July 28, 2009

ബെര്‍ളിച്ചായന് സ്നേഹത്തോടെ..

മലയാളത്തിലെ ബ്ലോഗെഴുത്തുകാരില്‍ പുള്ളിപ്പുലിയാണ് ബെര്‍ളി തോമസ്‌. മലയാള സിനിമയില്‍ മമ്മൂട്ടിയും മോഹന്‍ലാലും സുരേഷ് ഗോപിയും ദിലീപും ഷക്കീലയും എല്ലാം കൂടി ഒരാളായി മാറിയാല്‍ എന്താകുമോ അതാണ്‌ ബ്ലോഗില്‍ ബെര്‍ളി. ലക്ഷക്കണക്കിന് ഹിറ്റുകളാണ് ഈ ഒടുക്കത്തെ പഹയനു ഓരോ മാസവും ലഭിക്കുന്നത്. മൊത്തം ഹിറ്റുകള്‍ ഇപ്പോള്‍ ഒരു മില്യണ്‍ കവിഞ്ഞു. ബെര്‍ളി തോമസ് എന്ന് ഗൂഗിളില്‍ അടിച്ചാല്‍ 20 ലക്ഷ ത്തിനടുത്ത് റിസല്‍റ്റ്‌ കിട്ടും. (എം ടീ വാസുദേവന്‍ നായര്‍ എന്നടിച്ചപ്പോള്‍ കിട്ടിയത് 26,000!!!) ആള് പുലിയാണെന്ന് പ്രത്യേകം പറയേണ്ടല്ലോ., ബെര്‍ളിയുടെ ബ്ലോഗിന്റെ പോപുലാരിറ്റി തിരിച്ചറിഞ്ഞു മലയാളത്തിലെ പല പ്രസിദ്ധീകരണങളും പോസ്റ്റുകള്‍ പുനഃ പ്രസിദ്ധീകരിക്കാറുണ്ട്. ഇച്ചായന്‍ എഴുതിയ പൊളപ്പന്‍ പോസ്റ്റുകള്‍ കട്ടെടുത്തു സ്വന്തം പേരില്‍ കാച്ചുന്നവരും ഏറെയാണ്‌..

ബെര്‍ലിച്ച്ചായന് ഓശാന പാടുകയല്ല എന്റെ ഉദ്ദേശം. അതിയാന് അതിന്റെ ആവശ്യവുമില്ല. പക്ഷെ പുള്ളിക്കാരന്‍ ഇന്നലെ എന്റെ മേക്കെട്ട് കയറി. പരസ്യവിമര്‍ശനം എന്ന പേരില്‍ ഇന്നലെ ഇറങ്ങിയ പോസ്റ്റില്‍ ബെര്‍ളിയുടെ പ്രധാന ഇര ഞാനായിരുന്നു. കഴുതപ്പുലിക്ക് എള്ളുണ്ട കൊടുത്ത പോലെ അതിയാന്‍ എന്നെ കടിച്ചു തുപ്പി. ഇച്ചായനെ പ്രകോപിപ്പിച്ചത് എന്റെ ഒരു കമ്മന്റാണ്. ബെര്‍ളിയുടെ പോസ്റ്റുകള്‍ക്ക്‌ നടുവില്‍ മര്യാദക്ക് തുണിയുടുക്കാത്ത പെണ്ണുങ്ങളുടെ ചിത്രം തിരികി കേറ്റിയത് കണ്ടപ്പോള്‍ എന്റെ ധാര്‍മിക രോഷം ഹിമാലയം വരെ പൊങ്ങി. പിന്നെയും രോഷം മുകളിലോട്ടു പൊങ്ങുന്നത് കണ്ടപ്പോള്‍ വിനാശകാലെ ഞാനൊരു കമന്റടിച്ചു. അതിങ്ങനെ.. "എന്തോന്ന് പരസ്യമാണ് അച്ചായാ പോസ്റ്റിനു നടുവില്‍ തിരുകി കേറ്റുന്നത്‌.. നാല് ഡോളര്‍ കിട്ടാന്‍ ഇത്തരം കഞ്ഞിത്തരം കാട്ടണോ.. ?..”

ഇത്രയുമേ ഞാന്‍ പറഞ്ഞുള്ളൂ.. മണിക്കൂറ് 24 കഴിഞ്ഞില്ല.. ഹതാ വരുന്നു ഇച്ചായന്റെ ബ്രഹ്മാസ്ത്രം .. നിങ്ങളതൊന്ന് വായിക്ക്.. എന്നിട്ട് ബാക്കി പറയാം. അതിവിടെയുണ്ട്

കേരളത്തില്‍ രണ്ടേ രണ്ടു പേരെ ആരും വിമര്‍ശിക്കാന്‍ പാടില്ല. വിമര്‍ശിച്ചാല്‍ തീര്‍ന്നു അവന്റെ കഥ. ആ രണ്ടു പേര്‍ ആരെന്നു ഞാന്‍ പറയാതെ തന്നെ നിങ്ങള്‍ക്കറിയാം. ഒന്ന് അഴീക്കോടണ്ണന്‍, മറ്റേ പുള്ളി ഗൌരീ വല്ലഭന്‍ സാക്ഷാല്‍ പത്മനാഭന്‍.. ആ ജനുസ്സിലേക്ക് ഇപ്പോള്‍ ബെര്‍ലിച്ചായനും വന്നിരിക്കുന്നു. അച്ചായനെ തരം താഴ്താനല്ല ഞാനിത് പറയുന്നത്. എനിക്കുറപ്പാണ്, സാമൂഹ്യ വിമര്‍ശനത്തില്‍ ഈ രണ്ടു പേരെയും ബെര്‍ളി കടത്തി വെട്ടും. അത്രയ്ക്ക് മൂര്‍ച്ചയുണ്ട്‌ ആ പേനക്ക്. അനുഭവമാണല്ലോ ഏറ്റവും വലിയ ഗുരു.

തുണിയുടുക്കാത്ത പെണ്ണുങ്ങളെ കാണാനല്ല ഇച്ചായന്റെ ബ്ലോഗ്‌ തേടി ആളുകള്‍ എത്തുന്നത്‌. പൊതു പ്രശ്നങ്ങളില്‍ ഇച്ചായന്‍ ഉയര്‍ത്തുന്ന
കിടിലന്‍ കസര്‍ത്തുകള്‍ വായിക്കാനാണ്. ആളെ കിട്ടാത്ത ഏഴാം കൂലി ബ്ലോഗുകള്‍ക്ക് അത്തരം ചിത്രങ്ങള്‍ കാട്ടി ആളെ കൂട്ടാം. താങ്കള്‍ക്ക് അതിന്റെ ആവശ്യം ഇല്ല. ഇന്ത്യയിലെ ചേരികളെ ആര്‍ക്കാണ് പേടി എന്ന ഒരൊറ്റ എന്ട്രി മതി താങ്കളുടെ കാലിബര്‍ ( കയ്യിരുപ്പ് എന്ന് പച്ച മലയാളം ) അറിയാന്‍. അബ്ദുല്‍ കലാമിനെ ഷൂ അഴിപ്പിച്ച് പരിശോധിച്ച കോണ്ടിനെന്റല്‍കാരന്റെ പിടലിക്കിട്ടു ഇച്ചായന്‍ കൊട്ടിയ കൊട്ടിന്റെ കറക്കം - മുസ്ലിം മെഗാ റിയാലിറ്റി ഷോ ഇനിയും വിട്ടു മാറിയിട്ടുണ്ടാവില്ല. ഷൂവല്ല കോണകം അഴിപ്പിചാലും സായിപ്പിനോട്‌ കമാന്ന് ഒരക്ഷരം മിണ്ടാന്‍ വയ്യാത്ത പരുവത്തിലാണ് നമ്മുടെ സര്‍ദാര്‍ജിയും സോണിയാജിയും. അറ്റ്‌ ലീസ്റ്റ്, നമ്മള്‍ മലയാളികളില്‍ പലരുടെയും രോഷം അല്പമെങ്കിലും ശമിച്ചത് ഇച്ചായന്‍ ബ്ലോഗിയപ്പോളാണ്.

പിന്നെ കാശിന്റെ കാര്യം. മീഡിയയില്‍ വര്‍ക്ക്‌ ചെയ്യുന്നു എന്ന് നെറ്റിയില്‍ തന്നെ അങ്ങ് ഒട്ടിച്ചു വെച്ചിട്ടുണ്ടല്ലോ. അവരൊന്നും കാശ് തരുന്നില്ലേ. സിണ്ടിക്കേറ്റുകാരൊക്കെ നല്ല കാശ് കൊടുക്കുന്നുണ്ട് എന്നാണല്ലോ കേട്ട് കേള്‍വി, അതോ കാശ് കിട്ടാത്ത വല്ല അലമ്പ് പത്രത്തിലുമാണോ ഇച്ചായന്റെ ജോലി. ശമ്പളം 'ലച്ചം' കിട്ടിയാലും അച്ചായന്മാര്‍ക്ക് കാശിനു കൊതി തീരില്ല എന്നറിയാം. എന്നാലും ഇങ്ങനെ കാശുണ്ടാക്കണോ.. ഇനി പരസ്യം കൊടുത്തെ തീരൂ എന്നാണെങ്കില്‍ ആയിക്കോളൂ. ഇമ്മാതിരി ചൂടന്‍ പരസ്യങ്ങള്‍ തന്നെ വേണോ
ഇച്ചായാ... ഗൂഗിളുകാരനോട് പറഞ്ഞാല്‍ നാലാള്‍ക്കു കാണാന്‍ പറ്റിയ പരസ്യം തന്നെ അവര്‍ ഇട്ടു തരുമല്ലോ. ഇച്ചായന്റെ ബ്ലോഗ്‌ വായിക്കാന്‍ ഞാന്‍ പലരോടും ശുപാര്‍ശ ചെയ്തിന്ട്ടുണ്ട്. ഇമ്മാതിരി അലമ്പ് പരസ്യങ്ങള്‍ കാണുമ്പോള്‍ അവരൊക്കെ എന്ത് കരുതും. മസാല പരസ്യങ്ങളില്‍ ഇക്കിളിപ്പെടുന്ന വായനക്കാര്‍ മാത്രം ഇച്ചായന് മതിയെങ്കില്‍ കുമാരനാശാന്‍ പാടിയ പോലെ "ഹാ, പുഷ്പമേ, അധികതുംഗപദത്തിലെത്ര ശോഭിച്ചിരുന്നിതൊരു രാജ്ഞി കണക്കയേ നീ.. ശ്രീ ഭൂവിലസ്ഥിര-അസംശയ-മിന്നു നിന്റെ- യാഭൂതിയെങ്ങു പുനരെങ്ങു കിടപ്പിതോര്താല്‍? .. " എന്ന് പാടാനേ കഴിയൂ. (ഇതിന്റെ അര്‍ത്ഥം പൂര്‍ണമായി എനിക്കും പിടി കിട്ടിയിട്ടില്ല. അല്പം സാഹിത്യം എഴുതിയില്ലെങ്കില്‍ കണ്ട്രിയായികരുതുമല്ലോ എന്ന് കരുതിയാണ് ആശാന്റെ നെഞ്ചത്ത് കേറിയുള്ള ഈ കളി, ക്ഷമി.. )

ഇതിനൊക്കെ പൊളപ്പന്‍ മറുപടി ഇച്ചായന്റെ കയ്യില്‍ കാണുമെന്നറിയാം. അതിങ്ങു പോരട്ടെ.. ഞാനീ ഗീര്‍വാണ പ്രസംഗം നടത്തുന്നതിന്റെ പിന്നിലുള്ളത് ഇച്ചായന്റെ മറവില്‍ അല്പം പോപുലാരിറ്റി എനിക്കും കിട്ടട്ടെ എന്ന ദുഷ്ടലാക്കാണ്. എലിസബത്ത് രാജ്ഞിക്ക് കോളോത്ത് കിട്ടുണ്ണിയുടെ മറുപടി എന്ന മട്ടില്‍ ഇതിനെ കണ്ടാല്‍ മതി. ഇതിനു ബെര്‍ളിച്ചായന്‍ ഒരു മറുപടി പോസ്റ്റു കൂടെ അങ്ങ് കാച്ചിയാല്‍ നൂറല്ല നൂറ്റിയൊന്ന് ഡോളര്‍ ഞാന്‍ തരും.
തുടരും ..

July 20, 2009

കോംപ്ലാന്‍ കൊടുക്കാന്‍ മറക്കല്ലേ..

കോംപ്ലാന്‍ സ്ഥിരമായി കുടിക്കുന്ന കുട്ടികള്‍ക്ക് ഇരട്ടി വളര്‍ച്ചയാണ്.

ഈയിടെ നടത്തിയ ഒരു 'പരീച്ചണത്തില്‍' തെളിഞ്ഞത് കോംപ്ലാന്‍ കുടിക്കുന്ന കുട്ടികള്‍ ഒരു വര്‍ഷത്തിനിടയില്‍ 60 mm ഉയരം വെച്ചപ്പോള്‍ അത് കുടിക്കാത്ത കുട്ടികള്‍ വെറും 30 mm മാത്രമാണ് ഉയരം കൂടിയത് എന്നത്രേ ... (ഇത് ഏത് കൂതറ 'സാസ്ത്രച്ച്ചന്‍' നടത്തിയ പരീക്ഷണമാണ് എന്ന് ചോദിക്കരുത്, ഏഷ്യാനെറ്റില്‍ കണ്ട പരസ്യമാണ്).

ഇന്നത്തെ പല കുള്ളന്മാരും അങ്ങനെ ആയിപ്പോയത് ചെറുപ്പകാലത്ത് കോംപ്ലാന്‍ കിട്ടാതിരുന്നതിന്റെ ഫലമായിട്ടാട്ടാണെന്ന് ഈ സാസ്ത്രച്ച്ചന്മാര്‍ കണ്ടെത്തിയിട്ടുണ്ട്. ശ്ശോ.. ഈ കോംപ്ലാന്‍ ഇല്ലായിരുന്നുവെങ്കില്‍ എന്താകുമായിരുന്നു അവസ്ഥ?. ആലോചിച്ചിട്ട് തല കറക്കം വരുന്നു. ഡോബര്‍മാന്‍ പോലെ തലയുയര്‍ത്തി നില്‍ക്കുന്ന നമ്മുടെ കുട്ടികള്‍ കൊടിച്ചിപ്പട്ടികളെപ്പോലെ ചുരുണ്ടുണങ്ങുമായിരുന്നു .

കുട്ടിക്കാലത്ത് അമിതാബ് ബച്ചന് രണ്ടു 'ഗപ്പ് ഗോംപ്ലാന്‍' കൊടുക്കാന്‍ അമ്മക്ക് തോന്നിയത് കൊണ്ട് രക്ഷപ്പെട്ടു. അല്ലെങ്കില്‍ ആമിര്‍ഖാനെപ്പോലെ ബച്ചനും കുള്ളനായേനെ. ബച്ചന്റെ അമ്മ കാണിച്ച ആ വിവേകം എ കെ ആന്റണിയുടെ അമ്മക്ക് ഉണ്ടായിരുന്നെങ്കില്‍ പരേഡിന് സല്യൂട്ട് അടിക്കാന്‍ അദ്ദേഹമിങ്ങനെ കഷ്ടപ്പെടേണ്ടതില്ലായിരുന്നു. മന്ത്രി പോകുന്നിടത്തൊക്കെ വിക്ടറി സ്ടാന്ടുമായി നടക്കേണ്ട ഗതികേട് ഇന്ത്യന്‍ സൈന്യത്തിനും വരില്ലായിരുന്നു.

സോണിയ ഗാന്ധി പ്രിയങ്കക്ക് വേണ്ടത്ര കോംപ്ലാന്‍ കൊടുത്തപ്പോള്‍ രാഹുലിന്റെ കാര്യത്തില്‍ അല്പം പിശുക്കി. കേരള രാഷ്ട്രീയത്തില്‍ നന്നായി കോംപ്ലാന്‍ കുടിച്ചയാള്‍ തലേക്കുന്നില്‍ ബഷീറാണ്. തലവര നന്നായില്ല എന്ന ഒരു ദോഷമേ അദ്ദേഹത്തിനുള്ളൂ .


കുട്ടിക്കാലത്ത് ഇച്ചിരി കോംപ്ലാന്‍ കിട്ടിയത് കൊണ്ട് ഈ എണ്‍പത്തിയാറാം വയസ്സിലും അച്ചുമാമന്‍ തലയുയര്‍ത്തി നെഞ്ച് വിരിച്ച് നടക്കുന്നു. ആ ഭാഗ്യം കിട്ടാത്ത പാവം പിണറായിയണ്ണന്‍ തലയും താഴ്ത്തി കുനിഞ്ഞു നടക്കുന്നു. ചുമലില്‍ അരിച്ചാക്കു കേറ്റിയ പോലുള്ള ആ നടത്തത്തിന്റെ പിന്നിലെ യഥാര്‍ത്ഥ വില്ലന്‍ കോംപ്ലാന്‍ ആണെന്നത് എത്ര പേര്‍ക്ക് അറിയാം?

ഇങ്ങനെ കുള്ളന്‍മാരുടെയും 'നീളന്‍മാരുടെയും' ജീവിക്കുന്ന ഉദാഹരണങ്ങള്‍ നമുക്ക് മുന്നില്‍ വേണ്ടത്രയുള്ളപ്പോള്‍ കോംപ്ലാന്‍ കാര്യത്തില്‍ വിട്ടുവീഴ്ച ചെയ്യുന്നത് കുട്ടികളോട് കാണിക്കുന്ന കൊടും ചതിയായിരിക്കും.

മാത്രമല്ല ഒരു വര്ഷം കോംപ്ലാന്‍ കൊടുത്താല്‍ ഇത്രയും ഉയരും വെക്കുമെങ്കില്‍ പത്തു വര്ഷം തുടര്‍ച്ചയായി കൊടുത്താലുള്ള സ്ഥിതിയെന്താവും ? ചമ്പതെങ്ങ് പോലെ നമ്മുടെ പുള്ളാര് വളരുന്നത് കണ്ടു മനം കുളിര്‍ക്കാം. മറ്റൊരു ഗുണവുമുണ്ട്.. ഉയരക്കൂടുതല്‍ കാട്ടി കണ്ട അലവലാതികളൊക്കെ ഗിന്നസ്‌ ബുക്കില്‍ കയറുന്നത് തടയാനും സാധിക്കും ..

കോംപ്ലാന്‍ കൊടുക്കാന്‍ മറക്കല്ലേ.

July 19, 2009

ഈ അനീതി ഞങ്ങള്‍ പൊറുക്കില്ല..

എല്ലാ ബ്ലോഗിലും മഴയുടെ ചിത്രങ്ങളാണ്. ടീവീയിലും പത്രങ്ങളിലും മഴക്കെടുതികളും. വള്ളിക്കുന്നിലും മഴ പെയ്യുന്നുണ്ട്. പക്ഷെ ഒരു പത്രക്കാരനും അങ്ങോട്ട്‌ തിരിഞ്ഞു നോക്കുന്നില്ല. അവിടുത്തെ ഫോട്ടോ കൊടുക്കുന്നുമില്ല. ഇതില്‍ ഞങള്‍ക്ക് അതിയായ പ്രതിഷേധമുണ്ട്. കുത്തൊഴുക്കില്‍ ആരും മരിച്ചിട്ടില്ല എന്നത് ശരി തന്നെ. അത് ഞങളുടെ കുറ്റമാണോ?. പക്ഷെ എത്ര പേര്‍ക്ക് പനി പിടിച്ചു. വയറിളക്കം വന്നവര്‍ക്ക് കണക്കില്ല. കുറെ പേര്‍ ചളി വെള്ളത്തില്‍ കാല്‍ വഴുതി വീണു. അതിലൊരാള്‍ ഇപ്പോഴും ആശുപത്രിയിലാണ്. ഇതിലേതെങ്കിലും ഒന്ന് വാര്‍ത്തയായി കൊടുത്തു കൂടെ.

 ഇത് കുഞ്ഞിരാരുവിന്റെ ചായക്കട. എല്ലാം വെള്ളത്തിലായി.. ഇനി ഈ പഴക്കുല മാത്രം ബാക്കി.

 ഇത് അരിയല്ലൂര്‍ അങ്ങാടി. ഇങ്ങനെയായാല്‍ ഇവിടെ എന്ത് കച്ചവടം നടക്കാനാ.

 കപ്പെക്കാട് റോഡിന്റെ അവസ്ഥയാണിത്‌. കാല്‍ നനയാതെ ഒരടി നടക്കാന്‍ പറ്റുമോ?.
 ഇത് കൊങ്ങന്‍ ബസാറിലെ സ്രാമ്പ്യ. എങ്ങനെ കയറും ഉള്ളിലോട്ട് ..
 വള്ളിക്കുന്നിലെ തെങ്ങിന്‍ തൈകളൊക്കെ ഇത് പോലെ വെള്ളത്തിലായി.
ഇനി പറയൂ, ഇതിലൊന്നും വാര്‍ത്തക്ക് പറ്റിയ കോപ്പില്ലേ.. അപമാനിക്കുന്നതിനും ഒരു പരിധിയുണ്ട്.

July 11, 2009

ദേശാടനപക്ഷികളുടെ ഇഷ്ടഗ്രാമം.

ടൂറിസ്റ്റുകള്‍ക്ക് കറങ്ങാന്‍ ഇന്ത്യയില്‍ വേണ്ടത്ര വകയുണ്ട്. നോര്‍ത്തില്‍ താജ്‌ മഹലും കൈലാസവും. ഈസ്റ്റില്‍ കല്‍കട്ടയും ദാര്‍ജിലിങ്ങും. വെസ്റ്റില്‍ മുംബൈയും ഗോവയും. സൌത്ത് ഇന്ത്യയില്‍ ഇതാ ഞങ്ങളുടെ ഈ പ്രിയപ്പെട്ട ഗ്രാമവും.. അത് കുറച്ചു കടന്നു പോയില്ലേ എന്നാവും. ഇല്ല. അതിശയോക്തി ഒട്ടുമില്ലാത്ത ഒരു സത്യപ്രസ്താവമാണിത്.

July 7, 2009

വെറും 13 ലക്ഷം കൊണ്ട് എന്താകാനാ ?










13 ലക്ഷം സേവിങ്ങ്സ്‌ അക്കൌണ്ടില്‍ ഇട്ട് വീണ്ടും യാചിക്കാന്‍ ഇറങ്ങിയ ഒരു വിദ്വാനെ നാട്ടുകാര്‍ പിടിച്ചു പോലീസില്‍ ഏല്പിച്ചു. ഇന്നത്തെ മനോരമയിലെ വാര്‍ത്തയാണ്. കോടിക്കണക്കിന് രൂപയുടെ ആസ്തി ഉണ്ടായാലും 'വോട്ടറുടെ' കീശയില്‍ കയ്യിട്ട് ജീവിക്കുന്ന മുഖ്യധാരാ നേതാക്കന്മാരെയും ഇത് പോലെ പിടിച്ചു പോലീസില്‍ ഏല്പിക്കാന്‍ ആളുണ്ടായിരുന്നെങ്കില്‍..

July 1, 2009

ഇന്ത്യക്കാര്‍ക്ക് അറ്റാക്ക്‌ വരുത്തല്ലേ, പ്ലീസ്

അങ്ങിനെ ലിബര്‍ഹാന്‍ കമ്മീഷന്‍ ആ റിപ്പോര്‍ട്ട്‌ പുറത്തു വിട്ടു. 17 കൊല്ലമായി കക്ഷി അന്വേഷിക്കുകയായിരുന്നുവത്രേ ബാബറി മസ്ജിദ് പൊളിച്ചത് ആരാണെന്ന്. !!! പാര്‍ട്ടി പതാകകളുമേന്തി മസ്ജിദിന്റെ താഴികക്കുടത്തില്‍ കയറി കര്‍സേവകര്‍ കല്ലുകളോരോന്നായി പൊളിച്ചിടുന്നത് ടീവീയില്‍ ലൈവായി കണ്ടവരാണ് നാം. പള്ളി പൊളിക്കാന്‍ വേണ്ടി സോമനാഥ് മുതല്‍ അയോധ്യ വരെ ഒരു വിദ്വാന്‍ രഥയാത്ര നടത്തിയതും ലൈവായി തന്നെയായിരുന്നു.
ചുരുക്കത്തില്‍ നാട്ടുകാര്‍കൊക്കെ പച്ച വെള്ളം പോലെ അറിയാവുന്ന ഒരു കാര്യം കണ്ടു പിടിക്കാന്‍ കൊല്ലം 17 തുലച്ച ഇതിയാന്റെ തല മാഡം തുസ്സാഡിന്റെ മ്യൂസിയത്തില്‍ മെഴുക് പുരട്ടാതെ വെക്കണം. നാല് മാസത്തിനുള്ളില്‍ റിപ്പോര്‍ട്ട്‌ നല്‍കണം എന്ന് പറഞ്ഞാണത്രെ സര്‍ക്കാര്‍ കക്ഷിക്ക് പണി കൊടുത്തത്. 17 കൊല്ലം ചുരണ്ടി എഴുതിയ ഈ റിപ്പോര്‍ട്ടില്‍ എന്താനുള്ളതെന്നു സര്‍ക്കാര്‍ എത്രയും പെട്ടെന്ന് പുറത്തു വിടണം . അല്ലാത്ത പക്ഷം അതിനുള്ളില്‍ എന്താനുള്ളതെന്നു അറിയാനുള്ള ആകാംക്ഷയാല്‍ ഇന്ത്യക്കാരൊക്കെ അറ്റാക്ക്‌ വന്നു ചത്ത്‌ പോകും.. പറഞ്ഞില്ലാന്നു വേണ്ട..