഇമെയില്‍ അയക്കാനും കഴിയും. (തന്റെ മകളുടെ ഫോട്ടോ വെച്ചു പ്രൊഫൈല്‍ ഉണ്ടാക്കിയതിനെതിരെ ഒരു രക്ഷിതാവ് കൊടുത്ത പരാതിയില്‍ കോഴിക്കോട്ടു നടക്കാവ് പോലീസ് സൈബര്‍ സെല്ലുമായി സഹകരിച്ചു അന്വേഷണം ആരംഭിച്ചതായ ഒരു വാര്‍ത്ത ഇന്നലത്തെ പത്രത്തില്‍ കണ്ടു. അത്രയും നല്ലത്). പക്ഷെ അധികമാരും ഇത്തരം റിപ്പോര്‍ട്ടിംഗുകള്‍ ചെയ്യാന്‍ മിനക്കെടാത്തത് കൊണ്ട് ഞരമ്പുകള്‍ കൂളായി വിലസുന്നു എന്ന് മാത്രം.

എച്ചൂസ്മീ, ഞാനല്പം സീരിയസ്സായിപ്പോയോ?. ഫേസ്ബുക്കിലെ തമാശകള്‍ പറഞ്ഞു വന്ന കൂട്ടത്തില്‍ വെറുതെ ഒന്ന് മസില്‍ പിടിച്ചു എന്നേയുള്ളൂ. അത് പോട്ടെ. ഭര്‍ത്താവിനെ കയ്യോടെ പിടിച്ച സൗദി പെണ്ണിന് എന്റെ അഭിനന്ദനങ്ങള്‍ .. ഇത് വായിക്കുന്ന ഭാര്യമാരില്‍ /കാമുകിമാരില്‍ ഇനിയും ഐ ഡി ഉണ്ടാക്കിയിട്ടില്ലാത്തവര്‍ ഉണ്ടെങ്കില്‍ എത്രയും പെട്ടെന്ന് ഒന്നുണ്ടാക്കി ഫര്‍ത്താവിനു/കാമുകന് ഫ്രണ്ട് റിക്വസ്റ്റ് അയക്കണമെന്ന് വിനീതമായി അഭ്യര്‍ത്ഥിക്കുന്നു. ഉഷ്ണം ഉഷ്ണേന ശാന്തി. ഞരമ്പ്‌ ഞരമ്പേന സ്വാഹ.

Related Posts
പേര് ഫേസ്ബുക്ക്, വയസ്സ് പതിനാറ് (Female)
ടീനേജുകാരുടെ സോഷ്യല്‍ നെറ്റ്വര്‍ക്കിംഗ്
നൈജീരിയന്‍ ഈമെയിലും മലയാളിപൊട്ടനും

താരം കൊച്ചൌസേപ്പ്! ചാണ്ടിയും കുട്ടിയും ഔട്ട്‌!!

2012-01-07T20:02:00.000+03:00

അഹങ്കാരം കൊണ്ട് പറയുകയാണെന്ന് കരുതരുത്, അല്പം അഹങ്കാരം എനിക്കുണ്ട്. കൊച്ചൌസേപ്പ് ചിറ്റിലപ്പിള്ളിക്ക് വേണ്ടി നാം നടത്തിയ ക്യാമ്പയ്ന്‍ വിജയിച്ചിരിക്കുന്നു. മനോരമയുടെ ന്യൂസ്‌മേക്കര്‍ മത്സരത്തില്‍ ഉമ്മന്‍ ചാണ്ടി, കുഞ്ഞാലിക്കുട്ടി, സലിം കുമാര്‍ എന്നിവരെ പിന്തള്ളി കൊച്ചൌസേപ്പ് തന്നെ താരമായി മാറിയിരിക്കുകയാണ്. കുറച്ചെങ്കിലും കുറച്ചു വോട്ട് ഒരു മനുഷ്യ സ്നേഹിക്ക് നേടിക്കൊടുക്കാനുള്ള ശ്രമത്തില്‍ പങ്കാളിയായതില്‍ എനിക്കുള്ള അഹങ്കാരം ഞാന്‍ എല്ലാവരെയും വിനയപൂര്‍വ്വം അറിയിക്കുകയാണ്.

കഴിഞ്ഞ തവണ പ്രീജ ശ്രീധരനു വേണ്ടി ഇറങ്ങിയത്‌ പോലെ ഇത്തവണ കൊച്ചൌസേപ്പിന് വേണ്ടി ഇറങ്ങിയപ്പോള്‍ പലരും പറഞ്ഞു. 'അവാര്‍ഡ്‌ ചാണ്ടി സാറോ അതല്ലെങ്കില്‍ കുഞ്ഞാലിക്കുട്ടിയോ കൊണ്ട് പോകും, നിങ്ങള് ബ്ലോഗു പൂട്ടി കാശിക്കു പോകേണ്ടിയും വരും'. ലോട്ടറി അടിച്ചപ്പോള്‍ ഇന്നസന്‍റ് കാച്ചിയത് പോലുള്ള നാല് ഡയലോഗ് അവരോടു പറയണം എന്നെനിക്കുണ്ട്. പക്ഷെ എന്റെ അഹങ്കാരം അതിനെന്നെ അനുവദിക്കുന്നില്ല!

ആറ് ലക്ഷത്തോളം പേര്‍ പങ്കെടുത്ത വോട്ടിങ്ങില്‍ കൊച്ചൌസേപ്പിന് ലഭിച്ചത് ഏറെയും ഓണ്‍ലൈന്‍ വോട്ടുകളാണ് എന്നാണു അറിയാന്‍ കഴിഞ്ഞത്. രാഷ്ട്രീയത്തിനും സിനിമക്കും അപ്പുറം മാനുഷികതയുടെ മഹാസ്പര്‍ശത്തിനു മലയാളിയുടെ പൗരബോധം വില കല്പിച്ചിരിക്കുന്നു എന്ന് വേണം പറയാന്‍. എസ് എം എസ് ചെയ്ത് മനോരമക്കും മൊബൈല്‍ കമ്പനിക്കും കാശ് കൊടുക്കാതെ ഓണ്‍ലൈനില്‍ ഫ്രീയായി വോട്ട് ചെയ്ത എല്ലാവര്‍ക്കും ഒരു പെരിയ താങ്ക്സ്. രാഷ്ട്രീയ നേതാക്കളെയും സിനിമാ താരത്തെയും മാറ്റി നിര്‍ത്തി സ്വന്തം ജീവിതം കൊണ്ടും ശരീരം കൊണ്ടും മാനുഷികതയുടെ മാറ്റ് തെളിയിച്ച കൊച്ചൌസേപ്പിനെ തിരഞ്ഞെടുത്തത് വഴി സത്യത്തില്‍ കൊച്ചൌസേപ്പിനോടൊപ്പം പ്രേക്ഷകരും താരങ്ങളായിരിക്കുകയാണ്.

വോട്ട് ചെയ്ത വിവരം ബ്ലോഗ്‌, ഫേസ്ബുക്ക്‌, ഗൂഗിള്‍ പ്ലസ്‌, ഇമെയില്‍ എന്നിവയിലൂടെ അറിയിക്കുകയും ഈ ഓണ്‍ലൈന്‍ ക്യാമ്പയിന് പിന്തുണ പ്രഖ്യാപിക്കുകയും ചെയ്ത നിരവധി പേരുണ്ട്. അവര്‍ക്കൊക്കെയും നന്ദി പറയുന്നു. ഉമ്മന്‍ ചാണ്ടി, കുഞ്ഞാലിക്കുട്ടി, സലിം കുമാര്‍ എന്നിവരുടെ ഫാന്‍സുകാര്‍ക്ക് എന്റെ അനുശോചനവും റീത്തും അര്‍പ്പിക്കുകയാണ്. വിധിയുണ്ടെങ്കില്‍ അടുത്ത വര്‍ഷത്തെ ന്യൂസ്‌ മേക്കറില്‍ നമുക്ക് വീണ്ടും കാണാം.

മ്യാവൂ:- വീഗാ ലാന്‍ന്റിലേക്ക് എനിക്കും കുടുംബത്തിനും ഒരു ആജീവനാന്ത ഫ്രീ പാസ്‌ തരണമെന്ന് ആവശ്യപ്പെട്ട് ഒരു ടെലഗ്രാം ഞാന്‍ കൊച്ചൌസേപ്പിന് അയച്ചിട്ടുണ്ട്!.

Related Posts
കൊച്ചൌസേപ്പ് ജയിക്കില്ലേ ?
വ്യത്യസ്തനാമൊരു കൊച്ചൌസേപ്പ്
പ്രീജ ശ്രീധരന് ഒരു വോട്ട്
മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)
സുരേഷ് ഗോപി സെറോക്സ്‌ കോപ്പിയല്ല
ഏജന്റുമാരുടെ സമരം, മനോരമ വിറക്കുന്നു.

കൊച്ചൌസേപ്പ് ജയിക്കില്ലേ ?

2011-12-26T16:34:00.002+03:00

മനോരമ ന്യൂസ്‌മേക്കര്‍ 2011 അവാര്‍ഡ്‌ പ്രഖ്യാപിക്കാന്‍ ഇനി ഏതാനും ദിവസങ്ങള്‍ മാത്രമേ ബാക്കിയുള്ളൂ. പ്രാഥമിക റൌണ്ടില്‍ കൊച്ചൌസേപ്പ് ചിറ്റിലപ്പിള്ളിക്ക് പിന്തുണ പ്രഖ്യാപിച്ചു ഞാനൊരു പോസ്റ്റ് ഇട്ടിരുന്നു. ഫൈനല്‍ റൌണ്ടിലെ പിന്തുണ അറിയിക്കുന്നതിനു വേണ്ടിയാണ് ഇങ്ങനെയൊരു പോസ്റ്റ്‌ ഇടുന്നത്. ഒരു പണി ഏറ്റെടുത്ത സ്ഥിതിക്ക് അത് മുഴുവിപ്പിക്കാതെ പോകുന്നത് ശരിയല്ലല്ലോ :). ഫൈനല്‍ റൌണ്ടില്‍ ഇപ്പോള്‍ നാല് പേരാണുള്ളത്. ഉമ്മന്‍ ചാണ്ടി, കുഞ്ഞാലിക്കുട്ടി, സലിം കുമാര്‍ & കൊച്ചൌസേപ്പ് ചിറ്റിലപ്പിള്ളി. മനോരമയില്‍ നിന്ന് കിട്ടിയ രഹസ്യ വിവരം അനുസരിച്ച് ഇപ്പോഴത്തെ വോട്ടിംഗ് ട്രെന്‍ഡ് കുഞ്ഞാലിക്കുട്ടിക്ക് അനുകൂലമാണ്. മൂപ്പര്‍ക്ക് വേണ്ടി SMS ചെയ്യാന്‍ മലപ്പുറത്ത് ഇപ്പോള്‍ കൊണ്ടോട്ടി നേര്‍ച്ചയുടെ തിരക്കാണ് എന്നാണറിയുന്നത്. കൊച്ചൌസേപ്പ് ഔട്ടാകാതിരിക്കാന്‍ നമ്മളൊന്ന് ആഞ്ഞു പിടിക്കേണ്ടി വരും.

നിലവിലുള്ള നാല് പേരില്‍ ആര് ന്യൂസ്‌ മേക്കര്‍ ആയാലും അഞ്ചു കാശിന്റെ ഉപകാരം വ്യക്തിപരമായി എനിക്കില്ല. പക്ഷെ കൊച്ചൌസേപ്പിനോട് അല്പം ഇഷ്ടമുണ്ട്. വാക്കിനേക്കാള്‍ പ്രവൃത്തിക്ക് വിലയുണ്ടെന്ന് സ്വന്തം ജീവിതം വഴി കാണിച്ചു കൊടുത്ത ഒരേ ഒരാള്‍ ഈ നാല് പേരില്‍ കൊച്ചൌസേപ്പാണ്. ചാനലുകള്‍ അവരുടെ റേറ്റിംഗ് കൂട്ടാന്‍ വേണ്ടി നടത്തുന്ന പൊട്ടീസ് പരിപാടികള്‍ വിജയിപ്പിച്ചു കൊടുക്കാന്‍ ഇറങ്ങിപ്പുറപ്പെട്ട ഒരു പൊട്ടനാണ്‌ ഞാന്‍ എന്ന് കരുതുന്നവര്‍ ഉണ്ടാകും. എന്നാലും വേണ്ടില്ല, കൊച്ചൌസേപ്പ് കാണിച്ച മാനുഷികതയുടെ ആ മഹാ മാതൃകക്ക് ഒരംഗീകാരം ലഭിച്ചു കാണണമെന്ന് ആഗ്രഹമുണ്ട്. ഒന്ന് ഒത്തു പിടിച്ചാല്‍ കൊച്ചൌസേപ്പിനെ നമുക്ക് ഈ വര്‍ഷത്തെ ന്യൂസ്‌ മേക്കര്‍ ആക്കാന്‍ പറ്റും.

ഉമ്മന്‍ ചാണ്ടിയോ കുഞ്ഞാലിക്കുട്ടിയോ ന്യൂസ്‌ മേക്കര്‍ ആയി വരുന്നത് കൊണ്ട് യാതൊരു വിരോധവും ഉണ്ടായിട്ടല്ല. അവരൊക്കെ രാഷ്ട്രീയക്കാര്‍ ആണ്. ജനങ്ങളുടെ അംഗീകാരവും തിരസ്കാരവുമെല്ലാം വേണ്ടത്ര അനുഭവിച്ചവരുമാണ്. ഇപ്പോഴും അനുഭവിച്ചു കൊണ്ടിരിക്കുന്നവരാണ്. ഇനി ഒരു അവാര്‍ഡ് കൂടെ കിട്ടി എന്ന് വെച്ചു അവരുടെ ഇമേജിന് പ്രത്യേകിച്ച് ഒന്നും സംഭവിക്കാനില്ല. മുല്ലപ്പെരിയാര്‍ വിഷയത്തില്‍ ജീവന്‍ മരണ പോരാട്ടം നടത്തുന്ന കേരളത്തിലെ ജനങ്ങളെ പരിഹസിച്ചത്‌ വഴി സലിം കുമാറിനോട് ഇച്ചിരി നീരസം ഉണ്ട്. തണ്ണിയടിച്ചു ബഹളം ഉണ്ടാക്കിയതിനു വിമാനത്തില്‍ നിന്നും പുള്ളിയെ ഇറക്കി വിട്ട വാര്‍ത്ത വായിച്ചതോടെ ആ നീരസം വീണ്ടും കൂടി. ഇനി ഓസ്കാര്‍ വാങ്ങി വന്നാലും ആ നീരസം വഴിമാറും എന്ന് തോന്നുന്നില്ല.

കൊച്ചൌസേപ്പിനെപ്പറ്റി പറയാനുള്ളതെല്ലാം കഴിഞ്ഞ രണ്ടു പോസ്റ്റുകളിലായി ഞാന്‍ പറഞ്ഞിട്ടുള്ളത് കൊണ്ട് കൂടുതല്‍ ഒന്നും പറയുന്നില്ല. ഈ വീഡിയോ ഒന്ന് കൂടി കാണുക.

കൊച്ചൌസേപ്പ് ഒരു വോട്ടു അര്‍ഹിക്കുന്നുവെങ്കില്‍ ഈ ലിങ്ക് വഴി പോയി ഒരു വോട്ടു ചെയ്യുക. അപ്പോള്‍, പറഞ്ഞ പോലെ .. സ്റ്റാര്‍ട്ട്‌, ക്യാമറ, ആക്ഷന്‍..

(ഫൈനല്‍ റൌണ്ടില്‍ വോട്ടു ചെയ്തവര്‍ ആ വിവരം ഇവിടെ പറയുന്നത് നല്ലതാണ്)

പുതുതായി എത്തിയ വായനക്കാര്‍ക്ക് വേണ്ടി, മനോരമ ന്യൂസ്‌മേക്കര്‍ :ഗോവിന്ദച്ചാമി ലിസ്റ്റിലില്ല ഇവിടെ റീപോസ്റ്റ് ചെയ്യുന്നു. (originally posted on Dec 1, 2011)

മനോരമയുടെ ഈ വര്‍ഷത്തെ ന്യൂസ്‌മേക്കര്‍ മത്സരത്തിന്റെ നോമിനികളെ കണ്ടു ഞാന്‍ ഞെട്ടി. പി സി ജോര്‍ജ്, എം വി ജയരാജന്‍, പി കെ കുഞ്ഞാലിക്കുട്ടി, ബാലകൃഷ്ണപ്പിള്ള തുടങ്ങി പലരും അതിലുണ്ട്. ഉള്ള കാര്യം പറയാമല്ലോ, ഗോവിന്ദച്ചാമിയുടെ ഒരു കുറവുണ്ട് ആ ലിസ്റ്റില്‍ !. മനോരമേ, അയാളുടെ പേര് കൂടെ ഈ ലിസ്റ്റില്‍ ചേര്‍ക്കണം. എന്നാലേ മത്സരത്തിനു ഒരു ഗുമ്മുണ്ടാകൂ. കഴിഞ്ഞ വര്‍ഷം ഇതേ മത്സരത്തില്‍ പ്രീജ ശ്രീധരനെ ജയിപ്പിക്കാന്‍ വേണ്ടി അവളുടെ ബൂത്ത് ഏജന്റായി പ്രവര്‍ത്തിച്ച ഒരാളാണ് ഞാന്‍. ഭാഗ്യത്തിന് പെങ്കൊച്ചു ജയിച്ചു കയറി ന്യൂസ്‌ മേക്കര്‍ ആയി. (അതിന്റെ ലഹങ്കാരമൊന്നും എനിക്കില്ല കെട്ടോ..)

ഇത്തവണ ജനങ്ങള്‍ക്ക്‌ വോട്ടു ചെയ്തു വിജയിപ്പിക്കാന്‍ വേണ്ടി പന്ത്രണ്ടു പേരെയാണ് മനോരമ തിരഞ്ഞെടുത്തിരിക്കുന്നത്. അവരില്‍ നാല് പേരെയാണ് ഞാന്‍ മുകളില്‍ പറഞ്ഞത്. ഇനി ബാക്കിയുള്ള എട്ടു പേരുടെ കാര്യം നോക്കാം. സിനിമയില്‍ നിന്നും രണ്ടു മേനോത്തിക്കുട്ടികള്‍ ഉണ്ട് ലിസ്റ്റില്‍ . നിത്യ മേനോന്‍, ശ്വേത മേനോന്‍ (SNDP പ്രാതിനിധ്യം കുറവാണ്. വെള്ളാപ്പള്ളി കാണേണ്ട !!). പിന്നെയുള്ളത് നമ്മുടെ ദേശീയ അവാര്‍ഡ് ജേതാവും മുല്ലപ്പെരിയാര്‍ സമരത്തിന്റെ പ്രഖ്യാപിത ശത്രുവുമായ നടന്‍ സലിം കുമാര്‍ ആണ്. സിനിമയില്‍ നിന്ന് വേറെ ഒരാള്‍ കൂടി ജോണി ലൂക്കോസിന്റെ ലിസ്റ്റില്‍ ഉണ്ട്. ബോഡിഗാര്‍ഡ് സിദ്ദീഖ്. പിന്നെയുള്ളത് മുഖ്യമന്ത്രി ഉമ്മന്‍ ചാണ്ടി, വ്യവസായ പ്രമുഖനായ എം എ യൂസഫ്‌ അലി, ഇന്ത്യന്‍ ഹോക്കി താരം ശ്രീജേഷ് എന്നിവരാണ്. അതോടെ മൊത്തം പതിനൊന്നു പേരായി. ഇനി ഒരാള്‍ കൂടിയുണ്ട്. അത് കൊച്ചൌസേപ്പ് ചിറ്റിലപ്പിള്ളിയാണ്. അദ്ദേഹം ഈ ലിസ്റ്റില്‍ ഉള്ളത് കൊണ്ടാണ് ഞാന്‍ ഇങ്ങനെയൊരു പോസ്റ്റ്‌ എഴുതുന്നത്‌.

കഴിഞ്ഞ തവണത്തെപ്പോലെ ഒരു വോട്ടിംഗ് ക്യാന്‍വാസ് നടത്തുവാന്‍ എനിക്ക് ഉദ്ദേശമില്ല. മനോരമക്കെതിരെ മൂന്നു മാസം കൂടുമ്പോള്‍ ഒരു പോസ്റ്റെങ്കിലും എഴുതിയില്ലെങ്കില്‍ ഉറക്കം കിട്ടാത്ത ആളാണ്‌ ഞാന്‍. അതുകൊണ്ട് തന്നെ അവരുടെ പരിപാടി വിജയിപ്പിച്ചു കൊടുക്കുകയും എന്റെ ഉദ്ദേശമല്ല. ന്യൂസ്‌ മേക്കര്‍ സ്ഥാനത്തേക്ക് മത്സരിക്കുന്ന പന്ത്രണ്ടു പേരുടെ ലിസ്റ്റിലൂടെ കണ്ണോടിച്ചപ്പോള്‍ മനസ്സില്‍ തോന്നിയ ചിലതു ഇവിടെ പങ്കു വെക്കുന്നു എന്ന് മാത്രം. ഈ മത്സരത്തില്‍ ഞാന്‍ ആദ്യം പറഞ്ഞ നാല് പേരിലൊരാള്‍ വിജയിച്ചു വരാനുള്ള സാധ്യതയാണ് ഇപ്പോഴത്തെ അവസ്ഥയിലുള്ളത്. പി സി ജോര്‍ജ്, എം വി ജയരാജന്‍, പി കെ കുഞ്ഞാലിക്കുട്ടി, ബാലകൃഷ്ണപ്പിള്ള. ഈ നാല് പേര്‍ക്കും കുത്തിയിരുന്നു വോട്ടു ചെയ്യാനും എസ് എം എസ് അയക്കാനും വേണ്ടത്ര അനുയായികള്‍ ഉണ്ടാവും. ക്വട്ടേഷന്‍ സംഘങ്ങളെ വരെ എസ് എം എസ് അയക്കാന്‍ ഏര്‍പ്പാട് ചെയ്യാന്‍ കഴിയുന്നവരാണ് ഇവര്‍ . ഒരു പക്ഷെ അവര്‍ അവരുടെ പണി ഇതിനകം തന്നെ തുടങ്ങിക്കാണണം. മനോരമയുടെ ന്യായപ്രകാരം ഈ വര്‍ഷം വാര്‍ത്തകളില്‍ നിറഞ്ഞു നിന്നവരാണത്രേ ഇവര്‍ നാല് പേര്‍ . ശരിയാണ്. ഇവര്‍ വാര്‍ത്തകളില്‍ നിറഞ്ഞു നിന്നിട്ടിട്ടുണ്ട്. പക്ഷെ അതില്‍ മിക്കവയും കോടതിയും കേസുകെട്ടുകളും ജയില്‍വാസവുമൊക്കെയായി ബന്ധപ്പെട്ടതാണ്. ഇവരെ ലിസ്റ്റില്‍ ഉള്‍പെടുത്താമെങ്കില്‍ അതിനേക്കാള്‍ കൂടുതല്‍ വാര്‍ത്തയില്‍ നിറഞ്ഞു നിന്ന ഗോവിന്ദച്ചാമിയെയും ഉള്‍പെടുത്താന്‍ പറ്റും. അതവര്‍ ചെയ്യാത്തത് കൊണ്ട് എന്റെ ലിസ്റ്റില്‍ നിന്ന് ആ നാല് പേരെയും ഞാന്‍ ആദ്യം തന്നെ വെട്ടി.

ഹിന്ദിയില്‍ ഒരു സിനിമ ഹിറ്റാക്കി എന്നതാണ് സിദ്ധീഖിന്റെ ക്രെഡിറ്റില്‍ ഉള്ളത്. ഒരു മസാല ചിത്രത്തില്‍ രതിചേച്ചിയായി വന്നതാണ് ശ്വേത മേനോന്റെ ഈ വര്‍ഷത്തെ പ്രധാന ഹൈലൈറ്റ്. കല്യാണം കഴിക്കുന്നത്‌ സിനിമാനടികളെ സംബന്ധിച്ചിടത്തോളം വലിയ വാര്‍ത്തയൊന്നും അല്ലല്ലോ. (മഴവില്‍ മനോരമയില്‍ അവതാരകയാകാന്‍ സമ്മതിച്ചതാണ് ഈ ലിസ്റ്റില്‍ ഇടം പിടിക്കാനുള്ള യഥാര്‍ത്ഥ കാരണം എന്നൊരു മ്യാവൂ ഉണ്ട്. ബെര്‍ളിയുടെ കയ്യുണ്ടോ എന്നും അറിയില്ല. രതിചേച്ചിയെക്കുറിച്ചു ഏറ്റവും അധികം പോസ്റ്റുകള്‍ ഇട്ടതു പുള്ളിയാണ്) നിര്‍മാതാക്കളുടെ സംഘടനയുമായി ഉടക്കിയതാണ് നിത്യ മേനോനെ വാര്‍ത്തയില്‍ എത്തിച്ചത്. സിനിമയില്‍ നിന്ന് പിന്നെയുള്ളത് സലിം കുമാറാണ്. പുള്ളിയോട് അല്പം ഇഷ്ടം ഉണ്ടായിരുന്നു. ദേശീയ അവാര്‍ഡ് കിട്ടിയതോടെ ആ ഇഷ്ടം കൂടി. പക്ഷെ കഴിഞ്ഞ ദിവസം മുല്ലപ്പെരിയാര്‍ സമരത്തെ കൊച്ചാക്കി സംസാരിച്ചതോടെ മൊത്തം മലയാളികളുടെ മനസ്സില്‍ നിന്നും സലിം കുമാര്‍ പടിയിറങ്ങിക്കഴിഞ്ഞു എന്നാണെന്റെ വിശ്വാസം. ഇനി ഓസ്കാര്‍ കിട്ടിയാലും ഒരുത്തനും അയാള്‍ക്ക്‌ വോട്ടു ചെയ്യില്ല. മലയാളിയെ ഗുണപരമായി സ്വാധീനിച്ച ഒരു വാര്‍ത്താ വ്യക്തിയായി ഇവരില്‍ ഒരാളെ കാണാന്‍ കഴിയാത്തതിനാല്‍ ഞാന്‍ ഈ നാല് പേരെയും വെട്ടി.

ഇപ്പോള്‍ എട്ടു പേര്‍ ഔട്ടായി. നാല് പേര്‍ ബാക്കിയുണ്ട്. ഉമ്മന്‍ ചാണ്ടി. യൂസഫ്‌ അലി. ശ്രീജേഷ്. കൊച്ചൌസേപ്പ്. ഇവരില്‍ ആരുടേയും പേര് വെട്ടാന്‍ തോന്നുന്നില്ല. നാല് പേരും നമുക്ക് വേണ്ടപ്പെട്ടവര്‍ തന്നെ. എന്നിരുന്നാലും വ്യക്തിപരമായി എനിക്ക് ഏറ്റവും ഇഷ്ടം കൊച്ചൌസേപ്പിനെയാണ്. വി ഗാര്‍ഡ് കമ്പനിയുടെ ഉടമ എന്ന നിലക്കല്ല. വാക്കിലും പ്രവര്‍ത്തിയിലും മാനുഷികത തെളിയിച്ച ഒരു വ്യക്തി എന്ന നിലയില്‍ . ഈ വര്‍ഷം കേട്ട ഏറ്റവും ഹൃദയസ്പൃക്കായ വാര്‍ത്തകളില്‍ ഒന്നായിരുന്നു കൊച്ചൌസേപ്പ് തന്റെ കിഡ്നി ദാനം ചെയ്തു എന്നത്. ( ആ വാര്‍ത്ത കേട്ടയുടനെ ഞാനെഴുതിയ പോസ്റ്റ്‌ ഇവിടെയുണ്ട് ) അഞ്ഞൂറ് കോടി വിറ്റുവരവുള്ള ഒരു വ്യവസായ ശൃംഖലയുടെ ഉടമയായ അദ്ദേഹം സ്വയം സന്നദ്ധനായി ട്രക്ക് ഡ്രൈവറായ ഒരു രോഗിക്ക് തന്റെ കിഡ്നി ദാനം ചെയ്യുകയായിരുന്നു. പത്തു ലക്ഷം രൂപ സംഭാവന കൊടുക്കുന്ന പോലെയല്ല ഒരു കിഡ്നി മുറിച്ചെടുത്തു കൊടുക്കുന്നത്. പണത്തിനു വേണ്ടി വൃക്ക വില്‍ക്കുന്നവരും ഉറ്റവരുടെ ജീവന്‍ രക്ഷിക്കാന്‍ വേണ്ടി സ്വയം ത്യാഗം ചെയ്യുന്നവരും നമുക്കിടയില്‍ കാണും. പക്ഷെ കിഡ്നി ദാനമെന്ന ഒരു മാനുഷിക സംരംഭത്തെ പിന്തുണക്കുന്നതിനു വേണ്ടി അത്തരമൊരു മഹാത്യാഗം ചെയ്ത ആദ്യത്തെ കോടീശ്വരന്‍ ഒരു പക്ഷെ കൊച്ചൌസേപ്പ് ആയിരിക്കും. ചുരുങ്ങിയത് ഇന്ത്യയിലെങ്കിലും. അതുകൊണ്ട് തന്നെ ഈ പന്ത്രണ്ടു പേരില്‍ എനിക്ക് ഏറ്റവും പ്രിയങ്കരന്‍ കൊച്ചൌസേപ്പ് തന്നെയാണ്. അദ്ദേഹം ജയിച്ചു കാണണമെന്ന് മനസ്സില്‍ അതിയായ ആഗ്രഹമുണ്ട്. കിഡ്നി പോയിട്ട് ഒരു കുപ്പി രക്തം പോലും ദാനം ചെയ്യാന്‍ തയ്യാറാകാത്ത നമ്മില്‍ പലര്‍ക്കും കൊച്ചൌസേപ്പ് നല്‍കിയത് ഒരു വലിയ സന്ദേശമാണ്. ഒരു രാഷ്ട്രീയക്കാരനും ഒരു സിനിമാക്കാരനും ഒരു സ്പോര്‍ട്സ് താരവും നല്‍കാത്ത സന്ദേശം.

കിഡ്നി ദാനം ചെയ്യുന്നവരുടെ ഒരു ചെയിന്‍ ഉണ്ടാക്കാനുള്ള ശ്രമത്തിന്റെ തുടക്കമായിരുന്നു അദ്ദേഹം ചെയ്തത്. കൊച്ചൌസേപ്പിന്റെ കിഡ്നി ലഭിച്ച വ്യക്തിയുടെ ഭാര്യ മറ്റൊരാള്‍ക്ക് തന്റെ കിഡ്നി ദാനം ചെയ്തു. അയാളുടെ അടുത്ത ബന്ധു മറ്റൊരാള്‍ക്ക് ദാനം ചെയ്തു. അങ്ങനെ ജീവനില്‍ നിന്നും ജീവന്‍ പകര്‍ന്ന ഒരു ചങ്ങലയായി അത് മാറി. മനുഷ്യ സ്നേഹത്തിന്റെ ഉദാത്തമായ ഒരു ചങ്ങല. വലിയ വായില്‍ ഗീര്‍വാണ പ്രസംഗം നടത്തുന്ന രാഷ്ട്രീയക്കാര്‍ക്കും ഗ്ലാമര്‍ ലോകത്ത് ജീവിക്കുന്ന സിനിമാ താരങ്ങള്‍ക്കും ഇടയില്‍ കൊച്ചൌസേപ്പ് തന്നെയാണ് ഈ വര്‍ഷത്തെ ഏറ്റവും മധുരമുള്ള വാര്‍ത്ത സൃഷ്ടിച്ചത്. അത് കൊണ്ട് തന്നെ ഞാന്‍ അദ്ദേഹത്തിനു ഒരു വോട്ടു ചെയ്തു. താത്പര്യമുണ്ടെങ്കില്‍ നിങ്ങള്‍ക്കും അതാവാം. ജനുവരി മൂന്നു വരെയാണ് വോട്ടു ചെയ്യാനുള്ള അവസരമുള്ളത്. കാശുള്ളവര്‍ക്ക് SMS ചെയ്തു വോട്ടു നല്‍കാം . ഈ ലിങ്കിലൂടെ പോയാല്‍ ഫ്രീയായിട്ടും വോട്ടു രേഖപ്പെടുത്താം. കൊച്ചൌസേപ്പ് മനോരമയുടെ ന്യൂസ്‌ മേക്കര്‍ ആയാലും ഇല്ലെങ്കിലും അദ്ദേഹത്തിനു കരുണാമയനായ ദൈവം ദീര്‍ഘായുസ്സ് നല്‍കട്ടെയെന്ന് പ്രാര്‍ത്ഥിക്കുന്നു.

Related Posts
വ്യത്യസ്തനാമൊരു കൊച്ചൌസേപ്പ്
പ്രീജ ശ്രീധരന് ഒരു വോട്ട്
മനോരമ ചതിച്ചില്ല. താരം പ്രീജ തന്നെ
സുരേഷ് ഗോപി സെറോക്സ്‌ കോപ്പിയല്ല
ഏജന്റുമാരുടെ സമരം, മനോരമ വിറക്കുന്നു.

ഫേസ്ബുക്ക്‌ പിടി മുറുക്കുന്നു, Timeline ക്ലിക്ക്ഡ്

2011-12-16T03:14:00.010+03:00

എണ്‍പത് കോടി ജനസംഖ്യയുള്ള ഫേസ്ബുക്ക് മഹാരാജ്യത്ത് മഹാ വിപ്ലവങ്ങള്‍ നടന്നു കൊണ്ടിരിക്കുകയാണ്. അതിലൊന്നാണ് ഇന്നലെ മുതല്‍ പ്രവര്‍ത്തിച്ചു തുടങ്ങിയ ടൈംലൈന്‍. മൂന്നാല് മാസമായി ഇങ്ങനെയൊരു പുലി വരുന്ന കാര്യം പറഞ്ഞു കേള്‍ക്കുന്നുണ്ടായിരുന്നു. ഡെവലപ്പര്‍ വേര്‍ഷന്‍ ചിലരൊക്കെ പരീക്ഷിച്ചു നോക്കുകയും ചെയ്തിരുന്നു. ഇന്നലെയാണ് സംഗതി ഔദ്യോഗികമായി പ്രവര്‍ത്തിച്ചു തുടങ്ങിയത്. കാള പെറുന്നതിനു മുമ്പ് തന്നെ കയര്‍ റെഡിയാക്കി ശീലമുള്ളത് കൊണ്ട് ഞാന്‍ ചാടിക്കയറി പ്രൊഫൈലില്‍ ടൈംലൈന്‍ പിടിച്ചിട്ടു. ഉള്ളത് പറയാമല്ലോ, സംഗതി അടിപൊളിയായിട്ടുണ്ട്. സുക്കര്‍ബര്‍ഗ് ആളൊരു ഗൊച്ചു ഗള്ളന്‍ തന്നെയാണ്. ഒരു കാര്യം ഉറപ്പ്, ഇവനൊരു കലക്കാ കലക്കും.

നമ്മുടെ പോസ്റ്റുകളും ഫോട്ടോകളും വീഡിയോകളുമൊക്കെ വര്‍ഷവും തിയ്യതിയും തരം തിരിച്ചു കൃത്യമായി അടുക്കി വെക്കുന്ന ഒരു സംവിധാനമാണ് ചുള്ളന്‍ ചെക്കന്‍ ഇപ്പോള്‍ കൊണ്ട് വന്നിരിക്കുന്നത്. ബ്ലോഗുകളെയും മറ്റും അപേക്ഷിച്ച് ഫേസ്ബുക്കിന്റെ ഒരു വലിയ പോരായ്മയായി പലരും കണ്ടിരുന്നത്‌ പോസ്റ്റുകളൊക്കെ പാതാളത്തിലേക്ക് താഴ്ന്നു പോകുന്നു എന്നതായിരുന്നു. മുല്ലപ്പെരിയാറില്‍ മഴു വീണത്‌ പോലെ ഒരിക്കല്‍ താഴ്ന്നു പോയാല്‍ പിന്നെ പൊക്കിക്കൊണ്ട് വരാന്‍ വലിയ പാടാണ്. ടൈംലൈന്‍ സംവിധാനം വന്നതോട് കൂടി ഇനിയെല്ലാം മണി മണിയായി പൊങ്ങി വരും. പ്രൊഫൈല്‍ ബാറിന്റെ വലതു വശത്ത്‌ കൊല്ലവും മാസവും തരം തിരിച്ചു ഓരോരുത്തരുടെയും പോസ്റ്റുകള്‍ അടുക്കി വെച്ചിട്ടുണ്ട്. (ചിത്രം കാണുക)

ഫേസ്ബുക്ക് ഉപയോഗിക്കുന്നവര്‍ക്ക് അവരുടെ ജീവിതത്തിന്റെ തിരക്കഥ തയ്യാറാക്കാന്‍ കഴിയും വിധമാണ് ടൈം ലൈന്‍ സംവിധാനം ചെയ്തിരിക്കുന്നത്. Recover the Past എന്നാണ് അവര്‍ ഇതിനെ വിളിക്കാന്‍ ഇഷ്ടപ്പെടുന്നത്. ജനിച്ചത്‌ മുതലുള്ള ഫോട്ടോകള്‍ , വീഡിയോകള്‍, അനുഭവക്കുറിപ്പുകള്‍ എന്നിവയെല്ലാം സമയക്രമത്തില്‍ ശേഖരിച്ചു വെക്കാം. അവയില്‍ ആവശ്യമുള്ളത് സുഹൃത്തുക്കള്‍ക്ക് ഷെയര്‍ ചെയ്യാം. സ്വകാര്യമായി വെക്കേണ്ടത് അങ്ങിനെയാവാം. ഒരു വലിയ ഡിജിറ്റല്‍ ഡയറിയായി ഫേസ്ബുക്ക്‌ മാറുന്നുവെന്ന് ചുരുക്കം. ഫേസ്ബുക്കിനു വെല്ലുവിളി ഉയര്‍ത്തും എന്ന് കൊട്ടിഘോഷിച്ചു കടന്നു വന്നിരുന്ന ഗൂഗിള്‍ പ്ലസ്സിനെ സുരേഷ് ഗോപി ഗുണ്ടകളെ അടിച്ചു പരത്തുന്നത് പോലെയാണ് സുക്കര്‍ബര്‍ഗ് ഇപ്പോള്‍ ഫ്ലാറ്റാക്കിയിരിക്കുന്നത്.

ടൈംലൈനിന്റെ വരവോടെ ഫേസ്ബുക്ക് അതിന്റെ സ്വാധീന വലയം ഒന്ന് കൂടെ വിശാലമാക്കുകയാണ്. സ്റ്റാറ്റസ് മെസ്സേജും ഫോട്ടോകളും വീഡിയോകളും ഷെയര്‍ ചെയ്തിരുന്ന ഒരു സൈബര്‍ സ്പേസ് എന്നതില്‍ നിന്ന് ഓരോരുത്തരുടെയും ഒരു ലൈഫ് സ്ക്രാപ്പ് ബുക്കായി ഇതിനെ മാറ്റാനുള്ള പരിപാടിയാണ് ഇപ്പോള്‍ നടന്നു കൊണ്ടിരിക്കുന്നത്. ഏതായാലും ഒറ്റ ദിവസം കൊണ്ട് തന്നെ ടൈംലൈന്‍ ക്ലിക്ക് ആയ മട്ടാണ്. 'കൊലവെറി ഡി' ഹിറ്റായ പോലെ ലക്ഷക്കണക്കിന്‌ പേര്‍ ആദ്യ ദിവസം തന്നെ ഇത് ആസ്വദിച്ചു തുടങ്ങിക്കഴിഞ്ഞു. പലരും ടൈംലൈനിന്റെ പണിപ്പുരയില്‍ ആണ്. പഴയ പോസ്റ്റുകളില്‍ ആവശ്യമില്ലാത്തത് ഒഴിവാക്കുക, പ്രധാനപ്പെട്ടവ ഫീച്ചര്‍ ചെയ്യുക, പ്രൈവസി സെറ്റിങ്ങുകള്‍ ശരിയാക്കുക തുടങ്ങി ടൈംലൈന്‍ പബ്ലിഷ് ചെയ്യുന്നതിന് മുമ്പ് ആവശ്യമായ മാറ്റങ്ങള്‍ വരുത്തുവാന്‍ ഫേസ്ബുക്ക് സമയം നല്‍കുന്നുണ്ട്. പ്രൊഫൈലില്‍ ടൈംലൈന്‍ സിസ്റ്റം സ്വീകരിച്ചു കഴിഞ്ഞാല്‍ അത് പബ്ലിഷ് ചെയ്യുന്നതിന് ഒരാഴ്ച വരെ സമയം ഉണ്ട്. എന്നെപ്പോലുള്ളവര്‍ക്ക് മുന്നും പിന്നും നോക്കാതെ ഒറ്റയടിക്ക് പബ്ലിഷ് ചെയ്യുകയും ആവാം.

ഏതായാലും ഇത് വലിയ പൊല്ലാപ്പാകും എന്ന കാര്യത്തില്‍ തര്‍ക്കമില്ല. നിലവിലെ അവസ്ഥയില്‍ തന്നെ ഫേസ്ബുക്കില്‍ നിന്ന് എഴുന്നേല്‍ക്കാന്‍ പലര്‍ക്കും സമയം കിട്ടുന്നില്ല. രണ്ടു മണിക്കൂര്‍ ഉറങ്ങി എട്ടു മണിക്കൂര്‍ ഫേസ്ബുക്കില്‍ ഇരിക്കുക എന്നതാണ് പൊതുവേയുള്ള ട്രെന്‍ഡ്. ഇനി ഈ ടൈംലൈന്‍ പണ്ടാരം ക്ലച്ചു പിടിച്ചാല്‍ പറയുകയും വേണ്ട!. എല്ലാ ഫേസ്ബുക്ക് ചങ്ങായിമാര്‍ക്കും എന്റെ ടൈംലൈന്‍ അഥവാ സ്ലീപ്‌ ലെസ്സ് ആശംസകള്‍ ..

Related Posts
സൂക്ഷിക്കുക, ഭാര്യ ഫേസ്ബുക്കിലുണ്ട് !!.
പേര് ഫേസ്ബുക്ക്, വയസ്സ് പതിനാറ് (Female)
ഒടുക്കത്തെ Google+
നൈജീരിയന്‍ ഈമെയിലും മലയാളിപൊട്ടനും

ഇടുക്കി വേണോ ഇടുക്കി?

2011-12-14T09:41:00.003+03:00

മൂന്നാറിലെ അണ്ണന്മാരെ ഞാന്‍ സമ്മതിച്ചിരിക്കുന്നു. കേരളത്തിന്റെ മണ്ണില്‍ നിന്ന് കൊണ്ട് 'ഇടുക്കി വിട്ടു താങ്കോ' എന്ന് മുദ്രാവാക്യം വിളിക്കാന്‍ വാട്ട്‌ എ ധൈര്യം യു നോ?. ഇടുക്കി തമിഴ്നാടിനോട് ചേര്‍ക്കണം എന്ന് മാത്രമല്ല, നാണം കെട്ട കേരള മക്കള്‍ ഇടുക്കി വിട്ടു പോകണം എന്നും അവര്‍ മുദ്രാവാക്കിക്കളഞ്ഞു. തമിഴ്നാട്ടില്‍ ചെന്ന് മലയാളികള്‍ ഇങ്ങനെയൊരു മുദ്രാവാക്യം വിളിച്ചിരുന്നുവെങ്കില്‍ എല്ലും തോലും പാണ്ടി ലോറിയില്‍ കേറ്റി ഇങ്ങോട്ടെത്തിക്കേണ്ടി വരുമായിരുന്നു. നമ്മള്‍ ഇവിടെ ചെയ്തത് ഇങ്ങനെയൊരു മുദ്രാവാക്യം വിളിക്കാന്‍ പോലീസ് അകമ്പടിയും ചാനലുകളുടെ ലൈവ് ക്യാമറയും ഏര്‍പാടു ചെയ്തു കൊടുക്കുകയാണ്. പ്രകടനം കഴിഞ്ഞു പോകുന്നവര്‍ക്ക് ലഡുവും പുഴുങ്ങിയ കോഴിമുട്ടയും വിതരണം ചെയ്തു എന്നും പറഞ്ഞു കേള്‍ക്കുന്നു. എന്തരോ മഹാനു ഭാവുലു ഗുലു!!

ഒരു കണക്കിന് മൂന്നാറില്‍ പ്രകടനം നടത്തിയത് അവരുടെ ധൈര്യം ആണെന്ന് പറഞ്ഞു കൂട. ബുദ്ധി അല്പം കുറവാണെങ്കിലും ആളുകളെ അളക്കുന്ന കാര്യത്തില്‍ അണ്ണന്‍മാര്‍ ഒട്ടും മോശക്കാരല്ല. നമുക്ക് കേരളത്തിന്റെ താത്പര്യങ്ങള്‍ അല്ല രാഷ്ട്രീയമാണ് വലുത് എന്ന് മനസ്സിലാക്കാന്‍ ഒരു കോവര്‍ കഴുതയുടെ ബുദ്ധി മതി. മലയാളികളെ അവര്‍ ശരിക്കും അളന്നു കഴിഞ്ഞു. 'ചെമ്മീന്‍ തുള്ളിയാല്‍ മുട്ടോളം പിന്നെയും തുള്ളിയാല്‍ ചട്ടീല്' എന്ന് പറഞ്ഞ പോലെ നമ്മുടെ പ്രതിഷേധങ്ങള്‍ ഏതറ്റം വരെ പോകുമെന്നു അവര്‍ കൂളായി മനസ്സിലാക്കിയിട്ടുണ്ട്. ഇടുക്കി മാത്രമല്ല, കാസര്‍ക്കോട് വിട്ടുതരണം എന്ന് പറഞ്ഞാലും കടലാസ് ശരിയാക്കിക്കൊടുക്കാന്‍ ഇവിടെ ഏതെങ്കിലുമൊക്കെ ദണ്ഡപാണനുണ്ടാകും എന്ന് അവര്‍ക്കറിയാം. മുല്ലപ്പെരിയാര്‍ വിഷയത്തില്‍ കേരളത്തിലെ പൊതുസമൂഹം ഉയര്‍ത്തിക്കൊണ്ടു വന്ന ജനകീയ പ്രക്ഷോഭത്തെ ഇടതും വലതുമുള്ള രാഷ്ട്രീയക്കാര്‍ സമര്‍ത്ഥമായി ഒറ്റു കൊടുത്തതും അവര്‍ കണ്ടു. ഹൈക്കമാണ്ടും പോളിറ്റ് ബ്യൂറോയും നോക്കുന്നത് വോട്ടിന്റെ എണ്ണമാണ്. നീതിയും ന്യായവുമല്ല. അതുകൊണ്ടാണ് ഡല്‍ഹിയില്‍ ഒരു വാക്കും തിരോന്തരത്തു മറ്റൊരു വാക്കും പറയുന്നത്. ഇത് ശരിക്ക് അറിയുന്നത് കൊണ്ടാണ് ഇടുക്കി ഞങ്ങള്‍ക്ക് വേണം എന്ന് തമിഴന്മാര്‍ ആവശ്യപ്പെടുന്നത്.

'അമ്മി വേണോ അമ്മി' എന്ന് ചോദിച്ചു കൊണ്ട് മുക്കുത്തിയിട്ട തമിഴത്തിപ്പെണ്ണുങ്ങള്‍ പണ്ട് നമ്മുടെ വീടുകള്‍ കയറിയിറങ്ങിയിരുന്നു. നാല് വോട്ടും തേനിയില്‍ രണ്ടു തോട്ടവും കിട്ടുമെങ്കില്‍ 'ഇടുക്കി വേണോ ഇടുക്കി' എന്ന് ചോദിച്ചുകൊണ്ട് അമ്മായിയുടെ കാല്‍ക്കല്‍ വീഴാന്‍ ത്രിവര്‍ണവും ചെങ്കൊടിയും പുതച്ച വേണ്ടത്ര രാഷ്ട്രീയ നപുംസകങ്ങള്‍ നമുക്കുണ്ട്. കേരളത്തിലും കേന്ദ്രത്തിലും. പിറന്ന മണ്ണിനെ ഇങ്ങനെ ഒറ്റുകൊടുക്കാന്‍ ഒരു തമിഴനെയും കിട്ടില്ല. സംസ്ഥാനത്തിന്റെ പ്രശ്നം വരുമ്പോള്‍ വാഴ വെട്ടാന്‍ നടക്കുന്ന രാഷ്ട്രീയക്കാരും അവിടെയില്ല. അവരും നമ്മളും തമ്മിലുള്ള പ്രധാന വ്യത്യാസം അതാണ്‌.

തര്‍ക്കശാസ്ത്ര രീതിയനുസരിച്ച് ഒരു ചര്‍ച്ചയില്‍ വിട്ടുവീഴ്ചകള്‍ക്ക് ആദ്യം തയ്യാറാവുന്നവന്‍ തന്റെ വാദഗതികളില്‍ അല്പം വിശ്വാസക്കുറവുള്ളവന്‍ ആയിരിക്കും. മുല്ലപ്പെരിയാര്‍ പ്രശ്നത്തില്‍ കേരളമാണ് ആ വഴി ആദ്യം തിരഞ്ഞെടുത്തത്. നിങ്ങള്‍ക്ക് മുഴുവന്‍ വെള്ളവും തരാം, കാശും കരാറും ഇല്ലെങ്കിലും പ്രശ്നമില്ല, എവിടെ വന്നും ഒപ്പിട്ടു തരാം, തുടങ്ങിയ കിഞ്ചന വര്‍ത്തമാനങ്ങള്‍ പറഞ്ഞ് നാം നമ്മുടെ തര്‍ക്കശാസ്ത്ര ദുര്‍ബലത തുടക്കത്തിലേ പ്രകടമാക്കി. എന്നാല്‍ അമ്മായി അതിലൊന്നും വീണില്ല എന്ന് മാത്രമല്ല ഒരു തര്‍ക്കം ജയിക്കാനുള്ള കാര്‍ക്കശ്യം തുടക്കത്തിലേ പ്രകടമാക്കുകയും ചെയ്തു. ചര്‍ച്ചയുടെ കാര്യം പറഞ്ഞ് ആരും ഇങ്ങോട്ട് വരേണ്ട എന്ന് പ്രധാനമന്ത്രിയോട് തന്നെ തുറന്നു പറഞ്ഞു. അവര്‍ പാറ പോലെ ഉറച്ചു നിന്നപ്പോള്‍ നമ്മള്‍ പിന്നെയും അയഞ്ഞു. ഡാം പൊട്ടിയാലും ഇടുക്കി താങ്ങിക്കൊള്ളും എന്ന് കോടതിയില്‍ എഴുതിക്കൊടുത്തു. തമിഴ്നാട്ടിലായിരുന്നു ഇങ്ങനെയൊരു സംഭവം നടന്നിരുന്നതെങ്കില്‍ അന്ന് രാത്രിയിലെ കഞ്ഞി കുടിക്കാന്‍ അതെഴുതിക്കൊടുത്തവന്‍ ജീവിച്ചിരിക്കുമായിരുന്നില്ല. ജനങ്ങള്‍ അവനെ പട്ടിയെപ്പോലെ എറിഞ്ഞു കൊല്ലുമായിരുന്നു.

കേരളത്തില്‍ നിന്നുള്ള രണ്ടേ രണ്ടു സംഗതികളാണ് തമിഴന്റെ ഏറ്റവും വലിയ വീക്നെസ്. ഒന്ന് മുല്ലപ്പെരിയാറിലെ വെള്ളം, മറ്റൊന്ന് മല്ലു നായികമാര്‍. കൊന്നാലും ഇത് രണ്ടിലും തൊട്ടു കളിക്കാന്‍ അവര്‍ സമ്മതിക്കില്ല. നയന്‍ താര, അസിന്‍ തോട്ടുങ്കല്‍ എന്നൊക്കെ കേള്‍ക്കുമ്പോള്‍ തന്നെ തമിഴന് ഞരമ്പ്‌ ചൂടാവും. അത്ര മാത്രം ലഹരിയാണ് അവര്‍ക്ക് മല്ലു പെണ്‍കുട്ടികളോട്. അതുപോലെ തന്നെയാണ് മുല്ലപ്പെരിയാറിലെ വെള്ളത്തിന്റെ കാര്യവും. നമ്മള്‍ സമരം അവസാനിപ്പിച്ചിടത്തു നിന്ന് അവര്‍ തുടങ്ങിയിട്ടേ ഉള്ളൂ. ഇനി ഇത് രണ്ടാലൊന്ന് ആയിട്ടേ അവര്‍ ഈ സമരം നിര്‍ത്തുകയുള്ളൂ.. പേടിപ്പിക്കാന്‍ വേണ്ടി പറയുകയല്ല, അവരുടെ ഒരു രീതി അതാണ്‌. നമ്മളുടെ രീതി വേറെയാണ്. തുടക്കത്തില്‍ പുലിയായി വന്നു ഒടുക്കത്തില്‍ എലിയായി സ്ഥലം വിടുക. കേരളത്തിലെ മുല്ലപ്പെരിയാര്‍ പ്രക്ഷോഭങ്ങള്‍ ഏതാണ്ട് എലിയിലേക്കുള്ള പ്രയാണം തുടങ്ങിക്കഴിഞ്ഞു. തമിഴന്‍ എലിയില്‍ നിന്ന് പുലിയായി രൂപാന്തരം പ്രാപിച്ചുതുടങ്ങുന്നതേയുള്ളൂ. കളിയൊക്കെ ഇനിയാണ് വരാനിരിക്കുന്നത്.

ഇടുക്കി വിട്ടുതരണം എന്ന് അവര്‍ ആവശ്യപ്പെടുന്നത് ശരിക്കും അത് വിട്ടുകിട്ടുന്നതിന് വേണ്ടിയല്ല. ഒരു തര്‍ക്കം ജയിക്കാനുള്ള ആപ്പുകള്‍ വെക്കുകയാണ്. കന്യാകുമാരിയില്‍ മലയാളം സംസാരിക്കുന്നവരാണ്‌ കൂടുതലുള്ളത്, തിരുവിതാംകൂറിന്റെ ഭാഗമായിരുന്ന ആ ജില്ല കേരളത്തിനു വേണം എന്ന് ആവശ്യപ്പെടാന്‍ ഒരു 'വൈക്കോ'ല്‍ പോലും നമുക്കില്ല. തേനിയും കന്യാകുമാരിയും കേരളത്തോട് ചേര്‍ക്കണം എന്ന് ഏതെങ്കിലും ഒരു വൈക്കോല്‍ പാര്‍ട്ടി ആവശ്യപ്പെട്ടാല്‍ പോലും അതിനു അതിന്റേതായ ഒരു താര്‍ക്കിക ശക്തി ലഭിക്കും. Aim at sky and you will hit the mountaintop എന്നോ മറ്റോ സായിപ്പിന്റെ ഒരു ചൊല്ലുണ്ട്. ആകാശം ലക്‌ഷ്യം വെക്കുക, എങ്കില്‍ കുന്നില്‍ മുകളിലെങ്കിലും എത്താന്‍ പറ്റും. എപ്പോഴും അല്പം നീട്ടിയെറിയണം എന്ന് ചുരുക്കം. ഒരു തര്‍ക്കം ജയിക്കുന്നതിന്റെ പ്രധാന ഗുട്ടന്‍സ് ആ ചൊല്ലില്‍ ഉണ്ട്. തമിഴന്മാര്‍ ഇപ്പോള്‍ അതാണ്‌ ചെയ്തു കൊണ്ടിരിക്കുനത്.

ഒരു പുതിയ ഡാം കെട്ടുന്നതിനു വേണ്ട എന്തെങ്കിലും മുന്നൊരുക്കങ്ങള്‍ കേരളം ഇതിനകം നടത്തിയിട്ടുണ്ടോ എന്നത് സംശയമാണ്. ഇതിനു മുമ്പെഴുതിയ ഒരു പോസ്റ്റില്‍ ഞാന്‍ സൂചിപ്പിച്ച പോലെ അതിന്റെ നടപടി ക്രമങ്ങളുമായി നാം മുന്നോട്ട് പോയിരുന്നുവെങ്കില്‍ കാറ്റ് മാറിവീശുമായിരുന്നു. ചര്‍ച്ച നടത്താന്‍ അമ്മായി തിരുവനന്തപുരത്തു വരുമായിരുന്നു. ചാനലിലും അങ്ങാടിയിലും ഇരുന്ന് ഒച്ച വെക്കുകയല്ലാതെ ചെയ്യേണ്ട കാര്യങ്ങള്‍ അതതിന്റെ സ്ഥലത്തും സമയത്തും ചെയ്തിരുന്നുവെങ്കില്‍ സംസ്ഥാനത്തിലെ ജനങ്ങള്‍ ഒന്നാകെ ഇതുപോലെ നാണം കെടുന്ന ഒരവസ്ഥ ഉണ്ടാകുമായിരുന്നില്ല. ഈ പോക്ക് പോയാല്‍ നമ്മള്‍ എവിടെയും എത്തില്ല. വെള്ളം 136 അടിയില്‍ നില്‍ക്കട്ടെ എന്നാണ്‌ സുപ്രിം കോടതി വിധിച്ചിരിക്കുന്നത്. ഏതെങ്കിലും ഒരു ദണ്ഡപാണി അവിടെയും വല്ലതും എഴുതിക്കൊടുത്തു കാണും. ഈ സമരം വിജയിക്കുമെന്ന് കരുതി സത്യാഗ്രഹം ഇരിക്കുന്നത് വെറുതെയാണ്. (MLA മാര്‍ക്ക് തടി കുറക്കാന്‍ വേണമെങ്കില്‍ അല്പം സത്യാഗ്രഹം ആവാം). കഴിയുന്നത്ര ആളുകളെ പെരിയാറിന്റെ തീരത്ത്‌ നിന്ന് മാറ്റിപ്പാര്‍പ്പിച്ചാല്‍ അത്രയും ജീവന്‍ രക്ഷിക്കാന്‍ പറ്റും. അതല്ല ഇടുക്കി ജില്ല വിട്ടുകൊടുത്തു കൊണ്ടുള്ള വല്ല ഫോര്‍മുലയും സര്‍ദാര്‍ജിയുടെ കയ്യിലുണ്ടെങ്കില്‍ അതും ആലോചിക്കാവുന്നതാണ്. ഏതുനിമിഷവും പൊട്ടാവുന്ന ഒരു ഡാമിനെ പേടിച്ചു തീ തിന്നു കഴിയുന്ന ആ പാവങ്ങളെ പറ്റിക്കുന്നതിലും ഭേദം അതാണ്‌.

Related Posts
പുതിയ ഡാം കെട്ടൂ.. കമ്പിപ്പാര റെഡിയാക്കൂ
സുരേഷ് ഗോപി സെറോക്സ്‌ കോപ്പിയല്ല
അണ്ണാച്ചീ, ഞങ്ങ വിട മാട്ടേ..

ദി കിംഗ്‌ വരുന്നു !!!

2011-12-11T11:53:00.003+03:00

മഞ്ഞളാംകുഴി അലിയുടെ ദി കിംഗ്‌ സിനിമയില്‍ മമ്മൂട്ടി സ്ലോ മോഷനില്‍ വരുന്ന ഒരു രംഗമുണ്ട്. നിരന്നു നില്‍ക്കുന്ന പോലീസ് ഓഫീസര്‍മാരോട് മുണ്ട് മടക്കിക്കുത്തി നാല് ആര്‍ ഡി എക്സ് ഡയലോഗ് കാച്ചിയ ശേഷം ഇടതു വശത്തെ മുടി പിറകിലേക്ക് തട്ടിക്കൊണ്ടുള്ള ആ കിടിലന്‍ വരവില്‍ മോഹന്‍ലാല്‍ ഫാന്‍സ്‌ വരെ വിസില്‍ അടിച്ചു പോയിട്ടുണ്ട്. മന്ത്രിസ്ഥാനം ഉറപ്പാക്കിയ മഞ്ഞളാംകുഴി അലി അങ്ങിനെ ഒരു വരവാണ് ഇപ്പോള്‍ വരുന്നത്. അലിയെ കീടം എന്ന് വിളിച്ച സഖാവ് പിണറായി പോലും വിസിലടിച്ചു പോകുന്ന ഒരു വരവ്. ഫലസ്തീന്‍ പ്രശ്നം പരിഹരിച്ചു കഴിഞ്ഞാലും ലീഗിന്റെ അഞ്ചാം മന്ത്രി സ്ഥാനം പരിഹരിക്കപ്പെടില്ല എന്ന് കരുതി പാണക്കാട്ടെ തരിക്കഞ്ഞിയും കുടിച്ചു എല്ലാവരും പിരിഞ്ഞു പോയതായിരുന്നു.

പക്ഷെ അലി മാത്രം പ്രതീക്ഷ കൈവിടാതെ കാത്തിരുന്നു. ബഹളങ്ങള്‍ ഉണ്ടാക്കാതെ, ആരോടും പരാതി പറയാതെ എല്ലാം നിശ്ചയിച്ചുറപ്പിച്ചുള്ള ഒരു കാത്തിരുപ്പ്. കെ പി എ മജീദ്‌ പറഞ്ഞത് ശരിയാണെങ്കില്‍ അലി ഉടന്‍ സത്യപ്രതിജ്ഞ ചെയ്തു സ്ലോ മോഷനില്‍ വരും. സി പി എമ്മുകാരുടെ ആട്ടും തുപ്പും സഹിച്ചു മടുത്തു എന്ന് പറഞ്ഞാണ് അലി ഇടതുപക്ഷ എം എല്‍ എ സ്ഥാനം രാജി വെച്ചത്. ഉടനെ തന്നെ പിണറായി സഖാവ് 'കീടം' തെളിച്ചു. അതിന്റെ ഡോസ് കുറഞ്ഞു പോയോ എന്ന സംശയം ഉള്ളതിനാല്‍ കുഞ്ഞാലിക്കുട്ടിയുടെ എച്ചില്‍ തിന്നുന്നവനാണ് അലിയെന്ന് പറഞ്ഞു വിജയരാഘവന്‍ തന്റെ സ്വന്തം വകയില്‍ എന്‍ഡോസള്‍ഫാനും അടിച്ചു. അലി പിന്നെ മുന്നും പിന്നും നോക്കിയില്ല. നേരെ പാണക്കാട്ടേക്ക് ബസ് കയറി. ബാക്കി ഭാഗങ്ങള്‍ ഒക്കെ ഫസ്റ്റ് ഹാഫില്‍ നമ്മള്‍ കണ്ടതാണ്. ഇനി ഇടവേളയ്ക്കു ശേഷം കര്‍ട്ടന്‍ ഉയരുമ്പോള്‍ സ്റ്റേറ്റ് കാറില്‍ കൊടി പറത്തി അലിയുടെ വരവാണ് കാണിക്കേണ്ടത്. കാറില്‍ നിന്നും വലതു കാല്‍ വെച്ചു അലി ഇറങ്ങുമ്പോള്‍ സ്ലോ മോഷന്റെ ഫൂട്ടേജ് തുടങ്ങും.

അലി മന്ത്രിയാവുന്നതോടെ ശരിക്കും ശ്വാസം അയക്കുന്നത് കുഞ്ഞാലിക്കുട്ടി ആയിരിക്കും. പാണക്കാട് തങ്ങളെക്കൊണ്ട് അഞ്ചാം മന്ത്രിയുടെ പ്രസ്താവന എഴുതി വായിപ്പിച്ചത് മൂപ്പര്‍ ആയിരുന്നല്ലോ. പാര്‍ട്ടിയിലും മുന്നണിയിലും അതിനു ഏറെ പഴി കേള്‍ക്കുകയും ചെയ്തു. അലി വരുന്നതോടെ ഇന്ത്യാവിഷന്‍ മന്ത്രി ഒന്ന് കൂടെ ഒതുങ്ങാനുള്ള സാധ്യതും തള്ളിക്കളയാനാവില്ല.

പണ്ടൊക്കെ സി പി എം പാളയത്തില്‍ നിന്ന് ആരെങ്കിലും പോയാല്‍ പിന്നെ അവന്റെ കാര്യം പോക്കായിരുന്നു. ഒരു പട്ടി പോലും തിരിഞ്ഞു നോക്കാന്‍ ഉണ്ടാവില്ല. കുലം കുത്തിയായി കാലം കഴിച്ചു പണ്ടാരമടങ്ങുക. അതായിരുന്നു അവസ്ഥ. പക്ഷെ ഇപ്പോള്‍ സ്ഥിതി മാറി. സി പി എം പാളയം വിട്ടവര്‍ക്കൊക്കെ വെച്ചടി വെച്ചടി കേറ്റമാണ്. ഒടുവിലത്തെ (അവസാനത്തേതല്ല) ഉദാഹരണമാണ് മഞ്ഞളാംകുഴി. ഇടതു പാളയത്തില്‍ നിന്നും 'ലൂസ് മോഷന്‍' ആയി പുറത്തു പോയ മഞ്ഞളാം കുഴി വലതു പക്ഷത്തു 'സ്ലോ മോഷനില്‍ ' പൊങ്ങുന്നത് വരേയ്ക്കും എല്ലാവര്‍ക്കും ലാല്‍ സലാം.

മ്യാവൂ : - മഞ്ഞളാംകുഴി അലിയുടെ പേര് മന്ത്രിസ്ഥാനത്തേക്ക് നിര്‍ദേശിച്ചത് ഞാനാണ് - പി സി ജോര്‍ജ്!. ഹോ.. ഇയ്യാള് സന്തോഷ്‌ പണ്ഡിറ്റിനെയും കടത്തി വെട്ടും കെട്ടോ.

Related Posts
തോറ്റവരുടെ മാഞ്ഞാളംകുഴികള്‍
തുറുപ്പുഗുലാന്‍ കുഞ്ഞാലിക്കുട്ടി

മംഗളം കാണിച്ച അന്തസ്സ് !

2011-12-08T09:43:00.001+03:00

പത്രവിതരണ ഏജന്റുമാര്‍ നടത്തുന്ന സമരത്തെക്കുറിച്ച് ഞാന്‍ ഇതിനു മുമ്പ് എഴുതിയത് ഓര്‍ക്കുന്നുണ്ടാകുമെന്നു കരുതുന്നു. അതിന്റെ ഒരു ഫോളോ-അപ്പ്‌ സ്റ്റോറിയാണ് ഇത്. ഏജന്റുമാരുടെ കമ്മീഷന്‍ തുകയില്‍ ഒരു നയാപൈസ കൂട്ടിക്കൊടുക്കില്ല എന്ന പിടിവാശിയില്‍ തന്നെയാണ് മനോരമയും മാതൃഭുമിയും അടക്കമുള്ള പത്രമുത്തശ്ശിമാര്‍ . എന്നാല്‍ മംഗളം പത്രം അന്തസ്സ് കാണിച്ചിരിക്കുന്നു. ആ വാര്‍ത്ത നിങ്ങളുമായി പങ്കു വെക്കാന്‍ മാത്രമാണ് ഈ പോസ്റ്റ്‌. പത്ര മുതലാളിമാരുടെയും പത്രപ്രവര്‍ത്തകരുടെയും പേരോ പെരുമയോ ഇല്ലാത്ത, മഞ്ഞും മഴയും വകവെക്കാതെ അതിരാവിലെ വീട്ടുപടിക്കല്‍ പത്രം എത്തിക്കുന്ന ആ പാവങ്ങളെ അല്പമൊന്നു കരുണയോടെ നോക്കാന്‍ മലയാളത്തിലെ ഒരു പത്രം തയ്യാറായിരിക്കുന്നു എന്നത് ആഹ്ലാദകരമായ ഒരു വാര്‍ത്തയാണ്.

മംഗളം ചീഫ് എഡിറ്റര്‍ സാബു വര്‍ഗീസ്‌ പേര് വെച്ചെഴുതിയ എഡിറ്റോറിയലില്‍ ആണ് ഇക്കാര്യം അറിയിച്ചിരിക്കുന്നത്. ഞായറാഴ്ചപ്പതിപ്പിന്റെ വിലയില്‍ ഒന്നേ കാല്‍ രൂപ വര്‍ധന വരുത്തി ആ തുക മുഴുവന്‍ ഏജന്റുമാര്‍ക്ക് നല്‍കാനാണ് പത്രത്തിന്റെ തീരുമാനം. ഒരു മാസം അഞ്ചു രൂപ അധിക വരുമാനം ഒരു പത്രത്തില്‍ നിന്നും ഏജന്റിനു ലഭിക്കും. വര്‍ദ്ധിപ്പിച്ച തുകയില്‍ ഒരു നയാപൈസയും എടുക്കാതെ അത് മുഴുവന്‍ ഏജന്റുമാര്‍ക്ക് നല്‍കാനുള്ള തീരുമാനം എന്തുകൊണ്ടും സ്വാഗതാര്‍ഹമാണ്. സര്‍ക്കുലേഷനും പരസ്യങ്ങളും വഴി കോടികള്‍ ഉണ്ടാക്കുന്ന മനോരമയേയും മാതൃഭൂമിയേയും അപേക്ഷിച്ച് വരുമാനം തീരെ കുറഞ്ഞ പത്രമാണ്‌ മംഗളം. എന്നാലും അവര്‍ ഉള്ളതില്‍ നിന്ന് ഒരോഹരി, പത്രങ്ങളെ നിലനിര്‍ത്തുന്നതില്‍ പ്രധാന പങ്കു വഹിക്കുകയും എന്നാല്‍ ജീവിതത്തിന്റെ രണ്ടറ്റം മുട്ടിക്കാന്‍ പാടുപെടുകയും ചെയ്യുന്ന ഈ പാവങ്ങള്‍ക്ക് നല്‍കുവാന്‍ സന്നദ്ധമായിരിക്കുന്നു.

പിടിച്ചു നില്‍ക്കാന്‍ പാട് പെടുന്ന ചെറുകിട പത്രങ്ങള്‍ കമ്മീഷന്‍ തുക വര്‍ധിപ്പിച്ചു കൊടുക്കാത്തത് മനസ്സിലാക്കാം. എന്നാല്‍ പന പോലെ വളര്‍ന്നു നില്‍ക്കുന്ന വലിയ പത്രങ്ങള്‍ ഏജന്റുമാരുടെ പിച്ചച്ചട്ടിയില്‍ കയ്യിട്ടു വാരുന്നത് എന്തിനാണാവോ? സ്പെഷ്യല്‍ പതിപ്പുകളും ഇരട്ട പത്രങ്ങളും ഇറക്കുന്ന ദിവസമെങ്കിലും അത് ചുമന്നു കൊണ്ട് പോകുന്ന കുട്ടികള്‍ക്ക് ഒരു പത്തു പൈസ കൂട്ടി നല്‍കുവാന്‍ സന്മനസ്സു കാണിച്ചിരുന്നുവെങ്കില്‍ എത്ര നന്നായിരുന്നേനെ?. രാഷ്ട്രത്തെയും രാഷ്ട്രീയക്കാരെയും നന്നാക്കുവാന്‍ ദിവസവും ഗീര്‍വാണം മുഴക്കുന്നവര്‍ സ്വന്തം പത്രം വിതരണം ചെയ്യുന്ന കുഞ്ഞുങ്ങളെ കണ്ടില്ലെന്നു നടിക്കുന്നത് എത്രമാത്രം പരിതാപകരമാണ്. കിട്ടുന്നതെല്ലാം ആര്‍ത്തിപ്പണ്ടാരങ്ങളായി വെട്ടിവിഴുങ്ങുന്നതിനിടയില്‍ ആഘോഷ ദിവസങ്ങളില്‍ പോലും ലീവ് എടുക്കാന്‍ കഴിയാതെ പത്രം വീടുകളില്‍ എത്തിക്കുന്ന ഈ മനുഷ്യ ജന്മങ്ങളോട് ഒരല്പം കരുണ കാണിച്ചിരുന്നുവെങ്കില്‍ !!.

കമ്മീഷന്‍ തുക ഓരോ പത്രത്തിനും തോന്നുന്ന പോലെ കൂട്ടിക്കൊടുക്കാന്‍ പറ്റില്ല, അതിനു ഞങ്ങള്‍ക്ക് അസോസിയേഷനും സൊസൈറ്റിയും ഉണ്ട്, അവര്‍ അനുവദിക്കണം എന്നൊക്കെയാണ് മുട്ടുന്യായങ്ങള്‍ പറഞ്ഞിരുന്നത്. കീശയില്‍ നിന്ന് കാശിറക്കുന്ന കാര്യത്തില്‍ ഒരുപാട് ന്യായങ്ങള്‍ കാണും. ആ ന്യായങ്ങളെയെല്ലാം വെറും ന്യായങ്ങള്‍ മാത്രമാണെന്നും മംഗളം തെളിയിച്ചിരിക്കുന്നു. ഏജന്റുമാരുടെ സമരം വൃഥാവിലായില്ല എന്നുള്ളതും ഒരു പത്രമെങ്കിലും അവരുടെ രോദനം കേള്‍ക്കാന്‍ സന്മനസ്സു കാണിച്ചിരിക്കുന്നു എന്നുള്ളതും ഒരു 'നല്ല വാര്‍ത്ത' തന്നെയാണ്. മംഗളം കാണിച്ച ഈ അന്തസ്സിന്റെ വാര്‍ത്ത ഒരു പത്രവും പെട്ടിക്കോളത്തില്‍ പോലും കൊടുത്തുകാണില്ല എന്നുറപ്പ്. എങ്കിലും അതൊരു വാര്‍ത്തയല്ലാതാവുന്നില്ല. മംഗളം പത്രത്തിനു എന്റെ വക ഒരു ബിഗ്‌ സല്യൂട്ട്.

Related Posts
ഏജന്റുമാരുടെ സമരം, മനോരമ വിറക്കുന്നു.
മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)
മനോരമയുടെ കാര്യം എന്തായി? പൂട്ടിയോ?

മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)

2011-12-04T12:27:00.011+03:00

മനോരമ പല പുലിവാലും പിടിച്ചിട്ടുണ്ട്. പക്ഷെ ഇതുപോലൊരു പുലിവാല്‍ ഈ അടുത്ത കാലത്തൊന്നും പിടിച്ചിട്ടില്ല. പുതിയൊരു ചാനല്‍ തുടങ്ങി. മഴവില്‍ മനോരമ. പക്ഷെ തുടക്കത്തില്‍ തന്നെ കല്ലുകടി. അതും ചെറുമാതിരി കല്ലൊന്നുമല്ല. വിഴുങ്ങാന്‍ പറ്റാത്ത കരിങ്കല്ല്. സകല പൈങ്കിളി മസാലകളും ചേര്‍ത്തുള്ള ഒരു ഇന്‍സ്റ്റന്റ് റിയാലിറ്റി തട്ടുകടയാണ് മഴവില്‍ മനോരമ. അതിലെ ഏറ്റവും കൂടുതല്‍ റേറ്റിങ്ങ് ഉള്ള പരിപാടി നമ്മുടെ രതിചേച്ചി അവതരിപ്പിക്കുന്ന വെറുതെ അല്ല ഭാര്യ ആണ്. അതാണ്‌ ഇപ്പോള്‍ ആകെ കുളമായിരിക്കുന്നത്. അപാര തൊലിക്കട്ടിയുള്ള കുറച്ചു ദമ്പതികളെ കുളിപ്പിച്ചൊരുക്കിക്കൊണ്ട് വന്ന് ഓരോരുത്തരെയായിട്ടു നിറുത്തിപ്പൊരിക്കുകയെന്നതാണ് ഈ ഷോയുടെ ഫോര്‍മാറ്റ്‌.

ഭര്‍ത്താക്കന്മാരെക്കൊണ്ട് വീട്ടുജോലികള്‍ എടുപ്പിക്കുക. അതായത് അലക്കുക, അരക്കുക, കുട്ടികളെ തൂറിപ്പിക്കുക തുടങ്ങിയ വീരകൃത്യങ്ങള്‍ .. എല്ലാം ലൈവ് ആയിട്ടാണ്. തൃശൂര്‍ പൂരത്തിന് ആനകളെ നിര്‍ത്തിയ പോലെ വരിവരിയായി ഇരിക്കുന്ന സ്ത്രീ രത്നങ്ങള്‍ ഇതൊക്കെ കണ്ടു മാര്‍ക്കിടുന്നു. മനോരമയല്ലേ, വീട്ടമ്മമാരായ പ്രേക്ഷകരെ കിട്ടാന്‍ ഇതല്ല ഇതിലപ്പുറവും ചെയ്യും. ഇതൊക്കെ സഹിക്കാം. പക്ഷെ അതോടൊപ്പം മറ്റൊന്നുണ്ട്. ഭാര്യയുടെ കുറ്റങ്ങളും കുറവുകളും പരസ്യമായി ഭര്‍ത്താക്കന്മാര്‍ വേദിയില്‍ അവതരിപ്പിക്കുക. ഒരുവക തറവാട്ടില്‍ പിറന്നവരൊന്നും ചെയ്യാത്ത പണിയാണിത്. (ഏഷ്യാനെറ്റിനെയും രഞ്ജിനിയെയുമൊക്കെ നമ്മള്‍ വെറുതെ കുറ്റം പറഞ്ഞു . മനോരമ ചെയ്യുന്നത് വെച്ചു നോക്കിയാല്‍ രഞ്ജിനിയുടെ റിയാലിറ്റിക്ക് നൂറില്‍ നൂറ്റിപ്പത്ത് കൊടുക്കണം) . മനോരമയിലെ ഞാന്‍ കണ്ട എപ്പിസോഡില്‍ ബെഡ് റൂമിലെ പ്ലസും മൈനസും പങ്കു വെച്ചു കണ്ടില്ല. ബാക്കിയുള്ള എപ്പിസോഡുകളില്‍ ഉണ്ടായിരുന്നോ ആവോ?. ഏതായിരുന്നാലും സ്ത്രീ പ്രേക്ഷകരെ മൊത്തം വലവീശി മുന്നേറുന്നതിനിടയില്‍ ദാ വരുന്നു ഒരു ആറ്റം ബോംബ്‌!!!

ഇരുപത്തഞ്ചോളം കേസുകളില്‍ പ്രതിയായിട്ടുള്ള ഒരു വിദ്വാന്‍ ആണ് മാതൃക ഭര്‍ത്താവിന്റെ പട്ടം ലഭിക്കുന്നതിനു വേണ്ടി മത്സരിക്കുന്നത്!!. എലിമിനേഷനുകളില്‍ ഔട്ടാകാതെ പുള്ളിയും ഭാര്യയും കസര്‍ത്തുന്നതിനിടയിലാണ് പണ്ടാരമടങ്ങാന്‍ മാധ്യമം പത്രം മാതൃകാ ഭര്‍ത്താവിന്റെ ഫ്ലാഷ് ബാക്ക് പുറത്തു വിട്ടത്!!!. പോരേ പൂരം. പത്ര വാര്‍ത്തകള്‍ ശരിയാണെങ്കില്‍ തൃശൂര്‍ , എറണാകുളം, പാലക്കാട്, ആലപ്പുഴ ജില്ലകളില്‍ ക്ഷേത്രം, ബാങ്ക് കവര്‍ച്ചകള്‍ , ബൈക്ക് മോഷണം തുടങ്ങി പല കേസുകളിലും പ്രതിയായ കക്ഷിയാണ് ശ്വേത ചേച്ചിയുടെ കൈപിടിച്ച് കുലുക്കി താരമായി മുന്നേറുന്നത്. പെര്‍ഫോര്‍മന്‍സ് കണ്ടിട്ട് മിക്കവാറും അറുപതു ലക്ഷത്തിന്റെ ഫ്ലാറ്റ് പുള്ളി കൊണ്ട് പോകാനുള്ള സാധ്യതയുണ്ട്. ഞാനായിട്ട് ഒന്നും പറയുന്നില്ല. വിവരങ്ങള്‍ എല്ലാം ഈ റിപ്പോര്‍ട്ടില്‍ ഉണ്ട്.

കാശ് കൂടുതല്‍ ചോദിക്കുന്ന സീരിയല്‍ താരങ്ങളെ അടുത്ത എപ്പിസോഡില്‍ ഹാര്‍ട്ട്‌ അറ്റാക്ക് വന്ന് മരിക്കുന്നതായി കാണിച്ചു പറഞ്ഞു വിടുകയാണ് പൊതുവേയുള്ള രീതി. ഈ മാതൃക ദമ്പതികളെ മനോരമ എന്ത് ചെയ്യുമെന്ന് കാത്തിരുന്നു കാണാം.

Related Posts
മനോരമ ന്യൂസ്‌മേക്കര്‍ :ഗോവിന്ദച്ചാമി ലിസ്റ്റിലില്ല
ദാസേട്ടാ, രഞ്ജിനി വിളിക്കുന്നു
ഏജന്റുമാരുടെ സമരം, മനോരമ വിറക്കുന്നു.
മംഗളം കാണിച്ച അന്തസ്സ് !

പുതിയ ഡാം കെട്ടൂ.. കമ്പിപ്പാര റെഡിയാക്കൂ

2011-11-30T12:15:00.006+03:00

'മുല്ലപ്പെരിയാര്‍ ഡാം ഡീകമ്മീഷന്‍ ചെയ്യുന്ന കാര്യത്തില്‍ വല്ലാതെ തലപുകക്കേണ്ട. പുതിയതൊന്നു കെട്ടിത്തന്നാല്‍ പഴയത് പൊളിക്കുന്ന കാര്യം ഞങ്ങ നോക്കിക്കോളാം. അതിനു ആ &*^#(**** മാരുടെ സമ്മതമൊന്നും വേണ്ട'' ഇടുക്കിയില്‍ നിന്നുള്ള ഒരു സുഹൃത്ത് എന്നോട് പറഞ്ഞ ഈ വാക്കുകള്‍ തന്നെയാണ് എനിക്കും പറയാനുള്ളത്. നിലവിലുള്ള ഡാം പൊളിക്കാന്‍ കൊന്നാലും അമ്മായി സമ്മതിക്കില്ല. ചര്‍ച്ചയും കോടതിയും കേസുകെട്ടുകളുമായി അത് മുന്നോട്ടു പോകും. നമുക്ക് ചെയ്യാനുള്ളത് പെട്ടെന്ന് പുതിയ ഒരു ഡാം കെട്ടുകയാണ്. നമ്മുടെ പുഴ, നമ്മുടെ മണ്ണ്. നമ്മുടെ ഡാം. അതിനു ഒരു മറ്റവളുടെയും ലവ് ലറ്റര്‍ കിട്ടാന്‍ കാത്തു നില്‍ക്കേണ്ടതില്ല. കേന്ദ്രനില്‍ നിന്ന് ഒരു അനുമതി വാങ്ങുക. ടപ്പേന്ന് പണി തുടങ്ങുക

പുതിയ ഡാമിന്റെ പണി തുടങ്ങിയാല്‍ അമ്മായി ഒന്നയയും. അയയാതെ പറ്റില്ല. പിന്നെ കളി നമ്മുടെ കയ്യിലാവും. വിളിക്കാതെ തന്നെ അമ്മായി ചര്‍ച്ചക്ക് വരും. സായിപ്പ് ഉണ്ടാക്കിയ 999 വര്‍ഷത്തെ കരാര്‍ ടോയ്ലെറ്റ് പേപ്പറാക്കി ചന്തി തുടക്കാന്‍ ഉപയോഗിച്ചിട്ട്‌ പുതിയ കരാറും വ്യവസ്ഥകളും നമ്മള്‍ നിശ്ചയിക്കും. ഗ്ലോബല്‍ ടെണ്ടര്‍ വിളിച്ചു ഒരു വര്‍ഷത്തിനുള്ളില്‍ പണി തീര്‍ക്കാനുള്ള ഉത്തരവാദിത്വം ഞാന്‍ ഏറ്റെടുക്കുന്നു എന്നാണ് മന്ത്രി ജോസഫ്‌ പറഞ്ഞിരിക്കുന്നത്. ഒന്നുമില്ലേലും ഒരു ടെണ്ടര്‍ വിളിച്ചാല്‍ തന്നെ സ്ഥിതിഗതികള്‍ മാറിമറിയും. ഇപ്പോഴുള്ള ഡാം പൊട്ടിയാലുള്ള ഭവിഷ്യത്ത് ഓര്‍ത്തിട്ടാണ് ജനങ്ങള്‍ അതിനു മേല്‍ കൈ വെക്കാത്തത്. പക്ഷെ ഒരു പുതിയ ഡാം വന്നു കഴിഞ്ഞാല്‍ പിന്നെ ആ പേടിയുണ്ടാവില്ല. ഇടുക്കി ജില്ലയിലെ എല്ലാ വീടുകളിലും നല്ല കമ്പിപ്പാര കാണും. അധ്വാനിച്ചു ജീവിക്കുന്ന ആളുകളാണ് അവിടെയുള്ളത്. ഒറ്റ രാത്രിയുടെ പണിയേ വേണ്ടൂ. അമ്മായി രാവിലെ കക്കൂസില്‍ പോകുന്നതിനു മുമ്പ് തന്നെ ഡാമിന്റെ പണി കഴിഞ്ഞിരിക്കും. അല്പം തന്ത്രപരമായി നീങ്ങിയില്ലെങ്കില്‍ ഇന്നത്തെ കാലത്ത് ജീവിക്കാന്‍ പാടാണ്. ആ ഒരു തന്ത്രം നമ്മള്‍ ഇപ്പോള്‍ എടുത്തില്ലെങ്കില്‍ അണ്ണന്മാര്‍ നമ്മളെ ക്ഷ.. ണ്ണ.. ങ്ങ.. മ്മ വരപ്പിക്കും. ഡല്‍ഹിയില്‍ പോയി വരുന്നതിന്റെ വണ്ടിക്കൂലി പോയിക്കിട്ടും എന്നല്ലാതെ ഈ ചര്‍ച്ചകള്‍ കൊണ്ടൊന്നും വലിയ ഗുണം ഉണ്ടാകുമെന്ന് തോന്നുന്നില്ല. പത്തമ്പത് കൊല്ലമായില്ലേ ഈ ചര്‍ച്ചയും കൊണ്ട് നടക്കുന്നു!!!.

ചര്‍ച്ചകള്‍ എല്ലാം നിര്‍ത്തിവെക്കണം എന്നല്ല പറയുന്നത്. അത് ഒരു ഭാഗത്ത് നടക്കട്ടെ. പ്രക്ഷോഭങ്ങളുടെ ഫലമായി ഇപ്പോള്‍ കേരളത്തിനു ലഭിച്ചിട്ടുള്ള ഒരു മേല്‍ക്കോയ്മയുടെ ഗുണം ഉപയോഗപ്പെടുത്തി വാട്ടര്‍ ലെവല്‍ താഴ്ത്തിക്കൊണ്ട് വരാനുള്ള ശ്രമം തുടരുക. അതുവഴി ഡാമിന്റെ പ്രഷര്‍ കുറയ്ക്കുക. ഒരു ദുരന്തം ഉണ്ടായാലും അതിന്റെ വ്യാപ്തി കുറക്കാന്‍ നമുക്ക് അതുകൊണ്ട് സാധിച്ചു എന്ന് വരാം. അതോടൊപ്പം പുതിയ ഡാമിന് തറക്കല്ലിടുക. ഈ പോളിസി കൊണ്ട് ഒരു ഗുണമുള്ളത് തമിഴനുമായി നമ്മള്‍ നേരിട്ടൊരു ഏറ്റുമുട്ടലിന് പോകുന്നില്ല എന്നുള്ളതാണ്. നമ്മുടെ കാശ്, നമ്മുടെ മണ്ണ്, നമ്മുടെ പുഴ. നമ്മുടെ ഡാം. പുതിയ ഡാമിന്റെ പണി കഴിഞ്ഞാല്‍ ഉടന്‍ നമുക്ക് കമ്പിപ്പാരയുടെ പണി തുടങ്ങാം. മലയാളിയോടാണോ കളി?.

എല്ലാ രാഷ്ട്രീയര്‍ക്കാരോടും ഒരഭ്യര്‍ത്ഥനയുണ്ട്. ഇതിനിടയില്‍ വാഴ വെട്ടാന്‍ നടക്കരുത്. നിങ്ങളുടെ ഒടുക്കത്തെ രാഷ്ട്രീയക്കളികള്‍ ഈ പ്രശ്നത്തിലെങ്കിലും മാറ്റിവെക്കണം. മുല്ലപ്പെരിയാറില്‍ മത്സരിച്ചു ബോട്ട് സവാരി നടത്തിയത് കൊണ്ടൊന്നും പ്രശ്നം തീരില്ല. അടിയന്തര നിയമസഭ വിളിച്ചു കൂട്ടി പാസ്സാക്കാനുള്ളത് എന്താണെന്ന് വെച്ചാല്‍ പാസ്സാക്കി പുതിയ ഡാമിന്റെ പണി തുടങ്ങാനുള്ള ഏര്‍പ്പാട് ചെയ്യുക. ചാണ്ടി സാറിന്റെ ജനസമ്പര്‍ക്കം നല്ല പരിപാടി തന്നെയാണ്. പക്ഷെ ഇപ്പോള്‍ അതിനേക്കാള്‍ അടിയന്തിരമായി വേണ്ടത് ഈ വിഷയത്തില്‍ ശ്രദ്ധ കേന്ദ്രീകരിക്കുകയാണ്. ജനങ്ങള്‍ ജീവിച്ചിരിക്കുന്നുണ്ടെങ്കിലേ സമ്പര്‍ക്കം നടത്തിയിട്ട് കാര്യമുള്ളൂ. അമ്മക്ക് പ്രസവ വേദന മകള്‍ക്ക് വീണ വായന എന്ന് പറഞ്ഞ പോലുള്ള പരിപാടികള്‍ തത്ക്കാലം നിര്‍ത്തിവെക്കുന്നതാണ് നല്ലത്. ഡാമിന്റെ കാര്യത്തില്‍ ഒരു തീര്‍പ്പാക്കിയിട്ടു സമ്പര്‍ക്കം തുടരാം.

ഞാന്‍ മുമ്പത്തെ പോസ്റ്റില്‍ പറഞ്ഞ പോലെ പുതിയ ഡാം ഉണ്ടാക്കാന്‍ നമ്മുടെ PWD ക്കാരെ എല്പിക്കരുത്. ഉദ്ഘാടനത്തിന്റെ അന്ന് തന്നെ ഡാം പൊളിഞ്ഞാല്‍ ആകെ നാറ്റക്കേസാകും. പഴയ സായിപ്പിന്റെ കമ്പനിയെത്തന്നെ പണി ഏല്പിക്കണം. കാശിന്റെ കാര്യം പ്രച്നമാക്കേണ്ട. അത് എങ്ങനേലും ഉണ്ടാക്കാം എന്ന് മാണി സാര്‍ ഇതിനകം പറഞ്ഞിട്ടുണ്ട്. സര്‍ക്കാരിന്റെ കയ്യില്‍ കാശില്ലെങ്കില്‍ കാശ് ഞാന്‍ ഉണ്ടാക്കിത്തരാം എന്ന് വി എസ്സും പറഞ്ഞിട്ടുണ്ട്. ഇനി വേണ്ടത് കേന്ദ്രന്റെ കയ്യില്‍ നിന്ന് ഒരു ഒപ്പാണ്. ഡല്‍ഹിയിലുള്ള അഞ്ചാറു ~~മന്ത്രി കൊണാപ്പന്മാര്‍ക്ക്~~ മന്ത്രിമാര്‍ക്ക് അതെങ്കിലും വേടിച്ചു തരാന്‍ കഴിയും എന്നാണെന്റെ വിശ്വാസം. അതിനു കൂടി കഴിയില്ലെങ്കില്‍ പിന്നെ അവരെയൊക്കെ ചെയ്യേണ്ടത് മുക്കാലിയില്‍ കെട്ടി അടിക്കുകയല്ല, പിടിച്ചിരുത്തി സന്തോഷ്‌ പണ്ഡിറ്റിന്റെ സിനിമ നാല് വട്ടം കാണിക്കുകയാണ്. അതിനുള്ള അവസരം അവരായിട്ടു ഉണ്ടാക്കരുത്. ഗുഡ് ബൈ.. Latest Post ഇടുക്കി വേണോ ഇടുക്കി?

Related Posts
സുരേഷ് ഗോപി സെറോക്സ്‌ കോപ്പിയല്ല
അണ്ണാച്ചീ, ഞങ്ങ വിട മാട്ടേ..

സുരേഷ് ഗോപി സെറോക്സ്‌ കോപ്പിയല്ല

2011-11-29T08:33:00.009+03:00

ചൈനക്കാരി സുരേഷ് ഗോപി എന്ന് പറഞ്ഞപ്പോള്‍ അത് സെറോക്സ്‌ കോപ്പി എന്നായിപ്പോയി. ദുബായിയിലെ പാര്‍ക്കില്‍ വെച്ചു ശ്രീനിവാസനാണ് അത് തിരുത്തിക്കൊടുത്തത്. സത്യത്തില്‍ സുരേഷ് ഗോപി ഒരു സെറോക്സ്‌ കോപ്പിയല്ല. അദ്ദേഹത്തിനു മറ്റു താരങ്ങളില്‍ നിന്ന് ചില വ്യത്യാസങ്ങള്‍ ഉണ്ട്. അല്പം സാമൂഹിക പ്രതിബദ്ധത. ഇത്തിരി പ്രതികരണ ശേഷി, ജനങ്ങളുടെ മനസ്സറിയാനുള്ള ഒരല്പം വകതിരിവ്. മുല്ലപ്പെരിയാര്‍ വിഷയത്തില്‍ സിനിമാ ലോകത്ത് നിന്ന് ആദ്യം ശബ്ദം ഉയര്‍ത്തിയത്‌ സുരേഷ് ഗോപിയാണ്. അതിനു അദ്ദേഹത്തെ അഭിനന്ദിക്കാതെ വയ്യ.

ഭരത് അവാര്‍ഡും ഡോക്ടറേറ്റും കേണല്‍ പദവിയും ഒക്കെയുള്ള മഹാ നടന്മാര്‍ നമുക്കുണ്ട്. സകല വിഷയത്തിലും തീപ്പൊരി പ്രതികരണം നടത്തി കഴിവ് തെളിയിച്ച ബി ബി സി ഇംഗ്ലീഷ് സംസാരിക്കുന്ന തെന്നിന്ത്യയിലെ ഏക നടനുണ്ട്‌. മീശ വെച്ചതും വടിച്ചതുമായ കുറെയെണ്ണം വേറെയുമുണ്ട്. ഒരെണ്ണം മേക്കപ്പ് വാനില്‍ നിന്ന് പുറത്തിറങ്ങിയിട്ടില്ല. പകരം അവാര്‍ഡ് നിശയും ഡപ്പാംകൂത്ത് ഡാന്‍സുമായി അര്‍മാദിച്ചു നടക്കുകയാണ്. അല്ലേലും ഇവരൊന്നു മിണ്ടിയെന്നു വെച്ചു ഒന്നും ഉണ്ടായിട്ടല്ല. പൊട്ടാന്‍ സമയമായാല്‍ മുല്ലപ്പെരിയാര്‍ പൊട്ടുക തന്നെ ചെയ്യും. തിയേറ്ററില്‍ ക്യൂ നിന്ന് സിനിമ കണ്ട്, വിസിലടിച്ചും കയ്യടിച്ചും പ്രോത്സാഹിപ്പിച്ച്, ഫാന്‍സ്‌ അസോസിയേഷന്‍ ഉണ്ടാക്കി കട്ടൌട്ട് വെച്ച്, ഇവരെയൊക്കെ പനയോളം വളര്‍ത്തിയ പാവം പ്രേക്ഷകര്‍ ജീവന്‍ മരണ പോരാട്ടം നടത്തുമ്പോള്‍ ഞങ്ങളും നിങ്ങളോടൊപ്പമുണ്ട് എന്നൊരു വാക്കിനു വലിയ വിലയുണ്ട്‌. പക്ഷെ അതുണ്ടായില്ല. സുരേഷ് ഗോപിയില്‍ നിന്ന് അതുണ്ടായി. സംവിധായകന്‍ രഞ്ജിത്തില്‍ നിന്ന് അതുണ്ടായി. നടി റീമ കല്ലിങ്കലില്‍ നിന്നും ആ പിന്തുണ ലഭിച്ചു. സോഷ്യല്‍ മീഡിയയിലെ പ്രവര്‍ത്തകര്‍ക്കൊപ്പം കൊച്ചിയിലെ പ്രതിഷേധ റാലിയില്‍ റീമ പങ്കെടുക്കുകയും ചെയ്തു. ജനകീയ പ്രക്ഷോഭങ്ങള്‍ക്ക് ലോകത്ത് പലയിടത്തും ആവേശം പകരാന്‍ സെലിബ്രിറ്റികള്‍ എത്താറുണ്ട്. അവരെ താരങ്ങള്‍ ആക്കിയ ജനങ്ങളോടുള്ള പ്രത്യുപകാരത്തിന്റെ അടയാളമാണത്. മുല്ലപ്പൂ വസന്തം നടക്കുമ്പോള്‍ അറബ് ലോകത്ത് അത് ധാരാളമായി കണ്ടു. എന്നാല്‍ അന്ന് അതിനോട് പുറം തിരിഞ്ഞു നിന്ന് ചിലരെ ജനം വിപ്ലവ ശേഷം ജനം കാണുന്നിടത്ത് വെച്ചു കൂകി. ചിലര്‍ പരസ്യമായി മാപ്പ് പറഞ്ഞു.

സിനിമാക്കാരുടെ കാര്യം മാത്രമല്ല, സാംസ്കാരിക നായകന്മാര്‍ , സാഹിത്യകാരന്മാര്‍ , ബുദ്ധിജീവികള്‍ തുടങ്ങി കുരങ്ങു ചത്താല്‍ കവിത എഴുതുന്ന പല കുമാരികളും വേറെയുണ്ട്. ഒരെണ്ണത്തിനെ പുറത്തു കാണുന്നില്ല. ആരൊക്കെ പ്രതികരിച്ചു, ആരൊക്കെ പ്രതികരിച്ചില്ല, ആര്‍ക്കൊക്കെ നട്ടെല്ലുണ്ട് എന്നൊക്കെ മനസ്സിലാക്കാന്‍ പറ്റിയ ഒരു സുവര്‍ണ അവസരമാണ് ഇപ്പോള്‍ വന്നു ചേര്‍ന്നിരിക്കുന്നത്. കേന്ദ്ര പ്രതിരോധ മന്ത്രി എ കെ ആന്റണി പരസ്യമായി പ്രതികരിക്കാത്തത് നോക്കേണ്ട, മൂപ്പര് രഹസ്യമായി പലതും ചെയ്യുന്നുണ്ട് എന്നാണു കെ സി വേണുഗോപാല്‍ പറഞ്ഞത്. (രാവിലെ കക്കൂസില്‍ പോകുന്ന കാര്യമാണോ കെ സി ഉദ്ദേശിച്ചത് എന്നറിയില്ല) സ്വന്തം ജന്മ നാട്ടിലെ 35 ലക്ഷം ജനങ്ങളുടെ ജീവന്‍ ഭീഷണി നേരിടുമ്പോള്‍ അക്കാര്യത്തില്‍ ഒരു പരസ്യ നിലപാട് എടുക്കാന്‍ നട്ടെല്ല് ഇല്ലെങ്കില്‍ പിന്നെ എന്ത് കോപ്പിലെ മന്ത്രി എന്ന് സാധാരണക്കാരന്‍ ചോദിച്ചു പോയാല്‍ അതിനു കുറ്റം പറയാന്‍ കഴിയില്ല.

ആരൊക്കെ പിന്തുണച്ചാലും ഇല്ലെങ്കിലും ജനങ്ങള്‍ തെരുവില്‍ ഇറങ്ങിക്കഴിഞ്ഞു. കേരളത്തിന്റെ ആശങ്കകള്‍ പുറംലോകം അറിഞ്ഞു തുടങ്ങി. കോടതി വിധികളിലൂടെയും മറ്റും ഇതുവരെ മേല്‍കൈ ഉണ്ടായിരുന്ന തമിഴ്നാട് പ്രതിരോധത്തില്‍ ആയിക്കഴിഞ്ഞു. ഈ ആവേശം കെട്ടണയും മുമ്പ് വല്ലതും നടന്നാല്‍ നടക്കും. ഇനി പിന്നോട്ട് പോയാല്‍ ഒരിക്കലും ഈ പ്രശ്നം കേരളത്തിനു അനുകൂലമായി പരിഹരിക്കാന്‍ നമുക്ക് കഴിയില്ല. മുഖ്യധാരാ മാധ്യമങ്ങള്‍ മുല്ലപ്പെരിയാര്‍ പ്രശ്നം ഏറ്റെടുക്കുന്നതിനു മുമ്പ് ഈ പ്രശ്നം ശക്തമായി ഉയര്‍ത്തിയത്‌ സോഷ്യല്‍ മീഡിയകളിലെ കൂട്ടുകാരാണ്. അവര്‍ ഒറ്റക്കെട്ടായി ഈ പ്രശ്നത്തിന് പിന്തുണയുമായി ഉണ്ട്. ആ പിന്തുണ പൂര്‍വാധികം ശക്തിയോടെ ഇനിയും ഉണ്ടാകേണ്ടതുണ്ട്. എന്റെ 'ആജന്മ ശത്രു' ആണെങ്കിലും - :) ഈ വിഷയത്തില്‍ ഏറ്റവും ശക്തമായ ഇടപെടലുകള്‍ നടത്തിയ ബെര്‍ളിയെ ഞാന്‍ അനുമോദിക്കുന്നു. അതോടൊപ്പം ഫേസ്ബുക്കിലും ബ്ലോഗുകളിലും ട്വിട്ടറിലും ഈ സമരാവേശം കെടാതെ കാത്തുസൂക്ഷിക്കാന്‍ ശ്രമം നടത്തുന്ന മുഴുവന്‍ കൂട്ടുകാരെയും അഭിനന്ദിക്കുന്നു.

ഈ പ്രശ്നം ആളിക്കത്തിച്ചു വികാരമുണ്ടാക്കാതെ ബുദ്ധിപരമായി നീങ്ങിക്കൂടെ എന്ന് ചോദിക്കുന്നവരുണ്ട്. ശരിയാണ് ബുദ്ധിപരമായി തന്നെയാണ് നീങ്ങേണ്ടത്. ഇപ്പോഴുണ്ടായ ഈ തരംഗം ഉപയോഗപ്പെടുത്തുകയാണ് ഏറ്റവും വലിയ ബുദ്ധിപരത. ജലവിഭവ മന്ത്രി പി ജെ ജോസഫിന്റെ ഉറച്ച നിലപാടുകളില്‍ ജനത്തിനു പ്രതീക്ഷയുണ്ട്. 35 ലക്ഷം ജനങ്ങളുടെ ജീവന്‍ ഓര്‍ത്ത്‌ ഇനിക്കുറക്കം കിട്ടുന്നില്ല എന്ന അദ്ദേഹത്തിന്റെ വാക്കുകളില്‍ അടങ്ങിയ വികാരം പൊതുജനങ്ങള്‍ മനസ്സിലാക്കിയിട്ടുണ്ട്. ഇനി പ്രസ്താവനയല്ല, പ്രവര്‍ത്തനമാണ് വേണ്ടത്. അടിയന്തിര നിയമസഭ വിളിച്ചു കൂട്ടണം. വേണ്ട നിയമങ്ങള്‍ പാസ്സാക്കണം. യുദ്ധകാലാടിസ്ഥാനത്തിലുള്ള നീക്കങ്ങളാണ് ഇനി വേണ്ടത്. നിലവിലുള്ള ഡാമിന്റെ ജലവിതാനം താഴ്ത്തുന്നതിനും പുതിയ ഡാം നിര്‍മിക്കുന്നതിനും വേണ്ടി എന്തൊക്കെ ചെയ്യണമോ അതൊക്കെ ചെയ്തേ തീരൂ. വോട്ടു ബാങ്ക് രാഷ്ട്രീയത്തിന്റെ കളികള്‍ മാറ്റിവെച്ചു എല്ലാ രാഷ്ട്രീയ കക്ഷികളും ഒന്നിച്ചു നിന്നേ പറ്റൂ.

ലാലേട്ടനോടും മമ്മുക്കക്കയോടും ഒരു വാക്ക് കൂടി. മദ്രാസിലെ വീടും സ്ഥാവര ജംഗമവസ്തുക്കളും ആനക്കൊമ്പും കേടുപാട് കൂടാതെ സൂക്ഷിക്കണം. അതിനു പോറലൊന്നും എല്പിക്കരുത്. അടുത്ത ഫിലിം റിലീസ് ആകുമ്പോള്‍ പറയണം. ഡാം പൊട്ടിയിട്ടില്ലെങ്കില്‍ അതെങ്ങനേങ്കിലും ഞങ്ങള്‍ വിജയിപ്പിച്ചോളാം. Latest update പുതിയ ഡാം കെട്ടൂ.. കമ്പിപ്പാര റെഡിയാക്കൂ

Related Posts
അണ്ണാച്ചീ, ഞങ്ങ വിട മാട്ടേ..

Recent Post
മനോരമ ന്യൂസ്‌മേക്കര്‍ :ഗോവിന്ദച്ചാമി ലിസ്റ്റിലില്ല

അണ്ണാച്ചീ, ഞങ്ങ വിട മാട്ടേ..

2011-11-25T08:31:00.010+03:00

കുളിക്കുകയും പല്ല് തേക്കുകയും ചെയ്യുന്ന കാര്യത്തില്‍ തമിഴന്മാര്‍ നമ്മളെക്കാള്‍ ഒരു കട്ടക്ക് പിന്നിലാണെങ്കിലും സ്വന്തം മണ്ണിനു വേണ്ടി പൊരുതുന്ന കാര്യത്തില്‍ അവര്‍ നമ്മുടെ നാല് കട്ടക്ക് മുന്നിലാണ്. മുല്ലപ്പെരിയാര്‍ ഡാം പൊളിക്കുന്നതിനെതിരെ തീകൊളുത്തി ആത്മഹത്യ ചെയ്യാന്‍ തമിഴ്നാട്ടിലെ ഏതെങ്കിലും ഒരു ഈര്‍ക്കിളി പാര്‍ട്ടി ആഹ്വാനം ചെയ്‌താല്‍ അണ്ണാച്ചിമാരില്‍ കുറെയെണ്ണം അതിനു തയ്യാറായി എന്ന് വരും. പാര്‍ട്ടിക്ക് വേണ്ടി ചാകാനും വെട്ടാനും കേരളത്തില്‍ ആളുകള്‍ ഏറെക്കാണുമെങ്കിലും നാട്ടിന്റെ പൊതുപ്രശ്നത്തിനു വേണ്ടി തൊണ്ടകീറി ഒരു മുദ്രാവാക്യം വിളിക്കാന്‍ പോലും നമ്മള്‍ മലയാളികളെ കിട്ടാന്‍ പാടാണ്. മുല്ലപ്പെരിയാര്‍ പ്രശ്നത്തില്‍ നൂറു ശതമാനം നീതി കേരളത്തിന്റെ പക്ഷത്താണെങ്കിലും ഈ വിഷയത്തില്‍ തമിഴന്മാര്‍ ജയിക്കാനുള്ള സാധ്യത അതുകൊണ്ട് തന്നെ തള്ളിക്കളയാനാവില്ല.

നമ്മുടെയും അവരുടെയും സ്വഭാവം വെച്ചു നോക്കിയാല്‍ അണ്ണാച്ചികളുമായി ഒരു ഏറ്റുമുട്ടല്‍ സമീപനം നമുക്ക് ഗുണം ചെയ്യില്ല എന്നതുറപ്പാണ്. കേരളത്തിനു സുരക്ഷ, തമിഴ്നാട്ടിന് വെള്ളം എന്ന ഉമ്മന്‍ ചാണ്ടിയുടെ ലൈനില്‍ ആഞ്ഞു പിടിക്കുക തന്നെയാണ് നമുക്ക് നല്ലത്. വിട്ടുവീഴ്ച്ചകള്‍ക്കില്ല എന്ന ഉറച്ച നിലപാടുമായി മുന്നോട്ട് പോകുന്ന ജലവിഭവ മന്ത്രി പി ജെ ജോസഫിനെയും ഈ വിഷയത്തില്‍ ശക്തമായ നിലപാടുകള്‍ എടുത്ത മുന്‍ മന്ത്രി എന്‍ കെ പ്രേമചന്ദ്രനേയും അഭിനന്ദിക്കുന്നു. ജനവികാരം മനസ്സിലാക്കി മുന്നോട്ടു പോകുവാന്‍ ഭരണകൂടത്തിനു കഴിയേണ്ടതുണ്ട്.

തമിഴ്നാട്ടിലെ അമ്മായി പറഞ്ഞിരിക്കുന്നത് ഡാമിന് കുഴപ്പമൊന്നുമില്ല എന്നാണ്. മിനിമം ഇരുനൂറു കിലോ തൂക്കം കണ്ടേക്കാവുന്ന താന്‍ കുലുങ്ങി നടന്നിട്ട് പൊട്ടാത്ത ഡാമുകളൊന്നും ഭൂമി കുലുങ്ങിയാല്‍ പൊട്ടില്ല എന്നാണ് അമ്മായി വിശ്വസിക്കുന്നത്. പക്ഷെ ഡാമിന്റെ ഉറപ്പു പരിശോധിച്ച റൂര്‍ക്കി ഐ ഐ ടിയിലെ വിദഗ്ധര്‍ പറഞ്ഞത് ഡാം ഏതാണ്ട് പൊട്ടാറായിട്ടുണ്ട് എന്നാണ്. അമ്മായി പറഞ്ഞതാണോ അതോ വിദഗ്ദര്‍ പറഞ്ഞതാണോ ശരിയെന്നു തീര്‍പ്പാക്കുന്നതിന് വേണ്ടി മുപ്പതു ലക്ഷം പേരെ വെള്ളത്തില്‍ മുക്കിക്കൊല്ലാന്‍ നമുക്ക് കഴിയില്ല. ഡാമിന് കുഴപ്പമില്ലെന്നും IIT റിപ്പോര്‍ട്ട്‌ വ്യാജമാണെന്നുമാണ് സുബ്രഹ്മണ്യം സ്വാമി പറയുന്നത്. ഇവന്റെയൊക്കെ ചെകിടത്ത് അടിക്കാന്‍ നമുക്കൊരു ഹര്‍വീന്ദര്‍ സിംഗ് ഇല്ലാതെ പോയി.

999 വര്‍ഷത്തേക്കുള്ള കരാര്‍ ആണത്രേ ഒപ്പിട്ടിരിക്കുന്നത്. കേരളത്തിന്റെ മണ്ണ്, കേരളത്തിന്റെ പുഴ, കേരളത്തിന്റെ ഡാം. പക്ഷെ അതിന്റെ മൊയലാളി തമിഴന്‍ അണ്ണാച്ചി. കേരളത്തിനു യാതൊരു നിയന്ത്രണവും ഇല്ല!!. പല കരാറുകളും നമ്മള്‍ കണ്ടിട്ടുണ്ട്. കേട്ടിട്ടുണ്ട്. പക്ഷെ ഇത് പോലൊരു അടുപ്പിലെ കരാര്‍ ആദ്യമായിട്ടാണ് കാണുന്നത്.തിരുവിതാംകൂര്‍ ദിവാന്‍ വി രാം അയ്യങ്കാരും മദ്രാസ് സ്റ്റേറ്റ് സെക്രട്ടറി ഹാനിംഗ്ടന്‍ സായിപ്പുമാണ് ഈ കരാറില്‍ ഒപ്പ് വെച്ചിരിക്കുന്ന കക്ഷികള്‍ . ബ്രിട്ടീഷുകാരന്‍ തിരുവിതാകൂര്‍ രാജാവിന്റെ മേല്‍ അധികാര സമ്മര്‍ദ്ദം ചെലുത്തിയാണ് ഈ കരാറില്‍ ഒപ്പിടുവിച്ചത് എന്നാണ് പറയപ്പെടുന്നത്‌. നമ്മെ കൊള്ളയടിക്കാന്‍ വന്ന സായിപ്പ് ഒപ്പിട്ടു കൊണ്ടുപോയ കരാറിന് സ്വതന്ത്ര ഇന്ത്യയില്‍ നായിക്കാട്ടത്തിന്റെ വിലപോലും കൊടുക്കേണ്ടതില്ല എന്ന് എല്ലാവര്‍ക്കും അറിയാം. ഇതിലും വലിയ കരാറൊക്കെ സായിപ്പ് ഒപ്പിടുവിച്ചിട്ടുണ്ട്. അതൊക്കെ അറബിക്കടലിലേക്ക് വലിച്ചെറിഞ്ഞിട്ടാണ് നാം സായിപ്പിനെ വണ്ടി കയറ്റി വിട്ടത്. ഇനിയും അത്തരമൊരു കരാറിന്റെ മറവില്‍ മലയാളികളെ പറ്റിക്കുവാന്‍ ഇന്ത്യന്‍ ഭരണഘടന പ്രകാരം ഒരു സുപ്രിം കോടതിക്കും കഴിയില്ല എന്നതാണ് യാഥാര്‍ത്ഥ്യം. മുപ്പതു ലക്ഷം ജനങ്ങളുടെ ജീവന് പുല്ലു വില കല്പിക്കാതെ സായിപ്പിന്റെ കരാറും കൊണ്ട് ഉമ്മാക്കി കളിച്ചാല്‍ അത് സമ്മതിച്ചു കൊടുക്കാന്‍ നമുക്ക് കഴിയില്ല. എഴുപതില്‍ അച്യുതമേനോന്‍ സര്‍ക്കാര്‍ ആ കരാറിലെ വാടകത്തുക കൂട്ടി ഒപ്പിട്ടുകൊടുത്തിട്ടുണ്ടെങ്കിലും പൊതുജനങ്ങളുടെ ജീവസുരക്ഷയെ കണക്കിലെടുത്ത് അതിലെ അബദ്ധങ്ങള്‍ തിരുത്തുവാന്‍ തിരഞ്ഞെടുക്കപ്പെട്ട ഒരു സര്‍ക്കാരിന് അവകാശമില്ലെങ്കില്‍ പിന്നെ എന്തോന്ന് ജനാധിപത്യം?. മുപ്പതു ലക്ഷം ജനങ്ങള്‍ വെള്ളം കുടിച്ചു മരിക്കുന്നതാണോ അതോ കോണോത്തിലെ സായിപ്പിന്റെ കരാറാണോ വലുതെന്നു സോണിയാജിയോടും സര്‍ദാര്‍ജിയോടും ചോദിക്കുവാന്‍ കോണ്‍ഗ്രസ്സുകാര്‍ക്ക് ധൈര്യമില്ലെങ്കില്‍ പി സി ജോര്‍ജിനെക്കൊണ്ടെങ്കിലും അത് ചോദിപ്പിക്കണം.

പറയുമ്പോള്‍ എല്ലാം പറയണമല്ലോ. ഇപ്പോഴുള്ള ഡാം പൊളിച്ചുനീക്കി പുതിയ ഡാം പണിയാന്‍ അനുമതി കിട്ടിയാല്‍ കൊന്നാലും ആ പണി നമ്മുടെ പി ഡബ്ലിയു ഡി ക്കാരെ എല്പിക്കരുത്. ഒത്താല്‍ പഴയ സായിപ്പിന്റെ കമ്പനിയെ തന്നെ ആ പണി ഏല്പിക്കണം. അമ്പതു കൊല്ലത്തേക്ക് പണിത ഡാമാണ് 116 കൊല്ലം കഴിഞ്ഞിട്ടും പൊളിയാതെ നില്‍ക്കുന്നത്. സുര്‍ക്കി മിശ്രിതത്തിന്റെയല്ല, സായിപ്പിന്റെ പണിയുടെ ഉറപ്പാണ് അതിനു കാരണം. അതുകൊണ്ടാണ് ഇത്രയേറെ ഭൂചലനങ്ങള്‍ ഉണ്ടായിട്ടും മുല്ലപ്പെരിയാര്‍ പൊട്ടാതെ നിന്നത്. അല്ലാതെ നമ്മള്‍ അവിടെയും ഇവിടെയും അല്പം സിമന്റ് വാരി പൊത്തി ഉറപ്പു കൂട്ടിയത് കൊണ്ടല്ല. കുതിരവട്ടം പപ്പു ബുള്‍ഡോസര്‍ നന്നാക്കിയത് പോലുള്ള റിപ്പയറുകളാണ് നമ്മള്‍ പൊതുവേ നടത്താറുള്ളത്. റോഡായാലും പാലമായാലും മുല്ലപ്പെരിയാറായാലും ആ ഒരു നിലവാരം നമ്മള്‍ പ്രതീക്ഷിച്ചാല്‍ മതി. അതുകൊണ്ട് പുതിയ ഡാമിന് അനുമതി കിട്ടിയാലുടനെ സായിപ്പിന് ഒരു ടെലെഗ്രാം അടിക്കണം. അത് മറക്കണ്ട.

അണ്ണാച്ചികളോട് പറയാന്‍ രണ്ടു ഡയലോഗ് (നല്ല പഞ്ചില്‍ പറയാന്‍ സുരേഷ് ഗോപിയെ കിട്ടുമോന്നു നോക്കട്ടെ). "டாம் உடய்ந்து நிறையே மலையாளிகள் இறந்து போனால் அவர்களின் அடுத்த தலிம்ரைகள் சிறிது காலம் ஆனாலும் திரும்ப வருவார்கள். அனால் தமிழகர்லின் ஐந்து மாவட்டங்கள் நீரே இல்லாமல் பாலைவனம் ஆகிப்போனால் அவர்களக்கு தலைமுறைகள் இருக்கவே மாட்டார்கள் . இப்போழ்து உள்ளவர்கள் பட்டினியால் இறந்து போவார்கள். இதற்க்கு பிறகு உடைந்து போன அனைக்கேட்டுக்கு படிலாகே வேறு ஒரு அனைக்கேட்டினை உருவாக்கி மலைகாளிகள் சம்மதிக்க மாட்டார்கள். தமிழகத்திற்கு அருகில் உள்ள வேறு மாநிலங்கள் நீரை தருவ மாட்டார்கள் . அவர்களுக்கு முல்லைபெரியார் அனைகேட்டு ஒரு பாடமாகி அமைந்து விடும். கேரளா அரசு புதிய அனைகேட்டிளிருந்து நீர் கொடுக்க தயாராக உள்ளது . தமிழர்களே நன்றாகே சிந்திக்கவும்."

Translation : ഡാം പൊട്ടി കുറേ മലയാളികള്‍ മരിച്ചാല്‍, അവരുടെ ബന്ധുക്കളും ബാക്കി വരുന്ന ജനങ്ങളും കുറേ അധികം വര്‍ഷങ്ങള്‍ എടുത്തിട്ടായാലും ജീവിതത്തിലേക്ക് തിരിച്ചുവരും. അല്ലാതെ പറ്റില്ലല്ലോ ? പക്ഷെ തമിഴന്റെ കാര്യമോ ? അവര്‍ 5 ജില്ലകളില്‍ പൊന്ന് വിളയിക്കുന്നത് ഈ ഡാമിലെ വെള്ളം കൊണ്ടാണ്. വെള്ളം കിട്ടാതായാല്‍ തമിഴര്‍ നരകിച്ച് ജീവിച്ച് പട്ടിണി കിടന്ന് മരിക്കും. തകര്‍ന്ന ഡാമിന് പകരം പുതിയൊരു ഡാം ഉണ്ടാക്കി തമിഴന് വെള്ളം കൊടുക്കാന്‍ കേരളമക്കള്‍ ഒരുകാലത്തും സമ്മതിച്ചെന്ന് വരില്ല. മാത്രമല്ല, നിങ്ങള്ക്ക് ചുറ്റുമുള്ള സംസ്ഥാനങ്ങളും ഈ അവസ്ഥയില്‍ ഇനി നിങ്ങള്ക്ക് വെള്ളം തരുവാന്‍ തയ്യാറാവുകയില്ല. കേരള സര്‍ക്കാര്‍ പറയുന്നത് വ്യക്തമാണ്. പുതിയ ഡാം നിര്‍മ്മിച്ചാല്‍ തമിഴ്ക്ക് വെള്ളം തന്നിരിക്കും. തമിഴ് മക്കളെ ആലോചിക്കൂ.(തമിഴ് ഡയലോഗും പരിഭാഷയും എന്റെ വകയല്ല, ഫേസ്ബുക്കില്‍ നിന്ന് കിട്ടിയതാണ്)

മ്യാവൂ : ഐശ്വര്യയുടെ കുട്ടിക്ക് എന്ത് പേരിട്ടു, സന്തോഷ്‌ പണ്ഡിറ്റിന്റെ അടുത്ത സിനിമ എന്ന് റിലീസ് ആകും തുടങ്ങി അതീവ പ്രാധാന്യമുള്ള പ്രശ്നങ്ങള്‍ തലയില്‍ കത്തുമ്പോഴാണ് തന്റെയൊരു മുല്ലപ്പെരിയാര്‍ !!

Latest update : സുരേഷ് ഗോപി സെറോക്സ്‌ കോപ്പിയല്ല

ദാല്‍ തടാകത്തിലെ രണ്ടു രാത്രികള്‍

2011-11-14T10:33:00.004+03:00

'ഇദര്‍ സുകൂന്‍ ഹേതോ ഹം ലോകോംകോ സിന്ദഗി ഹെ, സുകൂന്‍ നഹീ തോ സിന്ദഗി നഹി' ദാല്‍ തടാകത്തിലെ ചെറിയ തോണി തുഴഞ്ഞു കൊണ്ട് നൂര്‍ മുഹമ്മദ്‌ പറഞ്ഞ ആ വാക്കുകള്‍ എന്നെ വല്ലാതെ സ്പര്‍ശിച്ചു. "ഇവിടെ സമാധാനം ഉണ്ടെങ്കില്‍ ഞങ്ങള്‍ക്ക് ജീവിതമുണ്ട്. ഇല്ലെങ്കില്‍ ജീവിതമില്ല". നൂര്‍ മുഹമ്മദിന്റെ ജീവിതം ദാല്‍ തടാകത്തിലെ തോണിയില്‍ ആണ്. അവിടെ ടൂറിസ്റ്റുകള്‍ വന്നാല്‍ അവന്റെ ജീവിതത്തിനു നിറമുണ്ടാകും. സംഘര്‍ഷം കാരണം ടൂറിസ്റ്റുകള്‍ വരാതായാല്‍ നൂര്‍ മുഹമ്മദിന്റെ മാത്രമല്ല അവനെപ്പോലെ ആയിരക്കണക്കിന് ആളുകളുടെ ജീവിതം നിറം കെടും.

കഴിഞ്ഞ വര്‍ഷം ഏപ്രിലില്‍ ആണ് ഞാന്‍ കാശ്മീരില്‍ പോയത്. മനോഹരമായ ആ യാത്രയെക്കുറിച്ച് എഴുതണം എന്നുണ്ടായിരുന്നെങ്കിലും ഇതുവരെ നടന്നില്ല. കഴിഞ്ഞ ദിവസം പത്രത്തില്‍ ഒരു വാര്‍ത്ത‍ കണ്ടു. സംഘര്‍ഷത്തിനു അയവ് വന്നതോടെ കാശ്മീരില്‍ ടൂറിസം പച്ച പിടിക്കുന്നു (Tourism Boost in Kashmir as violence ebbs) എന്ന തലക്കെട്ടില്‍ AFP യുടെ സ്റ്റോറി. നൂര്‍ മുഹമ്മദ്‌ എന്റെ ഓര്‍മയിലെക്കെത്താന്‍ അതാണ്‌ കാരണം. ഏതാണ്ട് ഏഴു ലക്ഷം ടൂറിസ്റ്റുകള്‍ ഈ വര്‍ഷം ഇതുവരെ കാശ്മീര്‍ സന്ദര്‍ശിച്ചു എന്നാണ് റിപ്പോര്‍ട്ടില്‍ കാണുന്നത്. കഴിഞ്ഞ രണ്ടു പതിറ്റാണ്ടിനിടക്ക് ഇത്രയും അധികം ആളുകള്‍ കാശ്മീര്‍ സന്ദര്‍ശിക്കുന്നത് ഇതാദ്യമാണെന്നും റിപ്പോര്‍ട്ടില്‍ പറയുന്നു. ടൂറിസ്റ്റുകള്‍ ധാരാളം വന്നു തുടങ്ങിയത് കാരണം നൂര്‍ മുഹമ്മദ്‌ ഇപ്പോള്‍ നല്ല സന്തോഷത്തില്‍ ആയിരിക്കണം .

ഒരു വൈകുന്നേരമാണ് ശ്രീനഗറില്‍ ഞങ്ങള്‍ എത്തുന്നത്. മൊത്തം എട്ടു പേര്‍ അടങ്ങുന്ന ഒരു സംഘമായിരുന്നു ഞങ്ങളുടേത്. എന്റെ വലിയ ജേഷ്ഠന്‍ മുഹമ്മദ്, ചെറിയ ജേഷ്ഠന്‍ റസാക്ക്, സുഹൃത്ത് ഗഫൂര്‍ , ജേഷ്ഠന്റെ അളിയന്‍ ലത്തീഫ്, എന്റെ രണ്ടു എളാപ്പമാര്‍ (കോയ ആപാപ്പയും അഹമ്മദ് ആപാപ്പയും) . കൂടെ ഡ്രൈവറും റസാക്കിന്റെ സുഹൃത്തുമായ രത്തന്‍ സിങ്ങും. യാത്ര കാശ്മീരിലേക്ക് ആയതിനാല്‍ അല്പം ഭയമുണ്ടായിരുന്നു. 'കലാപവും വെടിവെപ്പും ഭീകരവാദികളും'!!!. കാശ്മീരിനെക്കുറിച്ച് നാളിതു വരെ നല്ലതായി ഒന്നും കേട്ടിട്ടില്ല. അതുകൊണ്ട് തന്നെ കുടുംബത്തെ കൂടെ കൂട്ടിയില്ല. ഒരു ബാച്ച്ലര്‍ ട്രിപ്പ്‌ ആണ് നല്ലതെന്ന് തോന്നി. ജേഷ്ഠന്‍ റസാക്കിന്റെ വര്‍ക്ക്‌ സൈറ്റുള്ള പഞ്ചാബിലെ ഖാദിയാനില്‍ നിന്നും ഒരു സ്കോര്‍പിയോ കാറിലാണ് ഞങ്ങള്‍ പുറപ്പെട്ടത്‌. അതിരാവിലെ പുറപ്പെട്ട് ജമ്മു വഴി ശ്രീനഗറില്‍ എത്തിയപ്പോള്‍ ഏതാണ്ട് ഇരുട്ടിത്തുടങ്ങിയിട്ടുണ്ട്. നേരെ ദാല്‍ തടാകത്തിലേക്കാണ് പോയത്.

നല്ല വിശപ്പുണ്ടായതിനാല്‍ തടാകക്കരയിലെ ഒരു ഹോട്ടലില്‍ നിന്നും ഭക്ഷണം കഴിച്ചു. ഹോട്ടലിന്റെ ചില്ലുപാളികളിലൂടെ നോക്കുമ്പോള്‍ ദാല്‍ തടാകം ഹൌസ് ബോട്ടുകളിലെ വെളിച്ചത്തില്‍ കുളിച്ചു നില്‍ക്കുകയാണ്. ഓളങ്ങളില്‍ ബോട്ടുകളില്‍ നിന്നുള്ള വര്‍ണപ്രപഞ്ചം തത്തിക്കളിക്കുന്നു. പിറകില്‍ മഞ്ഞു മലകള്‍ . അല്പം കവിതാ വാസന ഉണ്ടെങ്കില്‍ ഒറ്റയിരുപ്പിനു ഒരു മഹാകാവ്യം എഴുതാനുള്ള വകുപ്പുണ്ട്. അമ്മാതിരി ലൊക്കേഷനാണ്. കക്കൂസിലിരുന്നു പോലും പാട്ട് പാടിയിട്ടില്ലാത്ത എന്റെ നാവിലും രണ്ടു വരിയെത്തി. കുയിലേ, നീലക്കുയിലേ.. (അങ്ങിനെ ഒരു പാട്ടുണ്ടോ ആവോ).

പതിനെട്ടു സ്ക്വയര്‍ കിലോമീറ്ററില്‍ വ്യാപിച്ചു കിടക്കുന്ന വിശാലമായ ഒരു തടാകമാണിത്. തടാകത്തിന്റെ തീരങ്ങളിലായി മുഗള്‍ രാജാക്കന്മാര്‍ ഉണ്ടാക്കിയ നിരവധി പൂന്തോട്ടങ്ങളുണ്ട്. അവരുടെ വേനല്‍ക്കാല ഒഴിവു കേന്ദ്രം ശ്രീനഗര്‍ ആയിരുന്നുവല്ലോ. പ്രസിദ്ധമായ ഹസ്രത് ബാല്‍ പള്ളിയും ഇതിനു സമീപത്താണ്. താമസം തടാകത്തിലെ ഏതെങ്കിലും ഒരു ബോട്ടില്‍ മതി എന്ന് നേരത്തെ തീരുമാനിച്ചതാണ്. ഹോട്ടലുകളിലും ലോഡ്ജുകളിലും താമസിച്ചു മടുത്തവരാണ് ഞാനടക്കമുള്ള സംഘത്തിലെ എല്ലാവരും.

ദാല്‍ തടാകത്തിന്റെ ആകാശ വീക്ഷണം. (ചിത്രത്തില്‍ ക്ലിക്കിയാല്‍ വലുതായി കാണാം. തെറ്റിദ്ധരിക്കരുത്!. എന്റെ മൊബൈല്‍ ക്യാമറയില്‍ എടുത്തതല്ല) തടാകത്തിന്റെ ഓരം ചേര്‍ന്ന് കിടക്കുന്ന ഹൗസ് ബോട്ടുകള്‍ ശ്രദ്ധിക്കുക.

King of Kashmir എന്ന മനോഹരമായ ഒരു ഹൗസ് ബോട്ടാണ് ഞങ്ങള്‍ താമസത്തിനായി തിരഞ്ഞെടുത്തത്. പേരില്‍ ഒരു കിംഗ്‌ ഉണ്ടാവുന്നത് എന്ത് കൊണ്ടും നല്ലതാണല്ലോ. മാത്രമല്ല വില പേശി അല്പം മാന്യമായ തുകക്ക് കിട്ടുകയും ചെയ്തു. ഒരു രാത്രിക്ക് മുവ്വായിരം രൂപയാണ് വാടക. പുറത്തെ വലിയ ഹോട്ടലുകളില്‍ റൂം എടുക്കുകയാണെങ്കില്‍ ഇതിലും കൂടുതല്‍ കാശാവും എന്നത് ഉറപ്പ്.

ഇടത്ത് നിന്ന് രണ്ടാമത്തേതാണ് King of Kashmir

മൂന്നു ബാത്ത് അറ്റാച്ച്ഡ് ബെഡ് റൂമുകള്‍ . ലിവിംഗ് റൂം, കിച്ചണ്‍ എല്ലാം ഉണ്ട്. ആലപ്പുഴയിലെയും കുമരകത്തെയും ഹൗസ് ബോട്ടുകളില്‍ ഞാന്‍ താമസിച്ചിട്ടുണ്ട്. അവിടുത്തെ ചാര്‍ജുമായി തട്ടിച്ചു നോക്കുമ്പോള്‍ വളരെ കുറഞ്ഞ നിരക്കാണ് ലോക പ്രശസ്തമായ ഈ തടാകത്തിലേത്. പക്ഷെ ഒറ്റ തകരാറുണ്ട്. ബോട്ട് ചലിക്കില്ല. തടാകത്തിന്റെ അരികില്‍ വെള്ളത്തില്‍ ഉറപ്പിച്ചു നിര്‍ത്തിയവയാണ് അവ. അതുകൊണ്ട് തന്നെ ഇവയെ ബോട്ട് എന്ന് വിളിക്കാന്‍ പറ്റുമോ എന്നറിയില്ല. വിശ്രമം, ഭക്ഷണം, ഉറക്കം, കുളി എന്നിവ ഇവക്കുള്ളില്‍ കഴിക്കുക. തടാകം ചുറ്റാന്‍ കൊച്ചു തോണികള്‍ ഉപയോഗിക്കുക. അതാണ്‌ അവിടത്തെ രീതി.

തടാകക്കരയില്‍ നിന്ന് ബോട്ടിലേക്ക് ചെറിയ തോണിയിലാണ് ഞങ്ങളെ കൊണ്ട് പോയത്. ബോട്ടിലെ സൗകര്യങ്ങള്‍ എല്ലാവര്‍ക്കും ഇഷ്ടപ്പെട്ടു. റൂമുകള്‍ കാണിച്ചു തന്ന ശേഷം ബോട്ട് മുതലാളി പോയി. ആഷിഖ് എന്ന ഒരു പയ്യന്‍ മാത്രമേ അവരുടെ ആളായി ബോട്ടിലുള്ളൂ. കോലായയിലെ കസേരകളില്‍ ഇരുന്നു ഞങ്ങള്‍ അല്‍പ നേരം വെടി പറഞ്ഞു. തടാകത്തിലെ ഓളങ്ങളെ നോക്കി പ്രകൃതി ഭംഗി ആസ്വദിച്ചു. വഴിക്കടവ് മണിമൂളി സ്വദേശിയായ ഗഫൂര്‍ ഏതോ പാട്ട് ഉറക്കെ പാടുന്നുണ്ട്. കേട്ടിട് ഹിന്ദിയോ മലയാളമോ അതോ പഞ്ചാബിയോ എന്ന് ഒരു പിടിയും കിട്ടുന്നില്ല. പുറമേക്ക് കോട്ട് ഇട്ടിട്ടുണ്ടെങ്കിലും ഗഫൂര്‍ ശ്രുതിയും ഷഡ്ജവും ഇട്ടിട്ടില്ല എന്നത് ഉറപ്പാണ്. ശരത് അണ്ണാച്ചി കൂടെയുണ്ടായിരുന്നെങ്കില്‍ ഇവനെ ഈ കായലില്‍ തന്നെ മുക്കി കൊന്നേനെ!. ചിരിക്കുന്ന കാര്യത്തില്‍ വളരെ പിശുക്കനായ രത്തന്‍ സിംഗ് പോലും ഗഫൂറിനെ നോക്കി ചിരിക്കുന്നത് കണ്ടു. ഒരു പക്ഷെ പഞ്ചാബി പാട്ട് ആയിരിക്കണം. 'ഭായി സാബ്, സോജാവോ സോജാവോ' എന്ന് ബോട്ടിലെ പയ്യന്‍ ഇടയ്ക്കിടെ വന്ന് പറയുന്നുണ്ട്. നിങ്ങള്‍ ഉറങ്ങിയാല്‍ എനിക്കും ഉറങ്ങാം എന്നതാണ് അതിന്റെ പച്ച മലയാളം. അല്ലേലും ആ രാത്രി ശിവരാത്രിയാക്കാന്‍ ഞങ്ങള്‍ക്ക് പരിപാടി ഇല്ലായിരുന്നു. പകല്‍ മുഴുവന്‍ പര്‍വത നിരകള്‍ കയറിയിറങ്ങിയുള്ള യാത്രയിലായതിനാല്‍ നല്ല ക്ഷീണമുണ്ട്. തണുത്ത കാറ്റ് വീശുന്നുമുണ്ട്. എല്ലാവരും റൂമുകളിലേക്ക് നീങ്ങി. നല്ല കിടക്കകള്‍ , മരം കോച്ചുന്ന തണുപ്പ്, കൂടെ കാശ്മീരി കമ്പിളിയും. കിടക്കയിലേക്ക് നോക്കി നിന്നത് മാത്രമേ എനിക്കോര്‍മയുള്ളൂ. സുഖ സുന്ദര സുഷുപ്തി..

ഷാജഹാന്‍ ചക്രവര്‍ത്തി എന്റടുത്തു വന്നു ' ബ്ലോഗര്‍ വള്ളിക്കുന്നല്ലേ, ഈ ആഴ്ചയിലെ പോസ്റ്റ് ഏതാ?" എന്ന് ചോദിക്കുമ്പോഴാണ് "ഭായി സാബ് ഉഡോ ഉഡോ' എന്ന ആഷിഖിന്റെ ഒടുക്കത്തെ വിളി. കട്ടന്‍ കാപ്പിയുമായാണ് പയ്യന്റെ നില്‍പ്പ്. (നല്ല ടിപ്സ് കിട്ടാനുള്ള നമ്പരുകളാണ് ഇതൊക്കെ. എല്ലാ ടൂറിസ്റ്റ് കേന്ദ്രങ്ങളിലും ഇതുപോലുള്ള ആഷിഖുമാര്‍ ഉണ്ടാകും. ചക്രവര്‍ത്തിയെ ഒന്ന് സൌകര്യമായിട്ട് കിട്ടിയതായിരുന്നു. അതവന്‍ കളഞ്ഞു കുളിച്ചു) ബാത്ത് റൂമുകളില്‍ ചുടു വെള്ളം റെഡിയാണ്. നമസ്കാരവും മറ്റു പ്രഭാത കൃത്യങ്ങളും കഴിഞ്ഞു പുറത്തു വന്നപ്പോള്‍ മനോഹരമായ കൊച്ചു തോണികളുമായി രണ്ടു പേര്‍ കാത്തുനില്‍ക്കുന്നുണ്ട്‌. പേര് ചോദിച്ചു പരിചയപ്പെട്ടു. ഒന്ന് നൂര്‍ മുഹമ്മദ്‌. മറ്റെയാള്‍ അസ്ഹര്‍ ഗുല്‍ . ഞങ്ങളെ ദാല്‍ തടാകം ചുറ്റിക്കാണിക്കാന്‍ ബോട്ട് മുതലാളി ഏര്‍പാട് ചെയ്തതാണ്.

മുഹമ്മദ്‌ നൂറും അസ്ഹര്‍ ഗുല്ലും

ദാല്‍ തടാകവും പരിസരവും ഞാന്‍ സൂക്ഷ്മ നിരീക്ഷണം നടത്തി. തലേ ദിവസം രാത്രി വന്നിറങ്ങിയതിനാല്‍ പ്രകൃതിയുടെ ഒരു ഗൂഡ സൌന്ദര്യം മാത്രമേ ആസ്വദിക്കാന്‍ പറ്റിയിരുന്നുള്ളൂ. ഇപ്പോള്‍ അത് പൂര്‍ണ ദൃശ്യമായി. മല നിരകളില്‍ മഞ്ഞു കുറവാണ്. ഏപ്രില്‍ മാസത്തില്‍ ഇത്രയേ കാണൂ. കടുത്ത ശൈത്യ കാലത്ത് പൂര്‍ണമായും മഞ്ഞു മൂടും. തടാകത്തില്‍ തോണി തുഴയാന്‍ പറ്റാത്ത വിധം വെള്ളം കട്ട പിടിക്കാറുണ്ടത്രേ. വര്‍ഷങ്ങള്‍ക്കു മുമ്പ് ഒരിക്കല്‍ ഈ തടാകം പൂര്‍ണമായും മഞ്ഞു കട്ടയായി മാറിയതായി നൂര്‍ മുഹമ്മദ്‌ പറഞ്ഞു. അന്ന് കുട്ടികള്‍ ഈ തടാകത്തില്‍ ക്രിക്കറ്റ് കളിച്ചിരുന്നുവത്രേ.

നൂര്‍ മുഹമ്മദുമായി സംസാരിച്ചിരിക്കുന്നതിനിടയില്‍ ഫോട്ടോ എടുക്കുന്നോ ഒന്ന് ചോദിച്ചു മറ്റൊരു തോണിക്കാരനും എത്തി. Mobile Photoshop എന്നാണു അവന്റെ തോണിയുടെ പേര്. ഫോട്ടോ വേണ്ട എന്ന് പറഞ്ഞിട്ടും കക്ഷി പോകുന്നില്ല. കാശ്മീരി ഡ്രസ്സില്‍ ടൂറിസ്റ്റുകള്‍ എടുത്ത ഫോട്ടോകളുടെ സാമ്പിള്‍ കാണിച്ചു തന്നു. വിദേശികളും സ്വദേശികളുമൊക്കെ അതിലുണ്ട്. ഫോട്ടോകള്‍ എനിക്ക് ഇഷ്ടപ്പെട്ടെങ്കിലും ഞാന്‍ കുറച്ചു നേരം മസില്‍ പിടിച്ചു നിന്നു. അപ്പോള്‍ അവന്റെ അവസാനത്തെ നമ്പര്‍ "ആപ്കോ കാശ്മീരി ഡ്രസ്സ്‌ ബഹുത്ത് അച്ചാ ലെഗേഗാ". ആ ലെഗേഗായില്‍ ഞാന്‍ വീണു എന്ന് പറഞ്ഞാല്‍ മതിയല്ലോ.

ദാല്‍ തടാകം ആസ്വദിച്ചു ചുറ്റിക്കറങ്ങണമെങ്കില്‍ നാലഞ്ചു ദിവസം വേണമെന്നാണ് നൂര്‍ മുഹമ്മദ്‌ പറഞ്ഞത്. ഞങ്ങള്‍ക്കാണെങ്കില്‍ ഉച്ചയോടെ മറ്റു സ്ഥലങ്ങള്‍ കാണാനായി പോകണം. രാത്രിയോടെ തടാകത്തില്‍ തിരിച്ചെത്തി അന്തിയുറക്കം ബോട്ടില്‍ ആക്കുക. അങ്ങിനെയാണ് പ്ലാന്‍ ചെയ്തിരിക്കുന്നത്. രണ്ടു രാത്രികള്‍ക്കാണ് ബോട്ട് ബുക്ക്‌ ചെയ്തത്. കിലോമീറ്ററുകള്‍ നീളത്തില്‍ കിടക്കുന്ന തടാകത്തിന്റെ ഉള്‍വഴികളിലേക്ക് വല്ലാതെ പോയില്ല. കരയോട് ചേര്‍ന്ന തടാകത്തിന്റെ ചില ഭാഗങ്ങളില്‍ പൂക്കളുടെ കൊച്ചു ദ്വീപുകള്‍ ഉണ്ട്. അവ വെള്ളത്തില്‍ ഒഴുകി നടക്കുന്നവായാണ്. അവയെ ഫ്ലോട്ടിംഗ് ഗാര്‍ഡന്‍ എന്ന് തീര്‍ച്ചയായും വിളിക്കാം. തോണിയില്‍ ചുറ്റുന്നതിനിടയില്‍ തന്നെ കച്ചവടക്കാരായ മറ്റു തോണിക്കാര്‍ വരുന്നും പോകുന്നുമുണ്ട്. ചൂടോടെയുള്ള ഭക്ഷണം, കൌതുക വസ്തുക്കള്‍ , പൂവുകള്‍ , കാശ്മീരി ഷാള്‍ , കുങ്കുമം തുടങ്ങി എല്ലാം തോണികളില്‍ വില്പനക്കുണ്ട്. വില്പന വസ്തുക്കളുമായി തോണിക്കാര്‍ എത്തുമ്പോള്‍ നൂര്‍ മുഹമ്മദും കൂട്ടുകാരനും ഞങ്ങളുടെ തോണി ആ തോണികളോട് അടുപ്പിച്ചു നിര്‍ത്തും. അത് അവര്‍ തമ്മിലുള്ള ഒരു അഡ്ജസ്റ്റ്മെന്റ്റ് ആണ്. ചിലതൊക്കെ ഞങ്ങള്‍ വാങ്ങി. കൊല്ലുന്ന വിലയൊന്നും ഇല്ലെങ്കിലും അല്പം വിലപേശാന്‍ അറിഞ്ഞാല്‍ അതിന്റെ ഗുണമുണ്ട്.

ഒരു തോണിക്കാരനില്‍ നിന്നും ഞങ്ങള്‍ കാശ്മീരി ബ്രേക്ക് ഫാസ്റ്റ് വാങ്ങിക്കഴിച്ചു.

ചെറിയ തോണികള്‍ ആണെങ്കിലും ഇരിക്കാനും കിടക്കാനും വേണ്ട സൌകര്യങ്ങളെല്ലാം അതിലുണ്ട്.

രജനി സ്റ്റൈലില്‍ പോസ് ചെയ്യുന്നത് ഗഫൂര്‍

നോ കമന്റ്സ്, ബ്ലീസ്

തടാകത്തില്‍ തന്നെയുള്ള ഒരു തുണിക്കടയില്‍ കയറി കൊച്ചു പര്‍ച്ചേസിങ്ങും നടത്തി. എല്ലാവരും കാശ്മീരി ഷാളും സാരിയുമാണ് വാങ്ങിച്ചത്. 'അഭ്യന്തര വകുപ്പിനെ' പിണക്കാതിരിക്കുക എന്നത് വളരെ പ്രധാനമാണല്ലോ. കൂടെ കൂട്ടാത്തതിനു ഒരു ചെറിയ പിണക്കം സ്വാഭാവികമാണ്. അത് മാറ്റാന്‍ സാരിയോളം പറ്റിയ വേറെ ഒരായുധമില്ല. അനുഭവമാണല്ലോ ഏറ്റവും വലിയ ഗുരു.

യാത്രക്കിടയില്‍ കാഴ്ചകള്‍ കാണുന്നതോടൊപ്പം നൂര്‍ മുഹമ്മദുമായും അസ്ഹര്‍ ഗുല്ലുമായും സംസാരിക്കാനാണ് എനിക്ക് ഏറെ താത്പര്യം ഉണ്ടായിരുന്നത്. നൂര്‍ മുഹമ്മദ്‌ ഒരു സംസാരപ്രിയനും ആയിരുന്നു. കല്യാണം കഴിച്ചിട്ടില്ല. പ്രായമായ ഉമ്മയും ഉപ്പയും രണ്ടു സഹോദരിമാരും ഒരു അനിയനും ഉണ്ട്. അനിയന്‍ സ്കൂളില്‍ പഠിക്കുന്നു. ഉപ്പ രോഗിയാണ്. പഠനം നിര്‍ത്തി കുടുംബം പോറ്റാന്‍ തടാകത്തില്‍ തോണി തുഴയുന്ന നൂര്‍ മുഹമ്മദില്‍ ആണ് ആ കുടുംബത്തിന്റെ പ്രതീക്ഷ. നാല് മണിക്കൂര്‍ ബോട്ടില്‍ കറങ്ങിയതിന് മുന്നൂറു രൂപയാണ് ഞങ്ങള്‍ കൊടുത്തത്. ടൂറിസ്റ്റുകളുമായി സംസാരിച്ചു കൊണ്ടേയിരിക്കുന്നതിനാല്‍ അല്പം ഇംഗ്ലീഷൊക്കെ നൂറിനു അറിയാം. ഉര്‍ദുവില്‍ സംസാരിക്കുന്നതിനിടക്ക് അറിയാവുന്ന ഇംഗ്ലീഷില്‍ ഇടയ്ക്കിടയ്ക്ക് ഓരോ ഡയലോഗ് ഫിറ്റ്‌ ചെയ്യുന്നുണ്ട്. നൂറിന്റെ ചങ്ങാത്തം ഞങ്ങള്‍ ശരിക്കും ആസ്വദിച്ചു.

ഇന്ത്യയും പാക്കിസ്താനും തമ്മിലുള്ള തര്‍ക്കങ്ങളെക്കുറിച്ചും ഞാന്‍ നൂറിനോട് ചോദിച്ചു. അപ്പോഴാണ്‌ ആ തര്‍ക്കങ്ങളെക്കുറിച്ചൊന്നും വലിയ അറിവില്ലെന്നും കാശ്മീരില്‍ സമാധാനം ഉണ്ടെങ്കിലേ ഞങ്ങള്‍ക്കൊരു ജീവിതമുള്ളൂ എന്നും നൂര്‍ പറഞ്ഞത്. തീര്‍ത്തും സത്യമാണത് . ജീവിതവൃത്തി കഴിക്കാന്‍ പാട് പെടുന്ന പാവങ്ങളെ സംബന്ധിച്ചിടത്തോളം രാജ്യങ്ങള്‍ തമ്മിലുള്ള തര്‍ക്കങ്ങള്‍ അവരുടെ അജണ്ടകളില്‍ വരാത്ത വിഷയമാണ്. ഭക്ഷണം, വസ്ത്രം, പാര്‍പ്പിടം എന്നിവയൊക്കെയാണ് അവരുടെ ജീവിതത്തിന്റെ 'തര്‍ക്കഭൂമികള്‍ '. നമുക്ക് കാശ്മീര്‍ എന്ന് കേള്‍ക്കുമ്പോള്‍ വെടിയുതിര്‍ക്കുന്ന ഭീകരനെയാണ് ഓര്‍മ വരുന്നത്. കശ്മീര്‍ സന്ദര്‍ശിക്കുന്നവന്‍ പോലും നമുക്കിന്നു ഭീകരനാണ്!!! നമ്മുടെ തന്നെ മാധ്യമങ്ങള്‍ നമുക്ക് നല്‍കുന്ന ചിത്രങ്ങള്‍ അതാണ്‌. ജനസംഖ്യയുടെ ഒരു ശതമാനം പോലും വരാത്ത തീവ്രവാദികളുടെ കണക്കില്‍ നാം തൊണ്ണൂറ്റി ഒമ്പത് ശതമാനത്തിന്റെ ജീവിതം മറക്കുന്നു. ലോകത്തെ ഏറ്റവും പ്രശസ്തമായ ഒരു ടൂറിസ്റ്റ് ആകര്‍ഷണമായി മാറേണ്ട പ്രദേശമാണ് കശ്മീര്‍ . പക്ഷെ മാധ്യമങ്ങള്‍ പര്‍വതീകരിച്ച് കാണിക്കുന്ന 'ഭീകരതയുടെ ദൃശ്യങ്ങള്‍ ' പലരെയും ഇങ്ങോട്ട് വരുന്നതില്‍ നിന്ന് അകറ്റുന്നു. ഇന്ത്യയുടെ മണ്ണിലെ ഏറ്റവും വിലപിടിപ്പുള്ള മുത്താണ് കാശ്മീര്‍ . ആ ഭൂപ്രകൃതിയുടെ വശ്യത വാക്കുകളില്‍ പകര്‍ത്താനാവില്ല. അത് അനുഭവിച്ചു തന്നെ അറിയേണ്ട ഒന്നാണ്. ആ മണ്ണിനെയും അവിടത്തെ ജനതയെയും നാം കുറേക്കൂടി അടുത്തറിയേണ്ടിയിരിക്കുന്നു. അവരെ കുറേക്കൂടി ഇഷ്ടപ്പെടേണ്ടിയിരിക്കുന്നു.

പതിനൊന്ന് മണിയോടെ ഞങ്ങള്‍ ദാല്‍ തടാകത്തില്‍ നിന്ന് പുറത്തിറങ്ങി. പിന്നെ പോയത് ഗുല്‍മാര്‍ഗിലെ മഞ്ഞു മലകളുടെ മുകളിലേക്കാണ്. അതിനെക്കുറിച്ച് എഴുതണോ എന്ന് തീരുമാനിച്ചിട്ടില്ല. യാത്രാവിവരണമൊന്നും എനിക്ക് പറഞ്ഞ ഫരിപാടിയല്ല!

ബ്ലോഗും ഫേസ്ബുക്കും ടോയ്ലറ്റ് സാഹിത്യമോ?

2011-11-10T09:55:00.008+03:00

ബ്ലോഗുകളെക്കുറിച്ചും ഫേസ്ബുക്കിനെക്കുറിച്ചും എഴുത്തുകാരി ഇന്ദുമേനോന്റെ ഒരു പ്രസ്താവന ദേശാഭിമാനിയില്‍ വായിച്ചു. പേനയും പുസ്തകവും ഉപയോഗിച്ചുള്ള എഴുത്തിനു മാത്രമേ പൂര്‍ണത കിട്ടൂ എന്നാണ് അവരുടെ പ്രസ്താവനയുടെ രത്നച്ചുരുക്കം. 'ചുവരിലും മറ്റും എഴുതാനുളള മനുഷ്യന്റെ വാസനയാണ് ബ്ലോഗ്, ഫേസ്ബുക്ക് എന്നിവയുടെ രചനകളിലൂടെ പ്രകടമാകുന്നത്' എന്നും 'ഒരു തരത്തിലുള്ള ടോയ്ലറ്റ് സാഹിത്യം എന്നതിനെ വിളിക്കാം' എന്നും അവര്‍ അഭിപ്രായപ്പെട്ടു കളഞ്ഞു!. ഫേസ്ബുക്കിലെ മലയാളം ബ്ലോഗേഴ്സ് ഗ്രൂപ്പിലൂടെയാണ് ഇന്ദു മേനോന്‍ നടത്തിയ ഈ മഹാപ്രസ്താവനയെക്കുറിച്ച് ഞാന്‍ അറിയുന്നത്. ഉടനെ തന്നെ ഒരു ചെറിയ കമന്റ്‌ ആ സ്റ്റോറി പ്രസിദ്ധീകരിച്ച ദേശാഭിമാനിയുടെ വെബ്സൈറ്റ് ലിങ്കില്‍ നല്‍കുകയും ചെയ്തു. പക്ഷെ അത് റിലീസ് ചെയ്തു കണ്ടില്ല. എന്നാല്‍ പിന്നെ ആ ചെറിയ പ്രതികരണത്തെ ഒന്ന് വലുതാക്കി ബ്ലോഗിലിടാം എന്ന് കരുതി.

ദേശാഭിമാനിയില്‍ ഞാന്‍ നല്‍കിയിരുന്ന കമന്റ്‌ ഇതാണ്. "നിങ്ങള്‍ എവിടെ എഴുതുന്നു എന്നതല്ല, നിങ്ങളുടെ തലയില്‍ എന്തുണ്ട് എന്നതാണ് പ്രശ്നം. താളിയോലയിലോ പേപ്പറിലോ കമ്പ്യൂട്ടറിലോ എവിടെയുമാകട്ടെ എഴുത്തിന്റെ പ്രതിഭ നിര്‍ണയിക്കുന്നത് അത് എഴുതുന്ന പ്രതലം ഏതെന്നു നോക്കിയിട്ടല്ല. കടലാസും അച്ചടിയും വരുന്നതിനു മുമ്പ് എഴുതപ്പെട്ട ഗ്രന്ഥങ്ങളും എഴുത്തുകാരും ഇന്നും കാലത്തെ അതിജീവിച്ചു നിലനില്‍ക്കുന്നുണ്ട്. പ്രതലമല്ല, പ്രതിഭയാണ് അതിജയിക്കുന്നത്. ഇത്തരം വിവരക്കേട് പറയുന്നവര്‍ക്ക് പത്രത്തിന്റെ പേജുകള്‍ അനുവദിക്കുന്നതിനു പകരം വരട്ടു ചൊറിക്കുള്ള ക്രീം കൊടുത്ത് പറഞ്ഞു വിടുന്നതാണ് നല്ലത്.".

ഇന്റര്‍നെറ്റും ഇ മീഡിയകളും ഉപയോഗിക്കാനറിയാത്ത സാഹിത്യകാരന്മാരാണ് ഇത്തരം മീഡിയകളെ പലപ്പോഴും തള്ളിപ്പറഞ്ഞു കാണാറുള്ളത്‌. കടലാസും പേനയും ഉപയോഗിച്ച് എഴുതിയുള്ള ശീലമേ ഞങ്ങള്‍ക്കുള്ളൂ, അതുകൊണ്ട് തന്നെ അതിനപ്പുറമുള്ള ഒന്നിനെയും അംഗീകരിക്കില്ല എന്ന് വാശിയുള്ളവര്‍ . പ്രിന്റ്‌ ചെയ്ത് പുസ്തക രൂപത്തില്‍ വരുന്നവ മാത്രമേ വായിക്കാന്‍ കൊള്ളൂ എന്ന് പറയുന്നവര്‍ . 'പ്രമേയത്തില്‍ , അവതരണത്തില്‍ , ഭാഷാപ്രയോഗങ്ങളില്‍ എല്ലാമെല്ലാം വ്യതിരിക്തതയോടെ മലയാള ചെറുകഥാസാഹിത്യത്തെ സമ്പന്നമാക്കിയ ഒരു കഥാകാരി'യില്‍ നിന്ന് (പ്രയോഗത്തിനു കടപ്പാട് : ഡി സി ബുക്സ്) ഇത്തരമൊരു പ്രസ്താവന വായിക്കേണ്ടി വന്നതില്‍ ഖേദമുണ്ട്. കടലാസും പ്രിന്റിംഗ് ടെക്നോളജിയും കടന്നു വന്ന കാലത്ത് റഷ്യയിലെ കോത്താഴത്ത് ജീവിച്ചിരുന്ന ഒരു മഹാസാഹിത്യകാരി താളിയോലയില്‍ എഴുതുന്നവ മാത്രമേ സാഹിത്യമാവുകയുള്ളൂ, ബാക്കിയുള്ളതെല്ലാം കക്കൂസ് സാഹിത്യമാണ് എന്ന് പറഞ്ഞതായി എനിക്ക് നല്ല ഓര്‍മയുണ്ട് :). ഇന്ദു മേനോന്‍ മാത്രമല്ല, എന്‍ എസ് മാധവന്‍ , വിജു വി നായര്‍ , സന്തോഷ്‌ എച്ചിക്കാനം തുടങ്ങി 'പുസ്തക മീഡിയ'യിലെ പല പുലികളും ബ്ലോഗുകളെക്കുറിച്ചും സോഷ്യല്‍ നെറ്റ് വര്‍ക്കിംഗ്‌ സൈറ്റുകളെക്കുറിച്ചും സമാനമായ പ്രസ്താവനകള്‍ ഇതിനു മുമ്പ് നടത്തിയിട്ടുണ്ട്. ബുദ്ധിവികാസത്തിന്റെ ജനിതക പാരമ്പര്യം വെച്ച് നോക്കിയാല്‍ റഷ്യയിലെ കോത്താഴം സാഹിത്യകാരിയുടെ അമ്മായിയുടെ മക്കള്‍ ആയിരിക്കണം ഇത്തരം പ്രസ്താവനകള്‍ പുറപ്പെടുവിക്കുന്ന സാഹിത്യകാരന്മാര്‍ ! .

ഫേസ്ബുക്ക്‌ എന്നാല്‍ തേങ്ങാക്കുലയാണോ അതോ മാങ്ങാത്തൊലിയാണോ എന്നറിയാത്ത ആളുകളാണ് സോഷ്യല്‍ മീഡിയകളെ അടച്ചാക്ഷേപിക്കുന്നത്. ഫേസ്ബുക്കില്‍ എഴുതുന്ന എഴുത്ത് ടോയ്ലെറ്റില്‍ എഴുതുന്ന അസംബന്ധം ആണെന്ന് പറയണമെങ്കില്‍ ചില്ലറ വിവരക്കേടൊന്നും പോര. തലക്കകത്ത് ഒരു കഷണം ടോയ്ലെറ്റ് പേപ്പറിന്റെ കനത്തിലെങ്കിലും 'പരിസരബോധം' ഉള്ള ആര്‍ക്കും പുതുതലമുറയുടെ ചലനങ്ങളും നിശ്വാസങ്ങളും കാതോര്‍ക്കാന്‍ കഴിയും. സക്രിയമായ സാമൂഹിക മാറ്റങ്ങള്‍ പോലും ഇന്ന് പരുവപ്പെട്ടു വരുന്നത് സോഷ്യല്‍ നെറ്റ് വര്‍ക്കിംഗ്‌ സൈറ്റുകളിലൂടെയാണ്. ലോകത്ത് ഇന്ന് ഏറ്റവും കൂടുതല്‍ വായന നടക്കുന്നത്, ഏറ്റവും കൂടുതല്‍ സൃഷ്ടികള്‍ ഉണ്ടാകുന്നത്, ഏറ്റവും കൂടുതല്‍ സര്‍ഗാത്മക വിപണനം നടക്കുന്നത് ഇ-മീഡിയകളിലാണ്. കോത്താഴത്തെ കിണറ്റില്‍ കിടക്കുന്ന തവള അത് കാണുന്നില്ലെങ്കില്‍ അത് തവളയുടെ മാത്രം കുഴപ്പമല്ല. അതിനെ കിണറ്റിലെത്തിച്ച 'തരിശു ഭൂമി'കളുടെ കൂടി കുഴപ്പമാണ്. വായനയുടെയും എഴുത്തിന്റെയും പുതിയ വസന്ത ഭൂമികളെ പ്രണയിക്കാതെ പഴമയുടെ തരിശു ഭൂമികളില്‍ 'കടലാസ് കൃഷി' നടത്തുന്നവരുടെ കൂട്ടമാണ്‌ വെള്ളമില്ലാത്ത ഇത്തരം കിണറുകള്‍ കുഴിച്ചുവെച്ചിരിക്കുന്നത്.

കുന്നംകുളത്തെ പ്രസ്സില്‍ പുസ്തകം അടിച്ചു വിതരണം ചെയ്തത് കൊണ്ടല്ല വാത്മീകിയെ നാലാള്‍ അറിഞ്ഞത്. ഡി സി ബുക്സിന്റെ റോയല്‍റ്റിയുടെ പിന്‍ബലത്തിലല്ല സോക്രട്ടീസിന്റെ ചിന്തകള്‍ തലമുറകള്‍ കൈമാറപ്പെട്ടത്‌. ഓരോരോ കാലത്തിനും ഓരോരോ ആശയ സംവേദന രീതികള്‍ ഉണ്ട്. കാലം മാറുന്നതിനനുസരിച്ച് ആ രീതികളും മാറിക്കൊണ്ടിരിക്കും. പക്ഷെ പ്രതിഭയുടെ തിളക്കം മാറില്ല. അത് നശിക്കില്ല. ബൈന്‍ഡു ചെയ്ത പുസ്തകത്തില്‍ എഴുതിയത് മാത്രമേ സാഹിത്യമാകൂ എന്ന് കരുതുന്നവര്‍ ഇന്നും ജീവിച്ചിരിപ്പുണ്ടെങ്കില്‍ അവര്‍ക്ക് വേണ്ടി കുതിരവട്ടത്ത്‌ ഒരു പുതിയ ബ്ലോക്ക് തുടങ്ങുകയാണ് വേണ്ടത്. പുതുതലമുറയുടെ ശീലങ്ങള്‍ പരമ്പരാഗത വായനശാലാ സംസ്കാരത്തില്‍ നിന്നും ഏറെ അകലെയാണ്. വായന ശാലകളിലും സ്കൂള്‍ ലൈബ്രറികളിലും കയറിയിറങ്ങി പുസ്തകങ്ങള്‍ തിരയുന്ന ഒരു കുട്ടിയെ നമുക്ക് ഇനി തിരിയിട്ടു തിരഞ്ഞാല്‍ കിട്ടില്ല. എന്നാല്‍ ഗൂഗിളില്‍ സെര്‍ച്ച് ചെയ്യുന്ന പതിനായിരക്കണക്കിനു കുട്ടികളെ നമുക്ക് കാണാന്‍ കഴിയും. പുതിയ കാലത്തിന്റെ വായനാ ശീലങ്ങളെ തിരിച്ചറിഞ്ഞ് അതിനനുസൃതമായി മാറാന്‍ തയ്യാറാകാതെ മടിച്ചു നില്‍ക്കുന്നവര്‍ അടുത്ത തലമുറയുടെ 'നോട്ടുബുക്കില്‍ ' നിന്ന് അപ്രത്യക്ഷമാകും എന്ന കാര്യത്തില്‍ സംശയമില്ല.

ഇത്രയും പറഞ്ഞതില്‍ നിന്ന് തെറ്റിദ്ധരിക്കരുത്. ബ്ലോഗുകളിലും ഫേസ്ബുക്കിലും കാണുന്നതെല്ലാം ഒന്നാന്തരം സാഹിത്യമെന്നല്ല പറഞ്ഞു വരുന്നത്. ഒരു കുഞ്ഞു വളര്‍ന്നു വരുന്നെന്ന പോലെ ശൈശവഘട്ടത്തിലെ ശുശ്രൂഷകള്‍ ഇവിടെ വേണ്ടത്ര ലഭിക്കേണ്ടതുണ്ട്. മലവും മൂത്രവുമൊക്കെ കിടപ്പറയിലും തീന്മേശയിലും കണ്ടെന്നു വരും. അവയൊക്കെ വൃത്തിയാക്കാനുള്ള സന്മനസ്സും സാവകാശവും വേണം. വീഴുന്ന കുട്ടിയെ കണ്ടു പരിഹസിക്കരുത്. ഉടുപ്പില്‍ മൂത്രമൊഴിച്ചാല്‍ തിരണ്ടി വാല്‍ കൊണ്ട് അടിക്കരുത്. വായനശാലകളില്‍ നിന്ന് പുസ്തമെടുത്തും പബ്ലിക് ലൈബ്രറികളില്‍ കയറി വായിച്ചും വളര്‍ന്ന ഒരു ബാല്യം തന്നെയാണ് എനിക്കുമുള്ളത്. ആ കാലത്തെയും ആ രീതികളെയും ഇന്നും ഗൃഹാതുരതയോടെ മനസ്സില്‍ കൊണ്ട് നടക്കുകയും ചെയ്യുന്നുണ്ട്. പക്ഷെ മാറുന്ന കാലത്തിന്റെ സ്പന്ദനം തിരിച്ചറിയാന്‍ അത്തരം വൈകാരികതകള്‍ തടസ്സമാകരുത് എന്നാണ് പറഞ്ഞു വന്നത്. സര്‍ഗപ്രതിഭയുള്ള എഴുത്തുകാര്‍ സോഷ്യല്‍ മീഡിയകളെ ഫലപ്രദമായി ഉപയോഗപ്പെടുത്താന്‍ മുന്നോട്ടു വരണം. പുതിയ വായനാ സംസ്കാരത്തിന്റെ സാധ്യതകളെ ഉപയോഗപ്പെടുത്താനും വിപണനം ചെയ്യാനും പുസ്തശാലകളും തയ്യാറാവണം. നമ്മുടെ സാഹിത്യവും പൈതൃകവും പുതുതലമുറയിലേക്ക് പകര്‍ന്നു നല്‍കുവാന്‍ ഇ-മീഡിയകളെ ടോയ്ലെറ്റ് എന്ന് ആക്ഷേപിച്ചു മാറി മാറിനില്‍ക്കുകയല്ല വേണ്ടത്.

പഴയ എഴുത്തുകാരോടും അവരുടെ സാഹിത്യ സൃഷ്ടികളോടും തെല്ലെങ്കിലും സ്നേഹമുള്ളവര്‍ ചരമ ദിനത്തില്‍ സെമിനാര്‍ സംഘടിപ്പിക്കുന്നതിനു പകരം അവരുടെ പുസ്തകങ്ങളുടെ സോഫ്റ്റ്‌ കോപ്പികള്‍ ഇന്‍റര്‍നെറ്റില്‍ ലഭ്യമാക്കാനുള്ള ശ്രമങ്ങള്‍ ആണ് നടത്തേണ്ടത്. വായനക്കാര്‍ എവിടെയാണോ ഉള്ളത് അവിടെ പുസ്തകങ്ങള്‍ ലഭ്യമാവണം. പൊടിപിടിച്ച പുസ്തക ശാലകളുടെ ഷെല്‍ഫിനുള്ളില്‍ കിടന്ന് മഹാ സാഹിത്യകാരന്മാര്‍ അകാല ചരമം പ്രാപിക്കാതിരിക്കണമെങ്കില്‍ ഡിജിറ്റല്‍ യുഗത്തിലേക്ക് അവരെ എത്തിക്കാനുള്ള ശ്രമങ്ങള്‍ വേണം. കാലത്തിനനുസരിച്ച അത്തരം ശ്രമങ്ങള്‍ മുന്‍ തലമുറകള്‍ നടത്തിയത് കൊണ്ടാണ് നൂറ്റാണ്ടുകള്‍ പഴക്കമുള്ള സാഹിത്യ സൃഷ്ടികള്‍ നമ്മുടെ തലമുറയ്ക്ക് പരിചിതമായത്. സാഹിത്യകാരന്മാരെ കുഴിയിലേക്ക് എടുത്തു വെക്കുമ്പോള്‍ പതിനാലു ആചാര വെടി ആകാശത്തേക്ക് വെച്ചു കഴിഞ്ഞാല്‍ എല്ലാമായി എന്ന് കരുതുന്ന നമ്മുടെ സാംസ്കാരിക വകുപ്പുകള്‍ക്കും ഈ ദിശയില്‍ ചിലതൊക്കെ ചെയ്യാന്‍ കഴിയും. കഴിയേണ്ടതുണ്ട്.

തകഴി ശിവശങ്കര പിള്ള എന്ന് മലയാളത്തില്‍ എഴുതി ഗൂഗിളില്‍ സേര്‍ച്ച്‌ ചെയ്തപ്പോള്‍ എനിക്ക് കിട്ടിയത് 334 റിസള്‍ട്ടുകളാണ്. മലയാളത്തിലെ ഒരു ശരാശരി ബ്ലോഗറുടെ പേര്‍ എഴുതി സെര്‍ച്ചിയപ്പോള്‍ പതിനയ്യായിരത്തിലധികം റിസള്‍ട്ടുകള്‍ വന്നു. ഗൂഗിള്‍ അമ്മച്ചിക്ക് തകഴിയെക്കാള്‍ പരിചയം ആ ബ്ലോഗറെ ആണെന്നര്‍ത്ഥം. ഇന്റര്‍നെറ്റില്‍ ഉറക്കമുണര്‍ന്ന് ഇന്റര്‍നെറ്റില്‍ തന്നെ കുളിയും പല്ല് തേപ്പും കഴിഞ്ഞു ഇന്റര്‍നെറ്റില്‍ തന്നെ കിടന്നുറങ്ങുന്ന ഒരു ഇ-യുവാവിനെ/യുവതിയെ സംബന്ധിച്ചിടത്തോളം ഗൂഗിളിനേക്കാള്‍ പരിതാപകരമായിരിക്കും അവസ്ഥ എന്ന് പറയേണ്ടതില്ല. തകഴിയോ? ലവനാര്? എന്നൊരു ചോദ്യം വന്നാല്‍ പോലും ഞെട്ടേണ്ടതില്ലാത്ത വിധം പരമ്പരാഗത വായനയുടെയും എഴുത്തിന്റെയും വിളനിലങ്ങള്‍ വരള്‍ച്ചയുടെ ചുടുകാറ്റില്‍ വിണ്ടു കീറിക്കിടക്കുകയാണ്. വായനയുടെയും എഴുത്തിന്റെയും വസന്തം ഇപ്പോള്‍ ഇലക്ട്രോണിക് മീഡിയകളുടെ തിരുമുറ്റത്താണ് ഉള്ളത്.

പടിഞ്ഞാറന്‍ നാടുകളിലെ പ്രിന്റ്‌ മീഡിയകള്‍ നിലനില്പിന്റെ ചക്രശ്വാസം വലിച്ചു കൊണ്ടിരിക്കുകയാണ് . എണ്ണമറ്റ എഡിഷനുകള്‍ ഉണ്ടായിരുന്ന, നൂറ്റാണ്ടുകളുടെ പഴക്കമുള്ള പല പത്രങ്ങളും അവരുടെ പ്രിന്റ്‌ എഡിഷനുകള്‍ നിര്‍ത്തുന്നതിനെക്കുറിച്ചാണ് ഇപ്പോള്‍ ആലോചിച്ചു കൊണ്ടിരിക്കുന്നത്. അവരുടെയെല്ലാം പ്രധാന ശ്രദ്ധ ഇപ്പോള്‍ വെബ്‌ എഡിഷനുകളിലാണ്. ഇന്റര്‍നെറ്റിന്റെ പ്രചാരം താരതമ്യേന കുറവായ ഇന്ത്യയില്‍ പ്രിന്റ്‌ എഡിഷനുകള്‍ കുറച്ചു കാലം കൂടെ നില നിന്നേക്കും. പക്ഷെ അവരും ഇന്നല്ലെങ്കില്‍ നാളെ ഇ-മീഡിയക്ക് വഴി മാറിക്കൊടുത്തേ മതിയാവൂ. ഇപ്പോള്‍ തന്നെ ആ ദിശയില്‍ ആസൂത്രണം നടത്തുന്നവര്‍ വിജയിക്കും. അല്ലാത്തവര്‍ കാലത്തിന്റെ വിസ്മൃതിയിലേക്ക് മറയും.

ഓണ്‍ലൈന്‍ എന്‍സൈക്ലോപീഡിയ ആയ വിക്കിപീഡിയ ഒരുദാഹരണമായി എടുക്കാം. പതിറ്റാണ്ടുകളുടെ പാരമ്പര്യവും ആധികാരികതയും അവകാശപ്പെടാവുന്ന നിരവധി വിശ്വവിജ്ഞാന കോശങ്ങളുണ്ട്. എന്‍സൈക്ലോപീഡിയ ബ്രിട്ടാനിക്ക അടക്കമുള്ള നിരവധി വിശ്വപ്രസിദ്ധ ഗ്രന്ഥങ്ങള്‍ . അവയെയെല്ലാം ചുരുങ്ങിയ വര്‍ഷങ്ങള്‍ക്കുള്ളിലാണ് വിക്കിപീഡിയ വിഴുങ്ങിക്കളഞ്ഞത്‌. ഇലക്ട്രോണിക് വിസ്ഫോടനത്തിന്റെ പള്‍സ് പോകുന്ന വഴി നോക്കി തുടക്കം കുറിച്ച ഒരു ചെറിയ സംരംഭം ഇന്ന് വിജ്ഞാനത്തിന്റെ ഒരു മഹാസാമ്രാജ്യമായി വളര്‍ന്നു കഴിഞ്ഞു. മാറാന്‍ തയ്യാറില്ലാത്ത പഴയ 'പുലി'കള്‍ തങ്ങളുടെ കൂടുകളില്‍ പുല്ലു തിന്നു കഴിഞ്ഞു കൂടുന്നു.

ഇന്ദുമേനോന്റെ പ്രസ്താവനയോടുള്ള ഒരു വൈകാരിക പ്രതികരണം ആയി ഈ പോസ്റ്റിനെ കാണരുത്. സര്‍ഗപ്രതിഭയുള്ള ഒരു കഥാകാരി എന്ന നിലക്ക് അവരോടു അങ്ങേയറ്റം ബഹുമാനവും ആദരവും ഉണ്ട്. പക്ഷെ ഇ-മീഡിയകള്‍ കക്കൂസ് സാഹിത്യമാണെന്ന വില കുറഞ്ഞ പ്രസ്താവനയോട് വിയോജിക്കാതെ വയ്യ. ഇത്തരം പ്രസ്താവനകള്‍ നിരന്തരം നടത്തിക്കൊണ്ടിരിക്കുന്ന മറ്റു സാഹിത്യ പുലികളോടുള്ള വിയോജിപ്പ് കൂടിയാണ് ഒരു ചെറിയ ബ്ലോഗ്‌ ഉടമയായ ഞാനിവിടെ പ്രകടിപ്പിച്ചത്. പുതിയ സാങ്കേതിക വിദ്യകളും രീതികളുമായി ലോകം മുന്നോട്ടു തന്നെ പൊയ്ക്കൊണ്ടിരിക്കും. മാറ്റം വരാത്തതായി ലോകത്ത് ഒന്നേയുള്ളൂ, അത് മാറ്റം മാത്രമാണ് എന്ന് തിരിച്ചറിയാന്‍ 'പുലികള്‍ക്കും പൂച്ചകള്‍ക്കും' കഴിയണം. അതല്ല, ചരിത്രത്തിന്റെ ചവറ്റുകുട്ടയില്‍ വിലയം പ്രാപിക്കാനാണ് ആഗ്രഹമെങ്കില്‍ ആ ആഗ്രഹം ദൈവം സാധിപ്പിച്ചു തരട്ടെ എന്ന് മുട്ടിപ്പായി പ്രാര്‍ത്ഥിക്കുകയും ചെയ്യുന്നു.

Related Posts
പേര് ഫേസ്ബുക്ക്, വയസ്സ് പതിനാറ് (Female)
ടീനേജുകാരുടെ സോഷ്യല്‍ നെറ്റ്വര്‍ക്കിംഗ്
ഒടുക്കത്തെ Google+
ജനകോടികളുടെ വിശ്വസ്ത ബ്ലോഗര്‍

പലനാള്‍ ശുംഭന്‍ ഒരുനാള്‍ പിടിയില്‍ !

2011-11-08T11:32:00.001+03:00

എല്ലാ ശുംഭന്മാര്‍ക്കും ഈ വിധി ഒരു പാഠമാണ്. രാഷ്ട്രീയക്കാരനായാല്‍ എന്ത് അസംബന്ധവും വിളിച്ചു കൂവാമെന്നുള്ള ധിക്കാരത്തിനേറ്റ കനത്ത തിരിച്ചടിയാണ് എം വി ജയരാജനെ പൂജപ്പുരയില്‍ അയക്കാനുള്ള ഹൈക്കോടതി ഡിവിഷന്‍ ബെഞ്ചിന്റെ വിധി. കഴിഞ്ഞ ഒന്നര വര്‍ഷമായി ജയരാജന്‍ ജുഡീഷ്യറിയെ മൂക്കിനു തോണ്ടി കളിക്കുകയായിരുന്നു. കിട്ടാവുന്ന വേദികളിലൊക്കെ കോടതികള്‍ക്കെതിരെ കുരച്ചു ചാടുകയായിരുന്നു. ഉന്നത സ്ഥാനത്തിരിക്കുന്ന ഒരു രാഷ്ട്രീയ നേതാവില്‍ നിന്നുണ്ടാകേണ്ട ഉത്തരവാദിത്വ ബോധത്തിന്റെ ഏറ്റവും ദയനീയമായ പ്രതിരൂപമാണ് താനെന്നു തുടരെത്തുടരെ തെളിയിച്ചതിന് അര്‍ഹിക്കുന്ന ശിക്ഷ കിട്ടി എന്ന് മാത്രമേ ഇപ്പോള്‍ പറയാനൊക്കൂ.

കോടതിയെ വിമര്‍ശിച്ചതിനല്ല ജയരാജന്‍ ജയിലില്‍ പോകുന്നത്, ജഡ്ജിമാരെ ശുംഭന്മാര്‍ എന്ന് വിളിച്ചതിനാണ്. കോടതി വിമര്‍ശനങ്ങള്‍ക്ക് അതീതമാണ് എന്ന് ആരും വാദിക്കുന്നില്ല. കോടതിയെ വിമര്‍ശിക്കാം. പക്ഷെ അതിനു അതിന്റേതായ ചില രീതികളും മാന്യതയും ഉണ്ടാവണം. ശുംഭന്മാര്‍ എന്ന് വിളിച്ചു ന്യായാധിപന്‍മാരെ അപഹസിച്ചത് പോരാഞ്ഞു കോടതിയേയും ജനങ്ങളെയും കുരങ്ങു കളിപ്പിക്കാന്‍ കൂടി ജയരാജന്‍ ശ്രമിച്ചു. ശുംഭന്‍ എന്ന പദത്തിന്റെ അര്‍ത്ഥം 'പ്രകാശം പരത്തുന്നവന്‍ ' എന്നാണെന്നാണ് അദ്ദേഹം കോടതിയില്‍ വാദിച്ചത്. കോടതിക്ക് പുറത്തു പരസ്യമായി ജഡ്ജിമാരെ വിവരം കെട്ടവര്‍ എന്ന് പറയുക, ഇനിയും വിളിക്കുമെന്ന് ആക്രോശിക്കുക, കോടത്തിക്കകത്തെത്തുമ്പോള്‍ ജഡ്ജിമാര്‍ പ്രകാശം പരത്തുന്നവര്‍ ആണെന്ന് വാദിക്കുക!!. ഇന്ത്യന്‍ ജുഡീഷ്യറിയുടെ ചരിത്രത്തില്‍ ഇത്പോലൊരു പൊറാട്ട് നാടകം ഏതെങ്കിലുമൊരു രാഷ്ട്രീയ നേതാവ് നടത്തിയതായി കേട്ടിട്ടില്ല. കേസ് കേള്‍ക്കുന്ന ജഡ്ജിമാരുടെ സാമാന്യബുദ്ധിയെ തന്നെ പരിഹസിക്കുന്നതായിരുന്നു ഈ കേസിന്റെ വാദം നടക്കുമ്പോള്‍ ജയരാജന്‍ സ്വീകരിച്ച സമീപനങ്ങള്‍ .

ഭാഷയെ വ്യഭിചരിച്ചു കൊണ്ട് ഇത്തരമൊരു സര്‍ക്കസ് കളിക്കുന്നതിനു പകരം മാന്യമായി കേസ് വാദിച്ചു കൊണ്ട് ജയിലില്‍ പോയിരുന്നുവെങ്കില്‍ പാര്‍ട്ടി പ്രവര്‍ത്തകര്‍ക്കിടയിലെങ്കിലും ജയരായന് ഒരു ഇമേജു ഉണ്ടാകുമായിരുന്നു. 'ശുംഭന്‍ എന്ന് വിളിച്ചത് നേരാണ്. അതിനു തക്കതായ കാരണങ്ങള്‍ ഉണ്ട്' എന്ന് പറഞ്ഞു കൊണ്ട് കേസ് വാദിക്കുകയാണ് ജയരാജന്‍ ചെയ്തിരുന്നതെങ്കില്‍ അതിനൊരു ആശയ പോരാട്ടത്തിന്റെ മുഖം ലഭിക്കുമായിരുന്നു. കോടതിക്ക് പുറത്തു ഒരു പുലിയെപ്പോലെ ചീറുകയും കോടതിക്കുള്ളില്‍ ഒരു എലിയെപ്പോലെ പതുങ്ങുകയും ചെയ്യുകയാണ് ജയരാജന്‍ ചെയ്തത്. അതുകൊണ്ട് തന്നെയാണ് അദ്ദേഹം പരിഹാസ്യനായതും.

ആവേശം തലയ്ക്കു പിടിക്കുമ്പോള്‍ നാക്ക് പിഴക്കുക സാധാരണമാണ്. പക്ഷെ സമനില തിരിച്ചു കിട്ടുമ്പോള്‍ തെറ്റിയ പറ്റിനെ തിരിച്ചറിയാന്‍ സാധിക്കണം. ശുംഭന്‍ എന്ന് വിളിച്ചത് തെറ്റായിപ്പോയി, ഖേദിക്കുന്നു എന്ന ഒരൊറ്റ വാചകം കൊണ്ട് തീര്‍ക്കാവുന്ന പ്രശ്നമാണ് പൂജപ്പുരയില്‍ ഉണ്ട തിന്നേണ്ട അവസ്ഥയിലേക്ക് ജയരാജനെ എത്തിച്ചത്. തെറ്റ് പറ്റിയാല്‍ അത് പരസ്യമായി തുറന്നു പറയാനുള്ള ആര്‍ജ്ജവം കാണിക്കാതെ വീണിടത്ത് കിടന്നു തല കുത്തിമറിയുന്നത് ഇനിയെങ്കിലും രാഷ്ട്രീയക്കാര്‍ നിര്‍ത്തണം. അണികളുടെ കയ്യടിയില്‍ ആവേശം കയറി വി എസ്സിനെ പുലഭ്യം പറഞ്ഞ ഗണേഷ് കുമാര്‍ പരസ്യമായി മാപ്പ് പറയാന്‍ തയ്യാറായ സംഭവം ഉദാഹരണമായി നമുക്ക് മുന്നിലുണ്ട്. അത്തരമൊരു മാപ്പുപറച്ചില്‍ കൊണ്ട് ഒരു നേതാവിന്റെയും ഇമേജ് ഇടിയില്ല.മറിച്ച് അത് വര്‍ധിക്കുകയാണ് ചെയ്യുക.

നിയമ വ്യവസ്ഥയെ വെല്ലുവിളിക്കുന്ന ഒരു ധിക്കാര രാഷ്ട്രീയത്തിന്റെ മുഖമാണ് ജയരാജന്‍ പലപ്പോഴും കാണിച്ചിട്ടുള്ളത്. അതുകൊണ്ട് തന്നെ ഈ വിധിയില്‍ സങ്കടപ്പെടുന്നവര്‍ വിരളമായിരിക്കും. അസിസ്റ്റന്റ്‌ പോലീസ് കമ്മീഷണര്‍ രാധാകൃഷ്ണപ്പിള്ളയെ കാണുന്നിടത്ത് വെച്ച് തല്ലാനാണ് ഏതാനും ദിവസം മുമ്പ് ജയരാജന്‍ എസ് എഫ് ഐ കുട്ടികളോട് പരസ്യമായി പറഞ്ഞത്. നിയമ വ്യവസ്ഥയെ ബഹുമാനിക്കുന്ന ഒരു രാഷ്ട്രീയ നേതാവില്‍ നിന്ന് ഒരിക്കലും ഉണ്ടാകാന്‍ പാടില്ലാത്ത ഒരു പ്രസ്താവമായിരുന്നു അത്. യൂണിഫോം ഇല്ലാതെ കണ്ടാല്‍ ഒരു പോലീസ് ഓഫീസറെ അടിച്ചു എല്ലൂരിക്കോ എന്ന് ഒരു രാഷ്ട്രീയ നേതാവിന് പറയാന്‍ കഴിയണമെങ്കില്‍ അയാളില്‍ എത്ര മാത്രം നിയമ പ്രതിബദ്ധത ഉണ്ടാകും?. പോലീസ് ഓഫീസര്‍ തെറ്റ് ചെയ്‌താല്‍ അയാളെ ശിക്ഷിക്കാന്‍ ഇവിടെ നിയമവും കോടതിയും ഉണ്ടെന്നിരിക്കെ കുട്ടികളോട് നിയമം കയ്യിലെടുക്കാന്‍ പറഞ്ഞ രാഷ്ട്രീയ നേതാവാണ് ജയരാജന്‍. ഇത്തരം നേതാക്കന്മാര്‍ അല്പം ഉണ്ട തിന്നുന്നത് എന്ത് കൊണ്ടും നല്ലതാണ്. ഈ വിധി സി പി എം കാര്‍ക്ക് മാത്രമുള്ള പാഠമല്ല. ഈ കുളിമുറിയില്‍ നഗ്നരായ എല്ലാ രാഷ്ട്രീയക്കാര്‍ക്കുമുള്ള പാഠമാണ്. നാക്കിനും വാക്കിനും അല്പമൊരു ലൈസന്‍സ് വേണം. അത്തരമൊരു ബോധോദയം എല്ലാ രാഷ്ട്രീയ നേതാക്കള്‍ക്കുമുണ്ടാകാന്‍ ഈ വിധി കാരണമാകട്ടെ.

Related Posts
വെല്‍ഡന്‍ ഗണേഷ്, വെല്‍ഡന്‍ !!
പിള്ളയെ തട്ടാന്‍ ജയരാജന്റെ ക്വട്ടേഷന്‍
പരിയാരത്തെ ശുംഭന്മാരും പാവം NRI കളും

ഏജന്റുമാരുടെ സമരം, മനോരമ വിറക്കുന്നു.

2011-11-04T15:51:00.003+03:00

മനോരമയുടെ കാര്യം എന്തായി, പൂട്ടിയോ? എന്ന പേരില്‍ ഞാന്‍ ഒരു പോസ്റ്റ്‌ എഴുതിയിരുന്നു. എടവനക്കാട്ടുകാരുടെ മനോരമ ബഹിഷ്കരണ സമരത്തെക്കുറിച്ച് എഴുതിയ പോസ്റ്റിന്റെ തുടര്‍ച്ചയായിരുന്നു അത്. അതോടെ മനോരമ വിരുദ്ധന്‍ എന്ന ഒരു ഇമേജ് എനിക്ക് കിട്ടി. അന്ന് കിട്ടിയ ഇമേജിനെ ഒന്നുകൂടി സ്ട്രോങ്ങ്‌ ആക്കാനാണ് ഈ പോസ്റ്റ്‌. ഇത്തവണ നാട്ടില്‍ പോയപ്പോള്‍ പത്രം ഇടുന്ന പയ്യനുമായി ഞാന്‍ ഉടക്കി. രണ്ടു പതിപ്പുകള്‍ ഉള്ള മനോരമയുടെ ഒരു പതിപ്പ് മാത്രമേ അവന്‍ വീട്ടില്‍ ഇട്ടുള്ളൂ. ചോദിച്ചപ്പോള്‍ 'ഞങ്ങള്‍ സമരത്തിലാ' എന്ന് മറുപടി. "എന്തോന്ന് സമരം? കാശ് എണ്ണി വാങ്ങിക്കുന്നുണ്ടല്ലോ?. ഇനി മുതല്‍ പകുതി കാശേ തരൂ". ഞാനും വിട്ടു കൊടുത്തില്ല.

"വെരട്ടല്ലേ സാറേ, പത്രങ്ങള്‍ പേജു കൂട്ടുമ്പോഴും പതിപ്പ് കൂട്ടുമ്പോഴും അത് ചുമന്നു കൊണ്ട് വരുന്ന ഞങ്ങള്‍ക്ക് ഒരു നയാപൈസ കൂടുതല്‍ തരുന്നില്ല. അതുകൊണ്ട് സ്പെഷ്യല്‍ പതിപ്പുകളൊന്നും ഇനി മുതല്‍ കിട്ടില്ല. നിങ്ങള്‍ക്ക് വേണ്ടെങ്കില്‍ പത്രം നിറുത്തിക്കോളൂ". നീട്ടിയൊരു ബെല്ലടിച്ചു അവന്‍ സൈക്കിള്‍ വിട്ടു. അതോടെ സമരത്തിന്റെ ഏകദേശ രൂപം എനിക്ക് പിടികിട്ടി. അന്വേഷിച്ചപ്പോള്‍ അറിഞ്ഞത് ഈ സമരം തുടങ്ങിയിട്ട് കുറച്ചു നാളായി എന്നാണ്. മനോരമ, മാതൃഭൂമി തുടങ്ങിയ പത്രങ്ങള്‍ രണ്ടു പതിപ്പുകള്‍ ഉണ്ടാകുമ്പോള്‍ ഒരു പതിപ്പ് മാത്രമേ വായനക്കാര്‍ക്ക് കിട്ടൂ. ഞായറാഴ്ച ഒഴികെയുള്ള ദിവസങ്ങളില്‍ ഇറക്കുന്ന സ്പെഷ്യല്‍ പതിപ്പുകളും കിട്ടില്ല. വെണ്ടയ്ക്ക വിത്ത്‌, ഷാമ്പൂ, നായ്ക്കുരണപ്പൊടി തുടങ്ങി ആഴ്ചപ്പതിപ്പുകള്‍ക്കൊപ്പം ഫ്രീയായി കൊടുക്കുന്ന വസ്തുവകകളും വീട്ടില്‍ എത്തില്ല. മലപ്പുറം ജില്ലയില്‍ ഉടനീളം ഈ സമരമുണ്ട് എന്നും അറിയാന്‍ കഴിഞ്ഞു.

കോഴിക്കോട് ജില്ലയിലെ ഏജന്റുമാര്‍ ഇപ്പോള്‍ നടത്തുന്ന സമരം കുറേക്കൂടി സ്ട്രോങ്ങ്‌ ആണ്. അവര്‍ മനോരമ പത്രം വിതരണം ചെയ്യുന്നത് തന്നെ നിര്‍ത്തി. ഏതാണ്ട് രണ്ടു ആഴ്ചയോളമായി കോഴിക്കോട് ജില്ലയില്‍ മനോരമ പത്രം വരിക്കാര്‍ക്ക് കിട്ടുന്നില്ല. ഒരു മുഖപ്രസംഗം എഴുതി ഏജന്റുമാരുടെ സമരത്തെ എതിര്‍ക്കുന്നു എന്ന് വരുത്തിയിട്ടുണ്ടെങ്കിലും കിട്ടിയ ഗ്യാപ്പില്‍ മാതൃഭൂമി അടിച്ചു കയറുകയാണ്. മറ്റു ചെറുകിട പത്രങ്ങളും സന്ദര്‍ഭം ഉപയോഗപ്പെടുത്തി വരിക്കാരെ പിടിക്കാനുള്ള ശ്രമങ്ങള്‍ തകൃതിയായി നടത്തുന്നുണ്ട്. പത്ര വിതരണക്കാരുടെ ആവശ്യങ്ങള്‍ കേട്ടിടത്തോളം ന്യായമാണ്. അവരുടെ സമരം മനോരമക്കെതിരെ മാത്രമല്ല. എല്ലാ പത്രങ്ങളുടെയും കമ്മീഷന്‍ വ്യവസ്ഥകള്‍ക്കെതിരെയാണ്. ഏജന്റുമാരെ പിഴിയുന്ന കാര്യത്തില്‍ ഏറ്റവും കടുംപിടുത്തം പിടിക്കുന്ന പത്രം എന്ന നിലക്കാണ് മനോരമക്കെതിരെയുള്ള ഇപ്പോഴത്തെ സമരം.

എട്ടു പേജ് പത്രം വിതരണം ചെയ്തിരുന്ന കാലത്ത് ഏജന്റിനു കിട്ടിയിരുന്ന കമ്മീഷന്‍ മുപ്പത്തഞ്ചു ശതമാനമായിരുന്നു. പേജുകളുടെ എണ്ണം കൂടുന്നതിനനുസരിച്ച് മനോരമയും മാതൃഭൂമിയും കമ്മീഷന്‍ കുറച്ചു കൊണ്ടേയിരുന്നു! ഇപ്പോള്‍ ഏജന്റിനു ലഭിക്കുന്ന കമ്മീഷന്‍ ഇരുപത്തിയഞ്ച് ശതമാനമാണ്!. പേജുകളും സപ്ലിമെന്റുകളും കൂടുന്നതിനനുസരിച്ച് പരസ്യ വരുമാനത്തില്‍ കോടികളുടെ ലാഭം കൊയ്യുന്ന പത്ര മുത്തശ്ശിമാര്‍ അവ ചുമന്നു കൊണ്ട് പോയി വിതരണം ചെയ്യുന്ന പാവങ്ങളുടെ കഴുത്തിനു പിടിക്കുന്നു എന്ന് ചുരുക്കം. അധിക പതിപ്പുകളും സപ്ലിമെന്റുകളും ഇറക്കുന്ന ദിവസം കമ്മീഷന്‍ തുകയില്‍ ഒരു നേരിയ വര്‍ധനവ്‌ നല്‍കിയാല്‍ തീരുന്ന പ്രശ്നമാണ് ഇപ്പോള്‍ പത്രവിതരണം തന്നെ നിന്ന് പോകുന്ന ഒരവസ്ഥയിലേക്കു എത്തിച്ചിരിക്കുന്നത്. ഇനിയും ബാലവേല നിരോധിച്ചിട്ടില്ലാത്ത ഏക ഫീല്‍ഡ് പത്രവിതരണമാണ്!. അതിരാവിലെ സ്കൂളില്‍ പോകുന്നതിനു മുമ്പ് പത്ര വിതരണത്തിന് പോകുന്ന കുട്ടികളെ എവിടെയും കാണാം. ഒരു പത്രവും ഇതിനെക്കുറിച്ച് ഫീച്ചര്‍ എഴുതാറില്ല!. അതിരാവിലെ 50 വീടുകള്‍ കയറിയിറങ്ങി പത്രം ഇടുന്ന ഒരു പയ്യന് ഒരു മാസം എജന്റ്റ് നല്‍കുന്നത് 600 ഓ 700 ഓ രൂപയാണ്. ഉറക്കമൊഴിച്ചു ഒരു മാസം കഷ്ടപ്പെടുന്നതിനു പകരം രണ്ടു ദിവസം പെയിന്റിംഗ് പണിക്കു ഹെല്‍പ്പറായി പോയാല്‍ ഇതിലധികം പണം കിട്ടും. തനിക്കു കിട്ടുന്ന തുച്ഛം കമ്മീഷന്‍ തുകയില്‍ നിന്ന് ഇതിലധികം പണം നല്‍കുവാന്‍ ഒരു ഏജന്റിനു കഴിയില്ല എന്നത് സത്യമാണ്. അതുകൊണ്ട് തന്നെ മുതിര്‍ന്നവരെ ഈ പണിക്കു കിട്ടുകയുമില്ല. സത്യത്തില്‍ ബാലവേല നടത്തിക്കുന്ന സാഹചര്യത്തിലേക്ക് ഈ മേഖലയെ തള്ളിവിട്ടത് പത്രവ്യവസായത്തിലൂടെ കൊഴുത്തു തടിച്ച മനോരമയും മാതൃഭൂമിയും അടക്കമുള്ള പത്രങ്ങളാണ്.

മനോരമയെ പേടിച്ചു ഈ സമരത്തെക്കുറിച്ചുള്ള വാര്‍ത്തകള്‍ ഒരു പത്രവും ചാനലും വേണ്ട രൂപത്തില്‍ കവര്‍ ചെയ്യുന്നില്ല. സമാന്തര മീഡിയകളായ ഫേസ്ബുക്കിലും ബ്ലോഗുകളിലും പത്രവിതരണം ചെയ്തു ജീവിക്കുന്ന ഈ പാവങ്ങള്‍ വേണ്ടത്ര ഇല്ലാത്തത് കാരണം അവിടെയും അവരുടെ വാര്‍ത്തകള്‍ ഇടം പിടിക്കുന്നില്ല. (മനോരമ ശമ്പളം തരുന്ന ബ്ലോഗര്‍ അല്ല ഞാന്‍. ആയിരുന്നെങ്കില്‍ ഈ സമരത്തെക്കുറിച്ച് ഞാനും ഒരക്ഷരം മിണ്ടില്ലായിരുന്നു!!!. ). സെപ്റ്റംബര്‍ മൂന്നിനാണ് വിതരണക്കാര്‍ സൂചന സമരം നടത്തിയത്. അന്നേ ദിവസം പത്രം വിതരണം ചെയ്യില്ല എന്നും കെട്ടുകള്‍ അയക്കരുത് എന്നും എജന്റുമാര്‍ പത്രങ്ങളെ അറിയിച്ചിരുന്നെങ്കിലും അവര്‍ അത് അയച്ചു എന്ന് മാത്രമല്ല ബില്‍ തുക ഇടുകയും ചെയ്തു. ഇതിനെതിരെ പ്രതിഷേധിച്ച ഏജന്റുമാര്‍ക്ക് മുന്നില്‍ മിക്ക പത്രങ്ങളും വിട്ടുവീഴ്ചക്ക് തയ്യാറായി. പക്ഷെ മനോരമ മാത്രം വഴങ്ങിയില്ല. അവര്‍ മൂന്നു കൊമ്പുള്ള മുയലിനെ ശൂലത്തില്‍ കുത്തിനിര്‍ത്തി. ഇതാണ് വിതരണക്കാരെ മനോരമക്കെതിരെ മാത്രമായി തിരിയാന്‍ പ്രേരിപ്പിച്ചത്.

വന്‍കിട പത്രങ്ങളെ സംബന്ധിച്ചിടത്തോളം പ്രധാന വരുമാനം പരസ്യങ്ങളാണ്. വരിക്കാര്‍ നല്‍കുന്ന പണം മഷി വാങ്ങാന്‍ പോലും തികയില്ല എന്നാണ് പറയാറുള്ളത്. മനോരമ ഒരു ദിവസം രണ്ടു പത്രം ഇറക്കുന്നത്‌ വായനക്കാരനെ സുഖിപ്പിക്കാനല്ല, പരസ്യക്കാരനെ സുഖിപ്പിക്കാനാണ്. എട്ടു പേജില്‍ നിന്നും മുപ്പതു പേജിലേക്ക് പത്രം വളരുമ്പോഴും സാധാരണക്കാരന് ലഭിക്കുന്നത് പഴയ എട്ടു പേജിന്റെ വാര്‍ത്തകള്‍ തന്നെയാണ്. വരിക്കാരന് പത്രം ഫ്രീയായി കൊടുത്താല്‍ പോലും മനോരമാക്കാരന് ലാഭം കിട്ടുന്ന രൂപത്തില്‍ പരസ്യ വരുമാനം കൂടിയിരിക്കുന്നു എന്ന് ചുരുക്കം. പിന്നെ എന്തിനാണ് മഞ്ഞിലും മഴയത്തും മുടങ്ങാതെ അതിരാവിലെ പത്രം വീട്ടുപടിക്കല്‍ എത്തിക്കുന്ന ഈ പാവങ്ങളുടെ കമ്മീഷന്‍ ശതമാനം വെട്ടിക്കുറക്കുന്നത്?

വിതരണക്കാരുടെ സമരം പൊളിക്കാനായി മനോരമ പതിനെട്ടടവും പയറ്റുന്നുണ്ട്. കൂലിക്ക് ആളുകളെ വെച്ചു ഹൌസിംഗ് കോളനികളിലും ഫ്ലാറ്റുകളിലും പത്രം വിതരണം ചെയ്യുന്നുണ്ട്. മനോരമ ഓഫീസില്‍ വരുന്നവര്‍ക്കെല്ലാം ഫ്രീയായി പത്രം കൊടുക്കുന്നുണ്ട്. എന്നാലും അടിക്കുന്ന കോപ്പികളില്‍ തൊണ്ണൂറു ശതമാനവും ഏജന്റുമാരുടെ പക്കല്‍ അന്ത്യവിശ്രമം കൊള്ളുന്ന അവസ്ഥയാണുള്ളത്. സമരത്തിന്റെ വാര്‍ത്ത പുറം ലോകം അറിയാതിരിക്കാന്‍ കിണഞ്ഞു പരിശ്രമിക്കുകയായിരുന്നു മനോരമയും പത്രമുതലാളിമാരുടെ സംഘടനയും. പക്ഷെ കാര്യങ്ങള്‍ പിടിവിട്ടു പോകുന്നതായി മനോരമക്ക് ബോധ്യം വന്നു തുടങ്ങിയിട്ടുണ്ട്. പത്രസ്വാതന്ത്യത്തിനെതിരെ പിന്‍വാതില്‍ പടനീക്കം എന്ന ഇന്നലത്തെ എഡിറ്റോറിയല്‍ അതിന്റെ തെളിവാണ്. അല്പം വിറയല്‍ അവര്‍ക്ക് കുടുങ്ങിയിട്ടുണ്ട് എന്ന് ചുരുക്കം. സി പി എം പോഷക സംഘടനകളാണ് സമരത്തിനു പിന്നില്‍ എന്നാണ് മനോരമയുടെ ഭാഷ്യം. രാഷ്ട്രീയം നോക്കാതെ നിത്യവൃത്തിക്ക് വേണ്ടിയുള്ള ഒറ്റക്കെട്ടായ സമരമാണിതെന്ന് വിതരണക്കാരും പറയുന്നു!.

ചുരുക്കിപ്പറയാതെ നീട്ടിപ്പറഞ്ഞാല്‍ പത്ര വിതരണക്കാരുടെ സമരം പുരോഗമിക്കുകയാണ്. ഇതിനകം തന്നെ അത് മറ്റു ജില്ലകളിലേക്കും വ്യാപിച്ചു തുടങ്ങിയിട്ടുണ്ട്. ഇതെവിടെച്ചെന്നു അവസാനിക്കുമെന്ന് ഇപ്പോള്‍ പറയുക വയ്യ. മനോരമയും മാതൃഭൂമിയുമൊക്കെ മലയാളികളുടെ പത്രവായന സംസ്കാരത്തിന്റെ ആവേശകരമായ പാരമ്പര്യം അവകാശപ്പെടാവുന്ന പത്രങ്ങളാണ്. മലയാളികളുടെ ജീവിതത്തിലും അവരുടെ ചിന്തകളിലും നിത്യേന ഇടപെടുന്ന സാംസ്കാരിക സ്ഥാപനങ്ങളാണ് ഈ പത്രങ്ങള്‍ . ഈ രണ്ടു പത്രങ്ങളും മുടിഞ്ഞു പോകണമെന്ന് ആരും ആഗ്രഹിക്കുന്നില്ല. അവര്‍ ഇനിയും കൂടുതല്‍ ശക്തിയോടെ നിലനില്‍ക്കണം. പക്ഷേ പത്രവിതരണം നടത്തുന്ന ഈ പാവങ്ങളുടെ ചോര ഇനിയും കുടിക്കരുത്. അവര്‍ക്ക് നല്‍കുന്ന കമ്മീഷന്‍ കാര്യത്തില്‍ കൂടുതല്‍ മാനുഷികമായ സമീപനങ്ങള്‍ ഉണ്ടാകണം. മറ്റുള്ളവരെ അന്തസ്സും സംസ്കാരവും പഠിപ്പിക്കാന്‍ ദിവസവും കാണിക്കുന്ന ആവേശത്തിന്റെ പത്തിലൊരംശം സ്വയം നന്നാവാനും കാണിക്കണം. ഗുഡ് ബൈ. Story update 08 Dec 2011 മംഗളം കാണിച്ച അന്തസ്സ് !

Related Posts
മനോരമ പിടിച്ച പുലിവാല് (വെറുതെ അല്ല ഭര്‍ത്താവ്)
ഇത് ലവ് ജിഹാദാണോ മനോരമേ ?
മനോരമയെ എന്തിനാണ് ബഹിഷ്കരിക്കുന്നത്?
മനോരമയുടെ കാര്യം എന്തായി? പൂട്ടിയോ?

ഓടുന്ന അയ്യര്‍ക്ക് ഒരു മുഴം മുമ്പേ (KCBC മോഡല്‍ )

2011-11-02T09:41:00.003+03:00

വി ആര്‍ കൃഷ്ണയ്യരുടെ തലമണ്ടക്ക്‌ കെ സി ബി സി ഇരുമ്പുലക്ക കൊണ്ട് അടിക്കാന്‍ പോവുകയാണ്. അതിന്റെ സംസ്ഥാന തല ഉദ്ഘാടനം ശിശുദിനമായ നവംബര്‍ പതിനാലിന് നടക്കും. മക്കള്‍ രണ്ടില്‍ കൂടിയാല്‍ തട്ടണം എന്ന കൃഷ്ണയ്യരുടെ 'തേര്‍ഡ് ലോ ഓഫ് സെക്സ് മോഷന്‍' (തേര്‍ഡ് എന്നത് തേര്‍ഡ് ക്ലാസ്സ്‌ എന്ന അര്‍ത്ഥത്തില്‍ അല്ല!! ) തിയറിക്ക് ഇത്ര രൂക്ഷമായ പ്രതിപ്രവര്‍ത്തനം ഉണ്ടാകുമെന്ന് ഞാന്‍ കരുതിയതല്ല. ഏതൊരു ആക്ഷനും കിടിലന്‍ റിയാക്ഷന്‍ ഉണ്ടാവും എന്ന് കേട്ടിട്ടുണ്ട്. പക്ഷെ അത് ഇപ്പരുവത്തില്‍ എത്തുമെന്ന് ഒട്ടും നിനച്ചില്ല.

'വലിയ കുടുംബം സംതൃപ്ത കുടുംബം' എന്ന മുദ്രാവാക്യമാണ് കത്തോലിക്ക സഭ നവംബര്‍ പതിനാലിന് ഉയര്‍ത്തുക!!. കൂടുതല്‍ കുട്ടികള്‍ ഉള്ളവരെ ഫലകം നല്‍കി ആദരിച്ചു കൊണ്ടാണ് ഉദ്ഘാടനം പ്ലാന്‍ ചെയ്തിരിക്കുന്നത്!!!. 'ജീവസമൃദ്ധി 2011' എന്ന് നാമകരണം ചെയ്തിട്ടുള്ള ഈ 'സംതൃപ്ത കുടുംബം' പദ്ധതി റിലീസ് ആകുന്നതോടെ സഭയോട് ബഹുമാനമുള്ള കത്തോലിക്കരൊക്കെ രണ്ടും കല്പിച്ചു ഇറങ്ങുമെന്നത് ഉറപ്പാണ്. മിക്കവാറും നവംബര്‍ പതിനാലിന്റെ രാത്രിയില്‍ കേരളത്തില്‍ പലതും നടക്കും!!.

കൂടുതല്‍ കുട്ടികളുള്ള മിനിമം അയ്യായിരം കുടുംബങ്ങളെയെങ്കിലും ആദരിച്ച് പ്രോത്സാഹിപ്പിക്കാനാണ് സഭ ഒരുങ്ങുന്നത്. കൂടുതല്‍ ഉത്പാദന മികവു കാണിച്ച ചെറുപ്പക്കാരെ പൊന്നാട അണിയിക്കാനും കെ സി ബി സിക്ക് പരിപാടിയുണ്ട്. കഴിഞ്ഞ ഇരുപതു വര്‍ഷങ്ങള്‍ക്കിടയില്‍ നാലിലധികം കുട്ടികളെ ഉത്പാദിപ്പിച്ച ചെറുപ്പക്കാര്‍ക്കാണ് ബെസ്റ്റ് പെര്‍ഫോമന്‍സ് അവാര്‍ഡ് ലഭിക്കുക. ഗര്‍ഭ നിരോധന ശസ്ത്രക്രിയ നടത്തിയവര്‍ ചാന്‍സ് പോയല്ലോ എന്ന് നിരാശപ്പെടേണ്ട. ഒരു ഗുഡ്നൈറ്റിന് ഇനിയും ബാല്യമുണ്ടെങ്കില്‍ സഭ അതിനും വഴി കാണുന്നുണ്ട്. വീണ്ടും ഗര്‍ഭം ധരിക്കാനുള്ള ശസ്ത്രക്രിയ സൌജന്യമായി ചെയ്തു കൊടുക്കാനാണ് സഭ പദ്ധതിയിടുന്നത്. ആകെ മൊത്തം നോക്കിയാല്‍ കൃഷ്ണയ്യരുടെ തലമണ്ട എപ്പോള്‍ പൊളിഞ്ഞു എന്ന് ചോദിച്ചാല്‍ മതി.

ജീവിതത്തിന്റെ സെഞ്ച്വറി ഇത്ര അടുത്തെത്തി നില്‍ക്കേ ഇങ്ങനെയൊരു കോഡുമായി റണ്‍ ഔട്ട്‌ ആകേണ്ട കാര്യം കൃഷയ്യര്‍ക്ക് ഉണ്ടായിരുന്നില്ല. പി ഡി പി യുടെയും സോളിഡാരിറ്റിയുടെയും പരിപാടികള്‍ ഉദ്ഘാടനം ചെയ്തു ഉള്ള പേര് ചീത്തയാക്കാതെ കാലം കഴിച്ചു കൂട്ടുകയായിരുന്നു നന്നായിരുന്നത്. ഒറ്റയടിക്ക് അവരെയെല്ലാം പിണക്കി. പണ്ടെങ്ങോ റവറന്റ് മാല്‍ത്യൂസച്ഛന്‍ എഴുതി വെച്ച ശുദ്ധ അസംബന്ധങ്ങള്‍ കോപ്പിയടിച്ചു ശിശുക്ഷേമം നടപ്പില്‍ വരുത്താന്‍ നോക്കുകയാണ് അയ്യരമ്മാവന്‍ ചെയ്തത്. ശിശുക്കളുടെയും സ്ത്രീകളുടെയും ക്ഷേമം നോക്കാന്‍ ഏല്‍പിച്ചിട്ടു ശിശുക്കളെ വയറ്റിനുള്ളിലോ അതല്ലെങ്കില്‍ പുറത്തോ വെച്ച് കൊല്ലാന്‍ ശുപാര്‍ശ ചെയ്തത് കടുത്ത കയ്യായിപ്പോയി!. ആവേശം തലയ്ക്കു കയറിയപ്പോള്‍ സന്താന നിയന്ത്രണ നിയമങ്ങളെ എതിര്‍ക്കുന്നവരെ (ബ്ലോഗര്‍മാര്‍ അടക്കം) ജയിലിലടക്കാനും അയ്യര്‍ ഉത്തരവിടുകയുണ്ടായി!.

കരംചന്ദ്‌ ഗാന്ധിയുടെ നാലാം ഭാര്യയില്‍ ജനിച്ച മൂന്നാമത്തെ കുട്ടിയാണ് നമ്മുടെ രാഷ്ട്രപിതാവ്. കൃഷ്ണയ്യര്‍ പോളിസി പ്രകാരം നമ്മുടെ രാഷ്ട്ര പിതാവ് പോലും ഈ ഭൂമിയില്‍ ജനിക്കേണ്ടവനല്ല. വി വി രാമ അയ്യര്‍ - നാരായണി ദമ്പതികളുടെ ഏഴു മക്കളില്‍ ഒരാളായ കൃഷ്ണയ്യരെ ജീവിതത്തില്‍ ആദ്യമായി മന്ത്രിയാക്കിയ സഖാവ് ഇ എം എസ് നമ്പൂതിരിപ്പാടും അയ്യര്‍ ഭരണഘടന അനുസരിച്ച് ഭൂമി കാണേണ്ടവവനല്ല. എട്ടു മക്കളില്‍ നാലാമനായി പിറന്ന ഇ എം എസ് അയ്യരുടെ തേര്‍ഡ് ലോയില്‍ ആവിയായിപ്പോവേണ്ടിയിരുന്ന ആളാണ്‌. ജനസംഖ്യ വര്‍ദ്ധനവിന്റെ ദേശീയ ശരാശരി 18 ശതമാനം ആണ്. എന്നാല്‍ കേരളത്തില്‍ അത് അഞ്ചു ശതമാനത്തിനും താഴെയാണ്. കൃഷ്ണയ്യര്‍ പറയാതെ തന്നെ ഓരോ സെന്‍സസിലും ഇത് കുറഞ്ഞു കുറഞ്ഞു വരികയാണ്. അധികം താമസിയാതെ കേരളം ഒരു വൃദ്ധ സംസ്ഥാനം ആയി മാറും എന്ന ആശങ്ക നിലനില്‍ക്കെയാണ് കൃഷയ്യരുടെ തേര്‍ഡ് ലോ വരുന്നത്!!!.

ലോക ജനസംഖ്യ 700 കോടിയിലേക്ക് എത്തിക്കുന്നതില്‍ തന്റേതായ പങ്കു വഹിച്ച ഒരാളാണ് സിയോണ ചന. പുള്ളി മിസോറാമില്‍ ആയതു കൊണ്ട് രക്ഷപ്പെട്ടു. കേരളത്തിലായിരുന്നെങ്കില്‍ കെ സി ബി സി അവാര്‍ഡ് കൊടുത്ത് മുടിഞ്ഞേനെ. ശുദ്ധ ക്രിസ്ത്ര്യാനിയായ ഇയാള്‍ക്ക് 39 ഭാര്യമാരും 94 കുട്ടികളുമുണ്ട്. പുള്ളി നില്‍ക്കുന്ന നില്‍പ്പ് കണ്ടില്ലേ. ഒറ്റ ഫ്രെയിമില്‍ എല്ലാവരെയും ഒതുക്കിക്കിട്ടാന്‍ ആ ഫോട്ടോഗ്രാഫര്‍ പെടാപാട് പെട്ട് കാണും!. സിയോണ ചനക്ക് അവാര്‍ഡ് കൊടുത്തില്ലേലും കൃഷ്ണയ്യരുടെ അടുത്ത പിറന്നാളിന് KCBC വക ബൊക്കെ കൊടുക്കാന്‍ അയാളെ കിട്ടുമോ എന്ന് നോക്കുന്നത് നല്ലതാണ്. എന്റെ അഫിപ്രായത്തില്‍ കൃഷ്ണയ്യര്‍ക്ക് ബൊക്കെ കൊടുക്കാന്‍ ഇതിലും പറ്റിയ ഒരു candidate വേറെയില്ല!.

ഇനി കാര്യത്തിലേക്ക് വരാം. 'ജീവസമൃദ്ധി' പരിപാടിക്ക് അല്പം പബ്ലിസിറ്റി നല്‍കാനാണ് ഈ പോസ്റ്റ്‌ എന്ന് ആരും ധരിക്കരുത്. KCBC യുടെ ഈ പടപ്പുറപ്പാടിനോട് ഒട്ടും യോജിപ്പില്ല എന്ന് പറയുകയാണ് ഈ പോസ്റ്റിന്റെ പ്രധാന ഉദ്ദേശം. ജനസംഖ്യ വര്‍ധിപ്പിക്കാന്‍ മതവിഭാഗങ്ങള്‍ ചേരി തിരിഞ്ഞു ഇത്തരം സര്‍ക്കസ്സുകള്‍ കളിക്കുന്നത് ദൂരവ്യാപകമായ പ്രത്യാഘാതങ്ങള്‍ ഉണ്ടാക്കും എന്നത് ഉറപ്പാണ്. കേരളത്തില്‍ കൂടുതല്‍ കുട്ടികള്‍ ഉണ്ടാവുക എന്നത് മാത്രമാണ് KCBC യുടെ ലക്‌ഷ്യമെങ്കില്‍ മതം നോക്കാതെ അവാര്‍ഡ്‌ കൊടുക്കാന്‍ അവര്‍ തയ്യാറാകണം. കൂടുതല്‍ കുട്ടികളുള്ള ഹിന്ദുവിനും മുസ്ലിമിനുമൊക്കെ പൊന്നാടയും കാശും കൊടുക്കണം. അതല്ല ക്രിസ്ത്യാനികളുടെ എണ്ണം കൂട്ടുക മാത്രമാണ് ഉദ്ദേശമെങ്കില്‍ ഇന്ത്യയെപ്പോലൊരു മതേതര സമൂഹത്തില്‍ അതൊരു നല്ല കീഴ്വഴക്കമല്ല എന്ന് മാത്രമേ പറയാന്‍ പറ്റൂ. ഭ്രൂണഹത്യക്കും ഗര്‍ഭഛിദ്രത്തിനും എതിരെ എല്ലാ മതവിശ്വാസികളെയും പോലെ സമരം ചെയ്യുവാനുള്ള അവകാശം കെ സി ബി സിക്കുണ്ട്. പക്ഷേ ഇപ്പോള്‍ പ്രഖ്യാപിക്കപ്പെട്ടിട്ടുള്ള പദ്ധതികള്‍ മതം നോക്കി മാത്രമാണ് നല്‍കുന്നതെങ്കില്‍ അത് ഇത്തരം സമരങ്ങളുടെ മതേതര മുഖത്തെ ഇല്ലാതാക്കും. അതിനാല്‍ നവംബര്‍ പതിനാലിന്റെ ജീവസമൃദ്ധി ഉദ്ഘാടന പരിപാടിയില്‍ നിന്ന് പിന്മാറണമെന്ന് കെ സി ബി സിയോട് അഭ്യര്‍ത്ഥിക്കുകയാണ്.

ഈ പോസ്റ്റിന് ടൈറ്റില്‍ കാര്‍ട്ടൂണ്‍ വരച്ചു തന്ന ജയരാജിന് നന്ദി.

വെല്‍ഡന്‍ ഗണേഷ്, വെല്‍ഡന്‍ !!

2011-10-28T16:27:00.008+03:00

വി എസ്സിനെ തെറി വിളിച്ചതിനല്ല, വിളിച്ചത് തെറിയാണെന്ന് തിരിച്ചറിഞ്ഞു പരസ്യമായി ഖേദം പ്രകടിപ്പിച്ചതിനാണ് വെല്‍ഡന്‍ പറഞ്ഞത്. മൈക്കിനു മുന്നില്‍ നില്‍ക്കുമ്പോള്‍ അല്പം സുബോധം വേണം. അല്‍പ നേരത്തേക്ക് ഗണേഷ് കുമാറിന് അത് നഷ്ടപ്പെട്ടു. വി എസ് കാമഭ്രാന്തനും ഞരമ്പ്‌ രോഗിയുമാണെന്ന് വിളിച്ചു പറഞ്ഞു. ജനം കയ്യടിച്ചു. സംഗതി വിവാദമായി. ഗണേഷ്കുമാര്‍ പരസ്യമായി തെറ്റ് സമ്മതിച്ചു. ടി വി രാജേഷ് സ്പീക്കറോട് പറഞ്ഞ പോലെ ഖേദപ്രകടനം 'വിഷമ'ത്തില്‍ മാത്രം ഒതുക്കിയില്ല. തെറ്റ് പത്രസമ്മേളനം നടത്തി പരസ്യമായിത്തന്നെ തുറന്നു പറഞ്ഞു. ഇതിനെയാണ് നാം അന്തസ്സ് എന്ന് വിളിക്കേണ്ടത്.

ഏതു മനുഷ്യനും തെറ്റ് പറ്റാം. നാക്ക് പിഴക്കാം. അത് തിരിച്ചറിഞ്ഞാല്‍ തിരുത്തുക. അതാണ്‌ വേണ്ടത്. വി എസ് കേരളത്തിന്റെ പ്രതിപക്ഷ നേതാവും മുന്‍ മുഖ്യമന്ത്രിയുമാണ്‌. ഒരു പാര്‍ട്ടിയുടെ സമുന്നത നേതാവാണ്‌. അതിനെക്കാളേറെ ഗണേഷിന്റെ അച്ഛനേക്കാള്‍ പ്രായമുള്ള വ്യക്തിയാണ്. അതുകൊണ്ട് തന്നെ ഇത്തരമൊരു പ്രസ്താവന ഗണേഷ് കുമാര്‍ എന്ന മന്ത്രിയുടെ നാവില്‍ നിന്ന് വരാന്‍ പാടില്ലായിരുന്നു. പക്ഷെ വന്നു പോയാല്‍ പിന്നെ ഉരുണ്ടു കളിക്കാതെ, അതിനെ വിശദീകരിച്ചു കുളമാക്കാതെ തെറ്റ് ഏറ്റുപറഞ്ഞ് ഖേദം പ്രകടിപ്പിക്കുക. അതാണ്‌ വേണ്ടത്. അത് ഗണേഷ് ചെയ്തിരിക്കുന്നു. സഖാക്കള്‍ക്ക് വിഷമം ഉണ്ടായാലും ഇല്ലെങ്കിലും ഒരു വെല്‍ഡന്‍ അതിനു കൊടുക്കുന്നതില്‍ കുഴപ്പമില്ല.

ഗണേഷിന്റെ ഖേദപ്രകടനത്തില്‍ നിന്ന് പാഠം പഠിക്കേണ്ട ആദ്യത്തെയാള്‍ സഖാവ് വി എസ് തന്നെയാണ്. ഇതിനേക്കാള്‍ പ്രകോപനപരമായതും തരംതാണതുമായ പ്രസ്താവനകള്‍ വി എസ് പലതവണ പലര്‍ക്കെതിരെ നടത്തിയിട്ടുണ്ട്. ഇപ്പോഴും നടത്തിക്കൊണ്ടിരിക്കുന്നുണ്ട്. ഒരിക്കലെങ്കിലും അദ്ദേഹം പരസ്യമായി ഖേദം പ്രകടിപ്പിച്ചതായി കണ്ടിട്ടില്ല. ഭൂമിയില്‍ ആരെയും അപമാനിക്കാന്‍ തനിക്കു അവകാശമുണ്ടെന്നും ഭൂമിയില്‍ ആരും തന്നെ അപമാനിച്ചു പോകരുതെന്നും കരുതുന്ന ഒരു മാനസിക അവസ്ഥ ആര്‍ക്കുണ്ടായാലും അത് ശരിയല്ല.

ഈ രാജ്യത്തിന്റെ അഭിമാനമായ മുന്‍ രാഷ്ട്രപതി എ പി ജെ അബ്ദുല്‍ കലാമിനെ 'വാണം വിടുന്നവന്‍' എന്ന് പരിഹസിച്ച വി എസ്സിന്, ഉത്രാടം തിരുനാള്‍ മാര്‍ത്താണ്ഡവര്‍മയെ പായസപ്പാത്രത്തില്‍ സ്വര്‍ണം കടത്തുന്ന കള്ളനെന്നു വിളിച്ച വി എസ്സിന്, കെ ഇ എന്‍ കുഞ്ഞഹമ്മദിനെ കുരങ്ങന്‍ എന്ന് വിളിച്ച വി എസ്സിന്, ലതികയെ മ്ലേച്ചമായ ശൈലിയില്‍ 'പ്രശസ്ത' യാക്കിയ വി എസ്സിന്, രാജ്യത്തിന്‌ വേണ്ടി ജീവന്‍ അര്‍പ്പിച്ച മേജര്‍ ഉണ്ണികൃഷ്ണന്റെ വീട്ടിലെത്തി 'പട്ടി' പ്രയോഗം നടത്തിയ വി എസ്സിന്, സിന്ധു ജോയിയെ 'ഒരുത്തി' യാക്കിയ വി എസ്സിന്, മുഖ്യമന്ത്രിയായിരുന്ന എ കെ ആന്റണിയെ തന്തയില്ലാത്തവനെന്നു ഉപമിച്ച വി എസ്സിന് ഒരിക്കല്‍ പോലും ഖേദപ്രകടനം നടത്തണമെന്ന് തോന്നിയിട്ടില്ല. ഒരു സോറി പറഞ്ഞതായി പോലും എവിടെയും കണ്ടിട്ടില്ല. ഗണേഷ് കുമാര്‍ തന്റെ ഖേദപ്രകടനത്തിലൂടെ വി എസ്സിന് തന്റെ സംസ്കാരം എന്തെന്ന് സ്വയം തിരിച്ചറിയാന്‍ ഒരവസരം നല്‍കി എന്ന് വേണമെങ്കിലും നമുക്ക് പറയാം.

ഗണേഷ് കുമാറിനോട് ഒരു വാക്ക് കൂടി. രാഷ്ട്രീയക്കാര്‍ ബ്ലോഗര്‍മാരെപ്പോലെയല്ല. അല്പം ഉത്തരവാദിത്വ ബോധം വേണം. സിനിമയില്‍ താങ്കള്‍ പല ഡയലോഗും അടിച്ചു കാണും. 'പോടാ പുല്ലേ' എന്നും 'ആസനത്തില്‍ വാലും ചുരുട്ടിയിരിക്കുന്ന പട്ടീ' എന്നുമൊക്കെ പലരെയും വിളിച്ചു കാണും. അതൊക്കെ സിനിമയില്‍ മാത്രം മതി. നിയമസഭയിലും പൊതുയോഗത്തിലും അത്തരമൊരു സംസ്കാരം ഇനി മേലാല്‍ പുറത്തെടുക്കരുത്. എസ് എഫ് ഐ - ഡിഫിക്കുട്ടികള്‍ക്ക് കോലം കത്തിക്കാന്‍ മാത്രമല്ല, റോട്ടിലിട്ടു പെരുമാറാനും കഴിയും. അത് മറക്കരുത്.

Related Posts
വി എസ്, ഇതും കോപ്പിയടിയാണോ?
ഏത് ലതിക? എന്ത് കോടതി?
വി എസ്, വിവരക്കേടിന് ഒരതിരുണ്ട്‌
'അച്ഛ'നാനന്ദന്‍
വി എസിനെ ആര് മലയാളം പഠിപ്പിക്കും?

'അച്ഛ'നാനന്ദന്‍

2011-10-27T09:56:00.001+03:00

Re-post (originally posted on 13.07.2011)
ഈ പത്രക്കാര്‍ക്ക് ഒരു വിവരവുമില്ല. വെറുതെ ഓരോ ആരോപണങ്ങള്‍ ഉന്നയിയിച്ചുകൊണ്ടിരിക്കും. മക്കള്‍ നന്നായിക്കാണണം എന്നാഗ്രഹിക്കാത്ത അച്ഛന്‍മാരുണ്ടോ? മക്കാവില്‍ അയച്ചിട്ടാണെങ്കിലും അവര്‍ക്ക് നല്ല വിദ്യാഭ്യാസം നേടിക്കൊടുക്കുക, ആരുടെ കാലു പിടിച്ചിട്ടായാലും അവര്‍ക്കൊരു ജോലി ഉണ്ടാക്കിക്കൊടുക്കുക, പ്രായമായാല്‍ കല്യാണം കഴിപ്പിക്കുക, ഒമ്പത് മാസം കഴിഞ്ഞാല്‍ അവരുടെ കുട്ടികളെ കളിപ്പിക്കുക. ഇതൊക്കെ ഏതച്ഛന്‍മാരുടെയും ജന്മാവകാശമാണ്. ഇതൊന്നും ചെയ്യാത്തവന്‍ അച്ഛനല്ല. ഇന്നും ഇന്നലെയും തുടങ്ങിയ പരിപാടികളല്ല ഇതൊന്നും. കാറല്‍ മാര്‍ക്സിന്റെ കാലം മുതലേയുള്ളതാണ്. മക്കള്‍ നന്നായിക്കാണുമ്പോള്‍ അച്ഛന്‍മാര്‍ക്കുണ്ടാവുന്ന ആനന്ദത്തെയാണ്‌ 'അച്ഛനാനന്ദം' എന്ന് പറയുന്നത്. ഏതു മലയാള ഡിക്ഷ്ണറി എടുത്തു നോക്കിയാലും ഇതിന്റെ അര്‍ത്ഥം കിട്ടും.

ഇതൊക്കെ ശരിക്കുമറിയാവുന്ന പത്രക്കാര്‍ തന്നെയാണ് സഖാവ് അച്യുതാനന്ദനെതിരെ ഇപ്പോള്‍ ആരോപണവുമായി വന്നിരിക്കുന്നത്. മകന്‍ അരുണ്‍കുമാറിന് സഖാവ് ഒരു ജോലി വാങ്ങിച്ചു കൊടുത്തത്രേ. ഭരണത്തില്‍ നിന്ന് ഇറങ്ങുന്നതിനു മുമ്പ് ഒരു പുതിയ ഡിപ്പാര്‍ട്ട്മെന്റ് ഉണ്ടാക്കി അതിന്റെ തലവനായി മകനെ നിയമിച്ചു. ഒന്നര ലക്ഷം ശമ്പളവും നിശ്ചയിച്ചു. ഇതിലൊക്കെ എന്തോന്നാ ഇത്ര ബഹളം വെക്കാന്‍?. എനിക്കൊന്നും മനസ്സിലാകുന്നില്ല. വിജിലന്‍സ് അന്വേഷണം വേണമെന്നാണ് പി സി വിഷ്ണുനാഥ് ആവശ്യപ്പെട്ടിരിക്കുന്നത്. അച്ഛന്‍ മകന്റെ കാര്യം നോക്കുന്നതില്‍ വിജിലന്‍സിന് എന്ത് കാര്യം?.

ചില പത്രങ്ങള്‍ എഴുതിയ റിപ്പോര്‍ട്ട്‌ കണ്ടാല്‍ തോന്നും ഒരു മകന് ആദ്യമായി ജോലി വാങ്ങിച്ചു കൊടുക്കുന്ന അച്ഛന്‍ സഖാവ് അച്യുതാനന്ദന്‍ ആണെന്ന്. കലശലായ കോണ്‍ഗ്രസ്‌ രോഗം പിടിപെട്ട മനോരമാക്കൊക്കെ എന്തും എഴുതാം. പക്ഷെ മാതൃഭൂമിയെങ്കിലും അല്പം വകതിരിവ് കാണിക്കണ്ടേ. അവര്‍ എന്തൊക്കെയാണ് എഴുതിയിരിക്കുന്നത് എന്ന് നോക്കൂ.

"സര്‍ക്കാര്‍ കാലാവധി തീരുംമുമ്പ് അരുണിനെ അക്കാദമി ഡയറക്ടറാക്കി. വെളിപ്പെടുത്തല്‍ വിവരാവകാശ രേഖയിലൂടെ"

തിരുവനന്തപുരം: കഴിഞ്ഞ സര്‍ക്കാരിന്റെ കാലാവധി തീരുന്നതിന് തൊട്ടുമുമ്പ് അന്നത്തെ മുഖ്യമന്ത്രി വി.എസ്.അച്യുതാനന്ദന്റെ മകന്‍ വി.എ.അരുണ്‍കുമാറിനെ പുതിയ ഒരു അക്കാദമി രൂപവത്കരിച്ച് അതിന്റെ ഡയറക്ടറായി നിയമിച്ചിരുന്നുവെന്ന് വ്യക്തമായി. മുഖ്യമന്ത്രിയുടെ കീഴിലായിരുന്ന ഐ.ടി. വകുപ്പിന്റെയും അരുണ്‍കുമാര്‍ ജോലിചെയ്തിരുന്ന ഐ.എച്ച്. ആര്‍.ഡിയുടെയും പങ്കാളിത്തത്തോടെ ഇന്‍ഫര്‍മേഷന്‍ ആന്‍ഡ് കമ്മ്യൂണിക്കേഷന്‍ അക്കാദമി രൂപവത്കരിച്ച് അതിന്റെ ഡയറക്ടറായാണ് അരുണ്‍കുമാറിനെ നിയമിച്ചത്. .. ആറുവര്‍ഷത്തെ കാലാവധിയിലാണ് നിയമനം. യു.ഡി.എഫ്. സര്‍ക്കാര്‍ വന്നാലും കാലാവധി കഴിഞ്ഞ് പുതിയ സര്‍ക്കാര്‍ വരുന്നതുവരെ അരുണ്‍കുമാര്‍ സുരക്ഷിതനായിരിക്കണമെന്നതാണ് ഇതിനുപിന്നിലെ ഉദ്ദേശ്യമെന്നും ആക്ഷേപമുണ്ട്. ടെക്‌നോപാര്‍ക്കിലെ സി.ഇ.ഒയുടേതിനു തുല്യമായ ശമ്പളവും മറ്റാനുകൂല്യങ്ങളുമാണ് ഡയറക്ടര്‍ക്ക് നിശ്ചയിച്ചിരിക്കുന്നത്. ഇത് മാസം ഒന്നര ലക്ഷത്തോളം രൂപ വരും. സ്ഥാനമൊഴിയുന്നതിനുമുമ്പ് മന്ത്രിസഭായോഗമാണ് അക്കാദമി രൂപവത്കരിക്കാനും അരുണ്‍കുമാറിനെ ഡയറക്ടറായി നിയമിക്കാനും തീരുമാനിച്ചത്. എന്നാല്‍ ഇത് സംബന്ധിച്ച വിവരങ്ങള്‍ രഹസ്യമാക്കി വെച്ചിരിക്കുകയായിരുന്നു .. ഡയറക്ടര്‍ നിയമനത്തിനുള്ള യോഗ്യതയോ വ്യവസ്ഥകളോ സ്ഥാപനത്തിന്റെ നിയമാവലിയില്‍ പറഞ്ഞിട്ടില്ല. എന്നാല്‍ കീഴ് ജീവനക്കാരെ സംബന്ധിച്ച വ്യവസ്ഥകള്‍ വ്യക്തമാക്കിയിട്ടുമുണ്ട്. അക്കാഡമിയിലെ വിവിധ തസ്തികകളില്‍ നിയമനം നടത്തുന്നത് ഡയറക്ടറായിരിക്കുമെന്ന് വ്യവസ്ഥ ചെയ്യുന്നു. ഡയറക്ടറുടെ യോഗ്യതകള്‍ പറയുന്നില്ലെങ്കിലും ശമ്പളം കൃത്യമായി വ്യവസ്ഥ ചെയ്തു." റിപ്പോര്‍ട്ടിന്റെ പൂര്‍ണ രൂപം ഇവിടെയുണ്ട്.

വീ എസ്സിനെയും മക്കളെയും ഇങ്ങനെ പീഡിപ്പിക്കരുത് എന്നാണ് എനിക്ക് പത്രക്കാരോട് പറയാനുള്ളത്. ആകെയൊരു മകനെയുള്ളൂ എന്ന് സഖാവ് കരഞ്ഞു പറഞ്ഞിട്ടുണ്ട്. ആ മകനെ ഒന്ന് കരകയറ്റാന്‍ സഖാവിനെ അനുവദിക്കൂ.. ഏതെങ്കിലും അച്ഛന്‍മാരെക്കുറിച്ച് നാല് തെറി എഴുതിയാലേ നിങ്ങളുടെ കയ്യിന്റെ തരിപ്പ് തീരൂ എങ്കില്‍ ഇവിടെ വേറെ എത്ര അച്ഛന്‍മാരുണ്ട്. ഫോര്‍ എക്സാമ്പിള്‍ വണ്‍ മിസ്റ്റര്‍ ബാലകൃഷ്ണപ്പിള്ള. അദ്ദേഹത്തെക്കുറിച്ച് എഴുതൂ. ഒരു കേസ് ഫയല്‍ ചെയൂ.. ജയിലില്‍ അടക്കൂ.. ഞങ്ങടെ സഖാവിനെ വെറുതെ വിടൂ.. ബ്ലീസ്.

27.10.2011 - സസ്പെന്ഷനും റെഡിയായി. അരുണ്‍കുമാറിനും സുബ്രഹ്മണ്യത്തിനും സസ്‌പെന്‍ഷന്‍
മ്യാവൂ : ഭൂമി ഉരുണ്ടതാണ് സഖാവേ, ഉരുണ്ടത്‌.

മുനീര്‍ കളിക്കുന്ന ഐസ്ക്രീം ഗെയിം

2011-10-23T09:28:00.001+03:00

ഇന്നലത്തെ മാതൃഭൂമി പത്രത്തില്‍ ഡോ മുനീറിന്റെ ഒരു പ്രസ്താവന കണ്ടു. അത് വായിച്ചിട്ട് ചിരിക്കണോ അതോ കരയണോ അതല്ല ഒരു അനുശോചനം രേഖപ്പെടുത്തണോ എന്താണ് വേണ്ടതെന്ന കാര്യത്തില്‍ എനിക്കൊരു സംശയം. പ്രസ്താവനയുടെ തലവാചകം ഇതാണ്.കുഞ്ഞാലിക്കുട്ടിയെ വേട്ടയാടുന്ന ഇന്ത്യാവിഷന്‍ രീതിയോട് യോജിപ്പില്ല -മുനീര്‍ . തലക്കെട്ട്‌ വായിച്ച ഞാന്‍ ആകെ കണ്ഫ്യൂസ്ഡ് ആയി. 'അമേരിക്കയുടെ പോക്ക് ശരിയല്ല: ഒബാമ' എന്ന തലക്കെട്ടില്‍ ഒരു പത്ര വാര്‍ത്ത കണ്ടാല്‍ പോലും എനിക്കിത്ര കണ്ഫ്യൂഷന്‍ ഉണ്ടാകില്ല. ഇന്ത്യാവിഷന്‍ തുടങ്ങിയത് മുനീറാണ്. അതിനു കാശ് പിരിച്ചതും നിയമാവലി ഉണ്ടാക്കിയതും മുനീറാണ്. അതിന്റെ ചെയര്‍മാനും മുഖ്യ ഷെയര്‍ ഹോള്‍ഡറും മുനീറാണ്. നയ നിലപാടുകളെക്കുറിച്ചു അവസാന വാക്ക് പറയേണ്ട ആളും മുനീര്‍ തന്നെ. ആ മുനീര്‍ തന്നെയാണ് പറയുന്നത് ഇന്ത്യാവിഷന്റെ പോക്ക് ശരിയല്ല എന്ന്. ഇതെന്തു കൂത്ത് എന്ന് ഞാന്‍ ചോദിച്ചു പോയാല്‍ മുനീറിന്റെ ഫാന്‍സുകാര്‍ എന്നെ തെറി വിളിക്കരുത്. കുഞ്ഞാലിക്കുട്ടിയുടെ ഫാന്‍സുകാരില്‍ നിന്ന് കേട്ടത് ഇനിയും ദഹിച്ചു കഴിഞ്ഞിട്ടില്ല!!

മുനീറിന്റെ പ്രസ്താവനയുടെ പൂര്‍ണ രൂപം ഇങ്ങനെയാണ്. "പൊതുരംഗത്ത് ദീര്‍ഘകാലമായി പ്രവര്‍ത്തിക്കുന്ന മുസ്‌ലിംലീഗ് നേതാവ് പി.കെ.കുഞ്ഞാലിക്കുട്ടിക്കെതിരെ നിരന്തരമായി വാര്‍ത്തകള്‍ നല്‍കുന്ന മാധ്യമപ്രവര്‍ത്തനത്തോട് യോജിക്കാനാവില്ലെന്ന് മന്ത്രി എം.കെ.മുനീര്‍ പ്രസ്താവിച്ചു.പൊതു പ്രവര്‍ത്തനവും രാഷ്ട്രീയപ്രവര്‍ത്തനവും വര്‍ഷങ്ങളായി തുടരുന്ന ഒരാളെ പിന്നാലെ നടന്ന് പീഡിപ്പിക്കുകയും വ്യക്തിഹത്യ നടത്തുകയും വേട്ടയാടുകയും ചെയ്യുന്ന ഇന്ത്യാവിഷന്റെ നിലപാടിനോടും യോജിക്കാനാവുകയില്ല.ഒളിക്യാമറ ആവശ്യത്തിനും അനാവശ്യത്തിനും ഉപയോഗിക്കുന്ന സ്ഥിതിയാണ് ഇന്നുള്ളത്. ഈ ദുരുപയോഗപ്പെടുത്തല്‍ പ്രതിഷേധാര്‍ഹമാണ്. അതിര്‍വരമ്പുകള്‍ അതിലംഘിക്കുന്ന എഡിറ്റോറിയല്‍ സ്വാതന്ത്ര്യം പത്രപ്രവര്‍ത്തനത്തിന്റെ ധാര്‍മികതയെ തകര്‍ക്കുന്നതും ചോദ്യംചെയ്യുന്നതുമാണെന്നും മുനീര്‍ അഭിപ്രായപ്പെട്ടു."

കുഞ്ഞാലിക്കുട്ടിയെ 'വേട്ടയാടുന്നതില്‍ ' ഇത്ര വലിയ ധാര്‍മിക രോഷം മുനീറിന് ഉണ്ടെങ്കില്‍ ഒരു ലോക്കല്‍ കാള്‍ കൊണ്ട് അത് നിര്‍ത്തിപ്പിക്കാവുന്നതേയുള്ളൂ. ഇങ്ങനെയൊരു പ്രസ്താവന നടത്തി മൂക്ക് പിഴിയേണ്ട ആവശ്യം ഉണ്ടായിരുന്നില്ല. ഇന്ത്യാവിഷന്‍ ന്യൂസ്‌ എഡിറ്ററെ വിളിച്ചു "താന്‍ എന്തുവാടോ ഈ കാണിക്കുന്നത്" എന്ന ഒറ്റച്ചോദ്യം ചോദിച്ചാല്‍ ഈ 'വേട്ടയാടല്‍ ' നില്‍ക്കും. "താനാരെടോ അത് ചോദിക്കാന്‍" എന്ന് ഒരു ബഷീറും മുനീറിനോട് തിരിച്ചു ചോദിക്കില്ല. കാരണം മുനീറാണ് ഈ ചാനലിന്റെ ജീവാത്മാവും പരമാത്മാവും. അതല്ല, ഇന്ത്യാവിഷന്‍ ചെയ്യുന്നത് തികഞ്ഞ മാധ്യമ ധര്‍മമാണ്‌ എന്നാണു അഭിപ്രായമെങ്കില്‍ ലീഗുകാരെ സോപ്പിടാന്‍ വേണ്ടി ഇത് പോലുള്ള വാചകക്കസര്‍ത്തുകള്‍ നടത്തരുത്. ലീഗുകാര്‍ക്കും അല്പമൊക്കെ വിവരം കാണും. മന്ത്രിസ്ഥാനം പോകാതിരിക്കാന്‍ കാണിക്കുന്ന ഒരു കസര്‍ത്തായിട്ടേ ഇതുമാതിരിയുള്ള ഉഡായിപ്പ് പ്രസ്താവനകളെ കാണാന്‍ പറ്റൂ.

ഭൂലോക തരികിടയായ റഊഫാണ് ഇന്ത്യാവിഷന്റെ ഇപ്പോഴത്തെ ചീഫ് റിപ്പോര്‍ട്ടര്‍ . പുള്ളിയാണ് ലേറ്റസ്റ്റ് എപ്പിസോഡിലെ ഇന്‍വെസ്റ്റിഗേഷന്‍ സ്റ്റോറി തയ്യാറാക്കിയിരിക്കുന്നത്. ഒരാളെ തന്റെ BMW കാറില്‍ ഇരുത്തി റഊഫ് ഡയലോഗ് വായിക്കുന്നു. കാര്യമെന്താണെന്നു ഒരു പിടിയും കിട്ടാതെ ആ പാവം ഇടയ്ക്കിടെ യെസ് യെസ് എന്ന് പറയുന്നു. ഈ ഇന്‍വെസ്റ്റിഗേഷന്‍ സ്റ്റോറിയാണെന്ന് തോന്നുന്നു മുനീറിന്റെ പുതിയ പ്രസ്താവനയുടെ സിറ്റുവേഷന്‍ ക്രിയേറ്റ് ചെയ്തത്. ഒന്നുകില്‍ മുനീര്‍ സാഹിബ് തികഞ്ഞ ആശയക്കുഴപ്പത്തിലാണ്. അതല്ലെങ്കില്‍ മഹാവെളവന്‍ ആണ്. രണ്ടാമത്തെ വകുപ്പില്‍ പെടുത്താനാണ് 'സാഹചര്യ ത്തെളിവുകള്‍' സാധ്യത നല്‍കുന്നത്. "ആമയെ ചുടുന്നെങ്കില്‍ മലര്‍ത്തി ചുടണം, ഞാനൊന്നുമറിഞ്ഞില്ലേ രാമ നാരായാണാ" എന്ന് പണ്ടാരാണ്ടോ പറഞ്ഞ പോലെ ഇന്ത്യാവിഷനിലെ കുട്ടികള്‍ക്ക് 'ആമയെ ചുടാനുള്ള' ട്രിക്ക് പറഞ്ഞു കൊടുത്ത ശേഷം ഞാനൊന്നുമറിഞ്ഞില്ലേ എന്ന് വിലപിക്കുന്നത് ഒരുമാതിരി ഊളത്തരമാണ്. കുഞ്ഞാലിക്കുട്ടിയെ പൂജപ്പുരയില്‍ എത്തിക്കാനുള്ള സമര്‍ത്ഥമായ ചരടാണ്‌ മുനീര്‍ വലിച്ചു കൊണ്ടിരിക്കുന്നത് എന്ന് ഞാന്‍ പറയുന്നില്ല. പക്ഷെ 'സാഹിബിനെ' ഒതുക്കാനുള്ള കളികളില്‍ ഒരു ചരട് മുനീറിന്റെ കയ്യിലാണ് ഉള്ളത് എന്ന് നിസ്സംശയം പറയാം. പാര്‍ട്ടി ഭാരവാഹിത്വമോ ഇന്ത്യാവിഷനോ ഏതെങ്കിലും ഒന്ന് തിരഞ്ഞെടുക്കേണ്ട ഘട്ടം വന്നാല്‍ ഞാന്‍ ഇന്ത്യാവിഷന്‍ തിരഞ്ഞെടുക്കും എന്ന് മുനീര്‍ പറഞ്ഞപ്പോള്‍ ടി വിക്ക് മുന്നിലിരുന്നു പലരും കയ്യടിച്ചു. വക്കം മൗലവിയുടെ പാതയില്‍ ഇതാ ചോരത്തിളപ്പുള്ള ഒരു ചെറുപ്പക്കാരന്‍ എന്ന് പറഞ്ഞവരും ഉണ്ട്. അതേ മുനീര്‍ തന്നെ 'അര മന്ത്രി' സ്ഥാനം കിട്ടാനുള്ള വകുപ്പ് കണ്ടപ്പോള്‍ വാക്ക് മാറ്റി നേരെ തിരോന്തരത്തേക്ക് വെച്ചു പിടിച്ചു. ചക്കരക്കുടം കാണുമ്പോള്‍ വായില്‍ വെള്ളമൂറുന്ന ഒരു സാധാരണ രാഷ്ട്രീയക്കാരന്‍ മാത്രമാണ് മുനീര്‍ എന്ന് അതോടെ വ്യക്തമായി. ഇയാള്‍ മഹാവെളവനാണ് എന്ന ഒരു നിഗമനത്തില്‍ ഞാന്‍ എത്തുന്നത് ഇത്തരം കാര്യങ്ങളെല്ലാം ഗുണിച്ച്‌ ഗണിച്ചു വിലയിരുത്തിയ ശേഷമാണ്.

ഒരു ലീഗുകാരന്‍ എന്നോട് പറഞ്ഞത് "സി എച്ചിന്റെ മോനായിപ്പോയി, അല്ലേല്‍ ഞങ്ങള്‍ ...." എന്നാണ്. അവന്റെ ഡയലോഗിന്റെ അവസാന ഭാഗം ഇവിടെ എഴുതാന്‍ കൊള്ളില്ല. അത് അണ്‍ പാര്‍ലിമെന്ററിയായ ഒരു പദമാണ്. ലീഗ് അണികള്‍ക്കിടയില്‍ അടുത്ത കാലത്തായി ഏറ്റവും വിലയിടിഞ്ഞിട്ടുള്ളത് ഡോക്ടര്‍ മുനീറിനാണ്. ഷെയര്‍ മാര്‍ക്കറ്റില്‍ സ്റ്റോക്കുകള്‍ ഇടിയുന്നതിനേക്കാള്‍ വേഗത്തിലാണ് മുനീറിന്റെ മാര്‍ക്കറ്റ് ഇടിഞ്ഞു കൊണ്ടിരിക്കുന്നത്. പഴയകാല തിരഞ്ഞെടുപ്പുകളില്‍ മുനീറിനെ സ്ഥാനാര്‍ഥിയായി കിട്ടാന്‍ വേണ്ടി നിയോജക മണ്ഡലങ്ങള്‍ തമ്മില്‍ പിടിവലിയായിരുന്നു. ഇപ്പോള്‍ നേരെ മറിച്ചാണ് ഉണ്ടാകുന്നതത്രേ. "ഞങ്ങള്‍ക്ക് വേണ്ടേ നിങ്ങള്‍ എടുത്തോളൂ" എന്ന് പരസ്പരം ലീഗുകാര്‍ തട്ടിക്കളിച്ചു എന്നാണ് വാര്‍ത്തകള്‍ . ഇതെന്തുകൊണ്ട് ഉണ്ടായി എന്ന് ചോദിച്ചാല്‍ ഇന്ത്യാവിഷന്‍ എന്നല്ലാതെ മറ്റൊരു ഉത്തരമില്ല.

ഇത്രയും പറഞ്ഞതില്‍ നിന്ന് തെറ്റിദ്ധരിക്കരുത്. ഇന്ത്യാവിഷനിലെ റിപ്പോര്‍ട്ടര്‍മാര്‍ക്ക് സ്വതന്ത്രമായ മാധ്യമ പ്രവര്‍ത്തനം നടത്താന്‍ അവസരം കൊടുക്കുന്ന വിശാലമനസ്കനായ മുതലാളി എന്ന ലേബല്‍ മുനീറിന് അവകാശപ്പെടാവുന്നത് തന്നെയാണ്. പക്ഷെ അത്തരം ഒരവകാശപ്പെടലിനെ തീര്‍ത്തും കൊഞ്ഞനം കുത്തുന്നതാണ് ഇപ്പോള്‍ നടത്തിയിട്ടുള്ള പ്രസ്താവന എന്നേ ഞാന്‍ പറയുന്നുള്ളൂ. ഇന്ത്യാവിഷന്‍ ചെയ്യുന്നത് ഒരു നേതാവിനെ കരുതിക്കൂട്ടി വേട്ടയാടുകയാണ് എന്ന് പറയുക, അത് ചെയ്യാനുള്ള സ്വാതന്ത്ര്യം ഞാന്‍ അവര്‍ക്ക് നല്‍കിയിട്ടുണ്ട് എന്ന് അവകാശപ്പെടുകയും ചെയ്യുക. ഇത് രണ്ടും കൂടെ കൂട്ടിവായിക്കുമ്പോഴാണ് മുനീറിന്റെ കയ്യിലുള്ള 'ചരടിന്റെ' കണ്ണികള്‍ പുറത്തേക്ക് വരുന്നത്. കൊക്കകോലാ വില്കാനുള്ള ലൈസന്‍സ് എടുത്ത കടയില്‍ പട്ടച്ചാരായം വില്‍ക്കുന്നത് കാണുമ്പോള്‍ ലൈസന്‍സ് എടുത്ത മുതലാളിക്ക് ഒഴിഞ്ഞു മാറാന്‍ കഴിയില്ല. എന്തും വില്‍ക്കാനുള്ള സ്വാതന്ത്ര്യം ഞാന്‍ പണിക്കാര്‍ക്ക് നല്‍കിയിട്ടുണ്ട്, അതവരുടെ ഇഷ്ടമാണ് എന്ന് പറയാന്‍ പറ്റില്ല. ഒന്നുകില്‍ വില്‍ക്കുന്നത് പട്ടച്ചാരായമല്ല, അത് സാക്ഷാല്‍ കൊക്കകോള തന്നെയാണ് എന്ന് പറയുക, അതല്ലെങ്കില്‍ പട്ടച്ചാരായം വില്‍ക്കുന്നത് നിര്‍ത്താന്‍ പറയുക. രണ്ടാലൊന്ന് മുനീര്‍ സാഹിബ് ചെയ്യണം. അതാണ്‌ അതിന്റെ ഒരന്തസ്സ്. സി എച്ചിന്റെ മോനല്ലേ എന്ന് കരുതിയുള്ള ലീഗുകാരുടെ ക്ഷമക്കും ഒരതിരൊക്കെ ഉണ്ടാകില്ലേ.

പിള്ളയെ തട്ടാന്‍ ജയരാജന്റെ ക്വട്ടേഷന്‍

2011-10-19T21:23:00.000+03:00

അസിസ്റ്റന്റ്‌ പോലീസ് കമ്മീഷണര്‍ രാധാകൃഷ്ണപ്പിള്ളയെ കാണുന്നിടത്ത് വെച്ച് തല്ലാനാണ് ജയരാജന്‍ വക്കീല്‍ ആഹ്വാനം ചെയ്തിരിക്കുന്നത്. സാധാരണ ഗതിയില്‍ സഖാക്കള്‍ ഇത്തരം ആഹ്വാനങ്ങളൊക്കെ കൊടുക്കാറുള്ളത് ഏരിയ കമ്മറ്റി മീറ്റിങ്ങുകളില്‍ ആണ്. പക്ഷെ ഇന്ന് കൊടുത്തത് പരസ്യമായാണ്. അതും മാധ്യമങ്ങളുടെ ക്യാമറക്ക്‌ മുന്നില്‍ . കോഴിയെ കണ്ടാല്‍ പിടിക്കാന്‍ കുറുക്കനോട് പ്രത്യേകം പറയേണ്ടതില്ല. അത് കുറുക്കന്റെ ജന്മ നിയോഗങ്ങളില്‍ ഒന്നാണ്. ഒറ്റയ്ക്ക് തരപ്പെട്ടു കിട്ടിയാല്‍ രാധാകൃഷ്ണപ്പിള്ളയെ എസ് എഫ് ഐ കുട്ടികള്‍ കൈകാര്യം ചെയ്തു എന്ന് വരാം. പക്ഷെ ഒരു പാര്‍ട്ടിയുടെ സംസ്ഥാന നേതാവ് ഇങ്ങനെയൊരു ക്വട്ടേഷന്‍ പരസ്യമായി കൊടുക്കുന്നത് കണ്ടപ്പോള്‍ ശരിക്കും ഞെട്ടിപ്പോയി. നമ്മുടെ രാഷ്ട്രീയ നേതൃത്വം എത്തിപ്പെട്ടിരിക്കുന്ന ഗുണ്ടാ രാഷ്ട്രീയത്തിന്റെ ഏറ്റവും പ്രകടമായ തെളിവ്.

രാധാകൃഷ്ണപിള്ള തെറ്റ് ചെയ്തിട്ടുണ്ടെങ്കില്‍ അയാളെ ശിക്ഷിക്കുവാന്‍ ഇവിടെ നിയമവും കോടതിയുമുണ്ട്. എസ് എഫ് ഐ യുടെ കണ്ണൂര്‍ ജില്ല കമ്മറ്റിയെ ഇന്ത്യന്‍ ഭരണഘടന ആ പണി എല്പിച്ചിട്ടില്ല. എസ് എഫ് ഐ കുട്ടികളുടെ സമരം അക്രമാസക്തമായപ്പോള്‍ രാധാകൃഷ്ണപിള്ള റിവോള്‍വര്‍ ഉപയോഗിച്ച് വെടി വെക്കുന്നതിന്റെ ഫൂട്ടേജ് മാധ്യമങ്ങള്‍ പുറത്തു വിട്ടിരുന്നു. അതിന്റെ അന്വേഷണം നടന്നു കൊണ്ടിരിക്കുന്നു. പിള്ള വെടിവെക്കുന്ന ദൃശ്യം കണ്ടപ്പോള്‍ ഇയാള്‍ക്കെന്താ വട്ടു പിടിച്ചോ എന്ന് ഞാനടക്കം പലര്‍ക്കും തോന്നി എന്നത് നേരാണ്. പക്ഷെ അത്തരം തോന്നലുകളല്ല, അന്വേഷണക്കമ്മീഷനുകളുടെ റിപ്പോര്‍ട്ടുകളാണ് നിയമ സംവിധാനത്തിന് മുന്നില്‍ പ്രത്യക്ഷപ്പെടുക.

മനുഷ്യാവകാശ കമ്മീഷന്‍, ഡി ജി പി ജേക്കബ് പുന്നൂസ്, അഡീഷനല്‍ ചീഫ് സെക്രട്ടറി കെ ജയകുമാര്‍ എന്നിവരാണ് വെടിവെപ്പിനെക്കുറിച്ച് അന്വേഷിച്ചു പ്രാഥമിക റിപ്പോര്‍ട്ട്‌ നല്‍കിയിരിക്കുന്നത്. റിപ്പോര്‍ട്ടുകള്‍ ഔദ്വോഗികമായി പുറത്തു വന്നിട്ടില്ല എങ്കിലും മാധ്യമങ്ങള്‍ പുറത്തു വിട്ട വാര്‍ത്തകള്‍ വിശ്വസിക്കാമെങ്കില്‍ ഈ മൂന്നു അന്വേഷണങ്ങളും പിള്ളക്കെതിരെ നടപടി സ്വീകരിക്കേണ്ട ആവശ്യമില്ല എന്ന് തന്നെയാണ് ശുപാര്‍ശ ചെയ്തിട്ടുള്ളത്. ഈയൊരു പാശ്ചാത്തലത്തില്‍ വേണം എം വി ജയരാജന്റെ ക്വട്ടേഷനെ നാം വിലയിരുത്തേണ്ടത്. കണ്ണൂരിലേക്ക് വന്നാല്‍ അടിച്ചോതുക്കുമെന്നും അതാണ്‌ കണ്ണൂരിന്റെ ചരിത്രമെന്നും പറഞ്ഞ സഖാവ് തല്ലുന്നതില്‍ ഒട്ടും പേടിക്കേണ്ടതില്ലെന്ന് കുട്ടികള്‍ക്ക് ഉറപ്പു നല്‍കുകയും ചെയ്തു. ഒരു ക്വട്ടേഷന്റെ എല്ലാ ചിട്ടവട്ടങ്ങളും ഒത്തിണങ്ങിയ രാജകല്പന തന്നെ. പിള്ള കുറ്റക്കാരനാണെന്ന് അന്വേഷണകമ്മീഷനുകള്‍ പറഞ്ഞിരുന്നുവെങ്കില്‍ ഇത്തരമൊരു പ്രസ്താവന നടത്താന്‍ ജയരാജന്‍ വക്കീല്‍ മുതിരുമായിരുന്നോ? ഇല്ല എന്നത് തീര്‍ച്ചയാണ്. അയാളെ സര്‍വീസില്‍ നിന്ന് എത്രയും വേഗം പിരിച്ചു വിടാന്‍ ആവശ്യപ്പെടും. വിധി അനുകൂലമായാല്‍ അംഗീകരിക്കുകയും അനുകൂലമല്ലാതെ വന്നാല്‍ തെരുവില്‍ കാണുമെന്നു പറയുകയും ചെയ്യുന്നത് ഏത് മാനിഫെസ്റ്റോയുടെ പിന്‍ബലത്തില്‍ ആണ്, ഏത് വിപ്ലവരേഖയുടെ അടിസ്ഥാനത്തില്‍ ആണ്?. ഇത് ഫാസിസം അല്ലെങ്കില്‍ മറ്റെന്താണ് ഫാസിസം?

അന്വേഷണക്കമ്മീഷനുകള്‍ ഒരാളെ കുറ്റവിമുക്തനാക്കിയാല്‍ അയാളെ തൂക്കിക്കൊല്ലണമെന്നു പറയാന്‍ ഒരു ശുംഭനും ഇന്ത്യന്‍ ഭരണഘടന അവകാശം നല്‍കുന്നില്ല. അസിസ്റ്റന്റ്‌ പോലീസ് കമ്മീഷണനറെ കാണുന്നിടത്ത് വെച്ചു തല്ലാനാണ് സംസ്ഥാന നേതാവ് ആഹ്വാനം ചെയ്തത്. യൂണിഫോമില്‍ ആണെങ്കില്‍ തല്ലേണ്ട എന്നും പറഞ്ഞു. പോലീസിന്റെ യൂണിഫോമിനോടുള്ള പ്രത്യേക ബഹുമാനം കൊണ്ടാണ് ഇത്രയും ഇളവു നല്‍കിയത്!. എന്നാല്‍ സാധാരണക്കാരന്റെ വേഷത്തോട് അത്തരമൊരു ബഹുമാനം വേണ്ടതില്ല!!. യൂണിഫോം മാറ്റി മുണ്ടും കുപ്പായവും ഇട്ടാല്‍ ഉടനെ അടിച്ചു എല്ലൂരിക്കോ എന്നാണ് കല്പന. രാജ്യത്തെ നിയമ സംവിധാനത്തോടും കോടതികളോടും തരിമ്പു പോലും ആദരവില്ലാത്ത ഇത്തരം ഗുണ്ടകളാണ് നമ്മുടെ രാഷ്ട്രീയ പ്രസ്ഥാനങ്ങളുടെ തലപ്പത്തുള്ളത് എന്നോര്‍ക്കുമ്പോള്‍ ലജ്ജിക്കുകയല്ല, ഒരു കുപ്പി എന്‍ഡോസള്‍ഫാന്‍ വാങ്ങി കുടിക്കുയാണ് വേണ്ടത്!!.

Related Posts
നിര്‍മല്‍ മാധവിനെ അമേരിക്കയിലയച്ചു പഠിപ്പിക്കണം.
ഷാജഹാനേ, ഇത് കണ്ണൂരാ..
പരിയാരത്തെ ശുംഭന്മാരും പാവം NRI കളും

നിര്‍മല്‍ മാധവിനെ അമേരിക്കയിലയച്ചു പഠിപ്പിക്കണം.

2011-10-17T08:56:00.002+03:00

ചാണ്ടി സാറിനോട് ഒരഭ്യര്‍ത്ഥനയുണ്ട്. ദയവു ചെയ്തു നിര്‍മല്‍ മാധവിനെ അമേരിക്കയില്‍ അയച്ചു പഠിപ്പിക്കണം. നമ്മുടെ സംസ്ഥാനത്തിനും നിര്‍മലിനും അതാണ്‌ നല്ലത്. അമേരിക്കയിലാവുമ്പോള്‍ ഒരു ഗുണമുണ്ട്. അവിടെ എസ് എഫ് ഐ സ്ട്രോങ്ങ്‌ കുറവാണ്. പഠന കാര്യങ്ങളില്‍ നമ്മളെപ്പോലെ നിലവാരം ഇല്ലെങ്കിലും അലമ്പില്ലാതെ ക്ലാസ്സില്‍ ഇരിക്കാന്‍ പറ്റും. ഒരു സീറ്റ് ഒപ്പിക്കാന്‍ ലീഗുകാരുടെ കാലു പിടിച്ചു എന്ന ചീത്തപ്പേരും ഒഴിവാക്കാം. പി സി ജോര്‍ജിനെക്കൊണ്ട് ഒബാമയെ വിളിപ്പിച്ചാല്‍ ഒരു മണിക്കൂറിനുള്ളില്‍ സീറ്റ് റെഡിയാവും. ഏറ്റവും വലിയ ലാഭം സര്‍ക്കാര്‍ ഖജനാവിനാണ്. നിര്‍മലിനെ ഏത് കോളേജില്‍ ചേര്‍ത്തിയാലും രണ്ടു ബറ്റാലിയന്‍ പോലീസ് കോളേജിനു കാവല്‍ ഇരിക്കേണ്ടി വരും. അമേരിക്കയില്‍ അയച്ചാല്‍ രണ്ടു കോണ്‍സ്റ്റബിളിന്റെ ശമ്പളം കൊണ്ട് കാര്യം നടക്കും.

ഈ ഒരു പയ്യന്റെ വിഷയത്തില്‍ മാസങ്ങളായി പല കോളേജുകളിലും പഠനം നടന്നിട്ട്. കേരളമാകെ വിദ്യാഭ്യാസ ബന്ദ് നടന്നു. നിരവധി സര്‍ക്കാര്‍ വാഹങ്ങള്‍ കത്തി. രാധാകൃഷ്ണ പിള്ള വെടിയും വെച്ചു!!. മന്ത്രിസഭയും ചാനലുകളും പൊതുജനവുമൊക്കെ ഈ ഒരു വിഷയമാണ് ചര്‍ച്ച ചെയ്തു കൊണ്ടിരിക്കുന്നത്. ഇപ്പോഴിതാ നിയമസഭയും സ്തംഭിച്ചിരിക്കുന്നു.

ഒരൊറ്റ ദിവസം പഠനം മുടങ്ങിയാല്‍ അധ്യാപകരുടെ ശമ്പള ഇനത്തില്‍ മാത്രം കോടികള്‍ നഷ്ടം ഉണ്ടാവും. നിര്‍മലിന്റെ വിഷയത്തില്‍ നഷ്ടപ്പെട്ട എല്ലാ അദ്ധ്യയന ദിനങ്ങളുടെയും തകര്‍ക്കപ്പെട്ട പൊതുമുതലിന്റെയും മറ്റും കണക്കെടുത്താല്‍ ഏറ്റവും ചുരുങ്ങിയത് അഞ്ഞൂറ് കോടിയെങ്കിലും ഖജനാവിന് നഷ്ടം കാണും. ഏത് കോളേജില്‍ കൊണ്ടുപോയി ചേര്‍ത്താലും ഇനിയും പ്രശ്നങ്ങള്‍ ഉണ്ടാവും. എസ് എഫ് ഐ യുടെ സ്വഭാവം സാക്ഷാല്‍ കാറല്‍ മാര്‍ക്സ് വന്നാല്‍ പോലും മാറ്റാന്‍ കഴിയില്ല. സമരം നടത്തലും തല്ലലും തല്ലു കൊള്ളലുമൊക്കെയാണ് അവരുടെ പ്രധാന കലാപരിപാടികള്‍ . പഠനം അജണ്ടയിലെ അവസാനത്തെ ഐറ്റം ആണ്. കേട്ടിടത്തോളം നിര്‍മല്‍ മാധവനും അവന്റെ സ്വഭാവം മാറ്റാനുള്ള വകുപ്പ് കാണുന്നില്ല. എസ് എഫ് ഐ റാഗിംഗ് മൂലം ആത്മഹത്യ ചെയ്യാന്‍ ശ്രമിച്ച ആ പഴയ പയ്യനില്‍ നിന്ന് ഇച്ചിരി മാറ്റം കാണുന്നുണ്ട്. തല്ലു കൊണ്ട്കൊണ്ട് ഒരു ഇരുത്തം വന്ന ലുക്ക്‌. ചുരുക്കത്തില്‍ ഇനിയും ഒരഞ്ഞൂറു കോടി കൂടി ഖജനാവില്‍ നിന്ന് പോകാനുള്ള വകുപ്പ് തെളിഞ്ഞു വരുന്നുണ്ട്. ഇവിടെയാണ്‌ അമേരിക്കന്‍ പഠനത്തിന്റെ പ്രസക്തി കിടക്കുന്നത്.

'ഭാര്യയും അമ്മയും അച്ഛനുമുളള' ടി വി രാജേഷ് പൊട്ടിക്കരഞ്ഞതിന് തന്നെ ഒരഞ്ഞൂറു കോടിയുടെ നിലവാരമുണ്ട്. ഖജനാവിലെ നഷ്ടത്തിന്റെ കൂടെ ഈ കരച്ചിലിന്റെ വിലയും കൂടെ കൂട്ടണം. ചെഗുവേരയുടെ ബൊളീവിയന്‍ കാടുകളിലെ വീരേതിഹാസങ്ങളും ഹോചിമിന്റെ ജയില്‍ ഡയറിയിലെ ചോര മണക്കുന്ന സാഹസങ്ങളും സ്റ്റഡി ക്ലാസെടുത്തു വളര്‍ന്ന വിപ്ലവ നായകന്‍ എല്‍ കെ ജി കുട്ടികള്‍ കോല് മുട്ടായിക്കു കരയുന്ന പോലെ നിലവിളിച്ചത്, ഹോ, കണ്ടിട്ട് എന്റെ തൊലിയുരിഞ്ഞു പോയി. തെളിയിക്കപ്പെടാത്ത ആരോപണങ്ങളുടെ പേരില്‍ ആരാന്റെ മെക്കിട്ടു കയറുമ്പോള്‍ അവരുടെ വീട്ടിലും അമ്മയും പെങ്ങളും ഭാര്യയും കാണുമെന്നു ഒരു നിമിഷം പോലും ഓര്‍ത്തിട്ടില്ലാത്ത വിപ്ലവ തീപ്പന്തമാണ് നിയമസഭയില്‍ അപ്പുക്കുട്ടന്‍ കളിച്ച് 'ഓവറാക്കി ചളമാക്കി'യത്. ഇവരുടെയൊക്കെ വിപ്ലവ വീര്യം ഇത്രയേ ഉള്ളോ എന്ന് ചോദിക്കരുത്. വിഘടനവാദികളും പ്രതിക്രിയാവാദികളും പ്രത്യക്ഷത്തില്‍ അകല്‍ച്ചയില്‍ നില്‍ക്കുമ്പോഴും കരച്ചിലിന്റെ അന്തര്‍ധാര ശക്തമാണ് എന്ന് മാത്രം മനസ്സിലാക്കിയാല്‍ മതി.

നിയമസഭക്കകത്തും പുറത്തും ഇതുപോലുള്ള കൂട്ടക്കരച്ചിലുകള്‍ ഉണ്ടാകാതിരിക്കാനും കോണ്‍ഗ്രസ്സുകാര്‍ക്ക് സുഖമായി ഭരിക്കാനും ബാലകൃഷ്ണ പിള്ളക്ക് സുഖമായി ആശുപത്രിയില്‍ കഴിയാനും എല്ലാം നല്ലത് നിര്‍മല്‍ മാധവിനെ അമേരിക്കയില്‍ അയക്കുകയാണ്. ഒരു ബ്ലോഗരുടെ പരിമിതി വെച്ചു എനിക്ക് ഉപദേശിക്കാനേ കഴിയൂ. ബാക്കിയൊക്കെ ചാണ്ടി സാര്‍ തന്നെ ചെയ്യണം.

മ്യാവൂ: അമേരിക്കയില്‍ ഇപ്പോള്‍ പഠിച്ചു കൊണ്ടിരിക്കുന്ന ഇന്ത്യന്‍ കുട്ടികള്‍ കൂട്ടത്തോടെ തിരിച്ചു വന്നാല്‍ അവരെ കയറ്റിയിരുത്താല്‍ പട്ടിക്കാട്ടെ സ്വാശ്രയ കോളേജില്‍ കുറച്ചു സീറ്റ് ഒഴിച്ചിടാന്‍ പാണക്കാട് തങ്ങളെക്കൊണ്ട് പറയിപ്പിക്കുന്നതും നല്ലതാണ്. (Disclaimer)

Story update : പിള്ളയെ തട്ടാന്‍ ജയരാജന്റെ ക്വട്ടേഷന്‍