March 26, 2009

കോട്ടയത്തുകാര്‍ വളരെ ഡീസന്റാ ..

അവര്‍ വളച്ച് കെട്ടില്ലാതെ കാര്യം പറയും. ഒരു തിരെഞ്ഞെടുപ്പ് ആകുമ്പോള്‍ ഇങ്ങനെയൊക്കെ കാണുമായിരിക്കും അല്ലെ.. ജനാധിപത്യം നീണാള്‍ വാഴട്ടെ
(Click the photo to read the board)

March 21, 2009

മമ്മൂട്ടിയും, സുരേഷ് ഗോപിയും പിന്നെ ജിദ്ദ മലയാളികളും.

മമ്മൂട്ടിയെയും സുരേഷ് ഗോപിയെയും കാണാന്‍ സൗദിയിലെ ജിദ്ദ ശറഫിയയില്‍ ഇന്നലെ തടിച്ചു കൂടിയവരാണിത്. ഒരു സ്വകാര്യ ആശുപത്രിയുടെ ഉദ്ഘാടനത്തിന് ഇരുവരും എത്തുമെന്ന് സംഘാടകര്‍ അവകാശപ്പെട്ടിരുന്നെങ്കിലും മമ്മൂട്ടി വന്നില്ല. സുരേഷ് ഗോപിയെ ഒരു നോക്ക് കണ്ടു ജനം സായൂജ്യ മടഞ്ഞു. . തിക്കിലും തള്ളിലും ആശുപത്രിയുടെ കവാടം പൊട്ടിച്ചിതറി..

സൗദി പോലീസുകാരുടേയും അറബികളായ അതിഥികളുടെയും കണ്ണ് തള്ളിപ്പോയി. ഇവിടെ ഇങ്ങനെയൊന്നും പതിവില്ലാത്തതാണ്..

ജനം ഇങ്ങനെ ആര്‍ത്തിരമ്പണമെങ്കില്‍ വന്നയാള്‍ ചില്ലറക്കാരനല്ല എന്ന് അവര്‍ക്കും തോന്നിക്കാണണം. സുരേഷ് ഗോപിയോടൊപ്പം ഫോട്ടോ എടുക്കാന്‍ അവരും മത്സരിക്കുന്നത് കാണാമായിരുന്നു. താടി വെച്ച ഒരു അറബി സുരേഷ് ഗോപിയുടെ കൈ പിടിച്ചു ലോകം കീഴടക്കിയ മട്ടില്‍ ഫോട്ടോയ്ക്ക്‌ പോസ് ചെയ്തു.. പെണ്‍കുട്ടികളോടൊപ്പം ആടുകയും പാടുകയുമൊക്കെ ചെയ്യുന്ന ഒരു സിനിമാക്കാരനാണ് ഇയാള്‍ എന്ന് ആ പാവം അറിഞ്ഞുകാണില്ല എന്നുറപ്പ്.
 
 പറഞ്ഞു വരുന്ന കാര്യമതല്ല.. ജിദ്ദയില്‍ പലരും വന്നിട്ടുണ്ട്. രാഷ്ട്രീയ നേതാക്കള്‍ , സാംസ്കാരിക നായകര്‍ , മത പണ്ഡിതന്മാര്‍ , അങ്ങനെ പലരും. പക്ഷെ ഇതുപോലൊരു ജനക്കൂട്ടം ഇതാദ്യമാണ്. താരങ്ങളുടെ ഒരു 'വെല' നോക്കണേ..
 
മ്യാവൂ : സിനിമാക്കാര്‍ വരുന്നിടത്ത് പത്രപ്രവര്‍ത്തകന്‍ എന്ന ലേബലില്‍ 'പോട്ടം' പിടിക്കാന്‍ നിങ്ങളും പോയല്ലോ..? അത് പിന്നെ.. മമ്മൂട്ടിയൊക്കെ വരുമെന്ന് പറഞ്ഞാല്‍ .

March 17, 2009

ഇറച്ചി കുറഞ്ഞു, കല്യാണ പന്തലില്‍ കൂട്ടത്തല്ല്.

മുഹൂര്‍ത്ത നേരത്ത് വധുവും വരനും ഒളിച്ചോടി (എന്തിനാണാവോ.. ?), കല്യാണ പന്തലില്‍ ആദ്യഭാര്യ നിരാഹാരമിരുന്നു (മക്കള്‍ ഭക്ഷണം കഴിച്ചു, അവര്‍ക്കെന്തൂന്നു നിരാഹാരം !!) , വധു വരനെ ചെരുപ്പ് കൊണ്ടടിച്ചു (ഉലക്ക കൊണ്ട് അടിച്ചില്ലല്ലോ, കാറ്റ് പോയേനെ) , വരന്‍ വധുവിന്റെ തലക്കിട്ടു കിഴുക്കി (that is hardly news anymore!!), റജിസ്ടാര്‍ ആപ്പീസര്‍ പെണ്ണുമായി മുങ്ങി (വരന്‍ ബോധംകെട്ട് വീണു എന്ന് പ്രത്യേകം പറയേണ്ടല്ലോ), വധുവിന്റെ വീട്ടുകാര്‍ ചെമ്പ് മോഷ്ടിച്ചു .. . തുടങ്ങി കാക്കതൊള്ളായിരം കല്യാണ വാര്‍ത്തകള്‍ നാം കേട്ടിട്ടുണ്ട്.. ആ ജനുസ്സിലേക്ക് ഇതാ ഇത് കൂടി കിടക്കട്ടെ.. (ദേശാഭിമാനിയില്‍ വന്നത്.. തിയ്യതി കാണുന്നില്ല, ഒരു സുഹൃത്ത്‌ ഈമെയിലില്‍ അയച്ചു തന്നതാ.. ഒറിജിനലാണോ എന്തോ..)

March 8, 2009

ലാലൂ, കൊട് കൈ ..





................ തീവണ്ടി കാണാത്തവരല്ല വള്ളിക്കുന്നുകാര്‍, പിന്നെ എന്തോന്നിത്, ചക്കയില്‍ ഈച്ച പൊതിഞ്ഞത് പോലെ എന്ന് ചോദിച്ചേക്കാം. കാര്യമുണ്ട്. വള്ളിക്കുന്ന് എത്തുമ്പോള്‍ 'പോടാ പുല്ലേ ' എന്ന് പറഞ്ഞു നിര്‍ത്താതെ പോയിരുന്ന ഒരു വിദ്വാനുണ്ട്‌. എക്സിക്യൂട്ടീവ് എക്സ്പ്രസ്. നമ്മുടെ ഇ അഹമ്മദ് പറഞ്ഞത് പ്രകാരം ലാലു ഈ വിദ്വാനു വള്ളിക്കുന്നില്‍ ഒരു സ്റ്റോപ്പ് നല്‍കി. ഇനി മുതല്‍ ഇവിടെ നിര്‍ത്തി ആളെ കയറ്റിയിട്ടേ കക്ഷി പോകൂ. സ്റ്റോപ്പ് അനുവദിച്ച ശേഷം ആദ്യമായെത്തിയ വണ്ടിയെ സ്വീകരിക്കുകയാണ് നാട്ടുകാര്‍.
( റെയില്‍വേക്ക് വള്ളിക്കുന്നിനോട് പിണക്കമാണ് എന്നെഴുതി മുമ്പ്‌ കാച്ചിയ പോസ്റ്റ് ഞാന്‍ പിന്‍വലിച്ചിരിക്കുന്നു ) ലാലു പ്രസാദ് കീ, ജയ്.. ഇ അഹമ്മദ് കീ, ജയ്.. ഇന്ത്യന്‍ റെയില്‍വേ കീ .. ജയ്..


March 3, 2009

പത്താം തരത്തിലെ ലൈവ് ഷോ

കണ്ടറിഞ്ഞത് .. കൊണ്ടറിഞ്ഞത്.. (1)

വള്ളിക്കുന്ന് സി ബി ഹൈസ്കൂള്‍ .. പത്താം തരം എ ഡിവിഷനില്‍ ക്ലാസ് എടുത്തു കൊണ്ടിരിക്കുകയാണ് ഞാന്‍.. പുതുതായി വന്ന അധ്യാപകന്‍ എന്ന നിലക്കുള്ള സകല ആരംഭ ശൂരത്വവും ഉണ്ടായിരുന്നു എന്ന് പ്രത്യേകം പറയേണ്ടതില്ലല്ലോ.. നോട്ട് കൊടുക്കുന്നു, ബോര്‍ഡില്‍ എഴുതുന്നു, ചോദ്യം ചോദിക്കുന്നു, ചിലര്‍ക്ക് അടി കിട്ടുന്നു.. 'തിരോന്തരം' ഭാഷയില്‍ പറഞ്ഞാല്‍ നല്ല പൊളപ്പന്‍ ക്ലാസ്.. .

അമ്പതോളം കുട്ടികളില്‍ പകുതിയിലേറെയും പെണ്‍ കുട്ടികളാണ്. കല്യാണം കഴിക്കാത്ത പുതിയ അദ്ധ്യാപകന്‍ ആയതിനാല്‍ മുതിര്‍ന്ന ക്ലാസ്സുകളില്‍ അല്പം ഗൌരവത്തോടെ ഇരിക്കണമെന്ന് ഹെഡ് മാസ്റ്റര്‍ നേരത്തെ പറഞ്ഞിട്ടുണ്ട്. കുട്ടികളോട് കൊഞ്ചാനും കുഴയാനും പാടില്ല, സ്ട്രിക്ട് ആയിരിക്കണം. അല്ല്ലെങ്കില്‍ പെണ്‍ പിള്ളേര്‍ തലയില്‍ മാത്രമല്ല, പലയിടത്തും കയറും.. ആണ്‍ പിള്ളേര്‍ ആണെങ്കില്‍ പിന്നെ പറയുകയും വേണ്ട, മൂക്ക് കൊണ്ട് ക്ഷ്ഷ വരപ്പിക്കും .. ഇത്യാദി ഉപദേശങ്ങളൊക്കെ ചെവി കൊണ്ട് നീങ്ങിയതിനാല്‍ തുടക്കത്തിലെ തന്നെ കുട്ടികളെ 'അണ്ടര്‍ കണ്‍ട്രോള്‍' ആക്കാന്‍ എനിക്കായിരുന്നു.

അപ്പോള്‍ പറഞ്ഞു വന്നത് .. എന്റെ ക്ലാസ് പൊടി പൊടിച്ചു കൊണ്ടിരിക്കുന്നു. ചില ചോദ്യങ്ങള്‍ എഴുതാന്‍ കൊടുത്തു ഞാന്‍ മേശപ്പുറത്ത് ഇരുന്നതേയുള്ളൂ , മുന്‍ ബെഞ്ചില്‍ ഇരിക്കുന്ന ഒരു വിദ്വാന്‍ എഴുന്നേറ്റ് എന്റടുത്ത് വന്നു.

ഹും .. എന്താടാ .. ഉത്തരം കിട്ടുന്നില്ലേ..
അതല്ല സാര്‍
ങും.. .. പിന്നെ.. ?
പയ്യന്‍സ് ഒന്നും മിണ്ടുന്നില്ല..
എനിക്ക് കലി കയറി..
ഇളിക്കാതെ കാര്യം പറയെടാ.

അവനു വീണ്ടും മൌനം. നല്ല പോലെ പഠിക്കുന്ന പയ്യനായതിനാല്‍ അടിക്കാന്‍ തോന്നുന്നില്ല, വടി
എന്റെ കയ്യില്‍ കിടന്നു വിറച്ചു. മുഖം തക്കാളി പോലെ ചുവന്നു വന്നു.
സാര്‍,, ങ്ങ് .. ങും..
അവന്‍ പിറകിലെ കുട്ടികളെ നോക്കുന്നു.. വാക്കുകള്‍ ഇടറുന്നു..
എനിക്കെന്തോ പന്തികേട്‌ തോന്നി.. പയ്യന് കക്കൂസില്‍ പോകാന്‍ എങ്ങാനും ഉണ്ടോ.. പറയാന്‍ മടി ആയതിനാലാവണം.
ഞാന്‍ അവന്റെ ചെവിയില്‍ ചോദിച്ചു..
തൂറാന്‍ മുട്ടുന്നുണ്ടോടാ ..?
അതല്ല സര്‍,
പിന്നെ.. ?
അത് .. അത്.. സാറ് പാന്റിന്റെ സിബ്ബിട്ടിട്ടില്ല ..

രാംജിറാവുവില്‍ ഇന്നസെന്റ് നോക്കുന്ന പോലെ ഞാന്‍ കീഴോട്ടു നോക്കി. ഷര്‍ട്ട് ഇന്‍സൈഡ് ചെയ്യാത്തതിനാല്‍ പെട്ടെന്ന് പുറത്ത് കാണുന്നില്ല.

അവനോടു ഇരിക്കാന്‍ പറഞ്ഞു വളിച്ച ചിരിയുമായി ഞാന്‍ ഒരുവിധം പുറത്തിറങ്ങി.. നോക്കുമ്പോള്‍ സംഗതി ശരിയാണ്.. സിബ്ബ് വാ പൊളിച്ചു നില്‍ക്കുകയാണ്‌.. ജട്ടി പുറത്ത് കാണുന്നുണ്ട്. പകുതി ആശ്വാസമായി.. ജട്ടി ഇടാന്‍ മറന്നിട്ടില്ലല്ലോ..

ഇത് നാലാമത്തെ പിരിയഡാണ്. അതില്‍ രണ്ടു പിരിയഡും ഞാന്‍ ക്ലാസ് എടുത്തിട്ടുണ്ട്. കഴിഞ്ഞ പിരിയഡില്‍ ഒമ്പത് സി യിലെ ചില പെണ്‍പിള്ളേര്‍ ഞാന്‍ ടേബിളില്‍ കാല്‍ കയറ്റി ഇരുന്നപ്പോള്‍ അടക്കി ചിരിക്കുന്നത് കണ്ടിരുന്നു. പിള്ളേരല്ലേ, വല്ല തമാശയും പറഞ്ഞു കാണും എന്ന് കരുതി.. ഇപ്പോഴാണ് അതിന്റെ ഗുട്ടന്‍സ് പിടി കിട്ടിയത്.. ഛെ.. നാറ്റക്കേസായി..

ആ പയ്യനോട് എന്തെന്നില്ലാത്ത ആദരവ്‌ തോന്നി. കുട്ടികള്‍ ആരായിരുന്നാലും ഇങ്ങനെ ഒരു സന്ദര്‍ഭം കിട്ടിയാല്‍ അത് ഉപയോഗപ്പെടുത്തുന്നതാണ്. കണിശക്കാരനായ അധ്യാപകന്‍ ആണെങ്കില്‍ പ്രത്യേകിച്ചും.. അധ്യാപകരെ കളിയാക്കാന്‍ കിട്ടിയിരുന്ന ഒരവസരവും പാഴാക്കാതിരുന്ന എന്റെ പഠന കാലം ഞാന്‍ ഓര്‍ത്തു. . പല സംഭവങ്ങളും മനസ്സിലൂടെ ഓടി മറഞ്ഞു.
പൊട്ടിച്ചിരിയുടെ ഒരു ലൈവ് ഷോയാണ് എന്റെ അഭിമാനം സംരക്ഷിക്കാനായി അവന്‍ വേണ്ടെന്നു വെച്ചത്.. 'സംഗതി' കണ്ട ഉടനെ എന്റടുത്ത് വന്നു അത് പറയാന്‍ കാണിച്ച മനസ്സ് .. അതും മറ്റു കുട്ടികള്‍ അറിയാതെ എന്റെ കാതില്‍..

വര്‍ഷങ്ങള്‍ പതിനഞ്ചു കഴിഞ്ഞെങ്കിലും മുന്നില്‍ പരുങ്ങലോടെ വന്നു നിന്ന ആ കുട്ടിയുടെ മുഖം ഇന്നും മനസ്സിലുണ്ട് .
ഞാന്‍ ശിഷ്യനും അവന്‍ ഗുരുനാഥനുമായ നിമിഷങ്ങള്‍.. അവന്‍ ഇപ്പോള്‍ എവിടെയാണാവോ ?..