March 5, 2016

കനയ്യ ഒരു പ്രതീക്ഷയാണ്

കനയ്യ കുമാർ ഉയർത്തിയ ആസാദി മുദ്രാവാക്യം സംഘപരിവാർ ശക്തികളെ അസ്വസ്ഥരാക്കിയെങ്കിൽ അതിൽ ഒട്ടും പുതുമയില്ല, ആസാദി എന്ന പദത്തോട് ചരിത്രപരമായി തന്നെ ഈ ശക്തികൾക്ക് അലർജിയുണ്ട്. ബ്രിട്ടീഷുകാർക്കെതിരെ ഗാന്ധിജി ആസാദി മുദ്രാവാക്യം ഉയർത്തിയപ്പോൾ ബ്രിട്ടീഷുകാരേക്കാൾ അസ്വസ്ഥരായത് സംഘികളുടെ അപ്പൂപ്പന്മാരായിരുന്നു എന്നത് ചരിത്രമാണ്. ബ്രിട്ടീഷുകാരന്റെ കാലു പിടിച്ച് അവന് മാപ്പെഴുതിക്കൊടുത്ത് സുഖജീവിതം ഉറപ്പ് വരുത്തിയ പൂർവപിതാക്കളുടെ പാരമ്പര്യത്തിൽ നിന്നും 'ആസാദി' എന്നല്ല, മനുഷ്യവംശത്തിന്റെ മുന്നോട്ടുള്ള പ്രയാണത്തിന് ഗുണകരമാവുന്ന ഒരു തൂവൽക്കൊടി പോലും ജന്മം കൊള്ളില്ല. മറിച്ച് അവർ പകരം വെക്കുന്നത് ആസാദി എന്ന ചിന്തയുടെ അടിവേര് തോണ്ടുന്നതും മനുഷ്യ വംശത്തെ ജാതിയുടേയും മതത്തിന്റേയും പേരിൽ വിഭജിച്ചും കൊന്നും കൊലവിളി നടത്തുന്നതുമായ രക്തപങ്കിലമായ ഒരു ദേശീയതയതായിരിക്കും. ആസാദി നേടിത്തന്ന രാഷ്ട്രപിതാവിനെ വെടിവെച്ചു കൊന്ന പിശാചിന്റെ ചിത്രത്തിൽ പുഷ്പാർച്ചന നടത്തുന്നവർക്ക് കനയ്യ വിളിച്ച ആസാദിയുടെ അർത്ഥം മനസ്സിലായാലാണ് നാം ഞെട്ടേണ്ടത്.