February 15, 2018

മാണിക്യമലരായ ആ ഖദീജ ബീവി ആരാണ്?

ഞങ്ങൾ മൂന്ന് പേർ ഒരു രാത്രിയിൽ ഹിറായിലേക്കുള്ള പടികൾ കയറുകയാണ്. മക്കയിലെ ജബലുന്നൂർ പർവ്വതം. പർവ്വത മുകളിലാണ് ഹിറാഗുഹ. പ്രവാചകൻ മുഹമ്മദ് നബി ധ്യാനത്തിലിരുന്ന ഗുഹ. ഈ ഗുഹക്കകത്താണ്‌ വിശുദ്ധ ഖുർആന്റെ വചനങ്ങൾ ആദ്യമായി അവതരിക്കപ്പെട്ടത്. ഒരു രാത്രി ആ ഗുഹയിൽ കഴിച്ചു കൂട്ടണമെന്ന ആഗ്രഹവുമായാണ് ഞങ്ങളുടെ മലകയറ്റം. തൊള്ളായിരം അടിയോളം ഏതാണ്ട് കുത്തനെയുള്ള കയറ്റമാണ്. വിശുദ്ധ കഅബാലത്തേയും ഹറം പള്ളിയുടെ മിനാരങ്ങളേയും തഴുകിയെത്തുന്ന തണുത്ത കാറ്റിലും ഞങ്ങൾ വിയർത്ത് കുളിക്കുന്നുണ്ടായിരുന്നു. അല്പം പടി കയറിയും അതിലേറെ സമയം പാറക്കല്ലുകളിൽ ഇരുന്നും വെള്ളം കുടിച്ചും ഏതാണ്ട് ഒരു മണിക്കൂറിലധികമെടുത്തു ഞങ്ങൾ മലമുകളിലെത്താൻ. ആയാസകരമായ ആ യാത്രയുടെ ഓരോ നിമിഷത്തിലും ഞാനോർത്തത് ഖദീജ ബീവിയെയാണ്. പ്രവാചകൻ മുഹമ്മദ് നബിയുടെ പ്രിയ പത്നിയെ. ശാരീരിക അവശതകൾ ഒന്നുമില്ലാത്ത ഞങ്ങൾക്ക് ഒരു തവണ ഈ പർവ്വതം കയറാൻ ഇത്രയേറെ ബുദ്ധിമുട്ടുകൾ അനുഭവപ്പെട്ടെങ്കിൽ പ്രവാചകനുള്ള ഭക്ഷണ പാനീയങ്ങളുമായി ഒരു ദിവസത്തിൽ പലതവണ ഈ മലകയറിയിറങ്ങിയ ആ മഹതി സഹിച്ച പ്രയാസങ്ങളെത്രയായിരിക്കും?. പ്രവാചകൻ ഈ പർവ്വതത്തിന്റെ ഉച്ചിയിൽ ധ്യാനത്തിലിരുന്ന നാളുകളത്രയും ആ ജീവൻ നിലനിർത്തിയത് ഖദീജ കൊണ്ടുവന്ന ഭക്ഷണ പാനീയങ്ങളാണ്. വേണ്ടത്ര പണവും പരിചാരകരുമുള്ള ധനിക കുടുംബത്തിലെ വ്യാപാരപ്രമുഖയായിരുന്നു ഖദീജ. ഭക്ഷണവുമായി എത്ര പേരെ വേണമെങ്കിലും ആ മലമുകളിലേക്ക് പറഞ്ഞയക്കുവാൻ അവർക്ക് കഴിയുമായിരുന്നു. എന്നാൽ ആ ദൗത്യം മറ്റാരേയും ഏല്പിക്കാതെ സ്വയം ഏറ്റെടുക്കുകയായിരുന്നു അവർ. പ്രവാചകനോട് എത്രമേൽ സ്നേഹവും കരുതലും ആ മഹതിക്കുണ്ടായിരുന്നിരിക്കുമെന്ന  ചിന്തയാണ് ജബലുന്നൂറിന്റെ ഓരോ പടികൾ കയറുമ്പോഴും എന്റെ മനസ്സിലൂടെ കടന്നുപോയത്.

January 28, 2018

ഇന്ത്യ ഇന്ത്യയായി തുടരട്ടെ

ഇന്ത്യ അതിന്റെ ഏഴ് പതിറ്റാണ്ട് കാല ചരിത്രത്തിലെ ഏറ്റവും വലിയ വെല്ലുവിളികളെ അഭിമുഖീകരിച്ചു കൊണ്ടാണ് കടന്നു പോകുന്നത്. അത്യധികം വൈവിധ്യ പൂർണ്ണമായ ഒരു ബഹുമത സമൂഹത്തിന്റെ സമാധാനപരമായ സഹവർത്തിത്വം ഉറപ്പ് വരുത്തിക്കൊണ്ട്  ലോക രാഷ്ട്രങ്ങൾക്കിടയിൽ ജനാധിപത്യ മതേതര വ്യവസ്ഥിതിയുടെ ഉജ്ജ്വല മാതൃകമായി നില നിന്ന ചരിത്രമാണ് സ്വതന്ത്ര ഇന്ത്യക്കുള്ളത്. ആ ചരിത്രത്തിന് നിരന്തരം മുറിവേറ്റുകൊണ്ടിരിക്കുന്ന ഒരു വർത്തമാന കാലത്തിലൂടെയാണ് ഇന്ത്യ യാത്ര തുടരുന്നത്. വർഗീയ ധ്രുവീകരണങ്ങളുടേയും അസഹിഷ്ണുതയുടെയും കാറ്റ് ഏറെക്കുറെ ഇന്ത്യയുടെ എല്ലാ ഭാഗങ്ങളിലും അടിച്ചു വീശുന്നുണ്ട്.         

ഇന്ത്യയെക്കുറിച്ച് ഏത് ദേശക്കാരുടെ മുന്നിലും അഭിമാനത്തോടെ പറയുന്ന ഓരോ പ്രവാസിക്കും നാട്ടിൽ നിന്ന് എത്തുന്ന ഇത്തരം വാർത്തകൾ ഏല്പിക്കുന്ന ആഘാതം ചെറുതല്ല. ഇന്ത്യയെന്ന വികാരം മനസ്സിൽ കൂടുതൽ ശക്തമാകുക ഇന്ത്യക്ക് പുറത്ത് ജീവിക്കുമ്പോഴാണ് എന്ന് പലപ്പോഴും തോന്നിയിട്ടുണ്ട്. വിരഹം സ്നേഹത്തേയും പ്രണയത്തേയും കൂടുതൽ ഊഷ്മളമാക്കുന്നത് പോലെ പ്രവാസം രാജ്യത്തോടുള്ള വികാരത്തെ കൂടുതൽ തീവ്രതരമാക്കുന്നതാകാം അതിനുള്ള കാരണം. രാജ്യത്ത് നടക്കുന്ന സംഭവങ്ങളും വർത്തകളുമൊക്കെ നാട്ടിലുള്ളവരേക്കാൾ ഏറ്റവും കൂടുതൽ അപ്‌ഡേറ്റഡായി അറിയുന്നവരാണ് പ്രവാസ ലോകത്ത് ജീവിക്കുന്ന ഭൂരിപക്ഷം പേരും. 'എത്ര കുറച്ചറിയുന്നുവോ അത്ര സുഖമായിട്ടുറങ്ങാം' എന്നൊരു പഴമൊഴിയുണ്ട്. രാജ്യത്ത് നടക്കുന്ന അസ്വസ്ഥതകളുടേയും സംഘർഷങ്ങളുടേയും വാർത്തകൾ അപ്പപ്പോൾ അറിയുന്ന ആർക്കും അത്ര സുഖമായിട്ടുറങ്ങാൻ കഴിയുന്ന കാലമല്ല ഇത്.

January 8, 2018

റിവേഴ്‌സ് ഗിയറിൽ യാത്ര തുടങ്ങുന്ന മുജാഹിദ് പ്രസ്ഥാനം

കേരള മുസ്‌ലിംകൾക്കിടയിൽ മതപരവും സാമൂഹ്യവും വിദ്യാഭ്യാസപരവുമായ മാറ്റങ്ങൾക്ക് വേണ്ടി ക്രിയാത്മക ഇടപെടലുകൾ നടത്തിയ  സംഘടനയെന്ന നിലക്ക്‌ മുജാഹിദ് പ്രസ്ഥാനത്തിന് കേരള സാമൂഹ്യ ചരിത്രത്തിൽ അതിന്റേതായ ഒരിടമുണ്ട്. ആ ഇടം കൃത്യമായി അടയാളപ്പെടുത്തിയ അതിന്റെ ഗതകാല ചരിത്രത്തോട് ആ പ്രസ്ഥാനത്തിന്റെ വർത്തമാനം എത്രമാത്രം നീതിപുലർത്തുന്നു എന്ന ചോദ്യം ഇപ്പോൾ ഉയരുന്നുണ്ട്. തീവ്രസലഫിസത്തെക്കുറിച്ച ആഗോള ചർച്ചകളുടെ പാശ്ചാത്തലത്തിൽ മാത്രമല്ല, കേരളത്തിന്റെ സവിശേഷ സാമൂഹ്യ സാഹചര്യത്തിൽ കൂടിയാണ് ആ ചോദ്യമിപ്പോൾ ഉയർന്നു വരുന്നത്.

ഒന്നര പതിറ്റാണ്ട് കാലം കേരള മുസ്‌ലിം സാമൂഹ്യാന്തരീക്ഷത്തിൽ വലിയ തർക്കങ്ങൾക്കും വിഴുപ്പലക്കലുകൾക്കും കാരണമായ ഒന്നാണ് മുജാഹിദ് വിഭാഗത്തിലെ പിളർപ്പും പിളർപ്പിനെത്തുടർന്നുണ്ടായ കിടമത്സരങ്ങളും. അത്തരം തർക്കങ്ങൾക്കൊക്കെ ഒരളവു വരെ അവസാനം കുറിച്ച് കൊണ്ടാണ് പ്രബലമായ രണ്ട് മുജാഹിദ് വിഭാഗങ്ങൾ കഴിഞ്ഞ വർഷം ഒന്നായത്. വലിയ ജനകീയ പങ്കാളിത്തത്തോടെ കോഴിക്കോട് കടപ്പുറത്ത് ലയനസമ്മേളനവും കൃത്യം ഒരു വർഷത്തിന് ശേഷം മലപ്പുറം കൂരിയാട് വെച്ച് സംയുക്തമായി സംസ്ഥാന സമ്മേളനവും നടന്നു.  പിളർന്ന മതസംഘടനകൾ ഒരുകാലത്തും ഒന്നായ ചരിത്രമോ കീഴ്വഴക്കമോ ഇല്ലാത്തതിനാൽ ഇത്തരമൊരു ലയനത്തെ ഒരു സാമൂഹ്യ അത്ഭുതമായാണ് പലരും വീക്ഷിച്ചത്. മുജാഹിദുകളുടെ ലയനത്തെ കേരളത്തിലെ മറ്റ് മുസ്‌ലിം സംഘടനകളെല്ലാം സ്വാഗതം ചെയ്യുന്ന അപൂർവം സ്ഥിതിവിശേഷത്തിനും കേരളക്കര സാക്ഷ്യം വഹിച്ചു.

November 17, 2017

ചെങ്കടൽ തീരത്തെ ഉപ്പുപാട കാഴ്ചകൾ

പെട്ടെന്നുള്ള കാഴ്ചയിൽ മഞ്ഞുപാളികൾ ചിതറിക്കിടക്കുന്നന അന്റാർട്ടിക്കയിലെ ഹിമപ്രദേശമാണെന്ന് തോന്നിയേക്കാമെങ്കിലും ഇതൊരു ഉപ്പ് പാടമാണ്. ജിദ്ദ നഗരത്തിൽ നിന്നും ഏതാണ്ട് നാല്പത്തിയഞ്ച് കിലോമീറ്റർ ദൂരത്തിലാണ് ചെങ്കടൽ തീരത്ത് ഈ ഉപ്പ് പാടമുള്ളത്.  ജിദ്ദ ജിസാൻ ഹൈവേയോട് ചേർന്ന് അൽഖുംറ മേഖലയിലാണ് നൂറ് കണക്കിന് തൊഴിലാളികൾക്ക് നിത്യജീവിതത്തിന് വകയേകുന്ന രീതിയിൽ കിലോമീറ്ററുകൾ ദൂരത്ത് ഉപ്പ് തളം കെട്ടി നിൽക്കുന്നത്.  നിത്യോപയോഗ വസ്തുക്കളിൽ ഒഴിച്ചു കൂടാനാവാത്ത ഒന്നാണ് ഉപ്പ്. പരമ്പരാഗത രീതിയിൽ അതുണ്ടാക്കിയെടുക്കുന്ന ഇടം ജിദ്ദ നഗരത്തോട് ചേർന്ന് തന്നെയുണ്ട് എന്ന് വളരെ മുമ്പേ അറിയാമായിരുന്നെങ്കിലും അങ്ങോട്ടൊരു യാത്ര തരപ്പെട്ടത് ഇപ്പോഴാണ്. ജിദ്ദയിലെ ഒരു ടൂറിസ്റ്റ് സ്പോട്ടായി മാറിക്കൊണ്ടിരിക്കുന്ന അൽസൈഫ്‌ ബീച്ച് പ്രോജക്ടിന്റെ കടലോരത്തോട് ചേർന്നാണ് ഈ ഉപ്പുപാടം സ്ഥിതി ചെയ്യുന്നത്. അവിടേക്ക് നടത്തിയ യാത്രയിൽ നിന്നുള്ള ചില ഫോട്ടോകളാണ് ഈ ബ്ലോഗിൽ ചേർത്തിരിക്കുന്നത്.

July 11, 2017

മലപ്പുറത്തെക്കുറിച്ച് സേതുരാമൻ ഐ പി എസ്സിന് പറയാനുള്ളത്

(കേരള കേഡറിൽ നിന്നുള്ള ഐ പി എസ് ഓഫീസർ സേതുരാമൻ എഴുതിയ ഫെയ്‌സ്ബുക്ക് പോസ്റ്റിന്റെ  വിവർത്തനമാണിത്. സംഘപരിവാറിന്റെ നേതൃത്വത്തിൽ മലപ്പുറം ജില്ലയെക്കുറിച്ച് ദേശീയ തലത്തിൽ വ്യാപകമായ കുപ്രചരണങ്ങൾ നടക്കുന്ന ഇക്കാലത്ത് മൂന്നാർ സ്വദേശിയായ സേതുരാമന്റെ പോസ്റ്റ് കൂടുതൽ ചർച്ചയർഹിക്കുന്നുണ്ട് എന്ന് കരുതുന്നതിനാലാണ് ഇംഗ്ലീഷിൽ നിന്ന് വിവർത്തനം ചെയ്ത് ഇവിടെ പ്രസിദ്ധീകരിക്കുന്നത്)

കേരളത്തിൽ മുസ്‌ലിം ജനസംഖ്യ വർദ്ധിക്കുന്നതിൽ ആകുലപ്പെട്ട് മുൻ ഡി ജി പി സെൻകുമാർ നടത്തിയ വിവാദ പ്രസ്താവനകളുടെ പാശ്ചാത്തലത്തിൽ ഇത്തരമൊരു കുറിപ്പിന് വലിയ പ്രസക്തിയുണ്ട്.  10 July 2017 ന് കെ സേതുരാമൻ ഐ പി എസ് തന്റെ ഫെയ്‌സ്ബുക്ക് പ്രൊഫൈലിൽ പോസ്റ്റ് ചെയ്ത കുറിപ്പിന്റെ വിവർത്തനം.

* * *
കേരളത്തിൽ മുസ്‌ലിം ജനസംഖ്യ വർദ്ധിച്ചാൽ എന്ത് സംഭവിക്കും?. ഒരു ഐ പി എസ് ഓഫീസർ എന്ന നിലക്ക് മലപ്പുറം ജില്ലാ പോലീസ് മേധാവിയായി നാല് വർഷം ജോലി ചെയ്ത പരിചയം വെച്ച് എനിക്ക് പറയാൻ കഴിയും, അത് കേരളത്തെ എല്ലാ അർത്ഥത്തിലും ജീവിക്കാൻ ഏറ്റവും മികച്ച ഒരു പ്രദേശമാക്കി മാറ്റും.

July 8, 2017

മാടമ്പള്ളിയിലെ യഥാർത്ഥ രോഗി

കേരള മുൻ ഡി ജി പി ടി പി സെൻകുമാർ സമകാലിക മലയാളം വാരികക്ക് നൽകിയ അഭിമുഖം ഞെട്ടലോടെയാണ് വായിച്ചത്. വർഷങ്ങളോളം കേരള പോലീസിന്റെ തലപ്പത്തുണ്ടായിരുന്ന ഒരാളുടെ സാമൂഹിക വീക്ഷണങ്ങൾ എന്താണെന്നും വിവിധ മതവിഭാഗങ്ങളോടുള്ള കാഴ്ചപ്പാടുകൾ എന്താണെന്നും ഭീതിയോടെ തിരിച്ചറിയേണ്ട അവസ്ഥാവിശേഷമാണ് ആ അഭിമുഖം കേരളക്കരക്ക് നല്കിയിരിക്കുന്നത്. വളരെ മതേതരവും നിഷ്പക്ഷവുമായിരുന്ന കേരളത്തിലെ പോലീസിനെ അടിമുടി സംഘിവത്കരിക്കുവാൻ ശ്രമിക്കുന്നത് ആരാണെന്ന ചോദ്യം കുറേക്കാലമായി നമ്മുടെ സാമൂഹികാന്തരീക്ഷത്തിൽ ഉയർന്ന് വന്നതാണ്. ആർക്കും ഉത്തരം കണ്ടെത്താൻ കഴിയാതിരുന്ന ചോദ്യം. ഇപ്പോൾ ആ ചോദ്യത്തിന് ഏതാണ്ടൊരു ഉത്തരമായിരിക്കുന്നു.  മാടമ്പള്ളിയിലെ യഥാർത്ഥ രോഗികൾ  മറ നീക്കി പുറത്ത് വന്ന് കൊണ്ടിരിക്കുന്നു. ഇതുവരെ ചികിത്സിച്ചിരുന്നത് യഥാർത്ഥ രോഗിയെ ആയിരുന്നില്ല എന്ന ഒരു തിരിച്ചറിവ് കൂടി ഇതോടൊപ്പമുണ്ടാകണം എന്നർത്ഥം. ഡി ജി പി പറഞ്ഞ ജനസംഖ്യാ കണക്കുകളിൽ നിന്ന് തുടങ്ങാം.  അഭിമുഖത്തിലെ പ്രൈം ഫോക്കസ് അതാണ്.

December 13, 2016

മുജാഹിദ് ഐക്യം: സാധ്യതകളും വെല്ലുവിളികളും

ഒന്നര പതിറ്റാണ്ട് കാലത്തെ പിളർപ്പിന് ശേഷം കേരളത്തിലെ മുജാഹിദ് പ്രസ്ഥാനം വീണ്ടും ഐക്യപ്പെടുകയാണ്. പ്രബലമായ രണ്ട് വിഭാഗങ്ങൾ ഒന്നിച്ചു ചേരുന്നു. സംഘടനകളുടെ പിളർപ്പുകളുടെ ചരിത്രത്തിൽ വളരെ അപൂർവ്വമായാണ് ഇത്തരം ഒന്നിക്കലുകൾ ഉണ്ടാകാറുളളത്. ഒരിക്കൽ പിളർന്നവ വീണ്ടും പിളരുകയും കൂടുതൽ ശിഥിലമാകുകയും ചെയ്യുന്നതാണ് പൊതുവെ കണ്ടു വരാറുള്ളത്. സ്ഥാപനങ്ങളും കീഴ്ഘടകങ്ങളും യൂണിറ്റുകളുമൊക്കെയായി വളരെ ആഴത്തിൽ പിളർപ്പ് വേരുപിടിക്കുകയും ആരോപണ പ്രത്യാരോപണങ്ങളിലൂടെ സാംസ്കാരിക രംഗത്ത് ഏറെ മാലിന്യങ്ങൾ നിക്ഷേപിക്കുകയും ചെയ്ത ശേഷം ഇങ്ങനെയൊരു ഐക്യപ്പെടൽ ഉണ്ടാകുമെന്ന് പ്രതീക്ഷിച്ചതല്ല. ചരിത്ര നിയോഗം മറന്നു കൊണ്ട് തമ്മിൽ തല്ലി കൂടുതൽ സാംസ്കാരിക മാലിന്യങ്ങളുണ്ടാക്കി പൊതുസമൂഹത്തിന്റെ ശ്രദ്ധയിൽ നിന്നും അത് വഴി ചരിത്രത്തിൽ നിന്ന് തന്നെയും പതിയെ അപ്രത്യക്ഷമാകുമെന്ന് കരുതിയിടത്തു നിന്നാണ് നവോത്ഥാന വഴിയിലെ ഒരു തിരിച്ചു വരവിന് വഴിയൊരുക്കിക്കൊണ്ടുള്ള ഈ ഐക്യപ്പെടൽ ഉണ്ടായിരിക്കുന്നത്. അതുകൊണ്ട് തന്നെ അത് തികച്ചും സ്വാഗതാർഹവുമാണ്. കേരളക്കരയിലെ മുസ്‌ലിം സമൂഹത്തിന്റെ നവോത്ഥാന ചരിത്രത്തിൽ വലിയ സംഭാവനകൾ അർപ്പിച്ച ഒരു പ്രസ്ഥാനമെന്ന നിലക്ക് മാറിയ കാലത്തിന്റെ സാഹചര്യങ്ങളിൽ ഈ പ്രസ്ഥാനത്തിന്റെ സാമൂഹ്യവും സാംസ്കാരികവുമായ ഇടം എന്തെന്നതിനെക്കുറിച്ച ചില ചിന്തകൾ പങ്ക് വെക്കുക മാത്രമാണ് ഈ കുറിപ്പ് കൊണ്ട് ഉദ്ദേശിക്കുന്നത്.

November 20, 2016

തും ബിൽകുൽ ഹം ജയ്സേ നിക് ലേ

ഡൊണാൾഡ് ട്രംപ് അമേരിക്കൻ പ്രസിഡന്റായ വാർത്ത പുറത്ത് വന്ന ഉടനെ കോഴിക്കോട് കളക്ടർ പ്രശാന്ത് നായർ ഫെയ്‌സ്ബുക്കിൽ ഇങ്ങനെ ഒരു സ്റ്റാറ്റസിട്ടു. "എന്റെ ട്രമ്പുരാനേ!".. അവിശ്വസനീയമായ ഒരു വാർത്തയുടെ കടന്നു വരവ് പോലെ അത്തരമൊരു ഞെട്ടൽ ലോകത്ത് എല്ലായിടത്തും പ്രകടമായിരുന്നു. മാധ്യമങ്ങളുടെ സർവേകളും തിരഞ്ഞെടുപ്പ് വിശാരദന്മാരുടെ പ്രവചനങ്ങളും ഹിലാരി ക്ലിന്റന് അനുകൂലമായിരുന്നു. അമേരിക്കൻ ജനതയെ ഏറ്റവും കൂടുതൽ സ്വാധീനിക്കാറുള്ള തെരഞ്ഞെടുപ്പ് ഡിബേറ്റുകളിലും തിളങ്ങിയത് ഹിലാരി തന്നെയായിരുന്നു. ഇമെയിൽ വിവാദത്തിന്റെ കരിനിഴൽ ഉണ്ടായിരുന്നെങ്കിലും തിരഞ്ഞെടുപ്പിന്റെ രണ്ട്‌ ദിവസം മുമ്പ് എഫ് ബി ഐ അവർക്ക് ക്ളീൻ ചിറ്റ് നൽകിയതോടെ വൻഭൂരിപക്ഷത്തിന്‌ ഹിലാരി ജയിച്ചു കയറുമെന്ന് പൊതുവിൽ വിലയിരുത്തപ്പെട്ടു. പക്ഷേ ഫലം വന്നപ്പോൾ നേരെ തിരിച്ചാണുണ്ടായത്.   "എന്റെ ട്രമ്പുരാനേ!" എന്ന് തലയിൽ കൈവച്ചു പോകുന്ന ജനവിധി.

പാക്കിസ്ഥാനി കവയത്രിയും ആക്ടിവിസ്റ്റുമായ ഫഹ്മിദ റിയാസിന്റെ പ്രശസ്തമായ ഒരു കവിതയുണ്ട്. ഇന്ത്യയിൽ വർഗീയ ശക്തികൾ വേര് പിടിക്കുകയും ബി ജെ പി ഏറ്റവും വലിയ ഒറ്റക്കക്ഷിയായി പാർലമെന്റിലെത്തുകയും ചെയ്ത അവസരത്തിലാണ് അവർ ഈ കവിത എഴുതിയത്. അതിന്റെ തലക്കെട്ട് ഇതായിരുന്നു. "തും ബിൽകുൽ ഹം ജയ്സേ നിക് ലേ".. 

October 31, 2016

ഏകസിവിൽകോഡ് : 'വാറുണ്ണി'യാകുന്ന മുസ്‌ലിം നേതാക്കൾ

ഗ്രാമത്തിൽ പുലിയിറങ്ങിയപ്പോൾ അതിനെ പിടിക്കാൻ രംഗത്തെത്തുന്ന സാഹസികനാണ് വാറുണ്ണി. മമ്മൂട്ടി തകർത്തഭിനയിച്ച മൃഗയയിലെ കഥാപാത്രം.  പുലി നാട്ടുകാർക്കും വളർത്തു മൃഗങ്ങൾക്കും ജീവന് ഭീഷണിയുയർത്തിയപ്പോൾ വാറുണ്ണി ജീവൻ പണയം വെച്ച് പുലിയോട് ഏറ്റുമുട്ടാനെത്തുകയാണ്. ഏതാനും ദിവസങ്ങൾക്കുള്ളിൽ തന്നെ നാട്ടുകാർക്ക് രണ്ട് ശത്രുക്കളായി. വാറുണ്ണിയും പുലിയും. അതിന് ഒരളവോളം വാറുണ്ണിയുടെ 'സ്വാഭാവഗുണവും' കാരണമായിട്ടുണ്ട്. വാറുണ്ണിക്ക് പാര പണിയാൻ നാട്ടിൽ പലരും രംഗത്തെത്തി. നാട്ടിലെ സകല അലമ്പുകളും അക്കൂട്ടത്തിലുണ്ടായിരുന്നു. പുലിയോട് ഏറ്റുമുട്ടി വാറുണ്ണി ചത്താലും കുഴപ്പമില്ല, വാറുണ്ണിയോട് ഏറ്റുമുട്ടി പുലി ചത്താലും കുഴപ്പമില്ല എന്നതായിരുന്നു അവരുടെ ലൈൻ. രണ്ട് ശത്രുക്കളിൽ ഒരെണ്ണം കുറഞ്ഞുകിട്ടുമല്ലോ. ഏതാണ്ട് ഇതുപോലെയാണ് ഏകസിവിൽ കോഡിന് എതിരെ പൊരുതാനിറങ്ങിയ മുസ്‌ലിം സംഘടനാ നേതാക്കളുടെ അവസ്ഥ. താത്വികമായി ഏക സിവിൽ കോഡിന് എതിരാണ് ഏതാണ്ടെല്ലാ മതനേതാക്കളും പുരോഹിതന്മാരും. ഗ്രാമത്തിലെ മൊത്തം ജനങ്ങൾ പുലിക്കെതിരായ പോലെ. അതിൽ ഹിന്ദുക്കളും മുസ്ലിംകളും കൃസ്ത്യാനികളും സിക്കുകാരും പാഴ്സികളുമെല്ലാമുൾപ്പെടും. കാരണം വിവാഹം, വിവാഹമോചനം, പിന്തുടർച്ചാവകാശം, ദത്തെടുക്കൽ  തുടങ്ങി മതശാസനകൾ നിലനില്ക്കുന്ന മേഖലകളിൽ ഓരോ മതവിശ്വാസിക്കും ഏറെക്കുറെ അവരുടെ മതനിയമങ്ങൾക്കനുനുസരിച്ച് ജീവിക്കാനുള്ള അവകാശം ഇന്ത്യൻ ഭരണഘടന നല്കുന്നുണ്ട്. അതിനനുസരിച്ച് ഓരോ മതവിഭാഗങ്ങൾക്കും വെവ്വേറെ നിയമങ്ങളും ഇന്ത്യയിലുണ്ട്. പക്ഷേ ഏക സിവിൽകോഡിനെതിരേ യുദ്ധം നയിക്കാൻ ഇറങ്ങിപ്പുറപ്പെട്ടിട്ടുള്ളത് വാറുണ്ണിയുടെ റോളിത്തെത്തുന്ന മുസ്‌ലിം മതനേതാക്കളാണ്. ബാക്കിയുള്ളവരൊക്കെ വാറുണ്ണിക്ക് പാര പണിയുന്ന തിരക്കിലും. ഞാനൊറ്റക്ക് ചെയ്യേണ്ട പോരാട്ടമാണോ ഇതെന്ന് ഇവിടെ വാറുണ്ണിയാണ് ചിന്തിക്കേണ്ടത്.

July 10, 2016

പോടാ, പോയി ചാകെടാ !

ഐ എസ് കേരളത്തിൽ വീണ്ടും ചർച്ചാവിഷയമാവുകയാണ്. കേരളത്തിലെ ഏതാനും യുവതീ യുവാക്കൾ ഐ എസ് താവളങ്ങളിലേക്ക് യാത്ര പോയിരിക്കുന്നു എന്ന വാർത്തയാണ് ചർച്ചക്ക് തിരി കൊളുത്തിയിരിക്കുന്നത്. ആ വാർത്തയുടെ നിജസ്ഥിതി അന്വേഷിക്കേണ്ടതും സത്യം പുറത്ത് കൊണ്ട് വരേണ്ടതും നമ്മുടെ പോലീസും അന്വേഷണ വിഭാഗവുമാണ്. അതവർ നടത്തട്ടെ.. കേരളത്തിലെ ഏതാനും യുവാക്കൾ സിറിയയിലേക്കോ ഐ എസിന്റെയോ അൽഖാഇദയുടെയോ താവളങ്ങളിലേക്കോ പോയിട്ടുണ്ടോ എന്നതിനേക്കാൾ പ്രധാനം അങ്ങനെ പോകാനുള്ള സാഹചര്യത്തിലേക്ക് യുവാക്കളെ എത്തിക്കുന്ന വിധത്തിൽ തീവ്രവാദം നമ്മുടെ മണ്ണിൽ വേര് പിടിക്കുന്നുണ്ടോ എന്ന ചിന്തയാണ്. കാരണം അറബ് രാജ്യങ്ങളിൽ നിന്ന് മാത്രമല്ല, യൂറോപ്യൻ, അമേരിക്കൻ നാടുകളിൽ നിന്നും ഭീകരവാദ താവളങ്ങളിലേക്ക് കുടിയേറുന്നവരുടെ എണ്ണം നാൾക്കുനാൾ വർദ്ധിച്ചു വരുന്നു എന്ന പേടിപ്പെടുത്തുന്ന വസ്തുത നമ്മുടെ മുന്നിലുണ്ട്. ഇതുവരെ കേരളത്തിൽ നിന്ന് ഒരാളും ഐ എസ് കേന്ദ്രങ്ങളിലേക്ക് പോയിട്ടില്ല എന്ന് അന്വേഷണ ഉദ്യോഗസ്ഥന്മാർ സാക്ഷ്യപ്പെടുത്തിയാൽ പോലും സമീപ ഭാവിയിൽ അത്തരമൊന്ന് ഉണ്ടാകില്ല എന്ന് ഉറപ്പിച്ചു പറയാൻ നമുക്ക് കഴിയില്ല. സ്ഥിതിഗതികൾ ആ ദിശയിലേക്കാണ് നീങ്ങിക്കൊണ്ടിരിക്കുന്നത്. തീവ്രവാദ ചിന്തകൾ എല്ലാ രംഗങ്ങളിലും നാൾക്കുനാൾ വർദ്ധിച്ചു വരുന്നു എന്നത് ഒരു വസ്തുതയാണ്. ഒരു നാഗരിക സമൂഹമെന്ന നിലക്ക് നമ്മെ അസ്വസ്ഥപ്പെടുത്തേണ്ടത് അതാണ്. ഇത്തരമൊരു ആശങ്കയുടെ ഘട്ടത്തിൽ നാം ചെയ്യേണ്ട മുൻകരുതലുകൾ എന്തൊക്കെയാണ്, ഒരു ക്രിയാത്മക സമൂഹമെന്ന നിലക്ക് സ്വീകരിക്കേണ്ട നടപടികൾ എന്തൊക്കെയാണ് എന്നതെല്ലാം തുറന്ന് ചർച്ച ചെയ്യേണ്ട ഘട്ടം എത്തിയിരിക്കുന്നു.

May 20, 2016

മണ്ണാര്‍ക്കാട് തകർന്നടിഞ്ഞത് പൗരോഹിത്യത്തിന്റെ അഹന്ത

ഇടതുപക്ഷം തൂത്തുവാരിയ ഈ പൊതുതിരഞ്ഞെടുപ്പിൽ നിന്ന് പലർക്കും പലതും പഠിക്കാനുണ്ട്. ഇന്ത്യൻ ജനാധിപത്യവും മതേതരത്വവും ഏഴ് പതിറ്റാണ്ടിന്റെ ചരിത്രത്തിലെ ഏറ്റവും വലിയ പ്രതിസന്ധിയിലൂടെ കടന്നു പൊയ്ക്കൊണ്ടിരിക്കുമ്പോഴാണ് നാം ഒരു പൊതുതിരഞ്ഞെടുപ്പിനെ നേരിട്ടത്. ഫാസിസം ഇന്ത്യയെ വംശീയമായി നെടുകെ പിളർക്കാൻ തയ്യാറെടുത്തു കഴിഞ്ഞ ഘട്ടം. പലരും പലതും ഭയപ്പെട്ടിരുന്നുവെങ്കിലും കേരള ജനത ഫാസിസ്റ്റുകൾക്ക് വഴിമാറിക്കൊടുക്കാൻ തയ്യാറായില്ല എന്നതാണ് ഈ തിരഞ്ഞെടുപ്പ് നല്കിയ ഏറ്റവും വലിയ ആശ്വാസം. അഴിമതി ആരോപണങ്ങളിൽ മുങ്ങിക്കുളിച്ച പല മന്ത്രിമാരേയും അണപ്പല്ല് കൊണ്ട് കടിച്ച് പിടിച്ച് സംരക്ഷിച്ച് കേരളജനതയുടെ ആത്മാഭിമാനത്തെ വെല്ലുവിളിച്ച ഉമ്മൻ ചാണ്ടിക്ക് ഇതിലേറെ മനോഹരമായ ഒരു മറുപടി ഒരു ജനാധിപത്യ വ്യവസ്ഥയിൽ ലഭിക്കാനില്ല. കള്ളനേക്കാൾ അപകടകാരിയാണ് കള്ളന് കഞ്ഞി വെച്ച് കൊടുക്കുന്നവൻ. വികസന കാര്യത്തിലും ഭരണവേഗതയിലും കേരളം കണ്ട ഏറ്റവും നല്ല ഭരണങ്ങളിൽ ഒന്നായിട്ട് പോലും പല കള്ളന്മാരുടേയും ഗോഡ്ഫാദറെന്ന റോളിലാണ് ചാണ്ടി ഏറെ തിളങ്ങിയത്. അതുകൊണ്ട് തന്നെ ഈ റിസൾട്ട്‌ ചാണ്ടിയുടെ കരണക്കുറ്റിക്ക് കേരള ജനത നല്കിയ പ്രഹരമാണ്. ജാതീയതയ്ക്കും മതദ്വേഷത്തിനുമെതിരെയുമുള്ള പോരാട്ടത്തിലൂടെ കേരളീയ സമൂഹത്തെ ഒരു സാംസ്കാരിക നവോത്ഥാനത്തിലേക്ക് പിടിച്ചുയർത്തിയ ശ്രീനാരായണ ദർശനത്തെതന്നെ ഭ്രാന്തമായ ജാതിമത വിഭജനത്തിന് ഉപയോഗിക്കാൻ ശ്രമിച്ച വെള്ളാപ്പള്ളിമാർക്കും ഈ തിരഞ്ഞെടുപ്പ് കനത്ത പ്രഹരം നല്കി.  കപട ആത്മീയതയുടെ കേരളത്തിലെ ഏറ്റവും വലിയ വ്യാപാരിക്കും ഈ തിരഞ്ഞെടുപ്പ് നല്കിയത് ജീവിതത്തിൽ ഒരിക്കലും മറക്കാനിടയില്ലാത്ത പ്രഹരം തന്നെയാണ്. ആ പ്രഹരത്തെക്കുറിച്ച് ചിലത് സൂചിപ്പിക്കാനാണ് ഈ കുറിപ്പ്.

May 11, 2016

മാധ്യമങ്ങളേ , നിങ്ങൾ മുക്കിയാൽ വാർത്ത മുങ്ങുമോ?

'പണം സംസാരിക്കുമ്പോൾ സത്യം മൗനം പാലിക്കും' എന്നൊരു ചൈനീസ് പഴമൊഴിയുണ്ട്. പ്രമുഖ ജ്വല്ലറി വ്യവസായി ബോബി ചെമ്മണ്ണൂരിനെതിരെ കഴിഞ്ഞ ദിവസം പുറത്തു വന്ന വിവാദ വീഡിയോ കേരളത്തിലെ മുഖ്യധാരാ മാധ്യമങ്ങൾ മുക്കിയ രീതി കാണുമ്പോൾ ഈ ചൈനീസ് പഴമൊഴി എത്രമാത്രം അർത്ഥവത്താണ് എന്ന് നമുക്ക് ബോധ്യപ്പെടും. നിരവധി സ്ത്രീകളെ പ്രേമം അഭിനയിച്ച് വശത്തിലാക്കി ലൈംഗിക വൈകൃതങ്ങൾക്ക് ഉപയോഗിച്ച ശേഷം വലിച്ചെറിയുന്നു എന്നാണ് ഒരു ഒളിക്യാമറ ദൃശ്യത്തിലൂടെ പീഡനത്തിനിരയായ യുവതി തന്നെ വെളിപ്പെടുത്തിയിരിക്കുന്നത്. ബോബിക്കെതിരെ നടപടിയാവശ്യപ്പെട്ട് മാസങ്ങൾക്ക് മുമ്പ് കേരള പോലീസിന് നല്കിയ പരാതിയോടൊപ്പമുള്ള വീഡിയോയാണ് വിവരാകാശ നിയമത്തിലൂടെ സംസ്ഥാന ഇന്റലിജന്‍സ് എഡിജിപി ഓഫിസില്‍ നിന്ന്  ലഭിച്ചതെന്നാണ് ഈ വാർത്ത പുറത്ത് വിട്ട വെബ്‌ പോർട്ടൽ പറയുന്നത്. "എത്ര പെൺകുട്ടികളെയാണ് നീ ചതിച്ചിരിക്കുന്നത്. ഞാനൊരനാഥയാണ്. എനിക്കൊരു അച്ഛനുണ്ടായിരുന്നെങ്കിൽ നീയിതെന്നോട് ചെയ്യുമായിരുന്നില്ല" എന്നൊക്കെ ആ പെൺകുട്ടി വീഡിയോയിൽ പറയുന്നുണ്ട്. "ഞാൻ ചാരിറ്റിയും നടത്തും, പെണ്ണ് പിടുത്തവും തുടരും. നാട്ടുകാർ അറിഞ്ഞാലും എനിക്കൊരു പ്രശ്നമല്ല" എന്നയാൾ ആ പെണ്ണിനോട് കയർക്കുന്നുമുണ്ട്. ആ ഫ്രാഡ് ചട്ടയും മുണ്ടും തന്നെയാണ് അപ്പോഴും വേഷം.